Чӑваш патшалӑх гуманитари ӑслӑлӑхӗсен институчӗн сӑнӳкерчӗкӗ

Пуш уйӑхӗн 27-мӗшӗнче Шупашкарти «Радуга» (чӑв. Асамат кӗперӗ) культурӑпа курав центрӗнче Праски Витти ӳнерҫӗн «Салтак юррисем» куравӗ уҫӑлнӑ.

«Тӗлӗнмелле ӳкерчӗксем. Хӑвӑрах курма пултаратӑр!» — хыпарланӑ курав пирки хулари шкулсенчен пӗринче чӑваш чӗлхи вӗрентекенӗнче ӗҫлекен Александр Степанов халӑх тетелӗнчи хӑйӗн страницинче.

Праски Витти – чӑваш халӑх художникӗ, Раҫҫей тава тивӗҫлӗ художникӗ. Ӑста шухӑшланӑ тӑрӑх, «салтак юррисем — халӑх поэзийӗн чи ҫӳллӗ шайӗ. Унта — куҫҫуль витӗр тухнӑ сӑмахсем, ҫывӑх ҫынсемпе тӑвансене юратни».

Художник салтак юррисем сӑмахпа, шалти пуянлӑхпа, этем кӑмӑл-туйӑмӗпе тыткӑнланине палӑртса хӑварнӑ. «Манӑн ӳкерчӗксем текстпа ҫума ҫуммӑн: ҫав сӑмахсем ҫумӗнчи пушӑ вырӑнсене эпӗ сӑрӑпа тултаратӑп», – тенӗ Праски Витти.

cheb-centr.soc.cap.ru/press-centr сӑнӳкерчӗкӗ

Ҫӗнӗ Шупашкарта ватӑ ҫынсем валли «Вдохновение возраста» (чӑв. Ҫулпа хавхаланса) ташӑ фестивалӗ иртнӗ. Ӑна асӑннӑ хулари халӑха социаллӑ пулӑшу кӳрекен комплекслӑ центр йӗркеленӗ. Фестивале унти 9-мӗш вӑтам шкулта пуҫтарӑннӑ.

Ташӑ мероприятине Шупашкарти халӑхӑн социаллӑ ыйтӑвӗсене тивӗҫтерекен комплекслӑ центрӗнчи пултарулӑх коллективӗсем те хутшӑннӑ.

«Пирӗн пата ҫӳрекен ватӑсем унтан хавхаланса таврӑнчӗҫ. Центртан виҫӗ коллектив пулчӗ. Фестиваль флешмобпа вӗҫленчӗ», — пӗлтереҫҫӗ Шупашкарти комплекслӑ центрта.

Паян, пуш уйӑхӗн 28-мӗшӗнче, Шупашкарта Пӗтӗм тӗнчери балет фестивалӗ пуҫланнӑ, «Симфония 1» балетпа, уҫӑлнӑ. Вӑл кӑҫалхипе 29-мӗш хут иртет. Фестиваль ака уйӑхӗн 6-мӗшӗнче вӗҫленӗ. Ун чухне гала-концерт пулӗ. Унта тӗнче шайӗнчи ҫӑлтӑрсем хутшӑнӗҫ.

Артистсем Чӑваш патшалӑх оперӑпа балет театрӗн сцени ҫинче пултарулӑхне кӑтартӗҫ.

Чӑваш Енри спортсменка Ирина Вразарь тӑватӑ енлӗ кӗрешӳ енӗпе иртнӗ «Шиповка юных» ӑмӑртура икӗ медаль ҫӗнсе илнӗ. Тупӑшу Хусан хулинче иртнӗ.

13 ҫулти Ирина 600 метрлӑ дистанцие 1 минут та 40,52 ҫеккунтра парӑнтарнӑ. Пӗтӗмӗшле зачетра 377 очко пухнӑ.

Ҫапла пирӗн ентеш ылтӑн тата пӑхӑр медальсем ҫӗнсӗ илнӗ.

"Контактри" сӑн

Йӗпреҫ округӗнче аслӑ ӳсӗмри ҫынсем валли хутшӑнмалли центр уҫӑлнӑ.

Кунта вӗсем пӗрле пухӑнса пултарулӑхпа аппаланаҫҫӗ, вӗренеҫҫӗ.

Кӗҫех унта ҫӳрекенсем финанс пӗлӗвӗ енӗпе, сывлӑха упрассипе ӑс пухма тытӑнӗҫ. Ҫавӑн пекех центрта вӗренӳ, спорт мероприятийӗсене те йӗркелеме палӑртнӑ.

Паян «Ҫамрӑксен хаҫачӗ» «Поэзи баттлӗ» конкурс ирттерчӗ. Кӑҫал унта 15-ӗн хутшӑнчӗҫ. Чи кӗҫӗнни Шупашкарти 5 ҫулти Айдар Иванов пулчӗ. Унӑн кукамӑшӗ Татьяна Иванова та конкурса хутшӑнчӗ. Чи асли – Элӗк салинчен килнӗ Любовь Константинова, вӑл – 76 ҫулта.

