max.ru/pcheb_21 сӑнӳкерчӗкӗ

Ҫӗнӗ Шупашкарта пурӑнакан пӗр хӗрарӑм питех те качча каяс тенӗ. Унӑн пӗр арҫын пулнӑ-ха, анчах вӑл ӑна пӑрахса кайнӑ. Ҫавӑн хыҫҫӑн хайхи хӗрарӑмӑн ӑна ҫухатас килмен, вӑл ӑна каялла тавӑрасшӑн ҫуннӑ.

Хӗрарӑм хӑйне качча каймалла мар тунӑ тесе минренӗ, ҫавна тасатмалла тесе шухӑшланӑ.

Ҫавӑн пек шухӑшпа минресе юмӑҫа ӗненнӗ, ӑна тӑватӑ уйӑх хушши укҫа тӳлесе пурӑннӑ. Ара, лешӗ хӗрарӑм ҫӑмӑл мар лару-тӑрӑва лекнӗ, ӑна тасатма самай вӑхӑт кирлӗ тесе каланӑ та хӗрарӑм ӗненнӗ. Ӑна вӑл пӗтӗмпе 100 пин тенкӗ укҫа куҫарса панӑ.

Кайран юмӑҫ хайхипе ҫыхӑнӑва татнӑ.

Ун хыҫҫӑн хӗрарӑм йӗрке хуралҫисенчен пулӑшу ыйтнӑ. Пакунлисем юмӑҫа Чӗмпӗрте тытса чарнӑ. Халӗ вӗсем ҫак хӗрарӑм-юмӑҫ тата миҫе айвана улталанине тӗрӗслеҫҫӗ.

Инкеклӗ лару-тӑру министерстви тунӑ сӑн

Улатӑр хулинче пушарта арҫын вилнӗ. Ун патне хӑнана килнӗ ҫынсем пульницӑна лекнӗ.

Ку инкек авӑн уйӑхӗн 18-мӗшӗнче, эрнекун, пулнӑ. Коммунарсен урамӗнчи йывӑҫ ҫурт 23 сехет те 10 минутра ҫунма тытӑннӑ. Ҫав самантра пӳртре кил хуҫи тата унӑн пӗлӗшӗсем пулнӑ: 1983 тата 1968 ҫулсенче ҫуралнӑ икӗ арҫын тата 1964 ҫулхи хӗрарӑм.

Шел те, кил хуҫи пушарта вилнӗ. Хӑнасене пульницӑна илсе кайнӑ. Вырӑна тухнӑ следователь арҫынсенчен пӗрне тӗтӗм-сӗрӗмрен урама илсе тухнӑ та ӑна васкавлӑ медпулӑшу тухтӑрӗсене панӑ.

Малтанлӑха палӑртнӑ тӑрӑх, пушар пирус асӑрханмасӑр туртнӑран тухнӑ. Сӑлтавне палӑртма пушар-техника экспертизи ирттерӗҫ.

Первый чувашский каналтан илнӗ сӑнӳкерчӗк

Шупашкарта пӗр таджика тытса чарнӑ. Ҫав арҫын пирӗн ҫӗршыва килме килнӗ те лӑпкӑн пурӑнма шутламан. Чӑваш Енре вӑл таджиксем вырӑссенчен чаплӑрах тесе калама, радикаллӑ тӗрлӗ шухӑш сарма тытӑннӑ.

Сӑмах май каласан, ҫав арҫын Раҫҫейӗн гражданствине те илсе ӗлкӗрнӗ.

Хӑй килсе тӗплӗннӗ ҫӗршыва тата унти халӑха юратман ҫынна Федерацин хӑрушсӑрлӑх службин ӗҫченӗсем тупса палӑртса тытса чарнӑ.

Халӗ ҫав этемӗн Раҫҫей паспортне туртса илнӗ. Паспортсӑр юлнипе пӗрлех ӑна Раҫҫее тепӗр 35 ҫулсӑр килмелле мар тунӑ.

Юлашки вӑхӑтра пирӗн ҫӗршывра мигрантсемпе ҫыхӑннӑ саккунсене ҫирӗплеткелерӗҫ. Ют ҫӗршывран ҫемйисемпе килекенсем хыснана та йывӑрлӑх кӳреҫҫӗ: вӗсене сиплемелле, шкулта вӗрентмелле, тӗрлӗ пособи тӳлемелле.

Первый чувашский каналтан илнӗ сӑнӳкерчӗк

Чӑваш Енре пӗр яш пикене пӑвса вӗлерни пирки Чӑваш халӑх сайчӗ унччен пӗлтернӗччӗ.

Аса илтерер: пӑтӑрмах ҫак уйӑхра пулса иртнӗ. Авӑн уйӑхӗн 1-мӗшӗнче Шупашкарти Трактор тӑвакансен проспектӗнчи пӗр ҫуртра 15 ҫулти хӗр виллине тупнӑ.

