Чӑваш кӗнеке издательствинче чӑваш писателӗн Николай Ишентейӗн ҫӗнӗ кӗнеки икӗ чӗлхепе: чӑвашла тата вырӑсла — пичетленсе тухнӑ.
«Чӗвӗлпи. Щебетунья» ят панӑ кӑларӑма авторӑн сӑввисем кӗнӗ. Вӗсене чӑвашлран вырӑсла Светлана Гордеева поэт тата прозаик куҫарнӑ.
Кӗнекене илемлӗ ӳкерчӗксемпе Екатерина Васильева капӑрлатнӑ. Ҫӗнӗ кӑларӑмӑн редакторӗ – Ольга Иванова.
«Чӗвӗлпи. Щебетунья» кӗнекене кӗҫӗн ҫулхи шкул ачисем валли пичетлесе кӑларнӑ.
Чӑваш кӗнеке издательствинче Константин Ушинскин «Тӗкекен ӗне» кӑларӑмӗ пичетленсе тухнӑ.
1823–1871 ҫулсенче пурӑннӑ вырӑссен паллӑ педагогӗ ачасем валли ырра вӗрентекен хайлавсем сахал мар ҫырнӑ.
Чӑваш кӗнеке издательствинче пичетленсе «Тӗкекен ӗне» унӑн ултӑ калавӗпе икӗ юмахӗ кӗнӗ. Вӗсене Валерий Алексеев чӑвашла куҫарнӑ.
Издательствӑра пӗлтернӗ тӑрӑх, «хайлавсенче чӗрчунсемпе вӗҫен кайӑксен пурнӑҫӗ тӗпре. Кулленхи тӗрлӗ пулӑм урлӑ автор вулакансене ҫутҫанталӑка сӑнама, тимлӗ те хӑюллӑ, ӗҫчен те сапӑр пулма хӑнӑхтарать».
Ҫу уйӑхӗн 20-мӗшӗнче Шупашкарти К.В. Иванов ячӗллӗ Литература музейӗнче «IX Иванов вулавӗ» регионсем хушшинчи ӑсталӑхпа практика конференцийӗ иртӗ. Унта чӑваш литературинче ҫивӗч ыйтусене тата хальхи литература музейӗсен аталанӑвне сӳтсе явма палӑртнӑ.
Музей ҫак темӑсене сӳтсе явмалли сӗнет: «Чӑваш литераторӗсем Раҫҫейри тата пӗтӗм тӗнчери литературоведение витӗм кӳни»,
«К.В. Ивановӑн пурнӑҫӗпе пултарулӑхӗ Раҫҫей культуринче»,
«Чӑваш писателӗсемпе поэчӗсем», «Чӑваш литературин ҫивӗч ыйтӑвӗсем», «К.В. Иванов тата унӑн вӑхӑтрисем»,
«Литература музейӗ: хальхи вӑхӑтри аталану».
«Иванов вулавӗ» 14 сехетре пуҫланӗ.
Чӑваш ҫыравҫисем Йошкар-Олари Пукане театрӗнче «Йӳд орол» (чӑв. Каҫхи хурал) спектакль курнӑ. Ӑна Хусанти Денис Осокин писатель хайлавӗ тӑрӑх лартнӑ.
Асӑннӑ спектакль — «Ылтӑн маска» преми лауреачӗ. Унта ҫулланнӑ арҫын тӑван тӑрӑхне, ашшӗ-амӑшӗн килне, пушанса юлнӑ ҫурта таврӑннине кӑтартса панӑ.
Мӗнпур зал – сцена. Куракансем спектакле тӗртнӗ кавир сарнӑ сак ҫине ларса курнӑ.
Чӑваш ҫыравҫисене ҫармӑссен спектакльне курма мари халӑх писателӗ Зоя Дудина йыхравланӑ.
Шупашкарти А. Гайдар ячӗллӗ вулавӑшра Лидия Сарине ҫыравҫӑпа тӗлпулу иртнӗ.
Лидия Сарине — хальхи вӑхӑтри чӑваш поэчӗ, прозаикӗ, Чӑваш Енри тата Раҫҫейри Профессионал писательсен союзӗн пайташӗ.
Ҫыравҫӑпа тӗл пулма хулари Раҫҫей Геройӗн Н.Ф. Гавриловӑн ячӗпе хисепленекен 22-мӗш вӑтам шкулти 2-мӗш класра вӗренекенсем пырса ҫитнӗ.
Лидия Сарине хӑйӗн чӑвашла сӑввисене вуланӑ май чӗлхемӗр епле ҫепӗҫ те янӑравлӑ пулнине ҫирӗплетсе панӑ. Тӑван чӗлхемӗре хисеплемеллине, чӑвашла калаҫмаллине палӑртса хӑварнӑ.
Хӑна ачалӑхри саманчӗсене аса илнӗ, чӑвашла юрӑсем юрланӑ.
