Ӗнер хыпарсем хушшинче Китайри авалхи кӗпер ҫунса кайни пирки сӑмахларӗҫ. Видеосене пӑхнӑ май паллӑ пулчӗ ӗнтӗ — ҫӑлса хӑварайман, вӑл тӗппипех ҫунса кайнӑ. Ҫапах та чи тӗлӗнмелли кунта — кӗпере 900 ҫул каялла туса лартни. Пин ҫул каялла тенӗ пек туса лартнӑскер ҫак тарана ҫити упранса юлнӑ (ӗнер вӑл ҫунса кайнине шута илмесен)! 1742 ҫулта ун ҫинче пушар тухнӑ пулнӑ-ха, анчах вырӑнти халӑх ӑна юсаса ҫӗнетнӗ, пӗтме паман.

Йывӑҫран тунӑ кӗперсем

Тӗрӗссипе йывӑҫ ҫирӗп кӗпер тума чи юрӑхлӑ материал мар. Йывӑҫ ҫумӑр-юр таврашне пула ҫӗрет; вут-ҫулӑмпа ӑна питӗ хӑвӑрт ҫунтарса яма пулать. Сӑмахӗ кунта чӗртсе янинче кӑна мар — ҫиҫӗм ҫапнипе те ӑна ҫулӑм ярса илме пултарать-ҫке. Ваньань кӗперӗ ҫинче ҫулӑм мӗнле сӑлтава пула тухнине тӗпчевҫӗсем палӑртӗҫ ӗнтӗ, анчах ҫапах та ҫак пӑтӑрмах йывӑҫ кӗпер тума чи юрӑхлӑ материал пулманнине ҫирӗплетсе кӑтартать.

Апла пулин те йывӑҫран кӗпер тунин лайӑх енӗсем те пур. Калӑпӑр, йывӑҫ йӗри-тавра пит нумай пулсан ҫак материалпа усӑ курма пулать.

Малалла...

Святослав Фёдоров. cap.ru порталтан илнӗ сӑнӳкерчӗк

Ҫурла уйӑхӗн 8-мӗшӗнче паллӑ офтальмолог, академик Святослав Фёдоров ҫуралнӑранпа 95 ҫул ҫитрӗ. Мухтавлӑ тухтӑр — «Куҫ микрохирургийӗ» отрасльсем хушшинчи ӑслӑлӑхпа техника комплексне пуҫарса янӑ ҫын.

Святослав Николаевич Шупашкарта пӗтӗмпе те виҫӗ ҫул: 1958—1961 ҫулсенче — пурӑннӑ. Апла пулин те хула историне ӗмӗрлӗхе кӗрсе юлнӑ.

1960 ҫулхи утӑ уйӑхӗн 5-мӗшӗнче вӑл Шупашкарта куҫ шӑрҫине ылмаштарассипе ӑнӑҫлӑ операци ирттернӗ. Катарактӑпа ҫуралнӑ 12 ҫулти хӗрача ҫапла вара курма тытӑннӑ. Ҫав операци куҫ микрохирургине пуҫарса янӑ та.

Искусствӑлла куҫ шӑрҫине оргкантӑкран (плексикуҫ) Святослав Фёдоровӑн пӗчӗк хваттерӗнче Шупашкарти электроаппаратура завочӗн слесарӗпе Семён Мильманпа пӗрле хатӗрленӗ.

Шупашкарта Святослав Николаевич ун пек 4 операци тума ӗлкӗрнӗ. Унтан унӑн куҫса кайма тивнӗ. Апла пулин те Чӑваш Ене манӑҫа кӑларман. «Ромашка» операци тата диагностика конвейерӗсене хатӗрлеме вӑл Шупашкарти конструкторсене шаннӑ, 1987 ҫулта отрасльсем хушшинчи ӑслӑлӑхпа техника комплексӗн пӗрремӗш филиалне уҫнӑ.

Паян Шупашкарта Святослав Фёдоров урамӗ, скверӗ пур, бюст вырнаҫтарнӑ.

Малалла...

culture.cap.ru сӑнӳкерчӗкӗ

Чӑвашсем Хусанта иккӗмӗш хут иртнӗ «Этно-fashion» фестивале хутшӑннӑ. Кун пирки Телеграмри чӑвашла каналсенчен пӗри пӗлтернӗ.

Культура фестивалӗнче «Паха тӗрӗ» фабрика хӑй ӑсталакан тумтире кӑтартса панӑ. Чӑваш пикисем наци тумне «Ҫиларман» ушкӑн юрри янӑранӑ, Александр Воробьевпа Олег Вунберов чӗрӗ сасӑпа юрласа чӑваш тумӗн куравне тата илемлӗрех тума пулӑшнӑ.

