cap.ru сайтри сӑн

Чӑваш Енре наци кӗрешӳ енӗпе пӗрремӗш хут ӑмӑрту иртӗ. Ӑна Республика кунне халалласа йӗркелӗҫ.

Тупӑшӑва Комосомольскинче ирттерме палӑртнӑ. Унччен кӗрешӳ ӑмӑртӑвӗсен ятарлӑ статус пулман. Ӑна ытларах чухне Акатуйра ирттернӗ.

Кӗрешӗве республикӑри спортсменсем хутшӑнӗҫ. Ҫавӑн пекех регионсенчи диаспорӑсенчи кӗрешӳҫӗсем килмелле.

Ӑмӑрту ҫӗртме уйӑхӗнче иртӗ.

Вячеслав Александров. culture.cap.ru сӑнӳкерчӗкӗ

Чӑваш халӑх артисчӗ Вячеслав Александров хӑй вӑхӑтӗнче СССР халӑх артисткипе Вера Кузьминапа ҫыру ҫӳретнӗ. Кун пирки вӑл Чӑваш патшалӑх акадми драма театрӗнче иртнӗ моноспектакль вӑхӑтӗнче каласа кӑтартнӑ.

«Шкулта вӗреннӗ чухне эпӗ пукане театрӗн кружокне ҫӳренӗ. Унта эпир сценкӑсем те, спектакльсем те лартма хӑтланаттӑмӑр. Ҫав ӗҫсемпе ялти клубсем тӑрӑх ҫӳреттӗмӗр. Канаш районне чӑваш театрӗ килсен кайса курманни ман нихҫан та пулман. Пӗринче мана Вера Кузьминапа тата Валерий Яковлевпа паллаштарчӗҫ. Вера Кузьминична ун чухне Чӑваш театр студине пырса пӑхма сӗнчӗ. Пултарулӑха тӗрӗслеме. Эпӗ шкул пӗтернӗ вӑхӑта унти студие илсе пӗтернӗччӗ. Ҫапла эпӗ Пукане театрне лекрӗм. Анчах чӑваш драмин сцени ҫинче выляс ӗмӗт мана кунта илсе ҫитерчӗ-ҫитерчех», – каласа кӑтартнӑ Вячеслав Александров.

Вячеслав Александров Вера Кузьминапа ҫыру ҫӳретнине аса илнӗ. Чӑваш патшалӑх академи драма театрӗнчи унӑн пӗрремӗш ролӗ Валерий Яковлев Николай Терентьев Вера Кузьмина валли ятарласа ҫырнӑ ӗҫ тӑрӑх лартнӑ «Ҫылӑх» спектакльте пулнӑ.

culture.cap.ru сӑнӳкерчӗкӗ

Пуш уйӑхӗн 25-мӗшӗнче пуҫласа Чӑваш наци музейӗ «Ялан янӑра, чӑваш чӗлхи!» ятпа чӑваш чӗлхи уйӑхлӑхне ирттерме палӑртса хунӑ. Вӑл шӑп та лӑп пӗр уйӑха тӑсӑлӗ.

Уйӑхлӑх вӑхӑтӗнче тӗрлӗ темӑпа экскурсисем, занятисемпе ӑсталӑх лаҫҫисем ӗҫлӗҫ. Вӗсем культура епле йӗркеленнипе, ҫырулӑхпа чӑваш литератури епле пуҫланса кайнипе паллаштарӗҫ.

Наци музейӗн ӗҫченӗсем руна паллисем ҫинчен каласа кӑтартӗҫ, «Уяв» тата «Киремет карти», «Чӑваш Енӗн асамлӑ ҫырӑвӗсем» интерактивлӑ занятисем, «Вупӑр» вӑйӑ ирттерӗҫ.

Ҫеҫпӗл Мишши музейӗ, Литература музейӗ, Чӑваш тӗррин музейӗ те кӑсӑклӑ программӑсем хатӗрлесе хунӑ.

