Паян, раштав уйӑхӗн 18-мӗшӗнче, Австрири Хохфильценра биатлон енӗпе Тӗнче кубокӗн спринт ӑмӑртӑвӗ иртӗ. Старта хӗрарӑмсем тухӗҫ. Раҫҫейӗн пӗрлештернӗ командине нумаях пулмасть кӗнӗ пирӗн ентешӗмӗр Татьяна Акимова та тупӑшӗ.

Тӗнче шайӗнчи ӑмӑртусене юлашки хут 2018 ҫулхи нарӑс уйӑхӗнче хутшӑннӑччӗ. Вӑл ун чухне Китайри Олимпиадӑра ӑмӑртнӑччӗ. Кайран чирленӗ, Тӗнче кубокӗн 2017/2018 ҫулсенчи тапхӑрӗнчи юлашки ӑмӑртусене хутшӑнайманччӗ. Унтан ача ҫуратрӗ, пӗчӗк Аделинӑн амӑшӗ кӗҫех каллех йӗлтӗр ҫине тӑчӗ. Михаил Вансяцкий журналист Фейсбукра пӗлтернӗ тӑрӑх, кӑҫалхи сезонта Раҫҫей кубокӗн ҫичӗ ӑмӑртӑвӗнче Татьяна Акимова ултӑ медаль ҫӗнсе илнӗ.

Паянхи спринтра ентешӗмӗр старта 90-мӗш тухӗ. Маларах асӑннӑ журналист шухӑшланӑ тӑрӑх, ҫакӑ лайӑхах мар. Чӑн та, Хохфильценра 6 градус ӑшӑ, спортсменсем ӑмӑртнӑҫемӗн йӗлтӗр йӗрӗ япӑхса каять. Ӗнер ҫавӑ арҫынсен спринтӗнче аван сисӗннӗ. Старта юлашки ушкӑнпа тӑнӑ хӑвӑрт чупакан спортсменсемех, Понсилуома тата Самуэльсон шведсем, чупас хӑвӑртлӑхпа ҫӗнтерӳҫӗсене 1 минут ытла выляса янӑ.

Пирӗн ҫӗршыври ытти спортсменкӑна илсен Ирина Казакевич 7-мӗш номерпе старта тухӗ, Светлана Миронова — 8-мӗш, Евгения Павлова — 40-мӗш, Ульяна Кайшева — 45, Анастасия Гореева — 60.

Малалла...

«Чӑвашкино» патшалӑх киностудийӗ Сӑр тата Хусан хӳтӗлев чиккисене чавнӑ ҫӗре хутшӑннӑ паттӑрсене халалланӑ документлӑ илемлӗ фильм ӳкерме пуҫланӑ. Ӳкерӳ Етӗрне районӗнчи Тури Ачак ялӗнче пырать. Киностуди ӗҫченӗсем маларах хатӗрленнӗ, ҫулла унта кайса фильм валли материалсем пухнӑ, тыл ӗҫченӗсемпе калаҫнӑ, интервью илнӗ.

Рольсенчен пӗрне РФ халӑх артистки Нина Яковлева вылять. Ҫавӑн пекех РФ тава тивӗҫлӗ артистки Любовь Федорова, ЧР тава тивӗҫлӗ артистки Ирина Архипова хутшӑнаҫҫӗ.

Хальлӗхе фильм сюжетне вӑрттӑнлӑхра тытаҫҫӗ.

Республикӑна 68 троллейбус илсе килмелле пулнӑ. Анчах паянхи куна виҫҫӗшне ҫеҫ илсе ҫитернӗ. Кун пирки Транспорт министерстви пӗлтерет.

Министр тивӗҫӗсене пурнӑҫлакан Юрий Арлашкин каланӑ тӑрӑх, лару-тӑру йывӑр пулсан та хулари электротранспорт паркне ҫӗнетӗҫ. Ҫулталӑк вӗҫлениччен тепӗр 10 троллейбус илсе килӗҫ. Ыттисене нарӑс уйӑхӗн варринче ҫитермелле.

