ШӖМ тунӑ сӑн

Шӑматкун, пуш уйӑхӗн 23-мӗшӗнче, Шупашкар районӗнчи Карачура ҫывӑхӗнче шкул автобусӗ аварие лекнӗ. Ҫав самантра салонра 19 ача пулнӑ.

Юрать, ЧР ШӖМӗн пресс-служби пӗлтернӗ тӑрӑх, пур пассажир та хӑрушсӑрлӑх пиҫҫиххипе ҫыхӑннӑ пулнӑ, аварире никам та аманман.

Малтанлӑха пӗлтернӗ тӑрӑх, светофор умӗнче шкул автобусӗн 56 ҫулти водителӗ тимлӗхне ҫухатнӑ та малта пыракан «Шкодӑна» пырса тӑрӑннӑ. Икӗ транспорт та кӑштах сиенленнӗ. Патшалӑх автоинспекцийӗн ӗҫченӗсем авари пирки хут ҫине ҫырнӑ хыҫҫӑн автобус малалла кайнӑ. Вӑл Йӗпреҫ поселокӗнчен Шупашкара кайма тухнӑ пулнӑ.

Йӗпреҫ районӗнчи Тымар поселокӗнче пурӑнакан 48 ҫулти арҫын саккуна пӑсса Мускава тухса кайнӑ. 2017 ҫулта ун тӗлӗшпе 8 ҫуллӑха административлӑ надзор йышӑннӑ. Вӑл унччен преступлени тунӑ пулнӑ, ӑна тӗрмене хупнӑ.

Анчах йӗплӗ пралук леш енчен тухсан, 2018 ҫулхи чӳк-раштав уйӑхӗсенче, хайхи арҫын район территорийӗнчен Мускава тухса кайнӑ. Унӑн ҫакна тума юраман.

Ҫак арҫына суд тунӑ. Судья арҫын айӑпне йышӑннине, унччен те преступлени тунине шута илнӗ, ӑна ҫирӗп режимлӑ колоние 6 ҫуллӑха ӑсатнӑ.

Шупашкарти пӗр медицина клиника ертӳҫи ултавҫӑсен аллине ҫакланса укҫа-тенкӗсӗр тӑрса юлнӑ.

Пӗр кунхине клиникӑна «прокуратура ӗҫченӗ» шӑнкӑравланӑ, хайхискер ҫитменлӗхсене тупса палӑртнине пӗлтернӗ, ку «ыйтӑва» татса пама май пурри пирки каланӑ.

Клиникӑн хӑраса ӳкнӗ администраторӗ номере пуҫлӑхне панӑ. Лешӗ те сехӗрленсе ӳкнӗ, «хӑратнӑ прокурор» чӑнах та тӗрӗслеме ан килтӗр тесе унӑн счечӗ ҫине темиҫе хутчен те укҫа куҫарнӑ.

Ҫапла майпа клиникӑн 58 ҫулти ертӳҫи ултавҫа 36 пин тенкӗ куҫарса панӑ. ЧР ШӖМӗ пӗлтернӗ тӑрӑх, ултавҫӑ шӑнкӑравланӑ номере Краснодар крайӗнче регистрациленӗ.

Хӑш-пӗр усламҫӑ штрафсене, ытти тӳлеве вӑхӑтра парса татмасть, ҫапла майпа хыснана укҫа сахалрах кӗрет. Суд приставӗсем ӗнер Шупашкарти «Ярмӑрккӑ» пасара рейда тухнӑ, парӑмҫӑсем патне ҫитнӗ.

Усламҫӑсенчен чылайӑшӗ пурлӑха арестлессинчен хӑраса ҫывӑхри банкомат патне кайса парӑмсене татнӑ. Темиҫе сехетре приставсем 600 пин тенке яхӑн шыраса илнӗ. 13 усламҫӑн пурлӑхне вара арестленӗ, пӗтӗмпе – 830 пин тенкӗлӗх пурлӑха. Вӗсен парӑма 10 кунра татмалла, унсӑрӑн арест хунӑ пурлӑхне сутӗҫ.

