ҪҪХПИ тунӑ сӑн

Паян ҫӗрле «Сӑр» автоҫул ҫинче ҫынна вилмеллех ҫапса хӑварнӑ. Водитель вара вырӑнтан тарнӑ. Халӗ ӑна йӗрке хуралҫисем шыраҫҫӗ.

ҪҪХПИ пӗлтеренӗ тӑрӑх, инкек автоҫулӑн 28-мӗш ҫухрӑмӗнче ҫур ҫӗрте пулнӑ. Машина Ҫӗмӗрлерен Шупашкар еннелле кайма пултарнӑ. Сиенленнӗ машинӑна курсан йӗрке хуралҫисем 102 номерпе шӑнкӑравласа пӗлтерме ыйтаҫҫӗ.

"Лиза Алерт" сайтри сӑн

Ӗнер ирхине Улатӑр районӗнчи Кивӗ Эйпеҫ ялӗнче икӗ хӗрарӑм ҫырлана кайнӑ. Анчах вӗсенчен пӗри вӑрмантан тухайман - ҫухалса кайнӑ. Халӗ 72 ҫулти Юлия Витальевна Андреевӑна «Лиза Алерт» хастарӗсем, полицейскисем, ахаль ҫынсем шыраҫҫӗ.

Ҫанталӑк шӑрӑх пулни лару-тӑрӑва тата кӑткӑслатать. Ҫитменнине, вӑл тӑрӑхри вӑрманта чӑтлӑх нумай.

Хастарсем пӗлтернӗ тӑрӑх, шырама ҫынсем ҫитмеҫҫӗ. Паянхи ир тӗлне Юлия Андреевӑна тупайман-ха.

ya-mechtayu.ru сайтри сӑн

Шупашкарта пурӑнакан 60 ҫулти хӗрарӑм чутах ултавҫӑсене 700 пин тенкӗ куҫарса паман. Юрать, банк ӗҫченӗ ӑна вӑхӑтра ӳкӗте кӗртнӗ.

Ултавҫӑсем анлӑ сарӑлнӑ схемӑпах ӗҫленӗ: шӑнкӑравланӑ та такам ун ячӗпе кредит илесшӗн пулнине пӗлтернӗ. Укҫана сыхласа хӑварас тесен хӑрушсӑр счет ҫине куҫармалла-мӗн. Хӗрарӑм банк инҫе вырнаҫнине каланӑ. Ултавҫӑсем ун валли такси чӗннӗ. Такси укҫине хӗрарӑмӑн хӑйӗнех тӳлеме тивнӗ-ха. Ҫав палламан ҫын банк ӗҫченӗсене нимӗн те шарламалла маррине асӑрхаттарнӑ.

Банка ҫитсен хӗрарӑм хӑйӗн 700 пин тенкине илнӗ. Унти ӗҫчен мӗн пулнипе кӑсӑкланнӑ. Хӗрарӑм укҫана ултавҫӑсенчен ҫӑлнине каланӑ. Банк ӗҫченӗ укҫана ниҫта та куҫармалла маррине ӑнлантарнӑ. Халӗ ҫав ултавҫа шыраҫҫӗ.

Яндекс.дзен сайтри сӑн

Утӑ уйӑхӗн 20-мӗшӗнче Катастрофа медицинин тата васкавлӑ медпулӑшу центрне шӑнкӑрав ҫитнӗ: Етӗрне районӗнче утарҫа пыл хурчӗсем тапӑннӑ.

Хайхи арҫын вӗсене вӗллене пуҫтарма шутланӑ. Анчах ятарлӑ тeм мар, футболкӑпа шорты тӑхӑннӑ. Пыл хурчӗсене темӗн килӗшмен - вӗсем хуҫине тапӑннӑ.

Вырӑна ҫитнӗ тухтӑрсем утарҫа тӳрех аллергирен укол тунӑ. Кайран пациента пульницӑна илсе ҫитернӗ.

Ку калав историйӗ, хӑйне ҫырас вӑхӑт пекех, вӑрӑма тӑсӑлчӗ. Ҫавӑн евӗрлӗ калав ҫырас шухӑш ман пуҫа 1933—1934 ҫулсенче пырса кӗчӗ пек астӑватӑп. Таҫта пӗр-ик предложенипе ҫырса хуни те пурччӗ пулас хутсем хушшинче. Ун чухне эпӗ Инҫет Хӗвелтухӑҫӗнчеччӗ ӗнтӗ.

1930 ҫулта Самарти иккӗмӗш сыпӑклӑ Чӑваш шкулне хупнӑ хыҫҫӑн эпӗ, ҫав шкулӑн 7-мӗш класӗнчен вӗренсе тухнӑскер, виҫӗ ҫула яхӑн е хамӑр ял колхозӗнче, е Самарпа Ӗпхӳ таврашӗнчи ҫӗнӗ стройкӑсенче ӗҫлекелесе ҫӳрерӗм. Малалла вӗренме май килмерӗ-ха. Хӑш шкулне хам кӗмерӗм, теприне — илмерӗҫ.

Юлхавӗн турри килтех тет — кӗлтунине час илтет. Вӑл ҫулсенче ман пек чухӑнни ҫукчӗ те пуль. Кӗсье те, хырӑм та пуш-пушахчӗ. Ӗҫе кӗнӗ чух, ытла ырханнӑн курӑнас мар тесе, ик-виҫшер хут кӗпе тӑхӑнаттӑм. 1933 ҫулччӗ ун чухне урамра. Правительство йӗркеленӗ выҫлӑхчӗ (колхозсенчи тырра патшалӑх пӗр пӗрчӗ хӑварми шӑлса кайнӑччӗ).

