Яндекс.дзен сайтри сӑн

Куславкка районӗнчи фермер тахҫан шкул пулнӑ столовӑйне йышӑннӑ та унта сыр пӗҫерме тытаннӑ. Прокуратура тӗрӗслев ирттерсен вӑл ҫав 170 тӑваткал метрпа саккуна пӑсса усӑ курнине тупса палӑртнӑ. Фермерӑн муниципалитетпа нимӗнле килӗшӳ те пулман.

Административлӑ йӗркене пӑснӑ тесе хресчен фермер хуҫалӑхӗ тӗлӗшпе ӗҫ пуҫарнӑ. Район администрацийӗн пуҫлӑхӗ тӗлӗшпе вара представлени ҫырнӑ.

Cap.ru сӑнӳкерчӗкӗ

Раҫҫей банкӗн Чӑваш Енри уйрӑмне ҫӗнӗ ҫын ертсе пыма тытӑннӑ. Унпа республика Элтеперне Олег Николаева банк ӗҫченӗсем паллаштарнӑ.

Раҫҫей банкӗн Чӑваш Енри уйрӑмӗн – Раҫҫейӗн Тӗп банкӗн Атӑл-Вятка тӗп управленийӗн Чӑваш Республикинчи наци банкӗн управляющийӗ пулма Максим Фролова ҫирӗплетнӗ. Максим Петрович Тӗп банкра 25 ҫул ытла ӗҫленӗ. Юлашки ҫулсенче вӑл Самарӑра тӑрӑшнӑ. Унта регионти уйрӑмӑн управляющийӗн ҫумӗ пулса 6 ҫула яхӑн тӑрӑшнӑ.

"Чеб.ру" сайтри сӑн

Утӑ уйӑхӗн 3-мӗшӗнче упӑшкипе арӑмӗ тата вӗсен 3 ачи Атӑл варринчен хӑйсем тӗллӗн тухайман. Вӗсен катерӗ ҫӗмӗрӗлсе ларнӑ.

Хайхискерсем ҫӑлавҫӑсем патне шӑнкӑравланӑ. Лешсем вырӑна ҫитсе катера ҫыран хӗррине туртса кӑларнӑ.

Тепӗр кунхине "Яхтклуб" ҫывӑхӗнче гидроцикл ҫӗмӗрӗлнӗ. Ку тӗслӗхре те ҫӑлавҫӑсем пулӑшнӑ. Вӗсем гидроцикла ҫыран хӗррине илсе тухнӑ.

Cap.ru сӑнӳкерчӗкӗ

Кӑҫалхи юпа уйӑхӗнче Ентешсен форумӗ иртӗ.

Асӑннӑ мероприятие ирттерме республикӑра йӗркелӳ комитетне палӑртнӑ. Ӗҫлӗ ушкӑна республика Элтеперӗ Олег Николаев ертсе пырӗ. Оргкомитет ҫитес эрнере пӗрремӗш ларӑва пуҫтарӑнӗ.

«Созвездие земляков» (чӑв. Ентешсен ҫӑлтӑр ушкӑнӗ) фестиваль Чӑваш Енре виҫҫӗмӗш ҫул ӗнтӗ юпа уйӑхӗн 28-мӗшӗнче иртет. Кӑҫалхине республика Элтеперӗ Олег Николаев «Ентешсен форумӗпе» тата «Сурский рубеж» оперӑн премьерипе пуянлатма сӗннӗ.

"Известия Мордовии" телеграм-каналти сӑн

Мӑкшӑ Республикинче Пӗтӗм Раҫҫейри ял Сапантайӗпе килӗшӳллӗн лаша кӳлсе чупакансен ӑмӑртӑвӗ иртнӗ. Унта 1600 метра чупса пирӗн ентеш Инсур Галимзянов финиша чи малтан ҫитнӗ. Вӑл Вернблум Аш ятлӑ лашапа ӑмӑртнӑ. Инсур тӗп парнене - Лада Грантӑна - ҫӗнсе илнӗ. Палӑртмалла: пирӗн ентешпе пӗрле Мӑкшӑ, Тутар республикисенчи, Пенза облаҫӗнчи спортсменсем хӑйсен урхамахӗсемпе ӑмӑртнӑ.

Уява 50 пин ытла ҫын пухӑннӑ. Спорт ӑмӑртӑвӗсемсӗр пуҫне наци вӑййисемпе конкурсӗсем иртнӗ. Хӑнасем наци апат-ҫимӗҫне тутанса курнӑ. Ҫавӑн пекех концерт, флешмоб пулнӑ.

Cap.ru сӑнӳкерчӗкӗ

Чӑваш Енре кӑҫал Паллӑ ентешсен ҫулталӑкӗ пулнӑ май тӗрлӗ мероприяти ирттереҫҫӗ. Паян Шупашкарта Валентина Иванова журналиста асра тытса асӑну хӑми уҫнӑ. Унта республика Элтеперӗ Олег Николаев хутшӑннӑ.