Рейд вӑхӑтӗнче пӗр машина хуҫи 600 пин тенкӗлӗх парӑма кӗрсе кайнине тупса палӑртнӑ. Унӑн машинине арест хунӑ. Халӗ машина ятарлӑ стоянкӑра тӑрать.

«Чӑвашавтотранс» панкрута тухни пирки сайтра хыпарласах тӑнӑччӗ. Халӗ предприятин автобусӗсене сутма тӑратасшӑн. Транспортсем ЧР Юстици министерствин зологӗнче тӑраҫҫӗ. Кун пирки «ИА Регнум» хыпарлать.

«Чӑвашавтотрансӑн» тӑватӑ автобусне сутасшӑн. Вӗсен малтанхи хакӗ – 16,7 миллион тенкӗ. Ку ыйтӑва кредиторсем ака уйӑхӗн 3-мӗшӗнче сӳтсе явӗҫ.

Кунсӑр пуҫне Вӑрмарти автотранспорт предприятине сутус ыйтӑва та ҫӗклӗҫ. Инвентаризаци ирттерсен унӑн хакне палӑртнӑ: 18,8 миллион тенкӗ.

Аса илтерер: нумаях пулмасть Шупашкарти Вокзалҫум автостанцийӗ ӗҫлеме пӑрахни пирки пӗлтернӗччӗ.

Пуш уйӑхӗн 30-мӗшӗнче Чӑваш Енри ачасене ҫуллахи вӑхӑтра канма кайма путёвкӑсем пама пуҫлӗҫ.

Республикӑн Вӗренӳ, ҫамрӑксен политикин министерстви пӗлтернӗ тӑрӑх, заявленисене пӗрлехи автоматизациленӗ тытӑм урлӑ йышӑнӗҫ. Ҫак ӗҫ тӑватӑ тапхӑрпа пулса пырӗ.

Пуш уйӑхӗн 30-мӗшӗнче социаллӑ центрсем йывӑр лару-тӑрури ҫемьесенчен заявленисем йышӑнма пуҫлӗҫ. Ака уйӑхӗн 6-мӗшӗнчен тытӑнса Ҫӗнӗ Шупашкар, Канаш хулисенче тата Канаш районӗнче пурӑнакансем хӑйсен ывӑл-хӗрӗ пурӑнакан шкулсенче ыйтса ҫырайӗҫ; ака уйӑхӗн 13-мӗшӗнчен Шупашкар хулинчисен заявленийӗсене шкулсенче йышӑнӗҫ; ака уйӑхӗн 20-мӗшӗ хыҫҫӑн — ытти мӗнпур районпа хулара.

Хула тулашӗнчи уйлӑхра 21 кну канма 14 962 тенке ларать, санатори-уйхлӑхра талӑкри хак — 935 тенке, хула тулашӗнчи уйлӑхсенчи профильлӗ сменӑсенче пӗр талӑкшӑн — 784 тенке. Ашшӗ-амӑшне путёвка хакӗ пӗр пайне ҫеҫ тӳлеттерӗҫ. Тупӑша кура — 5 процентран пуҫласа 50 процент таран.

Пуш уйӑхӗн 22-мӗшӗнче ҫӗрле Елчӗк районӗнче пурӑнакан 18 ҫулти каччӑ ашшӗ-амӑшӗн машинине ыйтмасӑрах тапратнӑ та тусӗпе пӗрле Ҫӗнӗ Шупашкарти каҫхи клуба вӗҫтернӗ. Хайхискерӗн права та пулман.

Анчах каччӑсем клубра ташлайман – машинӑна ҪҪХПИ инспекторӗсем асӑрханӑ. Пакунлисем вӗсене чарӑнма темиҫе хутчен те ыйтнӑ, анчах лешсем хӑнк та туман. Ҫапах каччӑсене тытса чарнӑ.

Водитель алкоголь тесчӗ витӗр тухма килӗшмен (ӑна 15 талӑклӑха арестлеме е 30 пин тенкӗлӗх штрафлама пултараҫҫӗ). ҪҪХПИ инспекторӗсем ыйтнипе чарӑнманшӑн 500-800 тенкӗ штраф парӗҫ. Ҫитменнине, водитель светофор хӗрлӗ ҫутнӑ чухне пилӗк хутчен чарӑнман. Куншӑн та штрафлӗҫ.