Следстви версийӗ тӑрӑх, ӑна хӑйӗнпе тантӑш ҫамрӑк пӑвса вӗлернӗ. Вӗсем вӑрҫӑнса кайнӑ. Каччӑ хӗре зарядник пралукӗпе пӑвнӑ.

Пӑтӑрмах хыҫҫӑн РФ Следстви комитечӗн Чӑваш Енри тӗпчевҫисем пуҫиле ӗҫ пуҫарнӑ.

Ҫак ӗҫе тума пултарнӑ ҫамрӑка йӗрке хуралҫисем ҫийӗнчех тытса чарнӑ. Ӑна Сӗнтӗрвӑрри хулинче шыраса тупнӑ. Вӑл айӑпне йышӑннӑ.

МИХри «Первый чувашский» каналта

МИХсем хыпарлани тӑрӑх пӗлтернине ӗненсен, яш Сӗнтӗрвӑрри тӑрӑхӗн пуҫлӑхӗн ҫумӗн ывӑлӗ-мӗн. Унӑн ашшӗ ӗҫрен кайнӑ тесе пӗлтернӗ.

max.ru/progorod21 каналтан илнӗ сӑнӳкерчӗк

Паян пурнӑҫ тулӑх та ашшӗ-амӑшӗ ывӑл-хӗрне ним мар мотоцикл туянса параҫҫӗ. Пӗр-пӗринпе ӑмӑртмалла тенӗ пек ярӑнаҫҫӗ унпа яшсемпе хӗрсем. Шучӗпе «А» категориллӗ водитель прави кирлӗ те, анчах ӑна никам та пӑхса тӑмасть, руль умне ларса вӗҫтерет.

Авӑн уйӑхӗн 11-мӗшӗнче Муркаш районӗнчи Шомик ялӗ тӗлӗнче пулса иртнӗ инкекре Шупашкарта пурӑнакан, тӑххӑрмӗш класра вӗренекен икӗ ача аманнӑ. Питбайкпа пыракан арҫын ача ҫул айккинче выртакан пӗрене ҫине пӑрӑнса кайса персе аннӑ. Ун хыҫӗнче тепӗр питбайкпа вӗҫтерсе пыракан хӗрача та ҫав пӗрене ҫинех пырса кӗнӗ.

Вӗсем иккӗшӗ те кӗлетекене шанчӑклӑ хӳтӗлекен тумпа пулнӑран йывӑр суранланса пӗтмен, апла пулин те иккӗшне те больницӑна илсе кайнӑ.

Прокуратура архивӗнчи сӑн

Паян, авӑн уйӑхӗн 13-мӗшӗнче, Шупашкар хулинчи «Ялав» ҫурт-йӗр комплексӗ ҫывӑхӗнче, Игумнов урамӗнче, 15 ҫулти питбайкер ҫапӑнса вилнӗ.

Ку инкек ирхи 9 сехет те 15 минутра пулнӑ. Малтанлӑха пӗлтернӗ тӑрӑх, каччӑ руле итлеттереймен – бордюра пырса тӑрӑннӑ та вилмеллех аманнӑ. Калинин районӗн прокуратури халӗ ку ӗҫ-пуҫа тӗрӗсленине тӗрӗслесе тӑрӗ.

Сӑмах май, «Ҫӗнӗ хула» микрорайонта (вӑл «Ялав» ҫурт-йӗр комплексӗнчен инҫе мар) ҫак канмалли кунсенче мотоӑмӑрту иртнӗ. Республика прокуратури пӗлтернӗ тӑрӑх, вилнӗ питбайкер унта хутшӑнакан ҫын пулман.

https://static.tildacdn.com сӑнӳкерчӗкӗ

Чӑваш Енре пилотсӑр вӗҫекен аппаратсене тата ракетӑна пула хӑрушлӑх пирки час-часах пӗлтереҫҫӗ.

Кӗҫӗр Чӑваш Енре пилотсӑр вӗҫекен аппарата ҫапса антарнӑ. Кун пирки республика Элтеперӗ Олег Николаев МАХри хӑйӗн каналӗнче пӗлтернӗ.

Сӑмах май каласан, хыпарта «по предварительной информации» (чӑв. Малтанласа пӗлтернӗ тӑрӑх) тесе палӑртса хӑварнӑ.

Олег Николаев ҫырнӑ тӑрӑх, шар куракансем пулман. Оперативлӑ службӑсем малалла ӗҫленине хыпарланӑ.

