Кӑркӑстанра чӑваш ҫыравҫин Дмитрий Моисеевӑн кӗнеки пичетленсе тухнӑ. Кун пирки автор «ВКонтактра» халӑх тетелӗнчи хӑйӗн страницинче пӗлтернӗ.
«Бишкекра манӑн «Ют пахчари хӑмла ҫырли» кӗнеке кӑркӑсла пичетленсе тухнӑ.
Калавӑмсене темиҫе чӗлхене куҫарса литература журналӗсенче кун ҫути кӑтартнӑ-ха, анчах ку таранччен урӑх чӗлхепе уйрӑм кӗнеке тухманччӗ. Кӑркӑссем калама ҫук пысӑк парне турӗҫ. Хайлавсене кӑркӑсла куҫарнине те эпӗ пӗлнӗ, ҫапах вӗсене кӗнекелесе кӑларасси пирки шухӑшлама та пултарайман», — пӗлтернӗ калем ӑсти.
Куҫаруҫи – кӑркӑс ҫыравҫи, журналисчӗ, педагогика ӑслӑлӑхӗсен докторӗ, профессор, ачасене чӗлхесем вӗрентессипе, тивӗҫлӗ воспитани парассипе ҫыхӑннӑ ыйтусемпе 100 ытла наука ӗҫӗ ҫырнӑ, 20-е яхӑн учебник хатӗрлесе кӑларнӑ Кыялбек Акматов.
Ака уйӑхӗн 18-мӗшӗнче, чӑваш поэчӗ Валентин Урташ ҫут тӗнчерен уйрӑлса кайнӑ кун, чӑваш писателӗсем, поэчӗсем, журналисчӗсем унӑн вил тӑприйӗ ҫине ҫитсе ӑна асӑннӑ. Калем ӑстисемпе пӗрле Анатолий Князев та пулнӑ. Анатолий Пантелеймонович – Елчӗк чӑвашӗ, вӑл Шупашкар районӗнчи Апашра пурӑнать.
Анатолий Князев поэтпа хурӑнташлӑ иккен. Кун пирки Лидия Филиппова журналист халӑх тетелӗнчи хӑйӗн страницинче пӗлтернӗ.
Чӑваш Республикинчи ачасемпе ҫамрӑксен вулавӑшӗнче чӑваш чӗлхине халалланӑ мероприяти иртӗ. Кун пирки Дмитрий Моисеев ҫыравҫӑ халӑх тетелӗнчи хӑйӗн страницинче пӗлтернӗ.
«Ӗнер питӗ ӑшӑ, кӑмӑллӑ мероприяти иртрӗ. Вулавӑш ӗҫченӗceм студентсене чӑваш чӗлхи пирки каласа кӑтартрӗҫ, пире те сӑмах пачӗҫ.
Cтудентсем хастар пулчӗҫ, паллӑ поэтӑмӑрсен чӑваш чӗлхи ҫинчен хайланӑ cӑввисене вуларӗҫ, ыйтӑвӗсене те чӑвашлах пачӗҫ. Ҫамрӑксем тӑван чӗлхепе хитре калаҫма пӗлеҫҫӗ-xa», – хыпарланӑ вӑл.
Чӑваш ҫыравҫисем Екатеринбурга тухса кайнӑ. Кун пирки Чӑваш Республикин ача-пӑчапа ҫамрӑксен вулавӑшӗн директорӗ Татьяна Вашуркина пӗлтернӗ.
«Чӑваш Енӗн Культура министерстви — майсемпе аталану министерстви тесе эпӗ пӗрре ҫеҫ мар ҫырнӑ. Хальхинче хисеплӗ чӑваш ҫыравҫисем пирӗн министерство пулӑшнипе регионсем хушшинчи ача-пӑча литературин кунне хутшӑнӗҫ. Вӗсен йышӗнче: чӑваш халӑх поэчӗ Раиса Сарпи, Светлана Гордеева, Ольга Федорова, Дмитрий Суслин ҫыравҫӑсем», — хыпарланӑ вулавӑш директорӗ.
Чӑваш Енӗн Наци вулавӑшӗн «Варкӑш» литература клубӗн черетлӗ ларӑвӗнче «Асамлӑ ачалӑх» кӗнеке пуххине хакланӑ. Асӑннӑ кӑларӑм Чӑваш кӗнеке издательствинче 2024 ҫул вӗҫӗнче пичетленсе тухнӑ. Кун пирки издательство ӗҫченӗ Ольга Иванова пӗлтернӗ.
«Кӑларӑмра XXI ӗмӗр пуҫламӑшӗнчи чӑваш литературинче ырми-канми тӑрӑшакан ҫыравҫӑсем – пурӗ вӑтӑр ҫичӗ автор – ачалӑхне, асра юлнӑ вӗрентекенӗсене, пӗрремӗш хайлав ҫырнине, вӑл хӑҫан кун ҫути курнине аса илеҫҫӗ», — хыпарланӑ вӑл.
Казахстанри ҫыравҫӑсен пӗрлӗхӗ ЧР Писательсен союзӗн правленийӗн председательне, Чӑваш халӑх ҫыравҫине Юхма Мишшине 89 ҫул тултарнӑ ятпа саламланӑ.
