Хыпарсем: Неверкино

АКА

Юрӑпа ташӑ ансамблӗ Раҫҫейри хуласенче концерт кӑтартӗ
■ Таисия Ташней | 13.04.2026 12:37 |

#концертсем, #ансамбльсем, #Хусан, #Димитровград, #Пенза, #Чулхула, #Чӗмпӗр, #Неверкино, #артистсем, #гастроль

Юрӑпа ташӑ ансамблӗн сӑнӳкерчӗкӗ

Чӑваш патшалӑх юрӑпа ташӑ ансамблӗ кӗҫех Раҫҫейри хуласене гастрольпе тухса кайӗ. Ҫула вӑл «Чӑваш тӗнчи» театризациленӗ концерт программипе тухӗ.

Гастроль ака уйӑхӗн 21-мӗшӗнче Чӗмпӗр хулинче пуҫланӗ. Тепӗр кунне пултарулӑх коллективӗ асӑннӑ облаҫри Димитровград хулинче пулӗ.

Ака уйӑхӗн 23-мӗшӗнче ансамбль Чулхулари «Газ» культура ҫурчӗн сцени ҫине тухӗ. Тепӗр кунне, ака уйӑхӗн 24-мӗшӗнче, Пенза облаҫӗнчи Неверкино ялӗнче концерт кӑтартӗ. Ака уйӑхӗн 26-мӗшӗнче Хусанти куракансем Чӑваш Енри профессилле коллективӑн пултарулахӗпе киленӗҫ.

Сцена ҫине харӑсах 50 артист тухӗ, концерт вӑхӑтӗнче вӗсем 10 ытла тум ылмаштарса тӑхӑнӗҫ. Йышра тӗрлӗ конкурс лауреачӗсем, ят-сума тивӗҫнӗ ытти сцена ӑсти пулӗ.

Хыпар ҫӑлкуҫӗ: https://vk.com/suvargazeta

УТӐ

Пенза тӑрӑхӗнче чӑваш таврапӗлӳҫисем пуҫтарӑннӑ
■ Таисия Ташней | 02.07.2025 22:21 |

#культура, #чӑвашлӑх, #слетсем, #культура, #таврапӗлӳҫӗсем, #Пенза, #Неверкино, #Бикмурзино

Культура

never.pnzreg.ru сайтран илнӗ сӑнӳкерчӗк

Пенза облаҫӗнчи Неверкино районӗнчи Бикмурзино ялӗнче чӑваш таврапӗлӳҫисен слечӗ иртнӗ. Ӑна Зинаида Чайко, Олег Жемчугов тата ял ҫыннисем тӑрӑшнипе йӗркеленӗ. Кун пирки «Хыпар» хаҫат пӗлтернӗ.

Слета Тольятти, Чӗмпӗр тата Шупашкар хулисенчи таврапӗлӳҫӗсем пырса ҫитнӗ. Вӗсене вырӑнти хастар Михаил Щербаков «Илем» туризм сукмакӗпе паллаштарнӑ.

«Слета хутшӑннисене чӑваш-апат-ҫимӗҫӗпе сӑйланӑ. Вӗсем салма яшки, ҫичӗ тӗрлӗ кӗрперен пӗҫернӗ пӑтӑ, хуплу, чӑкӑт, килте вӗретнӗ сӑрана тутанса пӑхнӑ», — тесе ҫырнӑ хӑйӗн хыпарӗнче Валентина Петрова.