«Культура кочӗ — пурнӑҫ стилӗ» ятпа йӗркеленӗ ӗҫ-пуҫ Хусанти Г. Камал ячӗпе хисепленекен театр умӗнчи тӳремре иртнӗ.

Суд приставӗсен архивӗнчи сӑн

31 ҫулти хӗрарӑма амӑшӗн правинчен хӑтарнӑ. Унӑн икӗ ачи урӑх ҫемьере пурӑнаҫҫӗ. Унӑн вара алимент тӳлемелле пулнӑ. Анчах вӑл укҫа куҫарса паман. Куншӑн ӑна административлӑ майпа темиҫе хутчен явап тыттарнӑ.

Ку та пулӑшман. Алимент парӑмӗ 200 пин тенкӗрен ытла иртнӗ. Ҫурла уйӑхӗн 3-мӗшӗнче ӑна суд приставӗсем уйрӑма илсе ҫитернӗ. Хӗрарӑм унта йӗркеллӗ пурнӑҫ патне таврӑнма хӑтланнине, ачасен пурнӑҫӗпе кӑсӑкланнине каласа кӑтартнӑ.

Анчах хӗрарӑм алмиент тӳлӗ-и? Унӑн, суд йышӑнӑвӗпе килӗшӳллӗн, уйӑхсерен икӗ ачишӗн 21 пин тенкӗ куҫармалла. Ун тӗлӗшпе пуҫиле ӗҫ пуҫарнӑ.

forum.na-svyazi.ru сӑнӳкерчӗкӗ

Ҫу уйӑхӗн 19-мӗшӗнче Шупашкарти Ленин районӗнче вырнаҫнӑ складсенчен пӗринче икӗ кладовщица хирӗҫсе кайнӑ. Вӗсенчен пӗри сӑмаха каличчен нумай шухӑшласа тӑман — хут ҫинче ҫырма юраман сӑмахсемпе перкелешме тапранса кайнӑ. Тепри ҫӗтсе кайман — диктофон туртса кӑларса ҫырса пынӑ.

Шар курнӑ кладовщица евитлеме прокуратурӑна ҫул тытнӑ.

Усал сӑмахсемпе перкелешнӗ, тепӗр ҫынна ним мар кӳрентерсе пӗтерме хӑюлӑх ҫитернӗ 36 ҫулти хӗрарӑма суд административлӑ майпа явап тыттарса 3 пин тенкӗ штраф хурса панӑ.

cap.ru сайтри сӑн

Тинех уҫӑлнӑ! Сӑмах – Шупашкарти «Кӗрӗк» патӗнчи ҫӳлтен каҫмалли кӗпер пирки.

Ҫак каҫӑн 2014 ҫултах уҫӑлмалла пулнӑ. Темиҫе подрядчик те улшӑннӑ. Юлашки 8 ҫулта тӳре-шарана куншӑн халӑхран мӗнле кӑна сӑмах тивмен-ши? Халӑха ку каҫҫа «коррупци палӑкӗ» тесе те ят панӑ.

Тинех унӑн алӑкӗ ҫинчи ҫакӑнса тӑракан ҫӑрана илнӗ. Халӗ ҫынсем Сӗнтӗрвӑрри ҫулӗ ҫинче ҫӑмӑллӑнах каҫса ҫӳреме пултараҫҫӗ. Сӑмах май, халӗ унти ҫула юсаҫҫӗ.

ЧР Элтеперӗ Олег Николаев цифра министрӗн ҫумӗ пулнӑ Юлия Стройкова валли ҫӗнӗ ӗҫ вырӑнӗ тупса панӑ. Вӑл халӗ – пресс-служба тата протокол администрацийӗн управленийӗн пуҫлӑхӗ. Ҫак должноҫ юлашки вӑхӑтра пушӑ пулнӑ.

Аса илтерер: Юлия Стройкова малтан Чӑваш наци телерадиокомпанийӗн директорӗн ҫумӗнче вӑй хунӑ. Кайран цифра министрӗн ҫумӗнче 2016 ҫулхи ҫӗртмен 1-мӗшӗнченпе ӗҫленӗ. Нумаях пулмасть, ҫурла уйӑхӗн 4-мӗшӗнче, ӑна ку должноҫрен кӑларнӑ.

