Чӳк уйӑхӗн 5-мӗшӗнче РСФСР халӑх артисчӗн Нина Яковлевӑн пултарулӑх кунӗ иртӗ. Мероприяти Вӑрмарти культура ҫуртӗнче пулӗ.
Ҫав кун 12 сехетре культура учрежденийӗнче «Театр – ман ӑраскал» моноспектакль пуҫланӗ. Ун вӑхӑтӗнче Нина Яковлева хӑйӗн пултарулӑхӗпе, кун-ҫулӗпе паллаштарӗ, куракансен ыйтӑвӗсене хуравлӗ.
18 сехет те 30 минутра вара унӑн юбилей каҫӗ пуҫланӗ. Ҫав каҫ артистка «Карчӑксем качча каяҫҫӗ» камитре вылӗ.
Юпа уйӑхӗн 28-мӗшӗнче Шупашкарти трактор тӑвакансен культура кременӗнче «От сердца к сердцу» (чӑв. Чӗререн чӗре патне) уяв программи кӑтартнӑ. Ӑна кинемисемпе мучисен кунне халалланӑ.
Ҫав кун сцена ҫине вокалӑн «Бэби-шлягер» эстрада студине, «Этуаль» хореографи студине, эстрада ташшин «Солнцеклеш» коллективне, «Суварята» ташӑ ансамбльне ҫӳрекенсем вокал тата хореографи номерӗсемпе тухнӑ.
Унсӑр пуҫне Владимир Егоров, Валентина Телей, «Икӗ аккорд» дуэт, Зоя Кириллова тата Григорий Павлов, Анастасия Власихина, Шупашкар районӗнчи Тутаркассинчи «БеЛаРа» ташӑ ушкӑнӗ куракансене хӑйсен пултарулӑхӗпе савӑнтарнӑ.
Чӳк уйӑхӗн 7-мӗшӗнче Чӑваш патшалӑх академи драма театрӗнче Валентина Ситова артисткӑн юбилей каҫӗ иртӗ.
Валентина Петровна — Раҫҫей тава тивӗҫлӗ артистки, Чӑваш халӑх артистки, Раҫҫей патшалӑх премийӗн лауреачӗ.
Пулас артистка 1960 ҫулхи авӑн уйӑхӗн 1-мӗшӗнче Патӑрьел районӗнчи Патӑрьелте ҫуралнӑ. Мускаври Щепкин ячӗллӗ театр училищинчен 1983 ҫулта вӗренсе тухнӑранпах театрта тӑрӑшать.
Юбилей каҫӗнче «Ай, мӑнтарӑн ҫил-тӑманӗ» спектакль кӑтартӗҫ.
Чӑваш халӑх артистки Ирина Архипова юбилей каҫне ирттерӗ. Вӑл куракансене сцена ҫинчи пурнӑҫӗпе ҫывӑхрах паллаштарӗ.
Ирина Александровна 1993 ҫулта Мускаври М.С.Щепкин ячӗллӗ театр училищинчен вӗренсе тухнӑ. Ҫавӑнтанпа сцена ҫинче 32 ҫул рольсем калӑплать.
Юбилей каҫӗ юпа уйӑхӗн 26-мӗшӗнче Ҫамрӑксен театрӗнче иртӗ. Ӑна «Театр. Пурнӑҫ. Юрату» ят панӑ.
«Ҫав каҫ юлташсемпе тӑвансене, пултарулӑхӑма кӑмӑллакансене хамӑн пурнӑҫ ҫинчен каласа кӑтартӑп. «Театр» ятлӑ чарӑнура ытларах чарӑнса тӑрӑпӑр», – ҫапла пӗлтернӗ артистка.
Чӑваш артисчӗсем Йошкар-Олара иртнӗ Пӗтӗм Раҫҫейри ҫамрӑксен «Театральные встречи на Вознесенской» фестивальне хутшӑннӑ.
К.В. Иванов ячӗллӗ Чӑваш патшалӑх академи драма театрӗ унта «Аманнӑ шӑпа» спектакльпе хутшӑннӑ. Ҫав ӗҫе, театрта пӗлтернӗ тӑрӑх, жюри пысӑка хурса хакланӑ.
Алман Арсланов сӑнарне калӑпланӑ Николай Сергеева артиста ятарлӑ наградӑпа чысланӑ, Григорий Федоров «Иккӗмӗш планри чи лайӑх арҫын ролӗ» номинацире ҫӗнтернӗ, Светлана Андреева «Иккӗмӗш планри чи лайӑх хӗрарӑм ролӗ» номинацире палӑрнӑ. Спектакль режиссёрне Борис Манджиева «Чи лайӑх режиссура» номинацире чысланӑ.
Чӑваш патшалӑх академи драма театрӗн артисчӗ Евгений Урдюков театр ӳнерне аталантарас ӗҫе курӑмлӑ тӳпе хывнӑшӑн тата пултарулӑх ӗҫӗнче тухӑҫлӑ тӑрӑшнӑшӑн Чӑваш Республикин Элтеперӗн Тав хутне тивӗҫнӗ.
Ҫак маттур артист Шӑмӑршӑ районӗнчи Ҫӗнӗ Чӗпкас ялӗнче 1989 ҫулта ҫуралнӑ. 2011 ҫулта вӑл Чӑваш патшалӑх культурӑпа ӳнер инстиутутӗнчен вӗренсе тухнӑ та эпир маларах асӑннӑ театрта ӗҫлеме пуҫланӑ.
