Кӑҫал ҫулла Шупашкарта транспорт шутне чакарасшӑн. Ку ыйту пирки Шупашкар хула администрацийӗнче ака уйӑхӗн 4-мӗшӗнче иртнӗ ҫавра сӗтелте калаҫнӑ.

Кӑҫалхи утӑ уйӑхӗн 1-мӗшӗнчен тӗп хулара 532 транспорт таран чакарӗҫ. Вӗсен йышӗнче 128-шӗ – маршрутка. Вӗсем вырӑнне вӑтам тата пысӑк класлӑ автобуссем ҫынсене илсе ҫӳреме тытӑнӗҫ.

Маршрутсен схемине, номерӗсене те улӑштарӗҫ. Пӗр ҫулпа ҫӳрекен маршрутсене те пӗтерӗҫ.

Палӑртмалла: хулара кунсерен 756 транспорт ҫӳрет. Куллен ҫӳрекен 488 маршрутка «пик» сехетсенче лӑк туллиех.

«Тӑван Ен» сӑнӗ.

Шупашкар районӗн «Тӑван Ен» хаҫачӗ пӗлтернӗ тӑрӑх, Явӑш ялӗн ҫыннисем Ҫул-йӗр федераци агентствин Атӑл-Вятка регионӗнчи автомобиль ҫулӗсен федераци управленине ҫырупа тухнӑ. Вӗсем хӑйсен ялӗпе Вознесенское поселокӗ патӗнчи хӗресленнӗ ҫул тӗлӗнче светофор лартса пама ыйтнӑ. Унсӑр пуҫне ҫыру авторӗсем ҫак вырӑнти ҫула ҫутатмалла тутарасшӑн.

Анчах нумаях пулмасть килнӗ хурав явӑшсене пачах савӑнтарман. Ҫырура каланӑ тӑрӑх, ял ҫыннисен ыйтӑвне 2019 ҫулччен татса пама ҫук иккен. Ку кӑна та мар, хурав панӑ ҫырура ҫулӑн асӑннӑ тӗлӗнчен ҫын палӑртнинчен самай сахалрах каҫнине, ку шут светофор вырнаҫтарма, ҫула ҫутатмалла тума ҫителӗксӗррине асӑннӑ. Апла пулин те ял-йыша лӑплантарнӑ: ҫын мӗн чухлӗ каҫса ҫӳренине тепӗр хут тӗрӗслӗҫ.

Палӑртса хӑвармалла, ку ҫулпа транспорт нумай ҫӳрет. Ҫул урлӑ каҫнӑ чухне ачасем кӑна мар, аслисем те шикленеҫҫӗ, мӗншӗн тесен йывӑр тиев турттаракан машинӑсем ҫил хӑвӑртлӑхӗпе вӗҫсе иртеҫҫӗ.

Шупашкарти «Ҫӗнӗ хула» микрорайона троллейбус ярасси пирки унччен сайтра пӗлтернӗччӗ. Ҫак кунсенче ҫав ӗҫе кам тӑвассине палӑртнӑ. Аукционра «ТУС» акционерсен пӗрлӗхӗ ҫӗнтернӗ.

Аукциона икӗ заявка килнӗ: «ТУС» акционерсен пӗрлӗхӗнчен тата ҫак микрорайона хӑпартакан «ИСКО-Ч» акционерсен пӗрлӗхӗнчен. «ИСКО-Ч» ҫак ӗҫе 223,6 миллион тенкӗпе тума шантарнӑ, «ТУС» вара — 200,9 миллион тенкӗпе. Ҫапла майпа иккӗмӗшӗ аукциона выляса илнӗ.

Подрядчик ӗҫе виҫӗ тапхӑрпа пурнӑҫлӗ. Пӗрремӗшӗнче районти ҫула ҫӗнетесшӗн. Иккӗмӗшӗнче Сӗнтӗрвӑрри ҫулӗпе Трактор Тӑвакансен проспектӗнчи ҫула лайӑхлатӗҫ. Виҫҫӗмӗшӗнче троллейбус линийӗсене карӗҫ. Ӗҫе ҫитес ҫулхи ҫу уйӑхӗн 31-мӗшӗччен вӗҫлемелле.

