21.мвд.рф сӑнӳкерчӗкӗ

Чӑваш Енри суд Удмурт Республикинчи водителе суд тунӑ.

28 ҫулти арҫын кӑҫалхи ҫу уйӑхӗн 15-мӗшӗнче пирӗн республикӑра инкеке лекнӗ. «М-7» ҫулпа пынӑ чухне Куславкка муниципаллӑ округне ҫитсен, вӑл ҫул айккине тухса кайса тимӗр карта ҫине пырса ҫапӑннӑ.

«Лада Гранта» машинӑа водительсӗр пуҫне унӑн тӑватӑ пӗр тӑванӗ: пиччӗшӗ (тен, шӑллӗ пулӗ. Вырӑсла хыпарта брат тенӗ) тата виҫӗ йӑмӑкӗ-аппӑшӗ (вырӑсла хыпарта сестра тенӗ) пулнӑ. Водитель тата икӗ тӑванӗ (хӗрарӑмсем) аманнӑ.

Инкеке лекнӗ водителе хӑвӑртлӑха ӳстернӗшӗн юлашки ик ҫулта 50 хутчен явап тыттарнӑ иккен. Инкек пулнӑ кунхине вӑл руль умӗнче 8 сехет пулнӑ.

Куславкка районӗнчи суда арҫынна тӗрмене хупса хумасӑр 9 уйӑхлӑха ирӗкрен хӑтарма йышӑннӑ.

«Известия» архивӗнчи сӑн

Кӑрлач уйӑхӗн 1-мӗшӗнчен РФ Патшалӑх Думин депутачӗсен хамӑр ҫӗршывра туса кӑларнӑ машинӑсемпе ҫӳреме пуҫламалла. Унсӑрӑн Патшалӑх Думи вӗсене бензин расхучӗшӗн тӳлеме пӑрахӗ.

«Известия» хаҫат пӗлтернӗ тӑрӑх, ҫитес ҫултан иномаркӑпа ҫӳрекен депутатсенчен бензин расхучӗшӗн илмелли документсене йышӑнма пӑрахӗҫ. Анчах РФ Промышленноҫ министерстви списокра хӑш-пӗр иномарка маркисене хӑварӗ.

"Руль умӗнче" порталтан илнӗ сӑнӳкерчӗк

Шупашкар хулинче пӗр водитель хӑйӗн машинине Тӑван ҫӗршывӑн аслӑ вӑрҫинче ҫӗнтернӗренпе 40 ҫул ҫитнине халалласа уҫнӑ мемориал комплексӗнче лартса хунине, тротуар тӑрӑх машинӑпа пынине эпир унччен пӗлтернӗччӗ-ха.

«Хендай» автомобиль водителӗ пуҫтахланни пирки халӑх тетелӗсенчен пӗринче хыпарланӑ хыҫҫӑн йӗрке хуралҫисем ҫав машина водительне административлӑ май явап тыттарнӑ.

Водитель 61 ҫулти арҫын иккен. Ӑна 2 пин тенкӗ штраф хурса панӑ. Арҫын ӳлӗмрен ун пек хӑтланмассине шантарнӑ.

t.me/pg21ru сӑнӳкерчӗкӗ

Патӑрьелти шыв ыйтӑвӗ ҫивӗччине РФ Следстви комитечӗн председателӗ Александр Бастрыкин та пӗлет. Ку ыйтӑва татса парассине вӑл хӑй тӗрӗслесе тӑма шантарнӑ.

Патӑрьелти шыв ыйтӑвӗпе ҫыхӑннӑ видеона раштав уйӑхӗн 18-мӗшӗнче вырӑнти хастарсем вырнаҫтарнӑ. Вӗсем ӗнентернӗ тӑрӑх, вырӑнти тӳре-шара ҫивӗч ыйтӑва татса пама васкамасть. Нумай хваттерлӗ икӗ ҫуртра тӑлӑхсем те пурӑнаҫҫӗ, ачаллӑ ҫемьесем те.

Ыйту епле тытӑлса пӗтнине асӑннӑ органӑн республикӑри управленийӗн ертӳҫин Александр Полтининӑн Александр Бастрыкина пӗлтермелле.

Ҫӗнӗ ҫул уявӗнче ҫанталӑк мӗнле пулӗ? «Чӑваш Енри ҫанталӑк» проект синоптикӗсем акӑ мӗн пӗлтереҫҫӗ.

Раштавӑн 23-мӗшӗччен пӗлӗтсен ҫӳллӗшӗнче 0-5 градус пулӗ, ҫӗр ҫинче – кӑштах кӑна «плюс». Ҫавна май кӗҫӗр йӗпе юр, ҫумӑр ҫӑвӗ. Канмалли кунсенче – вӑйлӑрах. Шӑматкун пӑрлӑ ҫумӑр ҫума пултарать.

Ҫитес эрнере 4-9 градус таран сивӗтӗ. Уяртӗ. Малтанлӑха пӗлтернӗ тӑрӑх, Ҫӗнӗ ҫул каҫхине ҫанталӑк 10-12 градус сивӗ пулӗ, ҫил вӑйлӑ вӗрмӗ.

cap.ru сайтри сӑн

Ҫӗнӗ ҫулта ачасем кӑна мар, ваттисем те асамлӑх кӗтеҫҫӗ. ЧР Ӗҫлев министерствин пресс-служби пӗлтернӗ тӑрӑх, вӗсене уяв хаваслӑхӗ парнелес тесе акци пуҫарнӑ.