Ҫӗнӗ Шупашкар хулин ҫуралнӑ кунӗнче ҫӗршыври паллӑ хӑш юрӑҫ килессине пӗлтернӗ. Вӑл – Паскаль. Ытларах ӑна «Шелковое сердце» юрӑпа пӗлеҫҫӗ.

Ҫӗнӗ Шупашкар 62 ҫул тултарнине ҫурла уйӑхӗн 27-мӗшӗнче паллӑ тӑвӗҫ. Паскаль концерчӗ 18 сехет ҫурӑран пуҫласа 21 сехетчен пулӗ. Хула администрацийӗ куншӑн 366 пин тенкӗ тӳлӗ.

Сӑмах май, Паскаль Чӑваш Енре унччен те пулнӑ. Ун чухне те, 2013 ҫулта, вӑл Ҫӗнӗ Шупашкар хулин ҫуралнӑ кунӗнче юрланӑ.

21.мвд.рф сӑнӳкерчӗкӗ

Ҫурла уйӑхӗн 4-мӗшӗнче Патшалӑхӑн ҫул-йӗр хӑрушсӑрлӑхӗн посчӗсенчен пӗринче инспекторсенчен «Ауди» автомобиль водителӗ пулӑшу ыйтнӑ. 34 ҫулти арҫын ӗнентернӗ тӑрӑх, ҫул ҫинчи «пӑкӑра» «Тойота» водителӗпе ӑнланманлӑх сиксе тухнӑ. Пӑтӑрмах Ҫӗнӗ Шупашкара каякан ҫул ҫинче пулнӑ.

«Тойота» водителӗ «пӑкӑран» тухас тесе хирӗҫ килекен ҫул ҫине тухса кайнӑ-мӗн, ҫакӑншӑн «Ауди» водителӗ сӗмсӗр этеме асӑрхаттарнӑ. Ҫамрӑкки аслӑрах водитель ҫине хӗҫпӑшал евӗр япала темиҫе хутчен те тӗлленӗ-мӗн.

Инспекторсем «Тойота» машнӑна тытса чарнӑ. Унта, чӑн та, травматика пистолечӗ тата пушӑ гильза пулнӑ.

«Кстати…» репортажри сӑн

Чулхула облаҫӗнчи Сосновское поселокра хӗрӗ амӑшне сарая пурӑнма хӑваласа янӑ. Кун пирки кӳршӗ тӑрӑхра тухакан «Кстати…» телепрограмма каласа панӑ.

Татьяна Кузьминична чи малтанах аслӑ хӗрӗпе тата кӗрӳшӗпе пӗрле Макасово ялта пурӑннӑ. Анчах та хӗрӗн ҫемьипе хирӗҫсе кайнӑ хыҫҫӑн унӑн Сосновски поселока куҫма тивнӗ. Кунта унӑн хваттер пулнӑ, хваттерте кӗҫӗн хӗрӗ пурӑннӑ. Поселока куҫса килнӗ хыҫҫӑн кӗҫӗн хӗрӗ аппӑшӗ хваттер пайне ан кӗрейтӗр тесе амӑшне пурлӑха хӑйӗн ҫине ҫырма ыйтнӑ. Амӑшӗ хваттере кӗҫӗн хӗрне парнеленӗ хыҫҫӑн хӗрӗ ӑна хваттере кӗртми пулнӑ. 69 ҫула ҫитнӗ хӗрарӑм суд урлӑ ӑна хваттере яма ирӗк ыйтнӑ, анчах ӗҫ ӑнман. Суд шучӗпе Татьяна Кузминичнӑн Макасово ялӗнче пурлӑх пур, прописка тӑрӑх вӑл унта тӑрать.

Хальхи вӑхӑтра карчӑк Сосновски поселокра вырнаҫнӑ сарайра пурӑнать. Кӗҫӗн хӗрӗ ултавпа туртса илнӗ хваттерӗн чӳречисем шӑп та лӑп сарай енне тухаҫҫӗ. Татьяна Кузминична урай ҫинчех ҫывӑрать, йӗри-тавра йӗкехӳресем чупаҫҫӗ. Унӑн малтан апат-ҫимӗҫ упрамашкӑн холодильник те пулнӑ, анчах хӗрӗ электричество пралукне татнӑ хыҫҫӑн вӑл ӗҫлемест.

Репортаж тухнӑ вӑхӑтра аслӑ хӗрӗ кӑнтӑрта каннӑ, кӗҫӗн хӗрӗ упӑшкипе пӗрле журналистсемпе калаҫасшӑн пулман.

Малалла...