Тупӑшу питӗ хӗрӳ иртрӗ. Финала Вӑрмар тӑрӑхӗнчи Александр Кузьмин тата Ҫӗмӗрле хулинчи Татьяна Иванова тухрӗҫ. Ҫӗнтерӳҫӗ ятне Александр Кузьмин тивӗҫрӗ. Вӑл Чупайри шкулта акӑлчан чӗлхине вӗрентет. Александр Иванович тӗп парнене - музыка колонкине – тивӗҫрӗ. Татьяна Иванова вара - «Ҫамрӑксен хаҫатне» ҫур ҫуллӑх ҫырӑнмалли сертификата. Конкурса килнӗ кашни ҫыннах пӗчӗк парнеллӗ пулчӗ.

"Контактри" сӑн

Чӑваш Енри ирӗклӗ кӗрешӳ шкулӗнче ӑсталӑхне туптакан Мария Александрова Раҫҫей шайӗнчи ӑмӑртура пӑхӑр медаль ҫӗнсе илнӗ. Ӑмӑртӑва 18 ҫул тултарман спортсменсем хутшӑннӑ.

Пирӗн ентеш 40 килограмм тайманнисен виҫе категорийӗнче вӑй виҫсе пьедесталӑн виҫҫӗмӗш картлашки ҫине хӑпарнӑ. Палӑртса хӑварар: Мария Александрова Владимир Григорьев тата Максим Степанов тренерсем патӗнче ӑсталӑхне туптать.

Алексей Макаревский страницинчен илнӗ сӑнӳкерчӗк

Балашиха хулинчи «Солнышко» (чӑв. Пӗчӗк хӗвел) кану центрӗнчи «Тӑвансемӗр» вырӑс-чӑваш юррин ансамблӗ «Музыка в метро» проекта хутшӑннӑ.

Ансамбль ертӳҫи — Лидия Петрова.

Проект пирки Алексей Макаревский халӑх тетелӗнчи хӑйӗн страницинче пӗлтернӗ тӑрӑх, вӑл — нумай енлӗ проект.

Музыкантсем ҫӗнӗ итлекенсене тупаҫҫӗ, пассажирсем ҫула май тенӗ пек юрӑ-кӗвӗпе киленеҫҫӗ.

cap.ru сӑнӳкерчӗкӗ

Утӑ уйӑхӗн 18-19-мӗшӗсенче Чӑваш Енре ӑратлӑ выльӑх-чӗрлӗх аукционӗ тата «Сӗт вӑхӑчӗ» фестиваль иртет. Вӗсене «Чебомилк» агрокомплексра йӗркелӗҫ.

Ӑратлӑ выльӑх аукционӗ кӑҫалхипе иккӗмӗш хут иртӗ. Унта ҫивӗч ыйтусене сӳтсе явӗҫ. Аукциона хутшӑнакансем ӑратлӑ выльӑх туянма кӑна мар, опытпа пайланма та пултараҫҫӗ.

» Пуринчен малтан» каналти видеоран илнӗ сӑнӳкерчӗк

Чӑваш Енре «Чӗнтӗрлӗ чаршав» республика конкурсне пӗтӗмлетнӗ. Кун пирки Телеграмри» Пуринчен малтан» каналта пӗлтернӗ.

«Чи лайӑх сценографи» номинацире «Сашка» спектакле илемлетнӗ Булат Ибрагимова палӑртнӑ (Чӑваш патшалӑх драма эксперимент театрӗ).

«Музыка енчен чи лайӑх илемлетнӗ спектакль» номинацире Чӑваш патшалӑх пукане театрӗн ӗҫченӗ Татьяна Алешина ҫӗнтернӗ.

Вырӑс драма театрӗнче тӑрӑшакан Вадим Валов «Иккӗмӗш планри чи лайӑх роль» номинацире палӑрнӑ.

«Ачасем валли чи лайӑх спектакль» – «В поисках Большой Медведицы» (К.В.Иванов ячӗллӗ Чӑваш патшалӑх академи драма театрӗ).

«Чи лайӑх арҫын ролӗ» номинаци ҫӗнтерӳҫи - Ҫеҫпӗл Мишши ячӗллӗ ҫамрӑксен театрӗнчи Николай Миронов. Вӑл «Мцыри» спектакльте тӗп роле вылянӑ.

Екатерина Апполонова (Вырӑс драма театрӗ) «Чи лайӑх хӗрарӑм ролӗ» номинацире палӑрнӑ.

«Ҫулталӑкри чи лайӑх спектакль» – «Мцыри» постановка. Ӑна Ҫеҫпӗл Мишши ячӗллӗ ҫамрӑксен театрӗн сцени ҫинче лартнӑ.