t.me/nikamran каналта вырнаҫтарна сӑнӳкерчӗк

Мӑнукне пӑвса вӗлернӗ хӗрарӑма сиплеме ярасшӑн. Кун пирки Телеграмри «Пуринчен малтан» каналта пӗлтернӗ.

Пӗлтӗрхи ака уйӑхӗнче Шупашкарта 61-ри хӗрарӑм 9-ти мӑнукне пӑвса вӗлернӗ.

Херарӑм тӗлӗшпе пуҫарнӑ пуҫиле ӗҫе тишкерсе пӗтернӗ. «Тӗрлӗ экспертиза ирттернӗ хыҫҫӑн хӗрарӑм психика чирне пула хӑй мӗн тунине ӑнланман тесе палӑртнӑ. Специалистсем ӑна медицина учрежденийӗнче сиплеме сӗннӗ. Ҫитес вӑхӑтра унӑн шӑпине суд татса парӗ», — хыпарлана эпир маларах асӑнна ҫӑлкуҫра.

Николай Максимовӑн страницинчен илнӗ сӑнӳкерчӗк

Николай Максимов писателӗн кӗнекине мӑкшӑсем кун ҫути кӑтартӗҫ.

«Пӗчӗкшерӗн мӑкшӑ ҫыравҫи пулса тӑратӑп. Мӑкшӑ Республикинчи кӗнеке издательстви манӑн «Сокровища юродивого» черетлӗ (виҫҫӗмӗш) романа пичетлесе кӑларма палӑртса хунӑ. Вӑл кӑҫалхи ҫур ҫулта пичетленсе тухмалла. Жанрӗ — мистикӑлла-приключенилле», — пӗлтернӗ автор халӑх тетелӗнчи хӑйӗн страницинче.

Мӑкшӑ Республикинчи кӗнеке издательствин кӗнекисем ҫӗршывӗпех сарӑлаҫҫӗ-мӗн.

Кӑрлач уйӑхӗн 29-мӗшӗнче Шупашкарти Трактор тӑвакансен культура керменӗнче Анатолий Музыкантовӑн юбилей каҫӗ иртӗ.

«Музыкантов приглашает!» (чӑв. Музыкантов йыхравлать) пултарулӑх каҫне Раҫҫей Федерацийӗн тата Чӑваш Республикин культурӑн тава тивӗҫлӗ ӗҫченӗ, «Сувар» халӑх ташшин ансамблӗн тата «Суварята» халӑх ташшин ача-пӑча ансамблӗн ертӳҫи Анатолий Музыкантов 75 ҫул тултарнине халалланӑ.

Уяв каҫне Мари Элти, Пушкӑртстанри, Тутарстанри коллективсем килсе ҫитмелле. Виталий Адюков, Вячеслав Христофоров тата Ирина Музыкантова юрӑсем шӑрантарӗҫ.

culture.cap.ru сӑнӳкерчӗкӗ

Кӑрлач уйӑхӗн 30-мӗшӗнче Чӑваш патшалӑх академи драма театрӗнче Пётр Осиповӑн астӑвӑм каҫне пуҫтарӑнӗҫ.

Вӑл — Чӑваш АССР искусствӑсен тава тивӗҫлӗ ӗҫченӗ, РСФСР тава тивӗҫлӗ врачӗ, чӑваш халӑх писателӗ, актер, драматург, медицина наукисен кандидачӗ. Пётр Осипов ҫуралнӑранпа кӑҫал 125 ҫул ҫитет.

Литературӑпа вӑл 1916 ҫул хыҫҫӑн хастар ӗҫленӗ. 1927-1930 ҫулсенче Чӑваш драма театрӗн тӗп режиссёрӗ пулнӑ. Хӑй вал 20 ытла пьеса ҫырнӑ. Вӗсем чӑваш драматургийӗн ылтӑн фончӗ пулса тӑнӑ.

ҪҪХПИ тунӑ сӑн

Паян, карлачӑн 17-мӗшӗнче 14 сехет те 25 минутра , Шупашкарти Трактор тӑвакансен проспектӗнче, «Яхтинг» чарӑну патӗнче, ҫамрӑк водитель студенткӑна ҫапса кайнӑ. Шел те, вилмеллех.

ҪҪХПИ пӗлтернӗ тӑрӑх, руль умӗнче ларнӑ водитель-хӗр «зебра»урлӑ каҫакан хӗр ҫине пырса кӗнӗ. 16 ҫулти студентка йывӑр сурансене пула ҫавӑнтах вилнӗ. Вӑл техникумра вӗреннӗ пулнӑ.

