© REUTERS / Yiming Woo

Хальхи вӑхӑтра Китайран килнисене самай тӗрӗслени пирки эпир пӗлтернӗччӗ — сӑмахран, вӗсене Кӳкеҫ пульницине вырнаҫтарнӑ. Палӑртмалла: вӗсем пурте сывах. Ҫавах та ку чиртен 630 ҫын ытла вилнине пула, вӗсене икӗ эрне хушши пульницӑрах тытӗҫ.

Короновируспа чи йышлӑ чирлекен патшалӑх — Китай. Унта ҫак чир 31 161 пин ҫынна ернӗ. Иккӗмӗш вырӑнта вара — Сингапур. Вӗсен сывлӑх сыхлав министерстви пӗлтернӗ тӑрӑх паянхи куна 2019-nCoV короновируспа чирленӗ ҫынсен шучӗ 33 ҫитнӗ. Вӗсенчен иккӗшӗ ку вӑхӑта сывалма та ӗлкӗрнӗ. 31 чирлӗ ҫыннӑн сывлӑхӗ е улшӑнмасть, е лайӑхланса пырать. Йывӑр чирлисем ҫук тесе пӗлтереҫҫӗ.

Раҫҫейре икӗ чирлӗ ҫынна тупса палӑртнӑ — пӗрине Тӗмен облаҫӗнче, теприне Байкалхыҫ крайӗнче.

uihere.com сайтри сӑн

Биологсем шутланӑ тӑрӑх, ытла та ӑшӑ хӗле пула регионта вӑрӑмтунасем сахалланма пултараҫҫӗ.

М.В. Ломоносова ялӗллӗ МПУ биофакри гидробиологи кафедрин наука ӗҫченӗ Вадим Марьянский палӑртнӑ тӑрӑх вӑрӑмтунасем сахалланни, паллах, ҫынсене савӑнтарӗ, ҫавах та ку ыйтӑва тарӑнрах пӑхмалла, мӗншӗн тесен кунашкал пысӑк улшӑнусем экологи шайлашӑвне хавшатма пултараҫҫӗ.

Ӑсчахсем палӑртнӑ тӑрӑх, хӗллехи тапхӑрта ялан тенӗ пекех ҫывӑракан ытти пысӑкрах кӑпшанкӑсем те юр ҫуккипе асапланаҫҫӗ. Ку шухӑшпа Финляндири Кӑнтӑр Карели аллергологипе тавралӑх институтӗнче те килӗшеҫҫӗ. Киммо Саринен ӑсчах каланӑ тӑрӑх, хӗл аномали шайӗнче ӑшӑ тӑнине пула ҫуркунне вӑрӑмтунасемшӗн тавралӑх ӗрчеме юрӑхсӑр пулӗ.

(Марина Карягина, Елен Нарпи, Галина Матвеева кӗнекисене вуласан асра юлни)

Нумаях пулмасть мана виҫӗ ҫилҫунатҫӑ хӑйсен пӑрасна (проза) кӗнекисене парнелерӗ. Вӗсене умлӑ-хыҫлах вуласа тухрӑм. Унти хӗрарӑмсен сӑнарӗсене виҫҫӗшӗ пӗр-пӗринпе калаҫса татӑлнӑ пекех ҫыхӑнтарса ҫырса кӑтартнӑ. Пӗринче — ҫын упӑшкине хапсӑнакан, савнин арӑмӗ машина айне пулса амансан ирӗк туйӑмне пусарма пултарнӑ артистка, тепринче — машинӑ ҫапнипе чӑлах юлнӑ, анчах телейне тупнӑ пир-авӑрҫӑ, виҫҫӗмӗш-тӑватӑмӗшӗнсенче — ҫылӑха кӗмесӗр юрату тасалӑхӗшӗн тӑракан хӗрсемпе арӑмсем.

Чӑваш хӗрарӑмӗсен ку саманари тӗрлӗ сӑнарӗсене курӑмлӑ сӑрланӑ ҫыраҫӑсемшӗн савӑнтӑм. Литературӑн анлӑ хирне вӗсем ҫирӗп вӑй-халлӑ ушкӑнпа харӑс тухнӑшӑн хӗпӗртесе, хамӑн татӑк-кӗсӗк шухӑша каласа хӑварас тетӗп.

Елен Нарпин «Хӗл лариччен» (Ш., Чӑв. кӗн. из-ви, 2019.— 190 с.) кӗнекинче пӗр халайпа вунӑ калав пичетленнӗ. «Ҫӳпҫе тӗпӗнчи ҫылӑх» калавне пӗлтӗр 8-мӗш класӑн вӗренӳ кӗнекине кӗртнӗ.

Малалла...

