|
Спорт
 cap.ru сайтри сӑн Пуш уйӑхӗн 21-22-мӗшӗсенче Краснодар крайӗнчи Архипо-Осиповка хулинче маунтинбайк енӗпе «кӗске ҫаврӑм» дисциплинӑра Пӗтӗм Раҫҫейри ӑмӑрту иртнӗ. Унта пирӗн ентешсем те, Олимп резервӗсен В. Ярды ячӗллӗ 7-мӗш спорт шкулӗнче ӑсталӑхне туптакан спортсменсем, хутшӑннӑ. Пухмача вӗсем виҫӗ медальпе пуянлатнӑ. Алина Карлова хӗрарӑмсен ушкӑнӗнче тупӑшса Раҫҫей Кубокӗн пӑхӑр медальне ҫӗнсе илнӗ. Полина Иванова 15-16 ҫулсенчисен ушкӑнӗнче вӑй виҫнӗ, Иван Семенов 13-14 ҫулсенчисемпе тупӑшнӑ. Иккӗшӗ те кӗмӗл медаль хуҫисем пулса тӑнӑ. Хыпар ҫӑлкуҫӗ:
|
|
Спорт
 Ҫӑлкуҫ: cap.ru 2026 ҫулхи пуш уйӑхӗн 13-мӗшӗнче Энтриелти культура ҫуртӗнче сӗтелҫи теннисӗпе ӑмӑрту иртнӗ. Турнирӑн тӗп тӗллевӗ вӑй-хал культурине тата халӑх хушшинче активлӑ пурнӑҫ йӗркине сарасси пулнӑ. Ӑмӑртӑва Энтриелти территори пайӗнче пурӑнакан тӑхӑр спортсмен хутшӑннӑ. Вӗсем ку тӑрӑхӑн чи лайӑх теннисист ячӗшӗн кӗрешнӗ. Хутшӑнакансен йышӗ пысӑк пулман пулин те, вӑйӑсем хӗрӳ иртнӗ. Спортсменсем ракеткӑпа ӑста усӑ курнине кӑтартнӑ, кашниех ҫӗнтерме тӑрӑшнӑ. Судьясем пӗтӗмлетӳ тунӑ хыҫҫӑн чи вӑйлӑ виҫӗ вылякана палӑртнӑ. Сӗтелҫи теннисӗнче Антон Шумерина ҫитекенни пулман — вӑл пӗрремӗш вырӑн йышӑннӑ тата чемпион титулне тивӗҫнӗ. Иккӗмӗш вырӑна Александр Семёнов тухнӑ, виҫҫӗмӗшне вара Кирилл Гаврилов йышӑннӑ. Турнир ҫӗнтерӳҫисемпе призёрӗсене медальсемпе тата хисеп хучӗсемпе чысланӑ. Хыпар ҫӑлкуҫӗ:
|
|
Спорт
 cap.ru сайтри сӑн Италире иртнӗ Паралимп вӑййисенче Раҫҫейӗн пӗрештернӗ команди медальсен зачетӗнче виҫҫӗмӗш вырӑн йышӑннӑ. Унтан пирӗн 6 спортсмен хутшӑннӑ. Вӗсем 12 медаль ҫӗнсе илнӗ: 8 ылтӑн, 1 кӗмӗл тата 3 пӑхӑр медаль. Палӑртса хӑвармалла: Паралимп вӑййисен историйӗнче ҫавӑн пек сахал атлетпа ҫавӑн чухлӗ медаль ҫӗнсе илни пулман. Анастасия Багиян йӗлтӗрпе чупса 3 ылтӑн медаль ҫӗнсе илнӗ, Иван Голубков вара — 2 ылтӑн медаль. Ту йӗлтӗрӗпе янӑракан Варвара Ворончихина тӳрех 4 медаль илнӗ: 2 ылтӑн, пӗр кӗмел тата пӗр пӑхӑр. Алексей Бугаев пухмача пӗр ылтӑнпа тата икӗ пӑхӑрпа пуянлатнӑ. Хыпар ҫӑлкуҫӗ:
|
|
Спорт
