Чӑваш патшалӑх академи драма театрӗнче Пётр Осипов драматург, театрӑн пӗрремӗш актерӗсенчен пӗри ҫуралнӑранпа 125 ҫул ҫитнине халалласа «Сурхури сӑри» спектакль кӑтартӗҫ.
Театрта пӗлтернӗ тӑрӑх, «пьесӑра пулса иртекен пӑтӑрмахсем 1917 ҫулхи революци саманипе ҫыхӑннӑ пулсан та, тӗп вырӑнта чӑваш ялӗнчи ҫынсен хутшӑнӑвӗсем. Унӑн жанрне «детективлӑ триллер» теме те пулӗ. Режиссерпа художник, композитор сюжетри вӑхӑтпа усӑ курса, халӑхӑн илемлӗ йӑлисене кӑтартма шутланӑ. Ку вара хальхи куракансемшӗн ҫав тери кӑсӑклӑ».
Ку ӗҫе режиссёр ҫуралнӑранпа 120 ҫул ҫитнӗ тӗле хатӗрленӗ пулнӑ. Унӑн режиссёрӗ — Наталья Сергеева, художникӗ — Наталья Зверева, музыкине Лолита Чекушкина ҫырнӑ.
Спектакле кӑрлач уйӑхӗн 27-мӗшӗнче кӑтартӗҫ.
Шупашкар муниципаллӑ округӗнчи Апаш тӑрӑхӗнче пурӑнакансем хӑйсен паллӑ ентеше Борис Алексеева, СССР халӑх артистне, асӑннӑ тӑрӑхри Паҫпак ялӗнче ҫуралса ӳснӗскере ырӑпа аса тытаҫҫӗ.
Апашри халӑх театрӗнче пӗлтернӗ тӑрӑх, 4 ҫул каялла театра Борис Алексеев ятне панӑ, 3 ҫул каялла халӑх артисчӗн ентешӗсем Борис Алексеев ячӗпе Паҫпак ялӗнче палӑк лартнӑ. Апаш халӑх театрӗн артисчӗсем чапа тухнӑ артист ятне тивӗҫтерес енӗпе ырӑ йӑлана малалла тӑсма шут тытнӑ, театр логотипӗпе ятарласа футболкӑсем туса хатӗрленӗ.
Чӑваш Енри паллӑ юрӑҫа, илемле сасӑллӑ Алина Фёдоровӑна «Чӑваш Республикин культурӑн тава тивӗҫлӗ ӗҫченӗ» хисеплӗ ят панӑ.
Алина Никифоровна – 2007 ҫултанпа Эстрада артисчӗсен союзӗн президенчӗ. Элӗк районӗнчи Исванкӑ ялӗнче ҫуралнӑ. Шупашкарпти Фёдор Павлов ячӗллӗ музыка училищинче вокал енӗпе вӗренне. Унӑн вӗрентекенӗ Станислав Кондратьев профессор пулнӑ. Кайран вӑл И.Н. Ульянов ячӗллӗ Чӑваш патшалӑх университетӗнче культуролога вӗренсе тухнӑ.
Чӑваш патшалӑх филармонийӗнче Раҫҫейри паллӑ артистсен концерчӗсем иртӗҫ. Нарӑс уйӑхӗн 19-мӗшӗнче унта Раҫҫейӗн тава тивӗҫлӗ артисчӗ, хальхи вӑхӑтри чи пултаруллӑ виолончелистсенчен пӗри Борис Андрианов пултарулӑхӗпе киленме май килӗ. Фортепианӑпа пӗтӗм тӗнчери конкурссен лауреачӗ, пултаруллӑ солист тата концертмейстер Петр Лаул калӗ.
Кӑрлач уйӑхӗн 23-мӗшӗнче Ҫеҫпӗл Мишши ячӗллӗ Чӑваш патшалӑх ҫамрӑксен театрӗнче Венера Пайгильдина артисткӑн 50 ҫулхине халалланӑ уяв каҫӗ иртӗ. Мероприяти 18 сехетре пуҫланӗ.
Венера Пайгильдина — Чӑваш Республикин тава тивӗҫлӗ артистки, Чӑваш Республикин Патшалӑх премийӗн лауреачӗ. Пултаруллӑ сцена ӑсти 1974 ҫулхи кӑрлач уйӑхӗн 7-мӗшӗнче Элӗк районӗнчи Тури Татмӑш ялӗнче ҫуралнӑ. Сцена ҫине пуҫласа шкулта вӗреннӗ чухнех, «Ҫутӑ ӗмӗт» вокал ансамбльпе тухнӑ. Хӗр Ф.Павлов ячӗллӗ музыка училищине вӗренме кӗнӗ, унта Ҫамрӑксен театрӗн директорӗпе, Зоя Ярдыкова режиссерпа паллашнӑ. 1996 ҫулта Зоя Дмитриевна училище вӗренсе пӗтернӗ Венерӑна театра ӗҫлеме чӗннӗ.
