Нарӑс уйӑхӗн 8-мӗшӗнче Ҫӗнӗ Шупашкарта пурӑнакан хӗрача килтен тухса кайнӑ. Ӑна шырама пуҫланӑ. Кун тӗлӗшпе пуҫиле ӗҫ пуҫарнӑ.

Хӗрача тупӑннӑ. Паян ӑна Шупашкарта шыраса тупнӑ. Софьйӑна следователь патне илсе ҫитернӗ.

Софья Савельева 13 ҫулта. Следовательсем каланӑ тӑрӑх, хӗрача килтен хӑйӗн ирӗкӗпе тухса кайнӑ, ятарласа таврӑнман. Халӗ ку лару-тӑрӑва тӗпчеҫҫӗ.

Александр Белов журналист ЧР Элтеперӗнчен Олег Николаевран интервью илнӗ. Олег Алексеевич тӗрлӗ ыйтӑва хуравланӑ: хысна, суйлав, санкцилемен митинг иртни пирки…

Журналист харпӑр пурнӑҫа пырса тивекен ыйтусем те панӑ. Александр Белов Элтеперӗн правительство ҫуртӗнче тӑвансем пурри-ҫуккипе кӑсӑкланнӑ. «Тӑвансемпе ӗҫлеме меллӗ мар», - тенӗ Элтепер.

Олег Николаевӑн мӑшӑрӗ Наталья Николаева Чӑваш Енри Хӗрарӑмсен пӗрлӗхне ертсе пырать. Унӑн Правительство ҫуртӗнче пӳлӗм пур тени чӑнах та тӗрӗс-и? Журналист ҫапла ыйтсан Олег Алексеевич хуравланӑ: «Эпӗ эсир пӗлнинчен сахалрах пӗлетӗп пулмалла. Правительство ҫуртӗнче хӑш-пӗр шайри пуҫлӑхӑн ҫеҫ пӳлӗм пур. Эпӗ пӗлнӗ тӑрӑх, манӑн мӑшӑр ун пеккисен йышне кӗмест».

Канашри компани ҫӑмран тата кӗҫҫерен ҫӑматӑ тата пушмак йӑвалать. Унӑн продукцийӗпе нимӗҫсен пӗр компанийӗ кӑсӑкланнӑ, туянас кӑмӑллине пӗлтернӗ.

Енсем малтанласа калаҫнӑ тӑрӑх, Германири атӑ-пушмак кӑларакан предприяти ҫӑматӑ тата килте тӑхӑнмалли пушмак (ҫав шутра — дизайнер хатӗрлени те) хатӗрлеме саккас пама хатӗр. Кун пирки Экспорта ӑстакан продукцие кӑларма пулӑшакан центр ертӳҫи Григорий Данилов пӗлтернӗ.

Ҫитес вӑхӑтра пирӗн патри компани кӗҫерен тӗслӗхлӗх парти пушмак хатӗрлесе пӑхӗ.

Чӑваш наци музейӗ паян пӗр ӗмӗрхине уявлать. Ҫав ятпа ӑна Раҫҫей Президенчӗ Владимир Путин телеграммӑпа саламланӑ.

Халӑх пархатарӗпе историйӗн управҫин ӗҫченӗсем музейпа филиалӗсене аталантарассишӗн нумай ӗҫ туса ирттернине палӑртнӑ.

«Сирӗн тӗпчев, экспозици ӗҫӗ-хӗлӗр, вӗрентӳ, ҫутӗҫ, информаци проектӑрсем Чӑваш Ен тӗп хулипе республикӑн культура тата общество пурнӑҫне пуянлатаҫҫӗ», — тесе ҫырнӑ правительство телеграмминче.

Паян музей юбилей мероприятийӗсене уҫрӗ. Ака уйӑхӗн 15-17-мӗшӗсенче «Национальный музей: 100 лет в истории Чувашии» (чӑв. Наци музейӗ: Чӑваш Ен кун-ҫулӗнчи 100 ҫул) ятпа регионсем хушшинчи музей форумӗ иртӗ. Вӑл юбилей мероприятийӗсенчен чи пӗлтерӗшли теме те юрать. Ӑна йӗркелеме федерацин Атӑлҫи округӗнчи музейсен канашӗ хутшӑнӗ.

Тверь облаҫӗнчи Пено районӗнчи Олений Рог 2 ялта ӗнер, нарӑс уйӑхӗн 11-мӗшӗнчи каҫхине, пушар алхаснӑ. Унта бытовка ҫуннӑ. Ҫавӑнта Чӑваш Енрен пӳрт хӑпартма кайнӑ арҫынсем тӗпленнӗ. Пушар хуралтӑра шалта тухни паллӑ. Тверь тӑрӑхӗнчи специалистсем пӗтӗмлетнӗ тӑрӑх, арҫынсем (вӗсем тӑваттӑн пулнӑ) сӗрӗмпе вилнӗ. Пӑтӑрмах хыҫҫӑн пуҫиле ӗҫ пуҫарнӑ.

