Иртнӗ эрнекун К.В. Иванов ячӗллӗ Чӑваш патшалӑх академи драма театрне Раҫҫей тава тивӗҫлӗ, Чӑваш халӑх артистки Валентина Трифонова сцена искусствине кӑмӑллакансене пуҫтарчӗ. Юбилей каҫне пултарулӑх ушкӑнӗсем, уйрӑм артистсем, культура ӗҫӗн ветеранӗсем хутшӑнчӗҫ.
…Экран ҫинче чылай ҫул каялла куракансене пӑлхантарнӑ сӑнарсем пӗрин хыҫҫӑн тепри улшӑнса пыраҫҫӗ. Акӑ ытарайми Сафия («Алхасуллӑ ҫамрӑклӑх», А. Абдулин), тӳрӗ кӑмӑллӑ, ачаш Ахахпи («Сан ятупа», П. Афанасьев), канӑҫсӑр Майя («Ашшӗ, амӑшӗ, ачисем», Г. Хухавили), ҫемҫе кӑмӑллӑ София («Телейсӗрскер» И. Тоболевич)… Вӗсенчен кашнинех актриса хӑнӑхнӑ меслетсемпе мар, пурнӑҫа лайӑх сӑнаса, автор уҫса кӑтартнӑ самантсене пур енлӗн шута илсе калӑпланӑ, ҫавӑнпа вӗсем тарӑн та ӑнланмалла пулса тухнӑ.
Ҫакна тухса калаҫакансенчен нумайӑшӗ, ку шутра театрӑн директорӗ Елена Николаева та, палӑртса хӑварчӗ.
– 1967 ҫулта эпир, вунсакӑр каччӑпа хӗр, театр ӑсталӑхне вӗренме тухса кайрӑмӑр, – тет Ленинградри театр, музыка тата кино институтӗнчен вӗренсе тухнӑ Владимир Бурмистров.
Ҫак эрнере Чӑваш патшалӑх
ҫамрӑксен театрӗнче «Ҫӑкӑр чӗлли» драма кӑтартнӑ. Пьеса авторӗ — Ева Лисина прозаик.
Театрта пӗлтернӗ тӑрӑх, Ева Лисина Тӑван ҫӗршывӑн аслӑ вӑрҫи хыҫҫӑнхи ҫулсенче выҫӑпа вилнӗ ачасене асӑнса «Ҫӑкӑр чӗлли» калав ҫырнӑ.
«Ашшӗсӗр тӑрса юлнӑ ҫемьен йывӑр пурнӑҫӗ калавра хӗрача куҫӗпе уҫӑлса пырать. Ҫула май чӑваш халӑхӗн наци характерӗ те курӑнсах тӑрать кунта.
Вӑрҫӑ хыҫҫӑнхи чӑваш ялӗн выҫӑллӑ-тутӑллӑ пурнӑҫне кӑтартнӑ май писательница ҫав вӑхӑтри йывӑрлӑхсене, пӗчӗк хӗрача ҫӑкӑршӑн ҫав тери тунсӑхланине кӑтартса парать.
«Ҫут тӗнчере савӑнӑҫпа хурлӑх пӗр тан валеҫӗнес пулсан, ман ҫӗршывӑм тахҫанах ырӑлӑхра пурӑнмалла», – пӗтӗмлетсе калать автор вӗҫӗнче», — хыпарланӑ театрта.
Патӑрьелти ача-пӑча ӳнер шкулӗнче Астӑвӑм кӗнекин хӑтлавӗ иртнӗ. Ӑна хатӗрлесе ҫитериччен нумай тӗпчев ӗҫӗ туса ирттернӗ. Вулавӑш ӗҫченӗсем документсем, сӑнӳкерчӗксем, асаилӳсем шыраса чылай ҫемьене ҫитнӗ.
Информацие тӗнче тетелӗнчи «Патӑрьел округӗнчи «Астӑватпӑр! Мухтанатпӑр!» Астӑвӑм кӗнеки» платформӑра та, хут ҫине те тултарса пынӑ. Кашни ялпа уйрӑм хатӗрленӗ.
Ака уйӑхӗн 18-мӗшӗнче, чӑваш поэчӗ Валентин Урташ ҫут тӗнчерен уйрӑлса кайнӑ кун, чӑваш писателӗсем, поэчӗсем, журналисчӗсем унӑн вил тӑприйӗ ҫине ҫитсе ӑна асӑннӑ. Калем ӑстисемпе пӗрле Анатолий Князев та пулнӑ. Анатолий Пантелеймонович – Елчӗк чӑвашӗ, вӑл Шупашкар районӗнчи Апашра пурӑнать.
Анатолий Князев поэтпа хурӑнташлӑ иккен. Кун пирки Лидия Филиппова журналист халӑх тетелӗнчи хӑйӗн страницинче пӗлтернӗ.
Шупашкарта «Чи лайӑх ҫамрӑк культура ӗҫченӗ» професси ӑсталӑхӗн конкурсӗ иртнӗ. Унта республикӑри тӗрлӗ округри специалистсем хутшӑннӑ.
Канаш округӗнчи культура ҫурчӗн ачасемпе ӗҫлекен методисчӗ Ольга Васильева хӑйӗн пултарулӑхӗпе паллаштарнӑ. Вӑл I степень диплома тивӗҫнӗ.
