morgau.cap.ru сӑнӳкерчӗкӗ

Шупашкартан Муркаш ҫити экологи сукмакӗ уҫасшӑн.

Туризм маршручӗ Муркаш тӑрӑхӗнчи паллӑ вырӑнсемпе паллаштарӗ. Паллашмалли унта вара, чӑн та, пур.

Ҫак эрнере Муркаш муниципаллӑ округӗнче республикӑн ҫутҫанталӑк ресурсӗсен тата экологи министрӗн ҫумӗ Елена Дымза пулнӑ. Вырӑнти администрацире пай пуҫлӑхӗнче тӑрӑшакан Зоя Дипломатовӑпа вӗсем экологи сукмакне кӗртнӗ объектсене тишкернӗ.

Экомаршрута авалхи чӑваш юманне, шыв сиккине, страус фермине, Ильинкӑри вӑтам шкула тата «Юман» кафене кӗртнӗ.

Павел Данилов страницинчен илнӗ сӑнӳкерчӗк

Чӑваш Енӗн вице-премьерӗ Павел Данилов республикӑпа сывпуллашнӑ. Регион правительствинче виҫӗ ҫул ытларах ӗҫленӗ ҫав ҫын ӗҫрен каяссине халӑх тетелӗнчи хӑйӗн страницинче шӑматкун пӗлтернӗ.

Хальлӗхе республика Элтеперӗ ун пек хушӑва алӑ пусман. Данилов ҫак кунсенче отпускра пулнӑ-мӗн. Кун пирки forum.na-svyazi.ru портал хыпарланӑ.

Павел Данилов Шупашкарта 1974 ҫулта ҫуралнӑ. 1995 ҫулта Плеханов ячӗллӗ Раҫҫейри экономика университетӗнчен вӗренсе тухнӑ. 2000 ҫулта ӑна Шупашкар хула мэрӗн ҫумӗ пулма шаннӑ. Каярах вӑл Ял хуҫалӑх министерствипе РФ Стройминне пӑхӑнакан учрежденисене ертсе пынӑ.

2021 ҫулхи кӑрлач уйӑхӗнче Павел Данилова Чӑваш Енӗн вице-премьерӗ пулма шаннӑ, тепӗр икӗ уйӑхран строительство тата транспорт министрӗн тилхепине тыттарнӑ.

Следстви комитечӗ тунӑ сӑн

Пуш уйӑхӗн 29-мӗшӗнче кӑнтӑрла Комсомольски тӑрӑхӗнчи Александровка ялӗнче пушар пулнӑ. Ҫулӑма сӳнтерсен 58 ҫулти арҫын виллине тупнӑ.

Инекек вырӑнне следователь килнӗ, пушар вырӑнне тӗплӗн пӑхнӑ. Малтанлӑха пӗлтернӗ тӑрӑх, ҫулӑм юсавсӑр электропралука пула тухнӑ. Халӗ следстви умӗнхи тӗрӗслев пырать.

Паян Шупашкарта Вӗренӳ институтӗнче Чӑваш ҫамрӑкӗсен форумӗ иртнӗ. Ӑна «Хавал» пуҫару ушкӑнӗпе «Ҫамрӑксен хаҫачӗ» йӗркеленӗ. Кӑҫалхипе вӑл иккӗмӗш хут иртнӗ. Пӗрремӗш форум 2019 ҫулта пулнӑ.

Паян форумра тӗрлӗ тытӑмра ҫитӗнӳсем тунӑ ҫамрӑксем хӑйсен ӗҫӗпе, проекчӗпе паллаштарнӑ. Элӗк тӑрӑхӗнчи Кирилл Степанов экзотикӑллӑ тӗрлӗ кайӑк-кӗшӗк ӗрчетет. Хӑйне вӑл ҫамрӑк фермер, ялти блогер тет. Кирилл халӑх тетелӗсенче страницӑсем тытса пырать. Унӑн видеовӗсене пин-пин ҫын пӑхать. Кирилл хӑйӗн роликӗсемпе те паллаштарнӑ, юлашки ҫур ҫулта блогер ӗҫӗ ӑна тупӑш кӳни пирки каласа кӑтартнӑ.

Матвей Блинов форума Мускавран ятарласа килнӗ, вӑл унта вӗренет. Каччӑ тӗрлӗ ҫулта халӑх йышӗ, демографи лару-тӑрӑвӗ мӗнле улшӑнни ҫинчен чӑвашла каласа кӑтартнӑ.

Красноармейски тӑрӑхӗнчи Артур Васильев хурт-хӑмӑр ӗрчетет. Вӑл та хӑйӗн ӗҫӗпе паллаштарнӑ.

Елчӗк округӗнче ҫуралнӑ, халӗ Мускаври М.В.Ломоносов ячӗллӗ патшалӑх университетӗнче вӗренекен Екатерина Нягина - пулас астроном. Эсир ҫӑлтӑр ӳкнине курнӑ-и? Чӑннипе, ҫӑлтӑр ӳкмест, вӗсем - метеорит пайӗсем. Ҫӑлтӑрсем вара вилеҫҫӗ: вӗсенчи газ сирпӗнет.

Малалла...

Николай Кондрашкин. Елизавета Долгова страницинчен илнӗ сӑнӳкерчӗк

Паян, пуш уйӑхӗн 30-мӗшӗнче, Чӗмпӗрти Николай Кондрашкин скульптора 75 ҫул тултарнӑ.

Николай Григорьевича Чӑваш наци ӑслӑлӑхпа ӳнер академийӗн президиумӗпе президенчӗ Евгений Ерагин тӗнче тетелӗнчи ушкӑнсенчен пӗринче саламланӑ.