«Паян Шупашкар районӗнчи пульницӑри инфекци уйрӑмӗнчен мӗнпур пациента кӑларса ячӗҫ. Ӗнер ҫеҫ вырттарнисене те, сипленсе пӗтменнисене, кӑларчӗҫ. Пульницӑри врачсем ҫакна кунта Китай ҫыннисене вырттарассипе сӑлтавлаҫҫӗ», — ҫакӑн пек хыпарланӑ ҫӗркаҫ, нарӑс уйӑхӗн 5-мӗшӗнче, «Контактра» халӑх ушкӑнӗнчи «Вести района / Чебоксарский район» пабликра.

Пост авторӗ пирӗн ҫынсен, ачасен сывлӑхӗ влаҫа пачах та кӑсӑклантармасть-ши тесе пӑшӑрханнӑ. «Ӑҫта каймалла, ӑҫта сипленмелле???», — тесе ҫырнӑ постра.

Ку хыпара вуланисем те кӑмӑлсӑрланнӑ. Шупашкарта йышӑнманран кунта вырттараҫҫӗ пуль тесе пӗтӗмлетнӗ.

Аса илтерер: Китайран килекенсене РФ санитари врачӗн йышӑнӑвӗпе коронавирусран пурне те ҫирӗп тӗрӗслеҫҫӗ, карантинта 14 кун тытаҫҫӗ.

pravdapfo.ru сӑнӳкерчӗкӗ

Валерий Филимонова Чӑваш Енӗн Элтеперӗн Администрацийӗн Ертӳҫин ҫумӗнчен кӑларнӑ. Аса илтерер: ӑна ҫав пукана 2018 ҫулхи юпа уйӑхӗн 19-мӗшӗнче шанса панӑччӗ. Валерий Филимонова Чӑваш Енӗн ун чухнехи Элтеперӗ Михаил Игнатьев «тухӑҫлӑ ӗҫшӗн» тав тунӑччӗ. Республика Элтеперӗн Администрацине куҫиччен Валерий Филимонов Чӑваш Ен Патшалӑх Канашӗн спикерӗ пулса ӗҫленӗччӗ.

Паян, нарӑс уйӑхӗн 6-мӗшӗнче, Чӑваш Ен Элтеперӗн тивӗҫӗсене пурнӑҫлакан Олег Николаев Валерий Филимонова ӗҫрен кӑларма йышӑннӑ.

Сӑмах май, кӑҫалхи кӑрлачӑн 30-мӗшӗнче Олег Николаевӑн пулӑшуҫи пулма ҫирӗплетнӗ Татьяна Михайловӑна ку ӗҫрен кӑларнӑ. Мӗн сӑлтавпа ҫапла йышӑннине паянхи 29-мӗш номерлӗ йышӑнура асӑнман.

Паян Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев республикӑн Патшалӑх Канашӗн ертӳҫисемпе тата фракци пайташӗсемпе тӗл пулнӑ. Унта Олег Николаев халӑхӑн тӗрлӗ категорине паракан социаллӑ тӳлевсене индексацилес ыйтӑва хускатнӑ. Ҫакӑн пирки Олег Николаев Фейсбукри хӑйӗн страницинче хыпарланӑ.

Чӑваш Ен Элтеперӗн тивӗҫӗсене вӑхӑтлӑх пурнӑҫлаканӗ республикӑн Ӗҫлев тата Финанс министерствисене маларах асӑннӑ тӗллевпе мӗн чухлӗ укҫа кирлине ҫывӑх вӑхӑтра шутласа пӑхма хушнӑ. Хыснана улшӑну кӗртнӗ чухне социаллӑ тӳлевсене индексацилеме укҫа-тенкӗ пӑхса хӑварасшӑн.

Олег Николаев Фейсбукра ҫырнӑ тӑрӑх, инфляци пӗр вырӑнта тӑман, социаллӑ тӳлевсене вара виҫӗ ҫул ӗнтӗ индексацилемен.

«Юрма» архивӗнчи сӑн

CKS INTERNATIONAL TRADING (BEIJING) CO LTD компани элчисем, вӑл Китайра вырнаҫнӑ, Чӑваш Енре пулса курнӑ. Вӗсем «Юрма» агрохолдинг ертӳлӗхӗпе тӗл пулса пӗр ыйтӑва сӳтсе явнӑ.

Тӗлпулура икӗ ен ҫапла калаҫса татӑлнӑ: «Юрма» хапрӑк бройлер чӗпписен урисене Китая ӑсатма тытӑнӗ.

ЧР Ял хуҫалӑх министерстви пӗлтернӗ тӑрӑх, Китайран ҫитнӗ ҫынсем агрохолдинг ӗҫӗ-хӗлӗпе паллашнӑ. Хӑнасене экспорт тумалли продукци пахалӑхӗ килӗшнӗ. Халӗ вӗсем Китая чӑх-чӗпӗн 11 тӗслӗ аш-какайне ӑсатассине сӳтсе яваҫҫӗ.