 Ҫӑлкуҫ: chuvashia-chess.ru Пуш уйӑхӗн 14-мӗшӗнче Хӗрлӗ Чутайра «Сӑр тӑрӑхӗ — шахмат тӑрӑхӗ» фестиваль иртрӗ. Кӑҫал ку ӑмӑрту ҫирӗммӗш хут йӗркеленнипе уйрӑмах пӗлтерӗшлӗ пулчӗ. Шахмат ӑстисем Совет Союзӗн Паттӑрӗсен И.В. Индряковпа А.Р. Логиновӑн кубокӗшӗн кӗрешрӗҫ. Юбилейлӑ хут иртекен спорт мероприятине республикӑри 17 хулапа округран пурӗ 118 ҫын пухӑнчӗ. Хутшӑнакансен ӳсӗмӗ те тӗрлӗрен: чи пӗчӗк выляканӗ халь тин 7 ҫул тултарнӑ пулсан (2019 ҫулта ҫуралнӑ), чи аслӑ хутшӑнаканӗ — 96 ҫулхи ватӑ (1930 ҫулта ҫуралнӑ). Тӗрлӗ ӳсӗмри абсолютлӑ ҫӗнтерӳҫӗсене — пуҫламӑш класс ачисенчен пуҫласа ӗҫ ветеранӗсем таран — кубоксемпе, медальсемпе тата хаклӑ парнесемпе чысларӗҫ. Ку ӑмӑртура уйрӑм ҫемьесем те, сывлӑхӗпе хавшакрах ачасем те хӑйсен пултарулӑхне кӑтартма пултарчӗҫ. Хыпар ҫӑлкуҫӗ:
|
|
Спорт
 cap.ru сайтри сӑн Кӗрешӳ Пӗтӗм Раҫҫейри XVIII ҫамрӑксен ҫар искусствин вӑййисен программине кӗнӗ. Кун пирки ЧР Элтеперӗ Олег Николаев пӗлтернӗ. «Ку паллӑ пулӑм: кӗрешӳ кун пек пысӑк ӑмӑртусенче пӗрремӗш хут пулӗ», — тесе ҫырнӑ Элтепер. Ӑмӑртура республика чысне кам хӳтӗлесси ака уйӑхӗн 19-мӗшӗнче паллӑ пулӗ. Ун чухне республика III чемпионачӗпе тата первенствипе килӗшӳллӗн суйлав тупӑшӑвӗсем иртӗҫ. Пӗтӗм Раҫҫейри XVIII ҫамрӑксен ҫар искусствин вӑййисем авӑн уйӑхӗн 7-23-мӗшӗсенче Анапӑра тата кӳршӗ Витязево поселокӗнче иртӗҫ. Ӑмӑрту 4 категорипе пулӗ: 10-11 ҫулсенчисем, 12-13 ҫулсенчисем, 14-15 ҫулсенчисем, 16-21 ҫулсенчисем. Хыпар ҫӑлкуҫӗ:
|
|
Спорт
 cap.ru сайтри сӑн Чӑваш Енри велочупуҫӑ Евгений Евграфов нейтраллӑ статус илнӗ. Ку ӑна тӗнче шайӗнчи ӑмӑртусене хутшӑнма май парать. Нейтраллӑ статуса вӑл Пӗтӗм тӗнчери велочупуҫӑсен пӗрлӗхӗнчен илнӗ. Ҫапла вӑл халӗ UCI календаре кӗртнӗ тупӑшусене хутшӑнма пултарать. Палӑртса хӑварар: Евгений Евграфов 27 ҫулта, вӑл – Раҫҫей спорт мастерӗ тата Раҫҫейӗн велоспорт (маунтинбайк) енӗпе пӗрлештернӗ командин пайташӗ. Евгений Шупашкарти Олимп резервӗсен В.Ярды ячӗллӗ 7-мӗш спорт шкулӗнче ӑсталӑхне туптать. Хыпар ҫӑлкуҫӗ:
|
|
Спорт