Саламлӑ ҫырура Михаил Николаевичӑн хайлавӗсем чӑваш тата вырӑс литературине аталантарас ҫӗрте пысӑк тӳпе хывнине, кашни йӗркере, сӑмахра унӑн шухӑшӗсем, кулянӑвӗсем пулнине палӑртнӑ.
Ҫыру айне Казахстанри Ҫыравҫӑсен правленийӗн председателӗ Мереке Кулькенов алӑ пуснӑ.
Юхма Мишши ҫинчен тӗплӗнрех РУВИКИн чӑваш уйрӑмӗнче паллашма пулать.
Алексей Афанасьевӑн «Юманлӑх ҫулҫӑ тӑкмарӗ» романӗ кун ҫути курнӑ.
Чӑваш кӗнеке издательствин ӗҫченӗ Ольга Иванова «Контактри» хӑйӗн страницинче пӗлтернӗ тӑрӑх, романӑн пӗрремӗш кӗнеки 2023 ҫулта кун ҫути курнӑ, пӗлтӗр – иккӗмӗшӗ, нумаях пулмасть, ав, виҫҫӗмӗшӗ пичетленсе тухнӑ.
Алексей Афанасьев Тутарстанри Потап-Тӑмпӑрлӑ чӑваш ялӗнче ҫуралса ӳснӗ. Вӑл — прозаик, поэт тата куҫаруҫӑ. Пултаруллӑ ҫав ҫын вырӑсла та, удмуртла та лайӑх пӗлнӗ, ҫамрӑк чух шкулта ачасене удмурт чӗлхине вӗрентнӗ.
Ӗнер, пуш уйӑхӗн 5-мӗшӗнче, Шупашкарти К.В. Иванов ячӗллӗ литература музейӗнче Чӑваш Енри поэтсем пуҫтарӑннӑ. Чӑваш Енри профессионал писательсен союзӗн халӑх тетелӗнчи пабликӗнче пӗлтернӗ тӑрӑх, чи лайӑх поэтсем пухӑннӑ.
Вӗсем хӑйсен лирикӑлла сӑввисемпе ҫуркуннене тата Светлана Гордеевӑна «Цветочная палитра» (чӑв. Чечек палитри) курав уҫӑлнипе саламланӑ.
Литература музейӗнче пуҫтарӑннисен йышӗнче Раиса Сарпи, Лидия Сарине, Раиса Воробьёва, Светлана Гордеева, Любовь Фёдорова, Зоя Сывлӑмпи, Людмила Исаева, Любовь Петрова, Нина Пӑрчӑкан пулнӑ. Унсӑр пуҫне ҫамрӑк поэтсем те пырса ҫитнӗ: Лариса Петрова, Мальвина Петрова, Татьяна Устинова (Тая Ёж).
Чӑвашла роман ҫыракансем кӑҫал та конкурса хутшӑнма пултараҫҫӗ. «Чӑваш романӗ» пултарулӑх ӑмӑртӑвне
Чӑваш кӗнеке издательстви виҫҫӗмӗш хут ирттерет. Конкурса халиччен кӗнекен пичетленмен чӑвашла алҫырусене йышӑнӗҫ. Ӗҫӗн А4 форматпа 700 страницӑран ытла пулмалла мар.
Конкурс ӗҫӗсене кӑҫалхи юпа уйӑхӗн 1-мӗшӗччен fed_ol@mail.ru электрон адреспа е почтӑпа ҫак адреспа ярса памалла: 428019, Шупашкар хули, Иван Яковлев проспекчӗ, 13-мӗш ҫурт, Чӑваш кӗнеке издательстви, «Чӑваш романӗ» конкурса».
Чӑваш кӗнеке издательствинче «Чӑваш ҫыравҫисем – фронтра. Чувашские писатели – на фронте» кӑларӑмӑн 1-мӗш кӗнеки кун ҫути курнӑ. Ӑна Эвелина Малеева, Ольга Федорова, Татьяна Захарова тата Алексей Кузьмин пухса хатӗрленӗ, ӳнерҫи – Дмитрий Литаврин.
Кӗнеке издательствинче пӗлтернӗ тӑрӑх, кӗнекене ҫӗнтерӗве ҫывхартма пулӑшнӑ чӑваш писателӗсемпе Чӑваш ҫӗрӗ ҫинче ҫуралса ӳснӗ вырӑсла ҫыракан калем ӑстисене кӗртнӗ. «Кӑларӑм вӗсен пурнӑҫӗпе тата пултарулӑхӗпе паллаштарать, унта вӑрҫӑ темипе хайланӑ произведенисене кӗртме тӑрӑшнӑ. Пӗрремӗш кӗнекене поэзи тата проза жанрӗпе ҫырнӑ хайлавсем кӗнӗ», — хыпарланӑ кӗнеке издательствинче. Авторсене алфавит йӗркипе вырнаҫтарнӑ.
2-мӗш кӗнекене проза тата драматурги жанрӗсемпе ҫырнӑ хайлавсем кӗрӗҫ.
-18.7 °C