chuvashia.sledcom.ru сӑнӳкерчӗкӗ

Куславккари арҫынна 13 ҫул та 6 уйӑхлӑха ҫирӗп режимлӑ колонпе ӑсатнӑ. Вӑл пӗлӗш-хӗрарӑмне чӗртсе янӑ.

Пӑтӑрмах пӗлтӗрхи чӳк уйӑхӗн 27-мӗшӗнче пулса иртнӗ. Ҫав кун арҫын ӳсӗр пулнӑ, хӑй паллакан 33 ҫулти хӗрарӑмпа хирӗҫле тапранса кайнӑ. Ӑна хӑвӑрт хыпса илекен шӗвекпе сапнӑ та чӗррсе янӑ. Хӗрарӑмӑн кӗлетки ытла ҫунса кайнӑ. Суранланса пӗтнӗ хӗрарӑм пульницӑра вилсе кайнӑ.

Усалланнӑ арҫынна Чӑваш Енӗн Аслӑ сучӗ 13 ҫул та 6 уйӑхлӑха ҫирӗп режимлӑ колонирен хупса хума йышӑннӑ.

Инкеклӗ лару-тӑру министерстви тунӑ сӑн

Ака уйӑхӗн 21-мӗшӗнче кӑнтӑрла Йӗпреҫ муниципаллӑ округӗнчи Энтриел ялӗнче пӗр кил хуҫалӑхӗнче сарай тӑрри ҫунма тытӑннӑ. Ҫулӑм 100 тӑваткал метр лаптӑк ҫинче алхаснӑ. Хуралтӑ таврашӗн стенисем те сиенленнӗ.

Пушарнӑйсем «хӗрлӗ автана» 20 минутран лӑплантарнӑ. Ҫулӑма ҫурт ҫине куҫма паман. Пушарта 10 сурӑхпа 2 сыснана ҫӑлма май килнӗ.

Палӑртмалла: ҫулталӑк пуҫланнӑранпа республикӑра 372 пушар пулнӑ. Вӗсенче 21 ҫын вилнӗ, 20-ӗн суранланнӑ. Пушарсенче 69 ҫынна ҫӑлма май килнӗ.

Шупашкар хула пухӑвӗн депутачӗсен пресс-служби пӗлтернӗ тӑрӑх, тӗп хуламӑр 555 ҫул тултарнӑ тӗле ҫынсене медаль парасшӑн. Ҫак ыйтӑва ыран, ака уйӑхӗн 23-мӗшӗнче, иртекен ларура пӑхса тухӗҫ. Унта хальлӗхе награда пирки положение йышӑнӗҫ.

Миҫе медаль кӑларӗҫ? Паллӑ мар-ха. Сӑмах май, Шупашкар 550 ҫул тултарнӑ тӗле юбилейлӑ медальсем кӑларнӑ. Вӗсене тӗп хуламӑр аталанӑвне тӳпе хывнӑ ҫынсене панӑ. Кӑҫал «Госзнак» астӑвӑм банкнотисем кӑларнӑ. Вӑл – укҫа мар. Кунашкал банкнотӑсене ҫамрӑк мӑшӑрсене, 2024 ҫулта ҫуралнӑ ачасен ашшӗ-амӑшне, юбилея паллӑ тӑвас ҫӗре тӳпе хывнӑ ҫынсене, хула конкурсӗсен ҫӗнтерӳҫисене, хисеплӗ хӑнасене параҫҫӗ.

Иртнӗ эрнере ЧР Вӗренӳ институчӗн ректорне Юрий Исаева ӗҫрен кӑларни пирки пӗлтернӗччӗ. Вӑл унта 6 ҫул вӑй хунӑ.

Халӗ Чӑваш патшалӑх гуманитари ӑслӑлӑхӗсен институчӗн сайтӗнче Юрий Николаевич ректор пек тӑрать. Влаҫ органӗсен порталӗнче вара хальлӗхе кун пирки документсем ҫук.

Палӑртмалла: Юрий Исаев Патӑрьел районӗнчи Нӑрваш Шӑхаль ялӗнче 1969 ҫулта ҫуралнӑ. Унччен вӑл, 2010-2016 ҫулсенче, Чӑваш патшалӑх гуманитари ӑслӑлӑхӗсен институтӗнче ӗҫленӗ. 2016-2018 ҫулсенче вӗренӳ министрӗ пулнӑ.

t.me/tsur21 сӑнӳкерчӗкӗ

Каҫал тӑрӑхӗнче пурӑнакансем вырӑнтисем канма пыма юратакан «Тимоша» ҫӑл патӗнчи территори ҫӳп-ҫап айне пулни пирки халӑх тетелӗнче пӗлтернӗ.