Чӑваш Енри артист Китайра пулнӑ. Пӗрре ҫеҫ мар-ха. Темиҫе те. Сӑмах Чӑваш патшалӑх филармонийӗн артисчӗ Иван Снигирев пирки пырать.
2024 ҫул Китайпа Раҫҫей хушшинчи туслӑх ҫирӗпленнӗренпе 75 ҫул ҫитнине халалланӑ ҫулталӑк пулнӑ. Ҫавна май унта пирӗн ҫӗршыв артисчӗсем концерт та кӑтартнӑ.
Чӑваш Республикин тава тивӗҫлӗ артисчӗ Иван Снигирев Китайра пӗлтӗр 12-мӗш хутчен пулнӑ. Хальхинче унта вӑл Липецкри симфони оркестрӗпе пӗрле кайнӑ. «Дружба народов России и Китая» (чӑв. Раҫҫейпе Китай хушшинчи халӑхсен туслӑхӗ) гастроль турне ирттернӗ май артистсем Урумчи, Иньчуань, Наньцзин, Хэфэй, Бэнбу, Шиянь, Цзыбо тата Дунъин хулисенче пулнӑ.
Иван китай чӗлхипе темиҫе юрӑ вӗреннӗ.
Раҫҫей тава тивӗҫлӗ артистки Валентина Ситова раштав уйӑхӗн 18-мӗшӗнче хӑйӗн паллӑ тӑванӗ Хветӗр Ҫитта вӑрҫӑра ҫырнӑ ҫырӑвӗсене Чӑваш наци музейне парнеленӗ. Кун пирки Чӑваш патшалӑх академи драма театре пӗлтернӗ.
Чӑваш халӑх артисчӗ Геннадий Медведев та Тӑван ҫӗршывӑн аслӑ вӑрҫине хутшӑннӑ ашшӗн историне каласа панӑ.
Валентина Петровна Федот Александровичӑн сӑввисен, калавӗсемпе ҫырӑвӗсен пуххине «Пӑшалпа та, перопа та …» кӑларнине Чӑваш халӑх сайчӗ те пӗлтернӗччӗ.
Раштав уйӑхӗн 3-мӗшӗнче Чӑваш патшалӑх академи драма театрӗнче РСФСР тава тивӗҫлӗ артисчӗ Геннадий Терентьев ҫуралнӑранпа 95 ҫул ҫитнине халалланӑ каҫ иртнӗ.
Астӑвӑм каҫне пуҫтарӑннисем артистӑн ырӑ сӑнарне, унӑн тӗлӗнсе каймалла пултарулӑхне аса илнӗ.
Астӑвӑм каҫне Александр Васильев тата Дмитрий Никифоров музыкантсем те хутшӑннӑ, вӗсем хуткупӑспа хитре каласа тӗлӗнтернӗ.
Мероприятие Геннадий Терентьевич мӑшӑрӗ Елена Константиновна тата Аринӑпа Лариса хӗрӗсем хутшӑннӑ.
К.В. Иванов ячӗллӗ Чӑваш патшалах академи драма театрӗн артистки Оксана Драгунова «Чӑваш Республикин тава тивӗҫлӗ артистки» ята тивӗҫнӗ. Хушӑва республика Элтеперӗ Олег Николаев ӗнер, чӳк уйӑхӗн 26-мӗшӗнче, алӑ пуснӑ.
Оксана Драгунова 1989 ҫулхи декабрӗн 18-мӗшӗнче Шӑмӑршӑ районӗнчи Асанкасси ялӗнче ҫуралнӑ. 2011 ҫулта Чӑваш патшалӑх культура тата искусство институтӗнчен вӗренсе тухнӑ.
Чӑваш патшалах филармонийӗн артисчӗ, «Ҫавал» ансамблӗн солисчӗ Александр Ильин чӳк уйӑхӗн 18-мӗшӗнче 45 ҫул тултарнӑ.
Йӗпреҫ районӗнчи Туҫа ялӗнче ҫуралнӑскер мӗн ачаранпах халӑх юррипе ӳснӗ. Александр Ильинӑн ашшӗ-амӑше те — пултарулӑх ҫыннисем. Амӑшӗ вырӑнти культура ҫуртӗнче директор пулса ӗҫлет, ашшӗ — хуткупӑсҫӑ.
«Ҫавал» ансамбльте юрланисӗр пуҫне вӑл шӑхличпе вылять, сӑрнайпа, палнайпа тата параппанпа калать, ташша ӑста.
Солистӑн мӑшӑрӗ — Чӑваш Республикин тава тивӗҫлӗ артисчӗ Любовь Ильина. Вӑл та ансамбльте юрлать. Ильинсен хӗрӗ Настя тата ывӑлӗ Коля Шупашкарти Ф.П. Павлов ячӗллӗ музыка училищинче тата Чӑваш культурӑпа ӳнер институтӗнче вӗренеҫҫӗ.
+23.3 °C