chuvdram.ru сайтран илне сӑнӳкерчӗк

Ака уйӑхӗн 10-мӗшӗнче Шупашкара Адыгей Республикинчи патшалӑхӑн академи халӑх ташшин ансамблӗ концертпа килӗ. Унти артистсен пултарулӑхӗпе Чӑваш патшалӑх академи драма театрӗнче паллашма май килӗ.

«Нальмэс» — халӑх ташшин академи ансамбльне 1936 ҫулта йӗркеленӗ. Вал асӑннӑ регионӑн визит карточки шутланать. Коллектива хамӑр ҫӗршывра ҫеҫ мар, тӗнчере те пӗлеҫҫӗ.

Ансамбль репертуарӗ ташӑсенчен ҫеҫ мар, тӗрлӗ трюкпа музыкӑран тӑрать. Сцена ҫине 60 ытла артист тухӗ.

Концерт 19 сехетре пуҫланӗ, 1 сехет те 30 минута пырӗ.

Ҫеҫпӗл Мишши ячӗллӗ Чӑваш патшалӑх ҫамрӑксен театрӗ «Ҫӑкӑр чӗлли» спектакле сцена ҫине кӑларать. Ӑна Ева Лисинӑн автобиографиллӗ калавӗ тӑрӑх хатӗрленӗ.

Ӑна Тӑван ҫӗршывӑн Аслӑ вӑрҫинче ҫӗнтернӗренпе 80 ҫул ҫитнине халаллӗҫ.

Спектакль режиссерӗ — Дмитрий Михайлов. Тӗп рольсене Чӑваш халӑх артистки Ирина Архипова, ЧР тава тивӗҫлӗ артистки Венера Пайгильдина, Алина Зайцева, Яна Кузьмина артисткӑсем выляҫҫӗ.

Премьерӑна ака уйӑхӗн 22-мӗшӗнче кӑтартӗҫ.

Ева Лисина ҫинчен тӗплӗнрех РУВИКИн чӑваш уйрӑмӗнче вуласа пӗлме пулать.

"Контактри" сӑн

Республикӑра «Ялти культура ӗҫченӗ» патшалӑх программи ӗҫлеме тытӑнӗ. Ӑна Чӑваш Ен Правительстви ҫирӗплетнӗ.

50 пин ҫын таран пурӑнакан ял-салана ӗҫлеме каякан культӗҫченсене 1 миллион тенкӗ парӗҫ. Анчах малтан конкурс витӗр тухмалла, вырӑнти культура организацийӗпе 1 ставкӑпа килӗшӳ тумалла, ЧР Культура министерствипе килӗшӳ алӑ пусмалла.

cap.ru сӑнӳкерчӗкӗ

К.В. Иванов ячӗллӗ Чӑваш патшалӑх академи драма театрӗ «Семейный театр» (чӑв. Ҫемье театрӗ) республикӑри конкурс ирттерессине пӗлтернӗ.

Пултарулӑх ӑмӑртӑвне чӑваш литературин классикӗ Константин Иванов ҫӳралнӑранпа 135 ҫул ҫитнине халалланӑ.

Конкурс тӗллевӗ — чӑваш литературин пуянлӑхӗпе паллаштарасси. Унта пӗр ҫемье лартнӑ постановкӑсемпе хутшӑнма пулать.

Конкурса утӑ уйӑхӗн 8-мӗшӗ тӗлне пӗтӗмлетӗҫ.

vk.com/dramteatr21 сӑнӳкерчӗкӗ

К.В. Иванв ячӗллӗ Чӑваш патшалах академи драма театрӗн артисчӗ Александр Игнатьев – «Островский. Опыт постижения» актер лабораторине хутшӑнӗ.

Раҫҫейри Пӗчӗк театр 180 заявкӑран 17-шне суйласа илнӗ. Чӑваш артисчӗ сумлӑ ҫав йыша лекнӗ.

«Островский. Опыт постижения» лаборатори Мускаври Пӗчӗк театрта ҫӗртме уйӑхӗн 23-29-мӗшӗсенче ӗҫлӗ. Лабораторие Раҫҫӗйӗн Культура министерстви пулӑшӗ.

culture.cap.ru сӑнӳкерчӗкӗ

Чӑваш Енре чикансен ачисене вырӑнти йӑла-йӗркепе паллаштараҫҫӗ. Кун пирки республикӑн влаҫ органӗсен официаллӑ порталӗнче пӗлтернӗ.

Асӑннӑ ӗҫе пурнӑҫласа чикансен ачисене Сӗнтӗрвӑрри районӗнчи Шуршӑлти А.Г. Николаевӑн мемориал комплексне илсе кайса кӑтартнӑ. Кун пек ҫулҫӳрӗве Чӑваш Енри Халӑхсен туслӑхӗн ҫурчӗ Чӑваш Енӗн Культура министерстви пулӑшнипе йӗркеленӗ.