«Канма килекенсен культура ҫук, ҫӑлкуҫ территорийӗнче йӑлари каяш йӑваланса выртать», — кӑмӑлсӑрланса пӗлтернӗ илемсӗр сӑнӳкерчӗке асӑрханисем. «Ун пирки калама та аван мар та», — хушса хунӑ вӗсем.

Чӑваш Енӗн регион управленийӗн центрӗ ҫавӑн пирки вырӑнти тӳре-шарана пӗлтернӗ. Унтисем экологи шӑматкунлӑхне йӗркелесе «Тимошӑна» тасатнӑ.

cap.ru сайтри сӑн

Йӗпреҫри васкавлӑ медпулӑшу ӗҫченӗсем ачана Шупашкара леҫнӗ хыҫҫӑн вырӑна таврӑннӑ чухне Канаш тӑрӑхӗнчи Шӑхасан ялӗ ҫывӑхӗнче ҫул ҫинче ҫын выртнине асӑрханӑ. Тӗттӗм пулнӑ. Тӑрук водитель фара ҫути ҫинче темӗнле пысӑк япала выртнине курнӑ. Патнерех пынӑ та – вӑл ҫын иккен.

Хайхи арҫын урӑ пулнӑ, тӑнне ҫухатман. Вӑл сылтӑм ури, сылтӑм алли ыратнине пӗлтернӗ. Тӑма хӑтланнӑ-ха вӑл – анчах пушшех те ыратма тытӑннӑ.

Малта вара фура иртсе кайнӑ. Телее, вӑл ҫул ҫинче выртакан арҫын ҫине пырса кӗмен. Арҫынна вӑл та асӑрханӑ, кун пирки 112 номерпе шӑнкӑраласа пӗлтернӗ. Вырӑна полици ӗҫченӗсем ҫитнӗ.

Ҫав вӑхӑтра арҫынна Ольга Школьникова тата Александр Авдеев фельдшерсем пӑхнӑ. Унӑн пуҫ мими четреннӗ иккен. Фельдшерсем ӑна пульницӑна илсе ҫитерне.

«Лиза Алерт» архивӗнчи сӑн

Шупашкарта пурӑнакан 40 ҫулти Денис Николаевич Аркадьев ҫухалнӑ. Вӑл килтен ака уйӑхӗн 19-мӗшӗнче тухса кайнӑ.

Вӑл 180 сантиметр ҫӳллӗш, вӑтам пӳ-силлӗ, куҫӗ симӗс, ҫӳҫӗ тӗттӗм ҫырӑ. Ҫав кун тӗттӗм кӑвак куртка, ҫутӑрах кофта, тӗттӗм кӑвак джинс шӑлавар, хура кроссовка тӑхӑннӑ пулнӑ.

Ӑна куракансене ҫак номерпе шӑнкӑравлама ыйтаҫҫӗ: 8 800 700-54-52, 89196666680.

"Контактри" сӑн

Шӑматкун, ака уйӑхӗн 21-мӗшӗнче, Мускавра регионсен хушшинче спорт кӗрешӗвӗ енӗпе турнир иртнӗ.

Пирӗн ентеш, Елчӗкри шкулта вӗренекен Михаил Миллин, кӑтартӑвӗпе савӑнтарнӑ. Вӑл 28 килограмм таякансемпе тупӑшса ылтӑн медале тивӗҫнӗ. Михаил финалта Дагестанри Гюльахмедов Ийиба ҫирӗппӗнех ҫӗнтернӗ.

ҪҪХПИ тунӑ сӑн

Паян 13 сехет ҫурӑра Ҫӗрпӳ хули ҫывӑхӗнче, М-7 федераци ҫулӗ ҫинче авари пулнӑ.

Малтанлӑха ҪҪХПИ пӗлтернӗ тӑрӑх, «Рено Дастер» хирӗҫ ҫул ҫине тухса кайнӑ та фурӑпа ҫапӑннӑ. Ҫӑмӑл машинӑри водитель тата пассажир аманнӑ. Вӗсене пульницӑна илсе кайнӑ.

Авари вырӑнӗнчен иртсе каякансем пӗлтернӗ тӑрӑх, ҫакна пула Ҫӗрпӳ хулинчен пуҫласа Сӑнав поселокӗ таран пӑкӑ пухӑннӑ.

Шупашкарти XVII пӗтӗм тӗнчери кинофестиваль ҫу уйӑхӗн 23-29-мӗшӗсенче иртӗ.

Кинофестивале ӗҫсене «Вӑйӑ киновӗ» тата «Этнос тата регионти кино» номинацисемпе йышӑннӑ. Йӗркелӳ комитетне Раҫҫейрен тата ют ҫӗршывсенчен (Бангладеш, Иран, Итали, Таджикистан) 300 ытла заявка килни паллӑ.

Комисси Раҫҫей, Европа тата тӗнче шайӗнчи ӗҫсене суйласа илессине пӗлтернӗ.