Ҫынсене Элтепер лӑпкӑ пулма чӗнсе каланӑ. Ҫапли-ҫапла пулӗ те, анчах сирена янӑрама пуҫласан та ҫынсем пӑлханаҫҫӗ. Пурте мар-ха. Теприсем шикленмеҫҫӗ. Сӑмах май каласан, пилотсӑр вӗҫекен аппаратсем Чӑваш Ене ҫеҫ мар, ҫӗршывӑмӑрӑн ҫурҫӗр регионӗсене те ҫитеҫҫӗ.

usinsk.gosuslugi.ru сайтри сӑн

Улатӑр хулинче пурӑнакан 89 ҫулти хӗрарӑм ултавҫӑсен аллине лекнӗ. ШӖМ пӗлтернӗ тӑрах, вӑл вӗсене 9,5 миллион тенкӗ куҫарса панӑ.

Утӑ уйӑхӗн вӗҫӗнче ун патне килти телефон ҫине палламан арҫын шӑнкӑравланӑ та хӑйӗнпе йӗрке хуралҫи тесе паллаштарнӑ. Хайхискер кинемее вӑл террористсен организацине 1 миллион тенкӗ куҫарнӑ тесе хӑратнӑ. Яваплӑхран тарас тесен «преступление» пӗрле уҫӑмлатма сӗннӗ, мӗн хушнине йӑлтах пурнӑҫлама хушнӑ.

Кинемей пухнӑ укҫине хулари банкоматсенче пайӑн-пайӑн илсе палламан ҫынсене парса тӑнӑ. Ҫавӑн пекех вӑл 87 ылтӑн «Георгий Победоносец» инвестици укҫине тыттарса янӑ. Ҫапла вӑл укҫан – 8,5 миллион тенкӗ, ылтӑн укҫапа 1 миллион ытла тенкӗ парса янӑ. Ҫак таранччен вӑл ултавҫӑсемпе калаҫнине банка юлашки 100 пин тенкине илме килсен пӗлнӗ.

Ку тӗслӗх тӗлӗшпе пуҫиле ӗҫ пуҫарнӑ. Ҫакӑ паллӑ: ватӑскер пӗччен пурӑнать, ачисем регион тулашӗнче тӗпленнӗ, ҫавӑнпа унӑн никампа та канашлама май пулман.

Махри Прогород каналтан илнӗ сӑнӳкерчӗк

Пирӗнпе кӳршӗллӗ республикӑра паян инкек пулса иртнӗ. Сӑмах Тутарстан пирки пырать. Унта самолёт персе аннӑ.

Ҫӑмӑл моторлӑ «Cessna» Шемордан ялӗнче ӳкнӗ.

Асӑннӑ самолёт тренировкӑна тухнӑ иккен. Кабинӑра инструктор тата лётчика вӗренекен ҫын ларса пынӑ. Тахӑш самантра самолёт телевышкӑна персе лекнӗ. Унтан вӑл персе аннӑ. Самолёт пӗр ҫыннӑн картишне ӳкнӗ.

Инкекре кил хуҫисем тата вӗсен пурлӑхӗ шар курман. Апла пулин те пысӑк ҫухатусӑр иртмен. Самолётри инструктор тата самолётпа ҫӳреме вӗренекен ҫын — курсант – пурнӑҫӗ ҫапла майпа сарӑмсӑр татӑлнӑ. Тепӗр майлӑ каласан, ку инкек сахалтан та икӗ ҫемьене пысӑк хуйхӑ илсе килнӗ. Йывӑр хуйха тӳссе ирттерме вилнисен ҫывӑх ҫыннисене самай вӑхӑт кирлӗ пулӗ.

Патшалӑх автоинспекцийӗ тунӑ сӑн

Паян, авӑнӑн 8-мӗшӗнче, 13 сехет те 30 минутра Канаш округӗнче хӑрушӑ авари пулнӑ: икӗ «Лада Гранта» ҫапӑннӑ.

Малтанлӑха палӑртнӑ тӑрӑх, 24 ҫулти водитель Чӗмпӗр хули еннелле кайнӑ чухне хирӗҫ ҫул ҫине тухса кайнӑ та тепӗр машинӑпа ҫапӑннӑ. Тепӗр машина рулӗ умӗнче 58 ҫулти арҫын ларнӑ.

Аварире йывӑр сурансене пула 24 ҫулти водитель тата унпа пӗрле ларса пынӑ 21 ҫулти каччӑ пурнӑҫран уйрӑлнӑ. Патшалӑх автоинспекцийӗн инспекторӗсем ҫакна палӑртнӑ: 24-ри водитель 2023 ҫулта права илнӗ, кӑҫал вӑл ҫул-йӗр ҫинчи правилӑсене пӑснӑшӑн административлӑ майпа 20 хутчен явап тытнӑ.

Тепӗр водителе, 58 ҫулти арҫынна, пульницӑна илсе кайнӑ.

Халӗ ӗҫ-пуҫа уҫӑмлатаҫҫӗ.