cap.ru сӑнӳкерчӗкӗ

Утӑ уйӑхӗн 7-9-мӗшӗсенче Шупашкарта ҫӑмӑл атлетика енӗпе Раҫҫей кубокӗ иртӗ.

Пӗтӗм Раҫҫейри ҫӑмӑл атлетика федерацийӗ пӗлтернӗ тӑрӑх, спортсменсем Шупашкарти Олимп стадионӗнче (Чапаев урамӗ, 17) ӑмӑртӗҫ.

Турнира ҫӗршыври чи вӑйлӑ ҫӑмӑл атлетсем килсе ҫитӗҫ. Кӑҫалхи программӑна многоборье енӗпе тата хӑвӑрт утассипе те ӑмӑртусане кӗртнӗ.

"Контактри" сӑн

Калмӑк Республикинче 2008-2017 ҫулсенче ҫуралнӑ арҫын ачасен хушшинче ирӗклӗ кӗрешӳ енӗпе уҫӑ турнир иртнӗ. Унта тӗлӗ регионти 200-е яхӑн вӑйлӑ спортсмен хутшӑннӑ.

Ӑмӑртура Чӑваш Ен чысне Елчӗкри Михаил Миллин тата Канашри Кирилл Бородкин хӳтӗленӗ. Вӗсем маттурсем! Михаилпа Кирилл икӗ ылтӑн медаль тата икӗ чемпион пиҫҫиххине ҫӗнсе илнӗ.

"Контактри" сӑн

Нумаях пулмасть куҫ курманнисен хушшинче Раҫҫей кубокӗ иртнӗ. Пирӗн ентеш Мария Мамаева унта 5 медаль ҫӗнсе илнӗ.

Мария ӑмӑртура тӗрлӗ дистанцие тӗрлӗ мелпе ишсе 2 ылтӑн, 2 кӗмӗл, 1 пӑхӑр медаль ҫӗнсе илнӗ.

Ӑмӑртӑва 17 регионти спортсменсем хутшӑннӑ. Вӗсен йышӗнче Паралимп вӑййисен, тӗнче, Европа шайӗнчи ӑмӑртусен чемпионӗсемпе призерӗсем пулнӑ.

БРИКС ҫӗршывӗсен вӑййисем малалла пыраҫҫӗ. Чӑваш Енри спортсменсемшӗн вара вӑл вӗҫленнӗ. Пирӗн ентешсем унтан пушӑ алӑпа таврӑнмаҫҫӗ.

Полина Андреева йывӑр атлетка пӗрремӗш кунхинех кӗмӗл медаль ҫӗнсе илнӗ. София Емелюкова тата Павел Иванов самбистсем вара пьедесталӑн ҫӳлти картлашка ҫине хӑпарнӑ – ылтӑн медаль илнӗ.

Ҫӗртмен 14-мӗшӗнче спорт гимнасчӗ Владислав Поляшов ылтӑн медале тивӗҫнӗ. Тепӗр кунхине вӑл кӗмӗл медальлӗ пулнӑ.

Ҫӗртмен 16-мӗшӗнче Виктория Максимова ҫӑмӑл атлетка 200 метра чупса виҫҫӗмӗш вырӑна тухнӑ.

"Контактри" сӑн

Чӑваш Енри ММА кӗрешӳҫисем Раҫҫей чемпионатӗнче тата Пӗтӗм Раҫҫейри ӑмӑртусенче виҫӗ медаль ҫӗнсе илнӗ.

Фарход Рахмоналиев Раҫҫей чемпионӗн ятне тӑваттӑмӗш хут илнӗ. Александр Шмелев тренер патӗнче ӑсталӑхне туптаканскер 52,2 килограмм таякансен виҫе категорийӗнче вӑй виҫнӗ.

Вера Лоткова 56,7 килогамм таяканнисен хушшинче ылтӑн медале тивӗҫнӗ. Ева Митрякова вара 61,2 килограмм таяканнисемпе кӗрешсе кӗмӗл медаль илнӗ. Спортсменкӑсем иккӗшӗ те Андрей Жилкин тренер патӗнче ӑсталӑхне туптаҫҫӗ.