Сӑмах май, Чӑваш Енри ял хуҫалӑх продукцийӗн ҫуррине Китая ӑсатаҫҫӗ. Пӗлтӗр экспорт 41,8 процентпа танлашнӑ.

Чӑваш автономи облаҫне туса хунӑранпа 100 ҫитнӗ тӗле логотип тата унӑн элеменчӗсене ҫирӗплетнӗ. Логотипа ятарлӑ ӗҫлӗ ушкӑн ларӑвӗнче ырланӑ.

Логотипа тата унӑн элеменчӗсене республика уявне халалласа ирттерекен тӗрлӗ фестивальпе конкурс валли пичет продукцийӗ (буклетсене, листовкӑсене, афишӑсене), ялавсем, сувенирсем хатӗрленӗ чухне усӑ курмалла. Республикӑмӑр пӗр ӗмӗрхине уявлама хатӗрленӗ лапамсене те пӗр стильпе хитрелетӗҫ. Вырӑнти хӑй тытӑмлӑх органӗсен те ҫавна шута илмелле. Кун пирки республикӑн Культура, национальноҫсен ӗҫӗсен тата архив ӗҫӗн министерстви пӗлтерет.

Логотипа тата унӑн элеменчӗсене Шупашкарти художество училищин (техникумӗн) студенчӗсемпе преподавателӗсем хатӗрленӗ.

PDF тата COREL форматлӑ логотиппа унӑн элеменчӗсене ЧР Культура министерствин сайтӗнче ҫак _http://www.cap.ru/news/2020/02/06/utverzhden-oficialjnij-logotip-100-letiya-obrazova_|каҫӑпа__ вырнаҫтарнӑ.

yandex.ru сӑнӳкерчӗкӗ

Чӑваш Ене Китайран килсе ҫитнӗ ҫынсене пульницӑна вырттарӗҫ. Вулаканӑмӑрсене тӳрех лӑплантарар: вӗсем коронавируспа чирлишӗн мар. Тӗрӗслемелле вырттараҫҫӗ. Йӗрки ҫавӑн пек.

Китай ҫӗршывӗнчен килнӗскерсене Мускаври Шереметьево аэропортӗнче те тӗрӗсленӗ-ха. Унти тухтӑрсем вӗсем чирлине тупса палӑртман. Ҫапах та коронавирус хӑрушшине кура хӑнасене изоляци стационарӗсенче карантинта тытмалла. Кун пек йышӑнӑва ҫӗршывӑн тӗп санитари врачӗн шайӗнче ҫирӗплетнӗ.

Пирӗн республикӑна килнисене, пурӗ 11 ҫынна, Шупашкар районӗнчи инфекци уйрӑмне вырттарма йышӑннӑ. Унта пациентсем валли ятарлӑ условисем туса панӑ. Ӗнер 1 ҫынна Шупашкарти васкавлӑ медицина пульницине вырттарнӑ. Карантин вӑхӑчӗ — 14 кун.

Правительство канашлӑвӗ. 2020 ҫулхи нарӑс уйӑхӗн 5-мӗшӗ. Cap.ru сӑнӳкерчӗкӗ

Чӑваш Ен Правительствин тытӑмне улӑштарнӑ. Ҫакӑн ҫинчен калакан хушӑва ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев паян, нарӑс уйӑхӗн 6-мӗшӗнче, алӑ пуснӑ.

Чӑваш Енре Промышленность тата энергетика министерстви туса хунӑ. Асӑннӑ енпе яваплӑх ҫапла вара Экономика министерствинчен тата Стройминран ҫӗнӗ министерствӑна куҫӗ.

Юстици тата пурлӑх хутшӑнӑвӗсен министерстви Юстици енӗпе ӗҫлекен комитета ҫаврӑннӑ.

Экономика, промышленность тата суту-илӳ министерстви малашне Экономика аталанӑвӗн тата пурлӑх хутшӑнӑвӗсен министерстви ятлӑ пулӗ.

Туризм функцине Культура, национальноҫсен ӗҫӗсен тата архив ӗҫӗн министерствинчен Экономика аталанӑвӗн тата пурлӑх хутшӑнӑвӗсен министерствине панӑ.

Гражданла хӳтӗлев тата инкеклӗ лару-тӑру енӗпе ӗҫленӗ министерство унчченхиллех Патшалӑх комитечӗ пулса тӑнӑ.

Министрсен Кабинечӗн Председателӗн тивӗҫне Чӑваш Ен Элтеперӗн тивӗҫне вӑхӑтлӑх пурнӑҫлакан ҫине тиенӗ.