Валентина Иванова ТАСС корреспонденчӗ пулса 27 ҫул тимленӗ, республикӑри хыпарсене ҫӗршыв шайне кӑларма пулӑшнӑ.

Пултаруллӑ калем ӑсти нумай ҫамрӑк журналистшӑн тӗслӗх пулса тӑнӑ, вӗсем унтан вӗренме, ун пек пулма ӑнтӑлнӑ.

Асӑну хӑмине Шупашкарти Ленин проспектӗнчи 11-мӗш ҫурт ҫине вырнаҫтарнӑ. Пурӑннӑ пулсан Валентина Иванова паян 85 ҫул тултаратчӗ.

Киров. smartik.ru сӑнӳкерчӗкӗ

Ҫулла кашниех канма кайма ӗмӗтленет. Хӗлле ҫул ҫӳресех кайманнисем те халӗ ӑҫта та пулин ҫитсе килме ӗмӗтленеҫҫӗ. Киров облаҫӗнчи 25 ҫулти ҫамрӑк та ҫаплах тӑвас тенӗ. Вӑл Краснодар крайӗнчи Сочие ҫитме ӗмӗтленнӗ.

Каччӑ самолёт-пуйӑспа мар, ҫула май машинӑпа кайма ӗмӗтленнӗ. Киров тӑрӑхӗнчен Шупашкара ҫитсен вӑл ҫула май машина шырама тытӑннӑ. Кӗҫех лартса кайма килӗшекен те тупӑннӑ. Анчах хайхи этем ҫул укҫин пӗр пайне куҫарса пама ыйтнӑ, ятарлӑ каҫӑ ярса панӑ.

Киров каччи каланине итленӗ. Кӗҫех вӑл 18 пин тенкӗсӗр тӑрса юлнӑ. Улталаннине ӑнланса илнӗ хыҫҫӑн каччӑ Шупашкартан тӑван килне кайнӑ.

21.мвд.рф сайтран илнӗ сӑнӳкерчӗк

Ҫӗрпӳ хулинче тиев турттармалли «Валдай» автомобиле чӗртсе янӑ. Вырӑнти пасар территорийӗнче ларакан машина ҫуннине ҫӗртме уйӑхӗн 30-мӗшӗнче 3 сехет те 40 минутра таксист асӑрханӑ. Ҫавӑн пирки вӑл йӗрке хуралҫисене пӗлтернӗ. Вут-ҫулӑма пушарпӑ кӗрешекенсем сӳнтернӗ.

Йӗрке хуралҫисем ҫав каҫ урамра ҫамрӑксен ушкӑнне асӑрханӑ. Вӗсене полицейскисем ШӖМӗн вырӑнти пайне лартса кайнӑ. Машинӑна шӑпах ҫав виҫӗ ҫамрӑк чӗртсе яни ҫиеле тухнӑ. Малтан бензин сапнӑ, унтан чӗртсе янӑ. Усал шухӑш тытнӑскерсем ҫипуҫа ылмаштарса тӑхӑннӑ.

Каччӑсем тӗлӗшпе пуҫиле ӗҫ пуҫарнӑ. Малтанласа палӑртнӑ тӑрӑх, ҫамрӑксенчен пӗри автомобиль хуҫине кӳреннӗ, ҫавӑнпа тавӑрас тенӗ.

Ҫӗртме уйӑхӗн 27-мӗшӗнче ҫил-тӑвӑлран шар курнӑ ҫемьсене укҫан пулӑшма палӑртнӑ. Кун пирки Инкеклӗ лару-тӑру патшалӑх комитечӗн ертӳҫи Сергей Павлов пӗлтернӗ. Шар курнӑ ҫемьсене 10-шар пин тенкӗ тӳлӗҫ.

Аса илтерер: ҫил-тӑвӑл ытларах Йӗпреҫ, Комсомольски, Канаш районӗсенче алхаснӑ.

Харпӑр ҫуртсемсӗр пуҫне республикӑра ҫил-тӑвӑл 9 шкула сиенлетнӗ. Тӑкак 9,95 миллион тенкӗпе танлашнӑ. Чылай шкулӑн тӑрри сменленнӗ.

21.мвд.рф сайтран илнӗ сӑнӳкерчӗк

Канаш районӗнчи пӗр ялта пурӑнакан арҫынна йывӑҫ каснӑшӑн явап тыттарӗҫ.

64 ҫулти ҫын Канашри вӑрман хуҫалӑхне шар кӑтартнӑ. Пурӗ 150 пин тенкӗ ытлалӑх.

Йывӑҫ каснине вырӑнти йӗрке хуралҫисем утӑ уйӑхӗнче тупса палӑртнӑ.

Арҫын тӗлӗшпе РФ Пуҫиле кодексӗн 260-мӗш статйин 3-мӗш пайӗпе пуҫиле ӗҫ пуҫарнӑ. Ватӑ ҫын йӗрке хуралҫисене хыра киле валли каснине пӗлтернӗ.

Чӑваш Енӗн Шалти ӗҫсен министерствинче пӗлтернӗ тӑрӑх, пуҫиле ӗҫе тӗпчесси малалла пырать.