Паян ирхи 6 сехет те 47 минутра Шупашкарти «Элара» савут ҫывӑхӗнчи ҫул ҫаври патӗнче троллейбус линийӗн пӑралукӗ татӑлса кайнӑ. Инкек, «За рулем» портал пӗлтернӗ тӑрӑх, 21-мӗш номерлӗ троллейбус иртсе кайнӑ хыҫҫӑн пулнӑ. Пӑралук «ГАЗель» ҫине ӳксе унӑн тӗкӗрне сиенлетнӗ-мӗн.

Чӑваш Енӗн Транспорт министерстви яваплӑ службӑсем инкеке 20 минутрах пӗтернине ӗнентерме пӑхнӑ, унтан юсав ӗҫӗ икӗ хут ытларах тӑсӑлнине йышӑннӑ. Кун пирки ведомствӑна Шупашкарти троллейбус управленийӗ хыпарланӑ.

Троллейбуссем вӑхӑтлӑх чарӑннине пула пассажирсенчен хӑшӗсем транспортран анса ҫуран та утнӑ-мӗн. Анчах, тепӗр хутчен палӑртар, юсав ӗҫӗпе вӑрах аппаланман, инкеке ҫийӗнчех сирсе троллейбуссене ӗҫлеттерсе янӑ.

Чӑваш Енӗн Транспорт тата ҫул-йӗр хуҫалӑх министерстви халӗ инкек сӑлтавне палӑртассипе ӗҫленине пӗлтерет.

Пуш уйӑхӗн 17-мӗшӗнче Шупашкар тӗлӗнче Атӑлӑн сулахай ҫыранӗ енне мотоциклпа каҫма тӑнӑ ҫамрӑк инкеке лекнӗ.

Икӗ урапаллӑ хатӗрпе вӗҫтерсе пыраканскер ҫыран хӗрне ҫитесси пӗр 500 метр юлсан шар курнӑ. Юрать-ха, хӑй ҫӑлӑнма пултарнӑ. Анчах пӑр айне лекнӗ тимӗр тусне туртса кӑларас тесе вӑл тӑватӑ сехете яхӑн нушаланнӑ.

Инкек кӑнтӑрлахи 11 сехетсенче «Чувашия» (чӑв. Чӑваш Ен) санатори ҫывӑхӗнче сиксе тухнӑ. Мотоцикла шывран кӑларас тесе каччӑ 14 сехет те 50 минутчен тапаланнӑ. Май килменнине кура ҫӑлавҫӑсенчен пулӑшу ыйтнӑ.

Чӑваш Енӗн шыравпа ҫӑлав тытӑмӗнче ӗҫлекен специалистсем пӑр ҫийӗн ҫӳреме хӗлле те хӑрушшине аса илтереҫҫӗ. Ҫитменнине тата — транспортпа. Ҫуркунне вара каламасӑрах паллӑ.

Шупашкарта пӗр хӗрарӑм хӑйӗн тимсӗрлӗхне пула автобусра майра сумкине манса хӑварнӑ, ҫав сумкӑра вара унӑн 80 пин тенкӗ укҫа тата куллен кирлӗ документсем пулнӑ. Кун пирки «Ман хулам Шупашкар» (выр. «Мой город Чебоксары») портал пӗлтерет.

Канӑҫне ҫухатнӑ хӗрарӑм Росгварди ӗҫченӗсенчен пулӑшу ыйтма ӑс ҫитернӗ, лешсем сумка юлнӑ автобуса темиҫе минутранах хӑваласа ҫитнӗ. Чарса транспорт салонне тӗрӗсленӗ.

Телее, сумка ҫавӑнтах, хӗрарӑм ларса пынӑ ларкӑч ҫинчех, выртнӑ. Ку сумка чӑнахах та ҫак хӗрарӑмӑн пулнине ӗненсен Росгварди ӗҫченӗсем ӑна пурлӑха парса янӑ.

Шупашкар хула администрацийӗн пуҫлӑхӗ Алексей Ладыков пуш уйӑхӗн 19-мӗшӗнчен пуҫласа ака уйӑхӗн 17-мӗшӗччен тӗп хулана 5 тоннӑран йывӑртарах машинӑсене кӗме чармашкӑн йышӑну кӑларнӑ. Асӑннӑ документа мэрин официаллӑ сайтӗнче вырнаҫтарнӑ.