Кӗҫӗр Йӗпреҫ поселокӗнчи Маресеьев урамӗнче вырнаҫнӑ ритуал пулӑшӑвӗ кӳрекен лавкка ҫуннӑ. Инкеклӗ ӗҫсен минситерсвтин Чӑваш Енри Тӗп управленийӗн пресс-служби пӗлтернӗ тӑрӑх, пушар, малтанласа шухӑшланӑ тӑрӑх, хуралҫӑ пирус туртнӑ чух асӑрханманнипе ҫыхӑнма пултарнӑ.

Хуралта ларкан 50 ҫулти арҫын «хӗрл автана» хӑй тӗллӗн сӳнтерме хӑтланса пӑхнӑ-ха, анчах май килмен. Пушарпа кӗрешекенсем вырӑна икӗ машинӑпа пырса ҫитнӗ. Апла пулин те лавкка тӑкак тӳснӗ. Хуралҫӑ пӳлӗмӗ вутпа сиенленнӗ тата лавкка ҫивиттийӗ ҫуннӑ

Инкекре хуралҫӑ та шар курнӑ. Унӑн алли тата ури пиҫсе кайнӑ. Ӑна Йӗпреҫ районӗнчи тӗп пульницӑна ӑсатнӑ.

Сӑмах май, ҫулталӑк пуҫланнӑранпа республикӑра пушар 233 хутчен тухнӑ. Ӑна пула 16 миллион тенкӗлӗх тӑкак курнӑ. Вутра 18 ҫын вилнӗ.

35 ҫултан ҫамрӑкрах тухтӑрсене, хула поликлиникисене е пӗтӗмӗшле практика тухтӑрӗсен офисӗсене ӗҫлеме килнӗскерсене, компенсаци парӗҫ. 200 пин тенке илес тесен вӗсен хӑйсен участокӗнче пӗр ҫул ӗҫлемелле.

Халӗ ҫӑмрӑк тухтӑрсем аслисен поликлиникисенче те, ачасен пульницисенче те кирлӗ. Ҫамрӑк специалистсем компенсацие кирек мӗнле тӗллевпе те тӑкаклама пултараҫҫӗ: счет ҫине хума та, вӗренӳшӗн тӳлеме те май пур. Ҫапах чылайӑшӗ 200 пин тенке пурӑнмалли ҫурт-йӗр условийӗсене лайахлатма ярать.

Аса илтерер: нумаях пулмасть РФ Президенчӗ Патшалӑх Думине янӑ Ҫырура ялсенчи шкулсене ӗҫлеме килекен вӗрентекенсене те 1 миллион тенкӗпе хавхалантармалли пирки каланӑ.

2007 ҫулта Президент пепкелӗх центрӗнче 690 грамм таякан, 35 сантиметр тӑршшӗ арҫын ача ҫут тӗнчене килнӗ. Амӑшӗ ӑна 26-27 эрнере ҫуратнӑ. Ҫак тӗслӗхе тухтӑрсем астуса юлнӑ, мӗншӗн тесен пепкен пурнӑҫӗшӗн самай кӗрешме тивнӗ.

Ача реанимаци уйрӑмӗнче пӗр уйӑха яхӑн выртнӑ, ӑна искуственнӑй майпа сывлаттарнӑ. Пепке 1500 грама ҫитсен вӑл суккӑр ан юлтӑр тесе операци тунӑ. Тухтӑрсем пирӗн патра кунашкаллине пӗрремӗш хутчен тунӑ.

Ҫак арҫын ача халӗ мӗнле пурӑнать-ши? Халӗ вӑл 4-мӗш класра вӗренет, виҫӗ чӗлхепе ҫӑмӑллӑнах калаҫать. Арҫын ача тантӑшӗсенчен нихӑш енӗпе те юлмасть.

Палӑртмалла: 2018 ҫулта Президент пепкелӗх центрӗнче 361 ача вӑхӑтсӑр ҫуралнӑ. Вӗсенчен 47-шӗ 1000-1500 грамм тайнӑ, 36-шӗ вара – 500-1000 грамм.