Тӑвай районӗнчи Элпуҫ ялӗнчи шкула 1886 ҫулта савӑнӑҫлӑ лару-тӑрура уҫма тӑван халӑхӑмӑра ҫутта кӑларнӑ Иван Яковлев хутшӑннӑ. Унта самана ыйтнине шута илсе Турӑ саккунне, ҫырулӑха, вулама тата арифметикӑна вӗрентнӗ.

1974 ҫулта ҫурта республика шайӗнчи историпе культура палӑкӗ тесе йышӑннӑ.

Росреестрӑн Чӑваш Енри управленийӗ пӗлтернӗ тӑрӑх, пирӗн республикӑра культура эткерлӗхӗ шутланакан 379 объект пур. Вӗсем – чиркӳсем, купса ҫурчӗсем, 18-20 ӗмӗрсенче тунӑ хуҫалӑх хуралтисем. Росреестрӑн Чӑваш Енри ӗҫченӗсем ҫавсене тупса палӑртас тесе кӑҫал самай тӑрӑшнӑ. Шел те, 33 ҫурт докуменчӗсене тупма май килмен. Истори пӗлтерӗшлӗ тепӗр 18 ҫурта вара ҫулталӑк вӗҫлениччен кадастр учетне илӗҫ.

Мурманск облаҫӗн кӗпӗрнаттӑрӗ Андрей Чибис вӗренӳпе ӑслӑлӑх министрӗн тивӗҫӗсене пурнӑҫлама Анна Головинана шаннинен Чӑваш халӑх сайчӗ хай вӑхӑтӗнче пӗлтернӗччӗ. Халӗ вӑл урӑх ӗҫе куҫнӑ май министр пуканне пушатнӑ.

Анна Германовна Головина 2009 ҫулта И.Н. Ульянов ячӗллӗ Чӑваш патшалӑх университетне вӗренсе пӗтернӗ. Унта вӑл «Физика» тата «Преподаватель» специальноҫӗсене алла илнӗ. «Финанс тата кредит» енӗпе те вӑл вӗреннӗ. «Пӗтӗмӗшле педагогика, педагогика тата вӗренӳ историйӗ» енӗпе аспирантурӑра ӑс пухнӑ. 2015 ҫулта вӑл педагогика наукисен кандидачӗ ята тивӗҫнӗ. Сӑмах май, 2014 ҫулта «Ҫулталӑк аспиранчӗ» республикӑри конкурсра «Педагогика ӑслӑлӑхӗсем» номинацире ҫӗнтернӗ.

Анна Головина Чӑваш Ен Вӗренӳ тата ҫамрӑксен политикин министерствинче тӗрлӗ должноҫра вунӑ ҫул ӗҫленӗ. Мурманска кайиччен Чӑваш патшалӑх университетӗнче проект ӗҫ-хӗлӗн управленийӗн пуҫлӑхӗ пулнӑ. Хӑй вӑл Хабаровскра ҫуралнӑ.

chgtrk.ru сӑнӳкерчӗкӗ. 2020 ҫулхи нарӑс уйӑхӗ

Паянхи кун хурлӑхлӑ хыпарсемпе пуян. Маларах эпир Петр Ивантаев тата Станислав Отрыванов вилни ҫинчен пӗлтернӗччӗ. Халӗ тата тепӗр хурлӑхлӑ хыпар илтрӗмӗр. Искусствоведени докторӗ тата профессор, Чӑваш патшалӑх гуманитари ӑслӑлӑхӗсен институтӗнче ӗҫленӗ Алексей Трофимов йывӑр чирлесе выртнӑ хыҫҫӑн пурнӑҫран уйрӑлнӑ.

Вӑл 1938 ҫулта Тутар Республикинчи Аксу районӗнчи Чӑваш Киреметпуҫ ялӗнче ҫуралнӑ. 1969 ҫулта Ленинградри И.Е. Репин ячӗллӗ Ӳнер академийӗнчен вӗренсе тухнӑ. Чӑваш АССР наукӑпа тӗпчев институтӗнче тӗрлӗ должноҫре тӑрӑшнӑ. Унта директор пулса та ӗҫленӗ. И.Н. Яковлев ячӗллӗ ЧППУра вӗрентнӗ.