 «Контактри» сӑн Чӑваш Енри спортсменка, пӑр ҫинче эрешлесе ярӑнакан Камилла Нелюбова Раҫҫей Гран-при финалӗнче пӑхӑр медаль ҫӗнсе илнӗ. Камилла Шупашкарти Олимп резервӗсен 4-мӗш спорт шкулӗнче ӑсталӑхне туптать. Вӑл ӑмӑртура тӳресене кӑткӑс программӑпа тӗлӗнтернӗ: тӳрех икӗ хутчен виҫҫӗллӗ аксель тунӑ. Ку пӑр ҫинче пӗччен ярӑнакан хӗрарӑмсемшӗн йывӑр хусканусенчен пӗри шутланать. Ҫапла пирӗн ентеш 210,67 балл пухса виҫҫӗмӗш вырӑна тухнӑ. Экспертсем акӑ мӗн палӑртаҫҫӗ: «Олимп таблици» ҫине куҫарас пулсан ку 8-мӗш вырӑнпа тан. Камиллӑна пысӑк ҫитӗнӳ тунӑ ятпа ЧР Элтеперӗ Олег Николаев та саламланӑ. Хыпар ҫӑлкуҫӗ:
|
|
Спорт
 «Контактра» халӑх тетелӗнчи сӑн Шупашкар округӗнче сунар биатлонӗ енӗпе турнир пулнӑ. Кӑҫалхипе ӑна 12-мӗш хут йӗркеленӗ. Ӑмӑртӑва Чӑваш Республикинчи тата Мари Элти 10 команда вӑй виҫнӗ. Турнира хутшӑнакансем сунар йӗлтерӗпе патаксемпе усӑ курмасӑр 1,5 ҫухрӑм чупнӑ. Дистанци варринче вӗсем сунар пӑшалӗнчен 30 метр аякран мишене пенӗ. Ӑмӑртура Канаш округӗнчи «Чакас-чикмас» командӑна ҫитекенни пулман. Иккӗмӗш вырӑна Мари Республикинчи «Акпатыр» команда йышӑннӑ. Финиша виҫҫӗмӗш ҫитекеннисем пирӗн ентешсем пулнӑ: ЧР Ҫутҫанталӑк министерствин Чӗрчунсен тӗнчине сыхлакан тата ООПТ дирекцийӗн команди пӑхӑр медаль ҫӗнсе илнӗ. Хыпар ҫӑлкуҫӗ:
|
|
Спорт
 Раҫҫейри ски-альпинист тата тепӗр медаль ҫӗнсе илнӗ. Сӑмах Никита Филиппов ски-альпинизм енӗпе Европа чемпионатӗнче финала тухнӑ ҫеҫ мар, ылтӑн медаль ҫӗнсе илнӗ. Спринт финалӗнче Раҫҫей спортсменӗ 2 минут та 58,6 ҫеккунтра финиша ҫитнӗ. Иккӗмӗш вырӑна тухнӑ Швейцари спортсменӗ Тома Бюссар тепӗр 1,2 ҫеккунтран ҫитнӗ, виҫҫӗмӗш вырӑн йышӑннӑ Испани спортсменӗ Феррер Мартинес – тата тепӗр 1,6 ҫеккунтран. Турнир Азербайджанри ту ҫинче йӗлтӗрпе ярӑнмалли Шахдаг курортра иртет. 23 ҫулти Никита Филиппов Камчаткӑран. Италире кӑҫал иртнӗ Олимпиадӑна нейтраллӑ пулса хутшӑннӑ пирӗн ҫӗршыв спортсменӗсенчен вӑл ҫеҫ медальпе таврӑнчӗ. Никита кӗмӗл медале тивӗҫрӗ. Ӑна ҫавӑншӑн тӑван тӑрӑхӗнче хваттер пама йышӑннӑ. |
|
Спорт
 «Контактри» сӑн Чӑваш Ен чысне хӳтӗлекен Алина Скрипко Екатеринбургра йывӑр атлетика енӗпе иртнӗ Раҫҫей ӑмӑртӑвӗнчен виҫӗ ылтӑн медальпе таврӑннӑ. Вӑл 76 килограмм тайманнисен виҫе категорийӗнче тупӑшнӑ. Пирӗн ентеш пьедесталӑн чи ҫӳллӗ картлашки ҫине виҫӗ хутчен хӑпарнӑ. Палӑртмалла: Алина Скрипко Шупашкарти В.С.Соколов ячӗллӗ спорт шкулӗнче ӑсталӑхне туптать. Хыпар ҫӑлкуҫӗ:
|
+12.3 °C