Ҫӗнӗ троллейбусра лармалли 32 вырӑн. Пӗтӗмпе 100 пассажир кӗме пултарать. Сывлӑх енчен хавшак ҫынсене кӗмелли майсем туса панӑ. Салонра видеокамера, информаци кӑтартакан табло, хушма 4 кӑмака, телефон зарядка тумалли вырӑнсем пур.

unian.net сайтри сӑн

Паян РФ Президенчӗ Владимир Путин пресс-конференци ирттернӗ. Вӑл 5 сехетех тӑсӑлнӑ. Юлашкинчен Владимир Владимирович ҫӗршыври ҫемьесене Ҫӗнӗ ҫул умӗн парне тӑвассине пӗлтернӗ.

Президент каланӑ тарӑх, 7 ҫул тултарман ачасемшӗн Ҫӗнӗ ҫулччен 5 пин тенкӗ куҫарса парӗҫ. Ӑна унчченхи пекех, 10 пин тенкӗ панӑ пек, куҫарса парӗҫ.

«Эпир калаҫса татӑлтӑмӑр, эпир – ҫӗршыв, патшалӑх – пирӗн ачасене парне тӑвӑпӑр. Пысӑках мар. Ҫапах 7 ҫул тултарман ачасемшӗн 5 пин тенкӗ парӑпӑр», - тенӗ Владимир Путин пресс-конференцире.

gtrkkursk.ru сайтри сӑн

Шупашкарта пурӑнакан 38 ҫулти хӗрарӑм ултавҫӑсен аллине лекнӗ. Лешсем анлӑ сарӑлнӑ меслетпе усӑ курнӑ: шӑнкӑравланӑ, хӑйсемпе банк ӗҫченӗ тесе паллаштарнӑ.

Хайхискерсем юптарма тытӑннӑ: унӑн укҫине ултавҫӑсем хапсӑнаҫҫӗ-мӗн, вӗсене тытмашкӑн пулӑшма ыйтнӑ. Хӗрарӑм вӗсене итлесе 1 миллион та 300 пин тенкӗ кредит илсе ултавҫӑсене куҫарса панӑ. Хӗрарӑм 73 тӗрлӗ операци ирттерсе укҫана куҫарнӑ.

Кун тӗлӗшпе пуҫиле ӗҫ пуҫарнӑ.

Паян тата ыран пирӗн республикӑра «Симӗс Чӑваш Ен» экологи форумӗ онлайн-мелпе иртет.

Унта тухса калаҫакансенчен пӗри — «Ту!» волонтер-экологсен пӗтӗм Раҫҫейри общество организацийӗн ертӳҫи Андрей Руднев. Вӑл ҫӗршывра экологи волонтерӗсем епле ӗҫленипе паллаштанӑ.

Мероприяти ыран та малалла тӑсӑлӗ.

Сӑмах май каласан, кӑҫал пирӗн республикӑра вӑрман ӗрчетес ӗҫе 1059,2 гектар ҫинче пурнӑҫламалла пулнӑ. Чӑваш Енӗн Ҫутҫанталӑк ресурсӗсен тата экологи министерствинче палӑртнӑ тӑрӑх, палӑртнине планпа пӑхнинчен 1 процент ирттернӗ.

gztslovo.ru сайтри сӑн

Юлашки талӑкра тепӗр 6 ҫын кӑшӑлвирусран вилнӗ. Федераци информаци центрӗ пӗлтернӗ тӑрӑх, республикӑра вируса пула 391 ҫыннӑн пурнӑҫӗ татӑлнӑ.

Ку таранччен 14697 ҫын инфекциленнӗ. Вӗсенчен 13121-шӗ сывалнӑ. Юлашки талӑкра 128-ӑн чирленӗ. 98 ҫын чире парӑнтарнӑ.

Хальхи вӑхӑтра республикӑра 1185 ҫын кӑшӑлвирусран килте амбулатори мелӗпе е пульницӑра сипленет.