Пӗтӗмӗшле зачетра хӗрарӑмсен команди иккӗмӗш вырӑна тухнӑ.

"Контактри" сӑн

Вӑрнар поселокӗнче ҫуралса ӳснӗ Андрей Львов спорт туризмӗ енӗпе иртнӗ Тӗнче кубокӗнче ылтӑн тата кӗмӗл медальсем ҫӗнсе илнӗ. Ӑмӑрту Узбекистанра пулнӑ.

Пирӗн ентеш Раҫҫейӗн пӗрлештернӗ командин йышӗнче тупӑшнӑ. Андрей Львов Никита Ющикпа ӑмӑртса ылтӑн медаль илнӗ. Хутӑш ӑмӑртура вара вӑл Дарья Елисеевӑпа тупӑшса кӗмӗл медале тивӗҫнӗ.

Анна Штурман тунӑ сӑн

Чӑваш Енри маттур ача Архип Морозов шахмат енӗпе иртнӗ Раҫҫей ӑмӑртӑвӗнче ылтӑн медаль ҫӗнсе илнӗ. Вӑл 9 ҫул тултарман ачасемпе вӑй виҫнӗ.

Ӑмӑрту Кострома хулинче иртнӗ. Унта ҫӗршыври 50 ытла ҫамрӑк шахматист хутшӑннӑ. Пирӗн Архип Морозов 11 турта 9,5 очко пухса Приморье крайӗнчи Богдан Калининран иртсе кайнӑ. Виҫҫӗмӗш вырӑна Ӗренпур облаҫӗнчи Федор Бондарев йышӑннӑ.

Архип Морозов ҫитес ҫул Раҫҫей ӑмӑртӑвӗнче 11 ҫул тултарман ачасемпе вӑй виҫӗ.

cap.ru сӑнӳкерчӗкӗ

Чӑваш патшалӑх аграри университечӗн экономика факультечӗн 3-мӗш курс студенчӗ Александр Константинов кире пуканӗн спорчӗпе иртнӗ Ази ӑмӑртӑвӗнче ылтӑн медаль ҫӗнсе илнӗ. Тупӑшу Тайваньре иртнӗ.

Конкуренци пысӑк пулсан та пирӗн ентеш ыттисене парӑнтарса пьедесталӑн пӗрремӗш картлашки ҫине хӑпарнӑ. Александр 95 килограмран ытларах таяканнисен ушкӑнӗнче кӗрешсе кире пуканне 64 хут йӑтнӑ.

cap.ru сӑнӳкерчӗкӗ

Ҫӗртме уйӑхӗн 24-мӗшӗнче, Республика кунӗнче, ЧР Элтеперӗн Кубокне ҫӗнсе илессишӗн лашапа чупса ӑмӑртӗҫ.

ЧР Ял хуҫалӑх министерстви пӗлтернӗ тӑрӑх, кун пек тупӑшу иккӗмӗш хут пулӗ. Ӑмӑрту Ҫӗнӗ Шупашкарти лаша спорчӗн ача-пӑча спорт шкулӗ ҫумӗнче иртӗ. Лапама 10 пин ытла куракан вырнаҫма пуларать.

Ӑмӑртӑва тӗрлӗ регионти лашапа чупакан спортсменсем хутшӑнӗҫ.

vk.com сайтри сӑн

Чӑваш Енри спорт гимнасчӗсем Раҫҫейри ҫуллахи спартакиадӑра лайӑх кӑтартусемпе савӑнтараҫҫӗ. Вӑл ҫамрӑксен хушшинче иртет.

Ӑмӑрту Пушкӑртстанри Ӗпхӳ хулинче пулнӑ. Хӗрсен хушшинче иртнӗ нумай енлӗ кӗрешӳре пирӗн ентеш Татьяна Терентьева кӗмӗл медаль ҫӗнсе илнӗ.

Командӑпа тупӑшса пирӗн Чӑваш Ен виҫҫӗмӗш вырӑна йышӑннӑ. Уйрӑмах Ника Ильина, Варвара Коптева, Татьяна Терентьева, Елизавета Тонкогова палӑрнӑ.