Хушни: Алексей Александрович Трофимовпа сывпулашшас текенсене Республикӑн 1-мӗш больницин ритуал залне авӑн уйӑхӗн 21-мӗшӗнче, тунтикун, 12 сехете пыма сӗнеҫҫӗ. Адресӗ: Мускав проспекчӗ, 9в.

ok.ru сӑнӳкерчӗкӗ

Раҫҫейри паллӑ актера Михаил Ефремова Мускаври аваришӗн 8 ҫуллӑха айӑпланӑ. Аса илтерер: вӑл руль умне ӳсӗр ларса машинӑпа ҫапӑннӑ, тепӗр водитель вилнӗ.

Михаил Ефремов айӑпне Чӑваш Енри колонире каҫарттарасшӑн пулнине пӗлтернӗ. «Унта – манӑн тымар. Иван Яковлев Ленин ашшӗн пулӑшуҫи пулнӑ», — тенӗ вӑл. Михаил Ефремов – Иван Яковлевӑн тӑванӗ.

Актер каланӑ тӑрӑх, Чӑваш Енри ФСИН ӗҫченӗсем ыйту ҫыраҫҫӗ. Михаил Ефремовӑн – икӗ вакат, анчах вӗсен ячӗсене вӑл пӗлтермен. Пӗри – Чӑваш Енрен.

olnika.blogspot.com сайтри сӑн

Авӑнӑн 1-мӗшӗнче ачасем вӗрентекенсене чечек ҫыххи парнелес вырӑнне йывӑр чирлӗ, нихӑҫан сывалайман шӑпӑрлансене пулӑшнӑ. Аня Чижова ячӗпе хисепленекен фонд пӗлтернӗ тӑрӑх, «Чечек вырӑнне – ачасем» акцие кӑҫал 32 шкулти 72 класс, 1 ача пахчи хутшӑннӑ. Пӗтӗмпе – 2 пин ытла ача, 4 пин ытла ашшӗпе амӑшӗ, 71 вӗрентекен тата 1 воспитатель. Пушкӑртстанри тата Новокузнецк облаҫӗнчи икӗ класс та пулӑшнӑ.

Кӑҫал 272046 тенкӗ пухма май килнӗ. Ырӑ ӗҫе коммерци компанийӗсем те хутшӑннӑ. Ҫапла 605 пин таранах пухӑннӑ. Ку укҫапа йывӑр чиртен нихӑҫан сывалайман 48 ачана пулӑшнӑ: эмелсем, апат-ҫимӗҫ, хатӗр-хӗтӗр туяннӑ.

Палӑртмалла: ку акци Чӑваш Енре тӑваттӑмӗш хут иртнӗ. Ҫак тапхӑрта 1 миллион ытла тенкӗ пухнӑ.

Ӗнер, авӑн уйӑхӗн 16-мӗшӗнче, Станислав Отрыванов инженер-строитель, краевед, Чӑваш халӑх академийӗн чӑн пайташӗ пурнӑҫран уйрӑлнӑ. Вӑл 72 ҫулта пулнӑ, Шупашкарта пурӑннӑ.

Станислав Гурьевич 1948 ҫулхи утӑ уйӑхӗн 17-мӗшӗнче Вӑрнар районӗнчи Нурӑс ялӗнче ҫуралнӑ. Вӑл 38 ҫул Ҫурҫӗрти строительство организацийӗсенче ӗҫленӗ, Архангельск хула администрацийӗн мэрийӗнче те тӑрӑшнӑ. Таврапӗлӳҫӗ, очерксем тата прозӑлла хайлавсем ҫырнӑ.

Станислав Отрывановпа Шупашкарти П. Лумумба урамӗнчи 10-мӗш ҫуртра ыран, авӑн уйӑхӗн 18-мӗшӗнче, 11 сехетре сывпуллашӗҫ.

Контактра сӑнӳкерчӗкӗ

Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев суйлава пӗтӗмлетме журналистсене брифинга пухсан Правительство тытӑмӗнче улшӑнусем кӑштах пулма пултарассине пӗлтернӗччӗ.