порталтан илнӗ сӑнӳкерчӗк

Чӑваш Ене Узбекистанпа Португалирен 1,7 миллион штук чӑх ҫӑмарти кӳрсе килнӗ.

Иртнӗ ҫул вӗҫӗнче пирӗн ҫӗршывра чӑх ҫӑмартин хакӗ кӗтмен ҫӗртмен ӳссе кайнӑччӗ. Ҫынсем кун пирки Владимир Путин Президента та пӗлтернӗччӗ. Сивӗ чухне чӑх ҫӑмарта тӑвасшӑнах маррине ял ҫыннисем аван пӗлеҫҫӗ. Ҫавна май кайӑк-кӗшӗк фабрикисем лавккасене хӑйсен ҫав продукцине хаклӑрахпа ӑсатма тытӑннӑ.

Хальхи вӑхӑтра пирӗн республикӑна ют ҫӗршыври ҫӑмартана кӳрсе килнӗ. Пӗтӗмпе 6 парти.

t.me/chuvashia_sledcome сӑнӳкерчӗкӗ

Ҫӗнӗ Шупашкарта ватӑ арҫын хӗрарӑма пусмӑрлама тӑнӑ. Пӑтӑрмах иртнӗ ҫулхи чӳк уйӑхӗн 16-мӗшӗнче каҫхине пулса иртнӗ. Хулари ҫуртсен картишӗсенчен пӗринче никам та пулманнипе усӑ курса вӑл пӗр хӗрарӑма тапӑннӑ. Анчах ҫав вӑхӑтра пӗр машина иртсе пынӑ. Водитель машинӑна чарнӑ, йӗрке хуралҫисене пӗлтересси пирки асӑрхаттарнӑ.

Хӑраса ӳкнӗ арҫын пӑтӑрмах вырӑнӗнчен тарнӑ. Анчах йӗрке хуралҫисем ӑна татса чарнӑ.

Хальхи вӑхӑтра пуҫиле ӗҫе тӗпчевҫӗсем суда ярса панӑ. Ҫав вӑхӑтрах вӑл этем ытти ҫавӑн йышши преступлени туман-ши тесе шухӑшлаҫҫӗ.

nvkz-tub.ru сӑнӳкерчӗкӗ

Элӗк муниципаллӑ округӗнче пурӑнакан пӗр хӗрарӑм кӗвӗҫнипе тепӗр хӗрарӑмӑн сутана шӑммине хуҫса янӑ.

Пӗлтӗрхи ҫӗртме уйӑхӗн 23-мӗшӗнче Мӑн Этмен ялӗнчи 60 ҫулти хӗрарӑм хӑйӗн пахчинче пӗр ялта пурӑнакан хӗрарӑмпа вӑрҫма тапранса кайнӑ. Вӑл ӑна икӗ хутран кая мар урапа тапнӑ. Икӗ хӗрарӑм хушшинчи ӑнланмалӑх кӗвӗҫӳпе ҫыхӑннӑ иккен. 60 ҫулти кӗвӗҫ хӗрарӑм кайран йывӑҫ патак ярса илсе икӗ хутран кая мар ҫапнӑ. Шар курнин сутана шӑмми хуҫӑлнӑ.

Пӑтӑрмах пуҫиле ӗҫ пуҫарнипе вӗҫленнӗ. Судра хӗрарӑм хӗненине йышӑнман, вӑл хӑй ӳкрӗ тесе суйнӑ.

Ҫапӑҫакан хӗрарӑма суд тӗрмене хупса хумасӑр 1 ҫул та 6 уйӑхлӑха ирӗкрен хӑтарма йышӑннӑ, сӑнав вӑхӑтне ҫулталӑклӑха палӑртнӑ.

Павловсен архивӗнчи сӑн

Ҫӗнӗ Шупашкарта пурӑнакан Лариса Павлова «Амӑшӗ героиня» ята тивӗҫнӗ. Лариса Леонидовнӑпа Герман Германович 10 ача ӳстереҫҫӗ: 4 ывӑл та 6 хӗр. Чи асли 23 ҫулта, кӗҫӗнни 6 ҫул тултарнӑ.

