dnpr.com.ua сайтри сӑн

Канашра пурӑнакан 43 ҫулти хӗрарӑм крипотвалюта илес тесе ултавҫӑсен аллине ҫакланнӑ. Вӑл вӗсене 1 миллион ытла тенкӗ куҫарса панӑ.

Хӗрарӑм полицейскисене акӑ мӗн каласа кӑтартнӑ: икӗ уйӑх каялла вӑл тӗнче тетелӗнче биткоина укҫа хывса ҫӑмӑллӑнах ӗҫлесе илме май пурри пирки вуласа пӗлнӗ. Хайхискер ҫавсемпе ҫыхӑннӑ, лешсем малтан 500 тенкӗ хывмаллине пӗлтернӗ. Анчах хӗрарӑмӑн ун чухлӗ укҫа пулман – вӑл кредит илнӗ.

Ку укҫана куҫарса панӑ хыҫҫӑн лешсем каллех шӑнкӑравланӑ: «раскрутка» тума тепӗр 520 пин кирлӗ-мӗн. Хӗрарӑм ку суммӑна та куҫарса панӑ. Анчах темӗн чухлӗ кӗтсен те тупӑш пирки никам та, нимӗн те шарламан. Ҫавӑн чухне тин хӗрарӑм ӑна шӑнман пӑр ҫине лартса хӑварнине ӑнланнӑ.

ШӖМ тунӑ сӑн

Авӑн уйӑхӗн 28-мӗшӗнче 16 сехет ҫурӑра Патӑрьел ҫывӑхӗнче трактор кювета чӑмнӑ. ЧР ШӖМӗ пӗлтернӗ тӑрӑх, руль умӗнче 35 ҫулти арҫын ларнӑ. Транспорт — вырӑнти предприятин.

Тракторист асфальт сарман ҫулпа пынӑ чухне руле итлеттереймен – кайнӑ ҫӗртех кювета чӑмнӑ. Арҫын, шел те, суранланнӑ. Унӑн ҫурӑм шӑмми аманнӑ, ӑна пульницӑна илсе кайнӑ.

Халӗ ку ӗҫ-пуҫа уҫӑмлатаҫҫӗ.

gtrk.tv сайтри сӑн

Елчӗк районӗнче пурӑнакан 34 ҫулти арҫынна ватӑ ҫынна мӑшкӑллама хӑтланнӑшӑн айӑпласшӑн. Ҫитменнине, вӑл вӗлерессипе хӑратнӑ. Ун тӗлӗшпе пуҫарнӑ пуҫиле ӗҫе следовательсем тишкерсе пӗтернӗ, суда ярса панӑ. Кӗҫех ӑна Елчӗк районӗн сучӗ пӑхса тухӗ.

Следстви комитечӗ пӗлтернӗ тӑрӑх, кӑҫал ҫурла уйӑхӗн 9-мӗшӗнче ҫак ӳсӗр арҫын ентешӗ патне пирус ыйтма кӗнӗ. Кӑштахран ӑна лешӗн амӑшӗ урама кӑларса янӑ.

Арҫын урамра ватӑ хӗрарӑма мӑйӗнчен ярса тытнӑ, аллипе тутине хупланӑ та кӳршӗри ҫурта илсе кӗнӗ, вӗлерессипе хӑратса мӑшкӑллама тӑнӑ. 78 ҫулти кил хуҫи картишӗнче пулнӑ, кӑшкӑрашнӑ сасӑ илтсен хӗрарӑмӑн таванӗсем патне чупнӑ. Лешсем ӳсӗрскере усал ӗҫ тӑвасран тытса чарнӑ.

Территориясмыслов.рф сайтри сӑнӳкерчӗк

Чӑваш Енре пурӑнакан студентсем Чӑваш Ен Элтеперӗн Михаил Игнатьевӑн укҫине тивӗҫӗҫ. Грант уйӑрасси ҫинчен калакан хушӑва республика ертӳҫи авӑн уйӑхӗн 27-мӗшӗнче алӑ пуснӑ.