Музейпа паллашнисем — «Лулуди» наципе культура пӗрлӗшӳри ачасем. Вӗсем Шупашар 63-мӗш тата 1-мӗш шкулсенче вӗренеҫҫӗ.

Чикан культурин пайташӗ Григорий Маркович каланӑ тӑрӑх, ачасене музейра питех те килӗшнӗ, экскурсовода вӗсем чунтан кӑҫӑкланса итленӗ.

cheb-centr.soc.cap.ru сӑнӳкерчӗкӗ

Анатолий Силов — живопись тата графика ӑсти. Вӑл 1938 ҫулхи ҫу уйӑхӗн 20-мӗшӗнче Сӗнтӗрвӑрри районӗнчи Шуркасси ялӗнче ҫуралнӑ. Вырӑнти шкулта ҫичӗ класс вӗренсе пӗтернӗ хыҫҫӑн вӑл Звенигово поселокӗнчи ремесла училищинче тата Мускаври пир-авӑр институтӗнчи прикладной ӳнер факультетӗнче пӗлӗвне туптанӑ.

Аслӑ шкултан вӗренсе тухсан Шупашкарти пир-авӑр комбинатӗнче пусма художникӗ пулса ӗҫлеме тытӑннӑ. Унтан тӗрлӗ ҫӗрте тӑрӑшнӑ.

Паян ватӑ ҫын ҫутҫанталӑкпа киленсе чунне уҫать.

cap.ru сӑнӳкерчӗкӗ

Етӗрне округӗнче Чӑваш хӑмлин музейне уҫасшӑн. Кун пирки округ пуҫлӑхӗ Станислав Трофимов пӗлтернӗ.

Вӑл муниципалитетра пурӑнакансене музей валли экспонатсем пухмашкӑн пулӑшу ыйтнӑ. Сӑнӳкерчӗксем, наградӑсем, документсем, харпӑр тата ытти япала – йӑлтах кирлӗ. Вӗсене Етӗрнери ӳнерпе таврапӗлӳ музейӗ йышӑнать.

Хальлӗхе музей ӑҫта пулассине, ӑна хӑҫан уҫассине пӗлтермен.

Антонина Андреева страницинчен илнӗ сӑнӳкерчӗк

Паян Чӑваш таврапӗлӳҫисен форумӗ иртнӗ. Унта чӑвашсем Пушкӑртстанран, Чӗмпӗртен, Ӗренпуртан тата ытти ҫӗртен килсе ҫитнӗ. Чӑваш культурине тӗпчекенсен форумӗ Чӑваш Енӗн Наци вулавӑшӗнче иртнӗ.

«Вӗсем ҫак ӗҫе чун ыйтнипе (пӗр тӳлевсӗр) туса пыраҫҫӗ, ҫавӑнпа ҫулталӑкра пӗрре пухӑнса аякри йӑхташӑмӑрсемпе пӗрле сӳтсе яваҫҫӗ», – тесе тӗрӗс палӑртнӑ вулавӑш ӗҫченӗ Антонина Андреева халӑх тетелӗнчи хӑйӗн страницинче.

Чӑваш патшалӑх гуманитари ӑслӑлӑхӗсен институчӗн сӑнӳкерчӗкӗ

Пуш уйӑхӗн 27-мӗшӗнче Шупашкарти «Радуга» (чӑв. Асамат кӗперӗ) культурӑпа курав центрӗнче Праски Витти ӳнерҫӗн «Салтак юррисем» куравӗ уҫӑлнӑ.

«Тӗлӗнмелле ӳкерчӗксем. Хӑвӑрах курма пултаратӑр!» — хыпарланӑ курав пирки хулари шкулсенчен пӗринче чӑваш чӗлхи вӗрентекенӗнче ӗҫлекен Александр Степанов халӑх тетелӗнчи хӑйӗн страницинче.

Праски Витти – чӑваш халӑх художникӗ, Раҫҫей тава тивӗҫлӗ художникӗ. Ӑста шухӑшланӑ тӑрӑх, «салтак юррисем — халӑх поэзийӗн чи ҫӳллӗ шайӗ. Унта — куҫҫуль витӗр тухнӑ сӑмахсем, ҫывӑх ҫынсемпе тӑвансене юратни».

Художник салтак юррисем сӑмахпа, шалти пуянлӑхпа, этем кӑмӑл-туйӑмӗпе тыткӑнланине палӑртса хӑварнӑ. «Манӑн ӳкерчӗксем текстпа ҫума ҫуммӑн: ҫав сӑмахсем ҫумӗнчи пушӑ вырӑнсене эпӗ сӑрӑпа тултаратӑп», – тенӗ Праски Витти.