Усал хыпара пӗлнӗ хыҫҫӑн Чӑваш Ен Этеперӗ Олег Николаев Тверь облаҫӗн кӗпӗрнаттӑрӗпе Игорь Руденяпа ҫыхӑннӑ. Республика ертӳҫи Инстаграмра пӗлтернӗ тӑрӑх, ентешсене Чӑваш Ене илсе килме пулӑшӗҫ. Олег Николаев калашле, шел те, вӑл вӗсемшӗн юлашки ҫул пулӗ. Ҫамрӑк, вӑйпитти, ҫут тӗнче илемӗпе савӑнса та киленсе пурӑнмалли арҫынсем пурнӑҫран уйрӑлнӑ...

Нарӑс уйӑхӗн 10-мӗшӗнче Шупашкарта 101С маршрутка хутлакан общество транспорчӗ ҫул урлӑ каҫакан ҫамрӑк хӗрарӑма ҫапса хӑварнӑ. Ҫапла, ҫапса хӑварнӑ. Шупашкарти «Пир-авӑр комбиначӗ» чарӑну тӗлӗнче светофорӑн хӗрлӗ ҫутипе вирхӗннӗ машина чарӑнса тӑман, инкек вырӑнӗнчен тапса сикнӗ. Ҫапах та ҫул-йӗр инспекторӗсем ӑна тупса палӑртнӑ. Вӑл — 51 ҫулта арҫын.

Урине хуҫнӑ хӗрарӑма Республикӑн клиника пульницине илсе кайнӑ. Хӗрарӑмпа «ProГород» портал корреспонденчӗсем ҫыхӑннӑ. Аманнӑ ҫын вӗсене ӗнер пӗлтернӗ тӑрӑх, маршрутка водителӗ те, маршрут хуҫи те унпа ҫыхӑнман.

cap.ru сӑн ӳкерчӗкӗ

2021 ҫул. 21-мӗш ӗмер. 21-мӗш регион. Хитре хисепсем. Нумаях пулмасть Ҫӗмӗрлере 21-мӗш ача ҫуралнӑ.

Ҫак ятпа телейлӗ ашшӗ-амӑшне хӑйне евӗр сертификатпа чысланӑ. 21-мӗш ҫуралнӑ ачана илемлӗ ят панӑ. Вӑл – Анастасия.

Нарӑсӑн 9-мӗшӗнче Ҫӗмӗрле тӑрӑхӗнче сайра тӗл пулакан ятлӑ арҫын ача кун ҫути курнӑ – Янис. Ят пирӗн пата Латвирен килнӗ.

Ҫав кунах Ҫӗмӗрлери ЗАГСра тепӗр ҫемье ача ҫуралнине ӗнентерекен документ илнӗ. Вӑл - Данила

rv-ryazan.ru сайтри сӑн

Юлашки талӑкра 102 ҫын сывалнӑ. Чирлекенсем сахал пулнӑ: 79 ҫын инфекциленнӗ.

Паянхи кун тӗлне 20388 ҫын кӑшӑлвируспа чирленӗ. Вӗсенчен 18559-шӗ сывалнӑ. Ку таранччен 941 ҫын вируса парӑнтараймасӑр вилнӗ. Юлашки талӑкра 6 ҫыннӑн пурнӑҫӗ татӑлнӑ.

Республикӑра кӑшӑлвируспа чирленисен 91 проценчӗ сывалнӑ. 4,6 проценчӗ вилнӗ. Хальхи вӑхӑтра стационарта тата килте амбулатори мелӗпе 888 пациент сипленет.

bitnovosti.com сайтри сӑн

Етӗрне районӗнче 62 ҫулти хӗрарӑм суд сакки ҫине ларнӑ. Вӑл хӗрне ҫӗҫӗпе суранлатнӑ. Куншӑн суд ӑна тӗрмене хупмасӑр 3 ҫуллӑха айӑпланӑ.

Суд ларӑвӗнче палӑртнӑ тӑрӑх, пӗлтӗр раштав уйӑхӗн пуҫламӑшӗнче вӑл хӗрӗпе хирӗҫсе кайнӑ. Лешӗ ачине воспитани паман-мӗн, килтен тӑтӑшах тухса кайнӑ, темиҫе кун ҫухалса ҫӳренӗ.

Хӗрарӑм судра хӑйӗн айӑпне йышӑннӑ. Судья прокуратура шухӑшӗпе килӗшсе хӗрарӑма тӗрмене хупмасӑр 3 ҫуллӑха айӑплама йышӑннӑ.

Владимир Михайлов тунӑ сӑн

Шупашкар ГЭСне мина хуни пирки нарӑс уйӑхӗн 10-мӗшӗнче ҫӗрле пӗлтернӗ. Кун пирки 112 номерпе шӑнкӑравласа хыпарланӑ.

Ятарлӑ службӑсем гидроэлектростанцие тӗрӗсленӗ. Унта мина хуманни ҫиеле тухнӑ – нимӗн те тупман. Шӑнкӑрав суя пулнӑ.

Ҫак хыпара кам пӗлтернине ҫийӗнчех шыраса тупнӑ. Вӑл Ҫӗнӗ Шупашкарта пурӑнакан арҫын пулнӑ. Вӑл мина хуни пирки шӑнкӑравласа пӗлтернӗ чухне ӳсӗр пулнӑ-мӗн.