Юпа уйӑхӗн 26-мӗшӗнче Чӑваш патшалӑх оперӑпа балет театрӗнче блокадӑри Ленинградра ӗҫлесе пурӑннӑ ӳнер ӗҫченӗсене халалланӑ «Так хочется жить!» спекталь-концерт кӑтартӗҫ.
Ку спектакль Ленинградри пултарулӑх интеллигенцийӗн – музыкантсен, театр артисчӗсен, Эрмитажпа ытти музей ӗҫченӗсен, искусствоведсемпе архитекторсен, поэтсемпе писательсен, художниксен, ученӑйсен — кун-ҫулӗпе паллаштарӗ. Шӑпапа паллаштаракан кашни новелла – ҫав ҫынсем дневниксенче ҫырса хӑварнӑ чӑн историсем.
Мероприятие Росконцерт йӗркелет. Спектакле Раҫҫей халӑх артисчӗ Артём Каминский, Раҫҫей тава тивӗҫлӗ артисчӗ Анна Большова, театрпа кино актёрӗ Андрей Пляскин хутшӑнӗҫ.
Чӑваш актёрӗсем Андрей Кончаловский сериалӗнче ӳкерӗннӗ.
Кӑҫалхи юпа уйӑхӗнче «Раҫҫей 1» телеканалпа Андрей Кончаловскийӗн «Хроники русской революции» сериалне кӑтартӗҫ. Унта пирӗн икӗ ентешӗмӗр Дмитрий Матвеев тата Даниил Иванов ӳкерӗннӗ.
Дмитрия куракансем «Чернобыль», «Империи: Александр I», Даниила – «Слово пацана. Кровь на асфальте», «СашаТаня» тӑрӑх пӗлеҫҫӗ.
II Николай патша сӑнарне Никита Ефремов калӑплать. Вӑл — чӑваш букварӗн авторӗн Иван Яковлевӑн тӑванӗ.
Авӑн уйӑхӗн 18-мӗшӗнче Чӑваш Енӗн Наци вулавӑшӗнче «Народный писатель Чувашской АССР Н. Т. Терентьев и чувашские драматурги» (чӑв. Чӑваш халӑх писателӗ Н.Т. Терентьев тата чӑваш драматургийӗ) ятпа ҫавра сӗтел иртӗ. Ӑна Николай Терентьев ҫуралнӑранпа 100 ҫул ситнине халаллӗҫ.
Николай Терентьев - драматург, тӑлмачӑ, артист, театр критикӗ; К.В. Иванов ячӗллӗ патшалӑх премийӗн Профессилле ҫыравҫӑсен П. Осипов ячӗллӗ премийӗн, К. Станиславский ячӗллӗ РСФСР патшалӑх премийӗн лауреачӗ.
Вӑл Канаш районӗнчи Кӑшнаруй ялӗнче ҫуралнӑ. Чӑваш патшалӑх педагогика институтӗнчен, Мускаври А.В. Луначарский ячӗллӗ театр ӳнерӗн институтӗнчен, А.М. Горький ячӗллӗ Литература институчӗ ҫумӗнчи Аслӑ литература курсӗнчен вӗренсе тухнӑ.
Тӑван колхозра счетоводра, кайран шкулта пуҫламӑш классен учителӗнче ӗҫленӗ. Кайран вара вӑл Чӑваш патшалӑх академи драма театрӗнче актер тата литература пайӗн заведующийӗнче тӑрӑшнӑ.
Мускаври Борис Щукин ячӗллӗ театр институчӗ килес ҫул тата тепӗр ултӑ ҫамрӑка вӗренме илме хатӗр иккен. Кун пирки Чӑваш патшалӑх академи драма театрӗ халӑх тетелӗнчи хӑйӗн пабликӗнче пӗлтернӗ.
«Чӑваш патшалӑх академи драма театрӗ сцена ӳнерне юратакан пултаруллӑ яш-кӗрӗме суйласа илсе хатӗрленӳ курсӗ уҫасшӑн. Ҫут ҫанталӑк панӑ тивлете сӳнме ан парӑр, хӗрсемпе каччӑсем, конкурса хутшӑнӑр! Ку — сире шӑпа пӳрнӗ телей!» — хыпарланӑ театрӑн пресс-служби.
Актер факультетӗнче вӗренекенсем общежитире тӳлевсӗр пурӑнӗҫ. Унтан вӗренсе тухсан вӗсене Чӑваш патшалӑх академи драма театрне ӗҫлеме илӗҫ.
Вӗренме кӗрес ӗмӗтлисен 16-21 ҫулсенче пулмалла, чӑвашла пӗлмелле.
Вӗсене театрта авӑн уйӑхӗн 25-мӗшӗнче 14 сехетре тата 28-мӗшӗнче 11 сехетре итлесе пӑхӗҫ. Унта сӑвӑ, халап, монолог, юрӑ вӗренсе каймалла. Мӗнпур хайлав чӑвашла пулмалла.
Тӗплӗнрех ыйтса пӗлес тесен тата итлеве ҫырӑнма 8 (8352) 62-02-21 телефонпа тунтикунтан пуҫласа эрнекун каҫчен, ирхи 9 сехетрен 17 сехетчен, шӑнкӑравламалла.
+10.3 °C