Аса илтерер: нумаях пулмасть ЧР Элтеперӗ Олег Николаев телекурава панӑ интервьюра кӑшӑлвирусран прививка тума хирӗҫ пулманни пирки пӗлтернӗччӗ.

Кӑҫалхи кӑрлач уйӑхӗн 1-мӗшӗнченпе раштав уйӑхӗн 15-мӗшӗччен Чӑваш Ен Элтеперӗн Олег Николаевӑн ятне 87 430 хутчен асӑннӑ.

Раҫҫейӗн массӑллӑ информаци хатӗрӗсенче асӑннин медиарейтингӗнче Олег Николаев 39-мӗш вырӑн йышӑннӑ. Ку кӑтартусене «Медиалогия» тӗпчев компанийӗн сайтӗнче вырнаҫтарнӑ.

Танлаштарӑма хатӗрленӗ чух ҫӗршыври 60 пин ытла МИХра: телекуравра, радиора, хаҫатсемпе интернет-кӑларӑмсенче хыпарланине шута илнӗ. Рейтингра ҫӳлти йӗркере — ҫӗршыв Президенчӗ Владимир Путин, Раҫҫей премьер-министрӗ Михаил Мишустин, Мускав мэрӗ Сергей Собянин, РФ Президенчӗн пресс-секретарӗ Дмитрий Песков.

Чӳк уйӑхӗн 15-мӗшӗнче Чӑваш Енри паллӑ ӑсчах, философи наукисен кандидачӗ, геологипе минералогич наукисен кандидачӗ, профессор, Раҫҫейри философи обществин регионти уйрӑмӗн председателӗ Геннадий Трифонов пурнӑҫран уйрӑлнӑ. Вӑл 82 ҫулта пулнӑ.

Пулас ӑсчах 1938 ҫулхи чӳк уйӑхӗн 10-мӗшӗнче Шупашкар районӗнчи Етӗрнекассинче ҫуралнӑ. 1961 ҫулта Мускаври М.В. Ломоносов ячӗллӗ университетӑн геологи факультетӗнчен вӗренсе тухнӑ. Ун хыҫҫӑн та хӑйӗн пӗлӗвне пӗрмай тарӑнлатсах тӑнӑ.

Ӑсчах пур енлӗ аталаннӑ, нумай пӗлекен специалист пулнӑ. Философи, логика, наукӑпа техникӑн историйӗ тата философийӗ, пахалӑх философийӗ енӗпе лекцисем вуланӑ, Ҫӗр ҫинчен калакан вӗрентӳпе паллаштарнӑ.

Ӗнер Любовь Мартьянова сӑвӑҫ 70 ҫул тултарнӑ.

«Ҫӗр ҫинчех ҫуралса та ҫӗре кӗнисем

Паян кун та — эпир — ҫут тӗнче куҫӗнче.

Ҫӗр ҫинчех ҫуралса та ҫӗре кӗнисем

Паян кун парӑмра сар хӗвел умӗнче». Ку йӗркесем — «Асатте-ши вара ассӑн-ассӑн сывлать...» сӑвӑран.

Любовь Мартьянова 1950 ҫулхи раштав уйӑхӗн 16-мӗшӗнче Сӗнтӗрвӑрри районӗнчи Карапаш ялӗнче ҫуралнӑ. Шкултан вӗренсе тухсан пир-авӑр комбинатӗнче ӗҫлеме тытӑннӑ. Каярах Чӑваш патшалӑх университечӗн историпе филологи факультетӗнчен вӗренсе тухнӑ. 1974-1977 ҫулсенче Патӑрьел районӗнчи Турханти вӑтам шкулта вӗрентнӗ. 1977 ҫултан пуҫласа «Тӑван Атӑл» журналта поэзи пайне ертсе пынӑ.

Любовь Мартьянова — 1986 ҫултанпа Раҫҫей писателӗсен союзӗн членӗ, Митта Ваҫлей ячӗллӗ преми лауреачӗ.