Улатӑрти социаллӑ пулӑшу паракан комплекслӑ центра ҫӳрекенсем Хӗл мучипе Юр пикерен парнесене тивӗҫеҫҫӗ. Ӗнер асамҫӑсем Улатӑрти Агния Васильевна патне ҫитнӗ. Кинемей Хӗл мучипе Юр пике килнӗшӗн питӗ савӑннӑ.

«Кун пек парне кӗтменччӗ. Хама ача пекех туятӑп. Саламланӑшӑн тата канфетсемшӗн пысӑк тав!» - тенӗ Агния Васильевна.

aerocheb.ru сӑнӳкерчӗкӗ

Шупашкарти аэропорта юсаса пӗтерме тепӗр 2 миллиарда яхӑн тенкӗ укҫа кирлӗ. Тата тӗрӗсрех каласан, 1,75 миллиард тенкӗ.

Вӑл укҫа сывлӑш гаваньне юсаса ҫӗнетме кирлӗ. Перронӑн тата руль ҫулӗн пӗр пайне аэропорт территорийӗн юсаса ҫӗнетмелле. Аэропорта 2024 ҫулта ҫӗнетсе пӗтермелле. Тӑкаксен виҫи 1,75 миллиард тенкӗпе танлашӗ. Кун пирки ТАСС информаци агентстви хыпарланӑ.

forum.na-svyazi.ru сайтри сӑн

Паян Шупашкарта «Садовый» микрорайона кӑвак тӗслӗ троллейбус ҫӳрет. Вӑл Алькешрен ҫак микрорайона каять. Хальлӗхе – тест режимӗнче.

Салонра пассажирсем те пур Паян кӑвак троллейбус 20 сехетчен маршрут ҫинче пулӗ. Ҫитес вӑхӑтра ӑна 14-мӗш маршрут ҫинче тӗрӗслӗҫ.

«КАМАЗ-65825» троллейбус «мӑйракасӑр» 20 ҫухрӑм таран кайма пултарать. Пынӑ ҫӗртех заряд илет, сехетре 70 ҫухрӑм хӑвӑртлӑхпа пыма пултарать.

Троллейбуса тӗрлӗ маршут ҫинче тӗрӗслӗҫ те кайран унашкал транспорта туяннӑ чухне кӑтартусене шута илӗҫ.

Шупашкарта пурӑнакан Рона Фомина паян, раштав уйӑхӗн 20-мӗшӗнче, 60 ҫул тултарнӑ.

Рона Витальевна И.Н. Ульянов ячӗллӗ Чӑваш патшалӑх университетӗнчен физикӑпа математика учителӗ пулма вӗренсе тухнӑ. Шкулта пӗр вӑхӑт ӗҫленӗ хыҫҫӑн хӗрарӑм ача пахчине воспитателе вырнаҫнӑ. Анчах вӑл унта та вӑрах вӑхӑт ӗҫлемен, социаллӑ сферӑна куҫнӑ. 2004 ҫулхи ҫу уйӑхӗнчепе Шупашкар хулинчи халӑхӑн соцаллӑ ыйтӑвӗсене тивӗҫтерекен комплекслӑ центрта социаллӑ ӗҫчен пулса тӑрӑшать.

Ӗнерхи учитель тата воспитатель хӑйӗн ҫӗнӗ тивӗҫӗсене тахҫанах хӑнӑхса ҫитнӗ ӗнтӗ. Ватӑсемпе пӗр чӗлхе тупма, вӗсен кӑмӑлне кайма пӗлет. Паян вӑл ҫамрӑк ӗҫтешӗсене те хӑйӗн пуян ӗҫ опычӗпе паллаштарать.

culture.cap.ru сайтран илнӗ сӑнӳкерчӗк

Ӗнер, раштав уйӑхӗн 19-мӗшӗнче, К.В. Иванов ячӗллӗ Чӑваш патшалӑх академи драма театрӗнче Владимир Семенов артист «Театр – ман ӑраскал» моноспекакле хутшӑнчӗ.

Аса илтерер: театрти артистсен пурнӑҫӗпе тата пултарулӑхӗпе паллаштаракан моноспектакльсен ярӑмне Нина Григорьевӑпа уҫнӑччӗ, кайран Нина Яковлева пурнӑҫӗпе тата пултарулӑхӗпе паллаштарнӑччӗ.

Уйӑхра пӗрре ирттерекен ӗнерхи моноспектакльте театрти кӗҫӗн залри сцена ҫине Раҫҫей тава тивӗҫлӗ, Чӑваш Республикин халӑх артисчӗ Владимир Семёнов тухрӗ.

Сцена ӑсти Шупашкар районӗнчи (халӗ округ теҫҫӗ) Ҫӗньял-Покровски ялӗнчен. Ленинградри музыкӑпа кинематографи театрӗн институтне вӗренме илесси ҫинчен пӗлтерӗве курнӑ хыҫҫӑн вӑл артист пулас ӗмӗтпе ҫунатланса кайнӑ. Сумлӑ тӳресем ун чухне 3 хӗрпе 3 каччӑна суйласа илнӗ. Владимир Семёнов сумлӑ ҫав йыша лекнӗ.

«Сирӗн ума телейлӗ ҫын тӑрать», — тесе каларӗ хӑйӗн пирки арист. Вӑл юратнӑ ӗҫре тӑрӑшса ӗмӗрленӗшӗн тата мӑшӑӗпе ӑннишӗн те хӑйне ҫавӑн пеккисен йышне кӗртет.

Моноспектакль вӑхӑтӗнче артист тӗрлӗ ҫулта вылянӑ спектакльсенчи сыпӑксемпе паллашма май килчӗ, куракансем унран хӑйсене кӑсӑклантаракан ыйтусене уҫӑмлатма пултарчӗҫ.

Малалла...