Ҫапла майпа ҫитес тунтикунран пуҫласа Шупашкара кӗмелли ҫулсем ҫинче – тӗпрен илсен, Вӑрнар, Канаш, Сӗнтӗрвӑрри, Етӗрне тата Улатӑр шоссисенче — виҫев тӗрӗслевӗн стационарлӑ пункчӗсем ӗҫлеме тытӑнӗҫ. Унсӑр пуҫне куҫса ҫӳрекен икӗ мобильлӗ комплекса хута ярӗҫ. Вӗсем пурте талӑкӗпех ӗҫлӗҫ.

Палӑртса хӑвармалла, Шупашкар хулине ирӗк илмесӗр кӗнӗ водительсене административлӑ майпа явап тыттарӗҫ, ку статьяпа килӗшӳллӗн йӗркене пӑснисене 5 пин тенкӗлӗх штрафлама пултараҫҫӗ.

Ҫӗнӗ Шупашкарта троллейбуса пенӗ. Хальхинче транспортӑн хыҫалти чӳречи сиенленнӗ. Аса илтерер: унашкал пӑтӑрмах пӗлтӗр Шупашкарта та пулнӑччӗ.

Пуш уйӑхӗн 8-мӗшӗнче 54-мӗш маршрутпа ҫӳрекен троллейбусри ҫынсем темӗн кӗмсӗртетнине илтнӗ. Унтан вӗсем хыҫалти чӳрече ҫурӑлса кайнине асӑрханӑ.

Вырӑна полицейскисем ҫитнӗ, пассажирсемпе калаҫнӑ. Вӗсем чарӑнура аннӑ каччӑн аллинче пистолет пек япала пуррине асӑрханӑ. Ҫав ҫамрӑка шыраса тупнӑ. Вӑл — техникумра вӗренекен 16-ри каччӑ. Хайхискер троллейбуса пенине йышӑннӑ-ха, анчах ҫакна мӗншӗн тунине ӑнлантарайман. Ун тӗлӗшпе пуҫиле ӗҫ пуҫарнӑ.

Транспортӑн пӗрлехи карттипе усӑ курма меллӗ те йӳнӗ, анчах унта укҫа хурас тесен кӑштах нерв пӗтермелле. Нумаях пулмасть укҫа-тенке Перекет банкӗ онлайн-мелӗпе хума май туса панӑ. Анчах хӑшӗ-пӗрин нухрачӗ карттӑ ҫине ҫитмен. Кун пирки сайтра хыпарланӑччӗ.

Ку ҫитменлӗхе часах пӗтерме шантарнӑччӗ. Анчах карттӑ ҫине онлайн-мелпе укҫа хурассине ака уйӑхӗччен чарса лартнӑ.

Организацин техника директорӗ каланӑ тӑрӑх, программа йӗркеллех ӗҫлеменнине тупса палӑртнӑ, ҫавна май ӑна сирме 3-4 эрне кирлӗ пулӗ. Ҫапла майпа ӗнертен карточкӑна онлайн-мелпе укҫа хума пулмасть. Сервис ака уйӑхӗнче ӗҫлесе каясса шантараҫҫӗ.

Онлайн-мелпе хунӑ укҫа карттӑ ҫине пуш уйӑхӗн 12-мӗшӗччен килмест тӗк офиса пырса пӗлтерме ыйтаҫҫӗ.

Нарӑс уйӑхӗн варринчен пуҫласа Транспортӑн пӗрлехи картти ҫине (ЕТК) Перекет банкӗн онлайн мелӗпе укҫа хума май пур. Паллах, ку меллӗ. Анчах хӑшӗ-пӗри пӗчӗк пӑтӑрмаха ҫакланнӑ.

Нумайӑшӗ Транспортӑн пӗрлехи картти ҫине ҫак мелпе укҫа хунӑ. Анчах хӑшӗ-пӗрин укҫи карттӑ ҫине ҫитмен. Сервис 48 сехет кӗтме ыйтнӑ. Анчах сехетсем те, кунсем те иртнӗ – икӗ эрне хыҫа юлнӑ. Карттӑ ҫине вара укҫа пӗрех килмен.

50 ҫынна яхӑн ҫапла шар курнӑ. Халӗ компани ку ҫитменлӗхе пӗтерес тӗлӗшпе ӗҫлет. ЕТК директорӗ Артем Горбунов лӑплантарма васкать: укҫа ниҫта та ҫухалмӗ, ҫитес вӑхӑтра вӑл карттӑ ҫине куҫӗ. Куҫмарӗ тӗк 36-33-30 номерпе шӑнкӑравлама ыйтаҫҫӗ.