Пыратӑп ҫапла пӗррехинче Самар урамӗпе, апат-ҫимӗҫ лавккисен чӳречисенчен тӗмсӗлсе пӑхатӑп. Курах кайрӑм пӗр хитре пӗлтерӳ: «Сахалиннефть» трест вербовкӑпа илсе кайма ӗҫлекенсене пуҫтарать», — тенӗ.

Малалла...

"Про Город" сайтӗнчи сӑн

Ҫӗнӗ Шупашкарти ача ҫуратмалли ҫурт ҫывӑхӗнче хӗрарӑм виллине тупнӑ. Халӗ РФ Следстви комитечӗн Чӑваш Енри следстви органӗсем ӗҫ-пуҫа уҫӑмлатаҫҫӗ.

Хӗрарӑм виллине паян 10 сехет ҫурӑра асӑрханӑ. Хӑй 50 ҫулти пек курӑнать. Малтанлӑха пӗлтернӗ тӑрӑх, хӗрарӑм 5-мӗш хутран ӳкнӗ.

Ҫакӑ паллӑ: хӗрарӑма ача ҫуратмалли ҫурта экстреннӑй шӑнкӑрав пулнӑ хыҫҫӑн илсе ҫитернӗ. Вӑл ҫӗре ӳксенех вилнӗ.

cap.ru сӑнӳкерчӗкӗ

Ҫӗртме уйӑхӗнче Хулари 1-мӗш клиника пульницинче чӗре чирӗпе йывӑр чирлекен ача ҫуралнӑ. Тухтӑрсем ӑна васкавлӑ операци кирлине пӗлтернӗ.

Чӑваш Ен тухтӑрӗсем Пензӑри чӗрепе юн тымарӗсен хирургийӗн федераци центрӗпе ҫыхӑннӑ. Ачан сывлӑхне кӑшт йӗркене кӗртсен ӑна Пензӑна илсе кайма хатӗрленӗ. Пӗчӗкскере реанимобильпе илсе кайнӑ, реанматологсем пӗрлех пулнӑ. Вырӑна ҫитсен ачана унти кардиохирургсен аллине панӑ.

Ача 6 кунра чухне операци тунӑ. Вӑл ӑнӑҫлӑ иртнӗ.

Ача халӗ килтех, Чӑваш Енрех.

Паян тинех урамра ҫуллахи ҫанталӑк хуҫаланать. Синоптиксем пӗлтернӗ тӑрӑх, кун пек уяр та шӑрӑх кунсем сахалтан та 2 эрне пулӗҫ.

Пирӗн патра хуҫаланнӑ циклон Черноземье енне кайнӑ. Паян-ыран 24-29 градус ӑшӑ тӑрӗ. Ҫил лӑпкӑ вӗрӗ.

Ҫитес эрне варринче сывлӑш температури 30 градус таранах ӑшӑнӗ. Каҫсерен те 17-19 градус ӑшӑ тӑрӗ. Анчах вырӑнӑн-вырӑнӑн аслатиллӗ ҫумӑр ҫӑвас хӑрушлӑх пулӗ.

Сӑмах май, иртнӗ талӑкра 1 тӑваткал метр ҫӗр ҫине 10 литр шыв ӳкнӗ. Утӑ уйӑхӗнчи нӳрӗклӗх норми 20 процент ытларах та тулнӑ.

pravdapfo.ru сӑнӳкерчӗкӗ

Шупашкар хулинче пӗр арҫын бетон карта ҫинчен Атӑла сикнӗ. Арҫынна тухтӑрсен пулӑшӑвӗ кирлӗ пулса тухнӑ.

Утӑ уйӑхӗн 21-мӗшӗнче Шупашкарти юханшыв порчӗ патӗнче пӗр арҫын бетон карта ҫинчен Атӑла сикнӗ. Пӗлнӗ-пӗлмен тата пули-пулми вырӑнта шыва сикмелле марри пирки шухӑшламан ҫав этем шывран тухайманине кура ҫынсем ҫӑлавҫӑсене чӗнсе илнӗ.

Республикӑн шыравпа ҫалав службинче пӗлтернӗ тӑрӑх, ҫӑлавҫӑсем арҫын патне кимӗпе пырса ӑна шывран туртса кӑларнӑ, унтан васкавлӑ пулӑшу тухтӑрӗсене чӗнсе илнӗ.

21.mchs.gov.ru сӑнӳкерчӗкӗ

Утӑ уйӑхӗн 21-мӗшӗнче Шупашкар районӗнчи Ҫӗнӗ Тутаркассинче пахча-ҫимӗҫ управӑшӗ ҫуннӑ. Пушарпа кӗрешекенсем вут-ҫулӑма сӳнтерес тесе икӗ сехет таран тӑрӑшнӑ.

Пушар пирки каҫхи пилӗк сехет ҫурӑ тӗлӗнче пӗлтернӗ. Ҫӑлавҫӑсем вырӑна васкавлӑн тухса кайнӑ. Вут-ҫулӑма сӳнтерме 10 машина тата 50 ҫын пырса ҫитнӗ. Пушара 19 сехет те 45 минут тӗлне сӳнтернӗ.

Вут-ҫулӑм пахча-ҫимӗҫ управӑшӗн ҫивиттине пурӗ 550 тӑваткал метр лаптӑкра сиенлетнӗ.

Инкек сӑлтавне тата вут-ҫулӑм миҫе тенкӗлӗх сиен кӳнине экспертсем палӑртӗҫ.