«Тӑван халӑхӑн мухтава тивӗҫ ывӑлне, ҫуралнӑ кунпа чун-чӗререн саламлатпӑр!

Иксӗлми вӑй-хӑват, ҫирӗп сывлӑх, тӑнӑҫлӑхпа ырлӑх, телей сунатпӑр.

Сирӗн хастарлӑх, чунри пуянлӑх тӗлӗнтерет, савӑнтарать. Малалла та тӑван халӑхшӑн нумай ырӑ ӗҫ тума пултарулӑх ҫӑлкуҫӗ тапсах тӑтӑр», — тесе ҫырнӑ саламра.

imghub.ru сайтри сӑн

Нумаях пулмасть Шупашкарта виҫӗреш ҫуралнӑ. Вӗсене Калинин районӗн администрацийӗн ЗАГС пайӗнче регистрациленӗ.

Виҫӗреш хӗрачасем Анастасийӑпа Дмитрий ҫемйинче кун ҫути курнӑ. Вӗсем хӗр пӗрчисене Мария, Валерия тата Кира ят хунӑ.

ЗАГС ӗҫченӗсем ашшӗ-амӑшне саламланӑ, ачисене сывлӑхлӑ ӳсме суннӑ.

Синоптиксем пӗлтернӗ тӑрӑх, ҫитес эрнере ҫанталӑк савӑнтарӗ - ҫу уйӑхӗнчи пекех ӑшӑ пулӗ.

Ҫак канмалли кунсенче ҫӗрлесерен вырӑнӑн-вырӑнӑн ҫумӑр ҫӑвӗ. Каҫхине те термометр «плюс» кӑтартӗ. Шӑматкун кӑна кӑшах сивӗрех пулӗ. Вырсарникун 7-12 градус ӑшӑ тӑрӗ.

Малтанлӑха пӗлтернӗ тӑрӑх, ҫитес эрнере 14-19 градус ӑшӑ пулӗ. Пӗлтӗр, сӑмах май, акан 4-мӗшӗнче 17,6 градус ӑшӑ пулнӑ. Ку - рекорд.

Синоптиксем хальлӗхе пӗлтернӗ тӑрӑх, ҫитес вӑхӑтра сиветмӗ. Акан пӗрремӗш декади вӗҫӗнче 20 градус таранах ӑшӑ пулма пултарӗ.

Прокуратура тунӑ сӑн

Улатӑр округӗнчи Чуварлей ялӗ ҫывӑхӗнчи Шиблево кӳллинче пулӗ нумай вилнине сӑн ӳкерсе халӑх тетелне вырнаҫтарнӑ. Пӑр ирӗлнӗ вырӑнта вилнӗ пулӑ нумай ишсе тухнӑ.

Мӗн пулнӑ-ха унта? Вырӑнти ҫынсен шухӑшӗпе, юнашар «Кипиай Агро» уй-хирӗ пур, ҫавна пула юханшыв вараланма пултарнӑ.

Рыбнадзор ӗҫченӗсем юханшыва тӗрӗслӗҫ, шыв пробине илӗҫ. Тӗрӗслеве Улатӑрти районсен хушшинчи прокуратура та хутшӑнать.

culture.cap.ru сӑнӳкерчӗкӗ

Пирӗн республикӑра ҫитес уйӑхра иртекен балет фестивалӗ ҫитиччен нумай вӑхӑт юлмасть. Аса илтерер: вӑл ака уйӑхӗн 5-14-мӗшӗсенче Чӑваш патшалӑх оперӑпа балет театрӗнче иртӗ. Пӗтӗм тӗнчери XXVIII балет фестивалӗ вӑхӑтӗнче Шупашкарта ҫулсеренех пысӑк шайри ӑстасем пуҫтарӑнаҫҫӗ. Ҫӗршыври чаплӑ театрсем вӑл вӑхӑтра пирӗн тӑрӑха гастрольсемпе килӗҫ.

Кӑҫал, сӑмахран, «Пушкиниана» премьерӑпа паллаштарӗ. Ӑна Александр Пушкинӑн «Маленькие трагедии» ярӑмне тӗпе хурса хатӗрленӗ. Ӗҫе вилӗмсӗр вырӑс классикӗ ҫуралнӑранпа 225 ҫҫитнине халалланӑ.

Фестиваль Коми Республикинчи оперӑпа балет театрӗн «Крик» балечӗпе уҫӑлӗ.

mintrud.cap.ru сӑнӳкерчӗкӗ

Чӑваш Енре пурӑнакан нумай ачаллӑ ҫемьесене патшалӑх шучӗпе ҫӗр паракан саккун пур. Юлашки вӑхӑтра ҫынсем ҫӗр вырӑнне укҫан илме пултараҫҫӗ. Тӳлев вӗсене пӗр хутчен лекет.

Шӑпах ҫавӑн пек майпа усӑ курнӑ та Куславкка муниципаллӑ округӗнчи Энтри Пасар ялӗнче пурӑнакан Лукиновсем. Вӗсем ҫӗр вырӑнне укҫа сетификатне суйласа илнӗ.

Еленӑпа Владимирӑн виҫӗ ача. Хӗрарӑмпа арҫын тӑван ялта ӗҫлеҫҫӗ.

«Ҫӗр лаптӑкӗ вырӑнне укҫа илме май килнишӗн эпир питӗ савӑнтӑмӑр. 250 пин тенкӗ укҫана эпир хваттер туянма ярасшӑн», — тенӗ виҫӗ ача амӑшӗ.