Элтепер укҫине памалли 10 ҫамрӑк йышӗнче ҫаксем: Сергей Емелин тата Ксения Прокопьева (Регионсем хушшинчи комметенци центрӗ – Шупашкарти электромеханика колледжӗ), Алексей Лазарев (Улатӑрти технологи колледжӗ), Сафар Назмутдинов (Канашри транспортпа энергетика техникумӗ), Василий Никитин тата Никооай Хурамаев (Шупашкарти апатланупа коммерци техникумӗ), Елена Павлова тата Екатерина Шилова  (Шупашкарти Н.В. Никольский ячӗллӗ колледж), Нина Романова (Канашри педагогика колледжӗ), Андрей Степанов (Ҫӗрпӳри аграрипе технологи техникумӗ. Вӗсем 2019-2020 ҫулсенчи ҫӗнӗ вӗренӳ ҫулӗнче уйӑхсерен 10-шар пин тенкӗ илсе тӑрӗҫ.

Ҫӗнӗ Шупашкарта пурӑнакан пӗр хӗр полицейскисенчен пулӑшу ыйтнӑ. Пакунлисене вӑл пӗлтернӗ тӑрӑх, унӑн картти ҫинчен такам укҫа илсе каять.

Хӗр ӑнлантарнӑ тӑрӑх, авӑн уйӑхӗн 13-мӗшӗнче унӑн картти ҫинчен 177 тенкӗ таксишӗн тӳлеме куҫса кайнӑ. Тепӗр темиҫе кунтан ҫав тӗллевпе — 105 тенкӗ.

Таксипе ҫӳремен хӗр карттӑпа укҫа илӗнмелле мар тунӑ та пакунлисем патне васканӑ. Унта ҫитсен утӑ уйӑхӗнче карттӑ ҫинчен 89 тенкӗ ҫухални те ҫиеле тухнӑ.

Пысӑк укҫа мар пулин те, полицейскисем вӑрра шырама пикеннӗ. Хӗр шучӗпе таксипе ҫӳрекен этем — Шупашкарта пурӑнакан, ниҫта та ӗҫлемен 27 ҫулти каччӑ иккен. Пӗррехинче хӗр хӑнара чухне телефонпа банк карттине хӑйӗнсӗр йӑпӑртлӑха хунӑ иккен. Ҫав самантпа усӑ курса каччӑ таксишӗн хӗрӗн карттипе тӳлемелле туса ӗлкӗрнӗ.

Ҫамрӑк ҫын 371 тенке саплаштарнӑ. Вӑрланӑшӑн халӗ ун тӗлӗшпе пуҫиле ӗҫ пуҫарнӑ.

kianewes.ru сӑнӳкерчӗкӗ

Ҫӗрпӳ районӗнчи Ҫырмапуҫ ял тӑрӑхӗн пуҫлӑхӗ тӗлӗшпе пуҫиле ӗҫ пуҫарнӑ. Ӑна РФ Пуҫиле кодексӗн 285 статйин 2-мӗш пайӗпе (вырӑнти хӑй тытӑмлӑх ертӳҫи ӗҫ вырӑнӗпе ытлашши усӑ курнӑшӑн) тата 292-мӗш статйин 2-мӗш пайӗпе (ӗҫпе усӑ курса улталанӑшӑн) айӑпласшӑн.

Тӗпчевҫӗсем шухӑшланӑ тӑрӑх, 2015 ҫулхи утӑ уйӑхӗнче вӑл 0,16 гектар ҫӗр уйӑрни ҫинчен калакан суя выписка ҫырса панӑ. Тусӗ валли. Тӗрӗссипе вара юлташӗн ун пек нимле ҫӗр те пулман.

Апла пулин те юлташӗ ҫав хута тӗпе хурса ҫӗре Росреестрӑн управленийӗнче хӑйӗн ячӗпе регистрацилеме пултарнӑ.

Пӑтӑрмаха РФ Следстви комитечӗн тӗпчевҫисем тата прокуратура ӗҫченӗсем тупса палӑртнӑ.

Суя хут ҫырса панӑ пуҫлӑх тӗлӗшпе ҫыхӑннӑ пуҫиле ӗҫе малалла тӗпчеҫҫӗ.

Yandex.ua сӑнӳкерчӗкӗ

Чӑваш Енре пурӑнакансем ӗнер, авӑн уйӑхӗн 27-мӗшӗнче, 1 миллион та 716 пин тенкӗсӗр тӑрса юлнӑ.