Павловсем питӗ хастар: пултарулӑх конкурсӗсене хутшӑнса лауреат ятне пӗрре мар тивӗҫнӗ.

Аса илтерер: «Амӑшӗ героиня» ята 10 ача амӑшне кӗҫӗнни 1 ҫул тултарсан параҫҫӗ, ытти ачин чӗрӗ пулмалла. Ҫак сумлӑ ята тивӗҫсен 1 миллион тенкӗ тата «Амӑшӗ героиня» орден параҫҫӗ.

mnogoblock.ru сӑнӳкерчӗкӗ

Шупашкарта пурӑнакан ҫамрӑк хӗарӑм хӑйӗн ӑс-тӑнне тӗнче тетелӗ урлӑ тӗрӗслес тенӗ. Кӑтартӑва пӗлес тесен 33 тенкӗ тӳлемелле тесе ӗнентернӗ. Хӗрарӑмӑн укҫи пулманран вӑл упӑшкин банк карттипе усӑ курнӑ.

Интернет-тест ирттерекенсем 33 тенкӗ вырӑннӗ банк картти ҫинчи 2 533 тенке илсе кайнӑ.

Пӑтӑрмах тӗлӗшпе пуҫиле ӗҫ пуҫарнӑ.

Йӗрке хуралҫисем вара ҫынсене банк реквизичӗсене пули-пулми пӗлтерме юраманни пирки тепӗр хутчен аса илтереҫҫӗ.

prisursky.ru сайтри сӑн ӳкерчӗк

Сӑварсем тухни ҫуркунне чӑнах та ҫитнине систерет. Пуш уйӑхӗн 19-мӗшӗнче Патӑрьел муниципаллӑ округӗнче ҫак чӗрчунсен уҫӑ шӑтӑкне асӑрханӑ. Специалистсем вӗсем унтан пуш уйӑхӗн 18-мӗшӗнче тухнӑ тесе палӑртнӑ.

Сӑвӑрсем хӗл ыйхинчен вӑрансан юр айӗнче ҫимелли, курӑк, шырама тытӑнаҫҫӗ. Вӗсем пӗлтӗрхи курӑка тата унӑн тымарне ҫиеҫҫӗ, хӗл ыйхинче пулнӑ чухне организмран ҫухатнӑ шыва саплаштараҫҫӗ, ҫавӑнпа юр ҫиеҫҫӗ.

«Сӑрҫи» заповедникре сӑнанӑ тӑрӑх, сӑвӑрсем хӗл ыйхинчен вӑтамран пуш уйӑхӗн 18-30-мӗшӗсенче вӑранаҫҫӗ. Ҫак чӗрчунсем вӑтамран шӑтӑкран 12 кунра тухса пӗтеҫҫӗ.

rutube.ru сайтри сӑн

20 ҫулти студент, Мускаври аслӑ шкулта вӗренекенскер, Чӑваш Ене килсен ултавҫӑсен серепине ҫакланнӑ.

Пуш уйӑхӗн 14-мӗшӗнче ун патне хӑйӗнпе «йӗрке хуралӗн ӗҫченӗ» тесе паллаштарнӑ ҫын шӑнкӑравланӑ. Хайхискер каланӑ тӑрӑх, такам ун ячӗпе кредит илесшӗн имӗш. Палламан ҫын кредитне унран маларах илмеллине, укҫана «хӑрушсӑр счет» ҫине куҫармаллине каланӑ.

Каччӑ темиҫе кунра ултавҫӑсене 1 миллион та 180 пин тенкӗ куҫарса панӑ. Ку йӑлтах тенӗ пек – кредит, 20 пин тенки кӑна хӑйӗн пулнӑ. Палламан ҫынсем татах шӑнкӑравласа ҫине тӑрса укҫа ыйтма пуҫласан кӑна вӑл ултаҫӑсен аллине лекнине ӑнланнӑ.