Канаш округӗнчи Сухайкассинчи вулавӑшӗ «Киле – кӗнеке» акци ирттерме тытӑннӑ. Халӗ вулавӑша ҫӳреймен ҫынсем те кӗнеке вулама пултараймаҫҫӗ.
Ку акци уйрӑмах тивӗҫлӗ канури ҫынсемшӗн меллӗ. Кӗнекене киле пырсах параҫҫӗ. Вулавӑш ӗҫченӗсем те ҫынсен йӑл куллине курса савӑнаҫҫӗ.
Чӑваш ҫыравҫисем Екатеринбурга тухса кайни ҫинчен эпир унччен пӗлтернӗччӗ-ха. Паян, ака уйӑхӗн 18-мӗшӗнче, унти В.П.Крапивин ячӗллӗ Свердловск облаҫӗнчи вулавӑшра ача-пӑча наци литературин регионсем хушшинчи «Народы дружат книгами» (чӑв. Халӑхсем кӗнеке урлӑ туслӑ) кунӗ иртнӗ.
Программӑра «Библиотека – культурӑсен диалогӗ валли лапам» ҫавра сӗтел, тӗлпулусем, ӑсталӑх лаҫҫисем тата кӗнеке куравӗсем пулнӑ.
Ака уйӑхӗн 25-мӗшӗнче Чӑваш патшалӑх академи драма театрӗнче Валентина Трифонован пултарулӑх каҫӗ иртӗ.
Валентина Ивановна — Чӑваш АССР тава тивӗҫлӗ артистки (1979), чӑваш халӑх артистки (1989), Раҫҫей тава тивӗҫлӗ артистки (1998).
Пулас артистка 1950 ҫулхи ака уйӑхӗн 25-мӗшӗнче Тӑвайӗнче ҫуралнӑ. Ленинградри А.Н. Островский ячӗллӗ патшалӑхӑн театр, музыка, кинематографи институтӗнчен вӗренсе тухнӑ. 1972 ҫултан пуҫласа 2008 ҫулччен Чӑваш патшалӑх академи драма театрӗнче ӗҫленӗ.
Валентина Трифонова ҫинчен тӗплӗнрех РУВИКИн чӑваш уйрӑменче вуласа пӗлме май пур.
Шупашкарти Ф.П. Павлов ячӗллӗ музыка училищинче вӗренекенсем Ҫӗнтерӳ кунне халалласа «Ҫӗнтерӳ юррисем» концерт хатӗрленӗ. Ӑна вӗсем ҫу уйӑхӗн 5-мӗшӗнче, 18 сехет те 30 минутра, кӑтартӗҫ.
Программӑна пирӗн халӑхӑмӑрӑн мухтавлӑхне палӑртса ҫырнӑ хайлавсене кӗртнӗ. Концерта вӗрсе тата ҫапса каламалли инструментсем илем кӳрӗҫ.
Концерта музыка училищин солисчӗсем, ансмблӗсем, оркестрӗ хутшӑнӗ.
Дирижёрӗ — Чӑваш Республикин культурӑн тава тивӗҫлӗ артисчӗ Николай Смирнов. Концерта Чӑваш Республикин культурӑн тава тивӗҫлӗ ӗҫченӗ Элла Леонтьева ертсе пырӗ. Концертмейстерсем: Наталья Тихонова, Ирина Сысоева, Елена Ананьева, Татьяна Асламас, Нина Кульпина.
Иртнӗ эрнере Чӑваш Енӗн наци вулавӑшӗнче Владимир Степановӑн «Ӑннӑ та ӑнман кун» кӗнекине тишкернӗ.
«Аслӑ классенче вӗренекенсем валли хатӗрленӗ кӑларӑм кӑҫалхи кӑрлач уйӑхӗнче Чӑваш кӗнеке издательствинче кун ҫути курнӑ. Унӑн алҫырӑвӗ ачасемпе ҫамрӑксем валли чӑвашла ҫырнӑ произведенисен 2024 ҫулхи конкурсӗнче ҫӗнтернӗ», — хыпарланӑ издательство сайтӗнче Ольга Австрийская.
Кӗнекене хаклама поэтсемпе прозаиксем, журналистсемпе критиксем, преподавательсемпе студентсем тата юрӑҫсем пуҫтарӑннӑ.
Кӗнеке редакторӗ Ольга Иванова алҫырупа хӑпартланса ӗҫленине палӑртса хӑварнӑ. «Владимир Васильевичӑн хӑйӗн стилӗ, ҫырас мелӗ. Темиҫе предложени вуласанах ку хайлава вӑл шӑрҫаланине пӗлме пулать. Ҫыравҫӑ тӗлӗнмелле танлаштарусемпе усӑ курать, пулӑмсене час-часах пысӑклатса кӑтартма юратать, сӑнарӗсем хӑйсенчен те, пӗр-пӗринчен те тӑрӑхласа-йӗплесе илме ӑста», – тесе ырланӑ ӗҫтешне Ольга Михайловна.
Хӑтлава хутшӑннӑ ытти ҫын та кӗнекене мухтанӑ. Сӑмахран, Николай Осипов критик, Лариса Петрова, Василий Кервен, Раиса Воробьева сӑвӑҫсем те.
+14.3 °C