Ӗнер ун пек пӗр йышӑну пулчӗ те. Промышленность тата энергетика министрӗ пулма Олег Николаев Евгений Герасимова шанчӗ. Вӑл Воронежри «Масловский» индустри паркӗн коммерци директорӗнче ӗҫленӗ. Унччен вӑл «Четра-Промышленные машины» акционерсен уҫӑ обществинче суту-илӳ пайӗн пуҫлӑхӗнче тӑрӑшнӑ, Ҫӗнӗ Шупашкарти «Дехим» обществӑн учредителӗ тата директорӑн ҫумӗ пулнӑ.

Министр тивӗҫне пӗр вӑхӑт пурнӑҫланӑ Сергей Лекарева министр ҫумӗ пулма куҫарнӑ. Паян асӑннӑ министертсвӑра тата тепӗр кадр улшӑнӑвӗ пулса иртнӗ. Министр ҫумӗ пулса ӗҫленӗ Николай Голубцова ӗҫрен кӑларнӑ.

Чӑваш Енри паллӑ та сумлӑ ҫынсенчен пӗри, Петр Ивантаев ӗмӗрлӗхе куҫне хупнӑ. Вӑл паян, авӑн уйӑхӗн 17-мӗшӗнче, вилсе кайнӑ.

Унпа Шупашкарти Ухсай Яков ячӗллӗ культура керменӗнче авӑн уйӑхӗн 19-мӗшӗнче 10 сехетрен пуҫласа 12 сехетчен сывпуллашӗҫ. 12 сехетре хурлӑхлӑ митинг пуҫланӗ.

Петр Ивантаев Хӗрлӗ Чутай районӗнчи Сурӑм ялӗнче 1941 ҫулхи раштав уйӑхӗн 19-мӗшӗнче ҫуралнӑ. Чӑваш патшалӑх ял хуҫалӑх институтӗнче вӗреннӗ. Дипломлӑ специалист ӗҫ биографине тӑван районӗнчи «Октябрь» колхозра агрономра пуҫланӑ. Утӑм хыҫҫӑн утӑм тунӑ вӑл. Чӑваш Ен Министрсен Кабинечӗн Председателӗн пӗрремӗш ҫумӗн — ЧР ял хуҫалӑхӗн министрӗн тилхепине тытма тивӗҫ пулнӑ.

Авӑн уйӑхӗн 21-мӗшӗнче Чӑваш Ен Наци вулавӑшӗнче Чӑваш ҫулҫӳревҫисен пӗрремӗш форумӗ иртӗ. Вӗсем кӑҫалхи ҫулла епле канни ҫинчен каласа кӑтартӗҫ. Инҫе ҫула тухсан мӗн пӗлмеллине ӑнлантарса парӗҫ. Ҫула тухсан ӳкерӗннӗ сӑн ӳкерчӗксемпе паллаштарӗҫ.

Форум Чӑваш Ен Наци вулавӑшӗнче (Шупашкар хули, Ленин проспекчӗ, 15-мӗш ҫурт) иртӗ. Вӑл 17 сехет те 30 минутра пуҫланӗ. Унта хутшӑнакансене 17 сехетре регистрацилеме тытӑнӗҫ.

Чӑваш Енри ҫулҫӳревҫӗсен пӗрремӗш форумне хутшӑнас ыйтусене 8 (8352)23-02-17 (хушма номер 128) телефон номерӗпе уҫӑмлатма пулать.

"Про Город" сайтри сӑн

Нимрен те хӑраман карчӑк теме пулать ун пирки. Ватӑскере килте питӗрсе хӑварнӑ. Анчах унӑн килте ларас килмен… карниз ҫине уҫӑлма тухнӑ.

Карчӑк карниз тӑрӑх утнине иртен-ҫӳрен асӑрханӑ. Стрелоксен 324-мӗш дивизийӗн урамӗнчи 13-мӗш ҫурт умне Инкеклӗ лару-тӑру министерствин ӗҫченӗсем ҫитсе тӑнӑ.

Карчӑк ватӑ, тӑванӗсем ӑна хваттерте питӗрсе хӑварнӑ. Ӑна вара ку килӗшмен-тӗр. Карчӑк балкон чӳречи урлӑ карниз ҫине тухнӑ.

Инкеклӗ лару-тӑру министерствин ӗҫченӗсем пусмапа ватӑ хӗрарӑм патне хӑпарнӑ та ӑна хваттере кӗме ӳкӗте кӗртнӗ. Халӗ кун тӗлӗшпе тӗрӗслев ирттереҫҫӗ.