Чӑваш кӗнеке издательствин редакторӗ тата ҫыравҫӑ Ольга Австрийская ӗнер, Чӑваш чӗлхи кунӗнче, Шупашкарти Ашмарин урамӗнчи шкулта иртнӗ литература тӗлпулӑвне хутшӑннӑ.
Пултаруллӑ пике «Контактра» халӑх тетелӗнче пӗлтернӗ тӑрӑх, 8 «А» тата 8 «Б» классемпе литература, поэзи ҫинчен калаҫнӑ. «Хамӑн пултарулӑх ҫулӗ, «Чӑлах пуканесем», «Пӗчӗкҫӗ шевле. Я – маленькая точка во Вселенной...» кӗнекесем ҫинчен каласа кӑтартрӑм, сӑвӑсем вуларӑм. Издательство ӗҫӗ-хӗлӗ, алҫыруран еплерех хатӗр кӑларӑм пулса тӑни ҫинчен те сӑмах хускатрӑм», — хыпарланӑ Ольга.
Ҫыравҫӑ асӑннӑ шкулта 8-мӗш класра ӑс пухакан Даша Кондратьевӑн калавӗпе тата сӑввисемпе те паллашнӑ. «Хӗрача тарӑн шухӑшлӑ произведенисем хайлать, пуласлӑхра кӗнеке кӑларасшӑн», — ырланӑ ача тӑрӑшӑвне ҫамрӑк ҫыравҫӑ.
Пушкӑртстанра «Халӑх туслӑхӗ – кӗнекере» наци ача-пӑча литературин регионсен хушшинчи кунӗ иртнӗ. Кун пирки Телеграмри «Пуринчен малтан. Ҫывӑрса юлмасан» каналта пӗлтернӗ.
Мероприятие Ӗпхӳри А.З. Валиди ячӗпе хисепленекен Наци библиотекинче йӗркеленӗ. Унтан Чӑваш Енрен те ҫыравҫӑсем хутшӑннӑ. Вӗсене сӑнӳкерчӗкре курма пулать.
Пушкӑртстанра пурӑнакан чӑвашсемпе те тӗлпулу иртнӗ.
Степан Аслан чӑваш писателӗн «Ахрат» романне вырӑсла куҫарнӑ. Тӑлмачи — А. В. Асланина-Павлова.
Роман XIX ӗмӗр вӗҫӗнчи - XX ӗмӗр пуҫламӑшӗнчи чӑваш ялӗн пурнӑҫне ҫутатса парать. Кӗнекене Макарӑн биографийӗ евӗр йӗркеленӗ. Ача чухне вӑл выльӑх-чӗрлӗх пӑхать, ҫӑпата ҫыхнӑ, вунӑ ҫула ҫитнӗ ҫӗре тырӑ вырма вӗренсе ҫитет, вун иккӗ валли — сӳрелеме.
Ӗҫе мӗн пӗчӗкрен хӑнӑхнӑскер кайран та ӳрӗк пулса пурӑнать, таса чунлӑ пулса ӳсет.
Ака уйӑхӗн 11-мӗшӗнче Ҫӗрпӳ муниципаллӑ Михайловкӑри А.А. Александров ячӗллӗ шкулта ҫыравҫӑсемпе тӗлпулу иртнӗ.
Унта Чӑваш Енри профессионал писательсен союзӗн пайташӗсем Лариса Петрова, Владимир Степанов тата Анатолий Хмыт пулнӑ. Вӗсем хӑйсем ҫинчен каласа кӑтартнӑ, ӗмӗчӗ-шухӑшӗпе паллаштарнӑ.
Владимир Степановпа Анатолий Хмыт хайлавӗсем шкул программине те кӗнӗ. Лариса Петрова шкул ҫулӗсенче ҫырнӑ сӑввисене вуласа панӑ.
Акан 10-мӗшӗнче Чӑваш Енӗн Наци библиотекинче «Хальхи чӑваш литератури: ӑрусен ҫыхӑнӑвӗ» темӑпа Юрий Скворцов пултарулӑхӗ тавра семинар иртнӗ.
Елена Нарпи халӑх тетелӗнче пӗлтернӗ тӑрӑх, ку иккӗмӗш семинар пулнӑ. «Малтанхи Хв. Уяр пултарулӑхӗпе иртнӗччӗ. Хальхинче те И.Н. Ульянов ячӗллӗ ЧПУ студенчӗсемпе хутшӑнтӑмӑр семинара. Улькка Эльмен, Арсений Тарасов, Людмила Сачкова, Раиса Сарпи ҫыравҫӑсем, Ю.М. Артемьев, В.В. Никифорова тӗпчевҫӗсем Ю. Скворцовӑн илемлӗ тӗнчине тӗрлӗ енлӗ ҫутатса пама тӑрӑшрӗҫ. Пирӗн студент, ҫамрӑк ҫыравҫӑ Елена Кириллова хӑй ҫырнӑ юптарӑва ӑста вуларӗ», – хыпарланӑ аслӑ шкулӑн вӗрентекенӗ.
+24.3 °C