Виктор Чугаров (сӑнӳкерчӗкре - сулахайри). Виктор Чугаров страницинчен илнӗ сӑнӳкерчӗк

Чӑваш Енри журналистсене Ҫемен Элкер, Николай Никольский, Леонид Ильин ячӗпе хисепленекен премисене ҫулсеренех параҫҫӗ. Кӑҫалхисен ячӗсене эпир «Хыпар» издательство ҫурчӗ хыпарлани тӑрӑх пӗлтӗмӗр.

Ҫемен Элкер ячӗпе хисепленекен преми лауреачӗн ятне Наци телерадиокомпанийӗнче ӗҫлекен Татьяна Молоковӑна тата «Чӑваш Ен» ПТРК ӗҫченне Светлана Поздняковӑна парас тенӗ.

Николай Никольский ячӗпе хисепленекен премие Виктор Чугаров кинорежиссер, фотожурналист тивӗҫнӗ.

Леонид Ильин ячӗпе хисепленекен преми лауреачӗсем: Элӗк тӑрӑхӗнче радиокӑларӑмсем хатӗрлекен, Элӗкре тухса тӑракан «Пурнӑҫ ҫулӗпе» хаҫатра чылай материал пичетлесе кӑларнӑ Юрий Корнилов тата «Хыпар» Издательство ҫурчӗн директорӗн-тӗп редакторӗн ҫумӗ Алина Паймулкина.

cap.ru сайтри сӑн

Ӗнер строительство министрне Михаил Коледана ЧР Элтеперӗ шанчӑкран тухнӑ тесе ӗҫрен кӑларни пирки пӗлтернӗччӗ. Халӗ ведомствӑна вӑхӑтлӑха ертсе пыракан ҫынна палӑртнӑ: вӑл – строительство министрӗн ҫумӗ пулнӑ Владимир Максимов.

Аса илтерер: ведомствӑра прокуратура тӗрӗслев ирттернӗ. «На связи» портал пӗлтернӗ тӑрӑх, кун хыҫҫӑн Раҫҫей Строительство министерстви министра ӗҫрен кӑларма ыйтнӑ имӗш.

Палӑртса хӑварар: Владимир Максимов 1985 ҫулта Вӑрмар тӑрӑхӗнче ҫуралнӑ, И.Н.Ульянов ячӗлле ЧПУра «Бухгалтери учечӗ, анализ тата аудит» специальноҫпе вӗреннӗ.

"Контактри" сӑн

Элӗкри ӳнерсен шкулӗ юсаса ҫӗнетнӗ хыҫҫӑн уҫӑлнӑ. Унта, фасадне улӑштарнӑ, электромонтаж ӗҫӗсене пурнӑҫланӑ, стенасене ҫирӗплетнӗ, шалти водопровода лайӑхлатнӑ.

Ӳнер шкулӗнче «Фортепиано», «Халӑх инструменчӗсем», «Музыка фольклорӗ», «Хореографи пултарулӑхӗ», «Театр ӳнерӗ». Пӗтӗмпе – 300 ытла ача. Унта ӗҫлекенсем шкула ҫӗнетнӗ хыҫҫӑн ачасем тата нумайрах ҫӳреме пуҫласа шанаҫҫӗ.

Хӗллехи вӑхӑтра ҫынсем юрҫӳренсемпе ярӑнма кӑмӑллаҫҫӗ. Чӑваш Енӗн Гостехнадзорӗнче пӗлтернӗ тӑрӑх, пӗлтӗр асӑннӑ органта 84 юрҫӳрене регистрациленӗ, юлашки 5 ҫулта вара — 316.

Юрҫӳрен ансат техника пек туйӑнсан та унпа ҫула тухсан асӑрханмалла — вӑл пысӑк хӑвӑртлӑхпа каять. Тӗрӗс экипировка пирки манмалла мар, асӑрханса ҫӳремелле. Асӑнна техникӑна ҫулсерен техосмотр витӗр кӑлармалла.

"Контактри" сӑн

Чӑваш Енре 105 ҫулти ветеран пурӑнать. Вӑл – Иван Ермолаев. Вӑл 106-мӗш ҫулта пырать. Иван Васильевич Етӗрнере пурӑнать, политикӑпа интересленет. Урама тухсан ҫынсемпе хаваспах калаҫать.

Иван Васильевич 1939 ҫулта ҫара кайнӑ. Икӗ ҫултан вӑл Гродно хулинче вӑрҫа кӗтсе илнӗ. Вӑл Чехословакие ирӗке кӑларнӑ ҫӗре хутшӑннӑ. Паттӑрлӑх кӑтартнӑшӑн I степень Тӑван ҫӗршыв вӑрҫин орденне, III степень Мухтав орденне, «Паттӑрлӑхшӑн» медале тивӗҫнӗ.

Ҫӗнтерӳ хыҫҫӑн Украинӑна минӑран тасатма, халӑх хуҫалӑхне ҫӗклеме пулӑшнӑ. Тӑван тӑрӑха таврӑнсан вара ҫемье ҫавӑрнӑ.