Ҫӗнӗ Шупашкарта пурӑнакан 53 ҫулти хӗрарӑм патне банк ӗҫченӗ тесе шӑнкӑравлакан тупӑннӑ. Вӑл хӗрарӑмӑн картти ҫинчен такам укҫа куҫарасшӑн тесе суйнӑ. Хӗрарӑм банка шӑнкӑравласа (телефон номерне карта ҫинех ҫырса хураҫҫӗ) ыйтас вырӑнне ют ҫынна ӗненнӗ. Вӑл банкомата кайса 145 пин укҫа илнӗ те ют ҫын счечӗ ҫине куҫарса панӑ. Хӗрарӑмӑн ҫитменнине кредит картти пулнӑ.

Ҫавӑн пек пӑтӑрмах Чӑваш Енри тата тепӗр ултӑ ҫынпа пулса иртнӗ.

Канашра пурӑнакан 43 ҫулти хӗрарӑм укҫана биткоин ҫине куҫарса пуяс тенӗ. Тӗнче тетелӗнчи пӗлтерӳри телефон номерӗпе шӑнкӑравланӑ. Старт взносӗ 500 пин тенкӗ пулмалла тенӗ. Хӗрарӑм итленӗ.

Чӑваш Енри харӑсах икӗ икӗ кирпӗч савутне панкрута кӑларасшӑн. Тавӑҫпа Федерацин налук служби тухнӑ.

Чӑваш Енӗн Арбитраж судне тухнӑ ҫырура парӑм виҫине 20 миллион та 500 пин тенкӗ тесе кӑтартнӑ. Сӑмах Муркашри тата Етӗрнери кирпӗч савучӗсем пирки пырать.

Федерацин налук службин Чӑваш Енри управленийӗ «Муркашри кирпӗч савучӗ» акционерсен обществинчен 12,5 миллион тенкӗ шыраса илесшӗн, «Етӗрнери кирпӗч савучӗ» предприятирен 8 миллион тенкӗ шыраса илесшӗн.

«Правда ПФО» тӗнче тетелӗнчи хаҫат пӗлтернӗ тӑрӑх, Чӑваш Енӗн Арбитраж сучӗ лару кунне хальлӗхе палӑртман-ха.

Ҫак йӗркесен авторӗ пӗлнӗ тӑрӑх, асӑннӑ икӗ савут хуҫи те — Владимир Ермолаев усламҫӑ. Предприятисене вӑл ӗнер-маян урӑх ҫынна сутса яман пулсан...

belcanto.ru сайтри сӑн

Сочи хулинче Пӗтӗм тӗнчери ачасемпе ҫамрӑксен «Ҫӗнӗ ҫырансем» пултарулӑх конкурсӗ иртнӗ. Шупашкарти Воробьев ячӗллӗ ачасен 2-мӗш музыка шкулӗнче сӗрме купӑс класӗнче вӗренекен Александра Николаева пысӑк наградӑна тивӗҫнӗ.

Хӗрачан вӗрентекенӗ – Наталья Серегина. Пӗтӗм тӗнче шайӗнчи конкурсра гран-при илни 11 ҫулти Алескандрӑшӑн – пысӑк ҫитӗнӳ. Саша конкурса хутшӑнса «Планета дарований» фонд пулӑшнипе йӗркеленекен тӗнче шайӗнчи «Пултарулӑх юхӑмӗ» проекта та хутшӑннӑ.

Палӑртмалла: Александра Николаева Раҫҫей тата тӗнче шайӗнчи конкурссенче нумай хутчен ҫӗнтернӗ.

agro.tatarstan.ru сайтри сӑн

ТАСС пӗлтернӗ тӑрӑх, ялта пурӑнакан ҫамрӑк специалистсемпе ҫемьесене ипотека кредитне 3 процентпа пама тытӑнасшӑн. Ку условисем ялсене комплекслӑ аталантармалли ҫӗнӗ патшалӑх программипе килӗшӳллӗн пулӗҫ.

Кун пирки РФ ял хуҫалӑх министрӗн ҫумӗ Иван Лебедев СФ комитечӗн тухса ҫӳрекен канашлу лапамӗнче каланӑ. Халӗ РФ Ял хуҫалӑх министерствинче ҫӑмӑллӑхлӑ ипотека кредичӗ илмелли условисене пӑхса тухаҫҫӗ.

ТАСС министр ҫумӗн сӑмахӗсене илсе кӑтартнӑ: «Ялти ҫамрӑк специалистсемпе ҫемьесене ҫӑмӑллӑхлӑ ипотекӑпа пулӑшни – ҫӗнӗ пуҫару тата революциллӗ йышӑну – 3 процентран пуҫласа регионсен софинансированине шута исле 0,1 процент таран чакармалли».