ptoday.ru сайтри сӑн

Паян ирхине Шупашкарта Эльгер урамӗнче вырнаҫнӑ шкултан палламан арҫын 10 ҫулти арҫын ачана ҫавӑтса тухса кайма тӑнӑ. Ҫакна унӑн 18-ти пиччӗшӗ курнӑ та арҫынна тӗксе янӑ. Лешӗ кун хыҫҫӑн тарнӑ.

Кун пирки ҫийӗнчех полицие пӗлтернӗ. ҪҪХПИ инспекторӗсем палламанскер мӗнле маршрутпа куҫнине палӑртнӑ. Ӑна Университет урамӗнчи ҫурт умӗнче тытса чарнӑ.

Ҫакӑ паллӑ: 38 ҫулти арҫын психиатр патӗнче шутра тӑрать. Шкула пынӑ чухне вӑл нимӗн те ӑнланман, ҫакна мӗншӗн тунине ӑнлантараймасть.

cap.ru сайтри сӑн

Шупашкар хула администрацийӗн пуҫлӑхӗ Денис Спирин ку должноҫе йышӑннӑранпа тӳрӗ линие пушӑн 24-мӗшӗнче тухнӑччӗ. Унтанпа вӑл тӳрӗ лини ирттермен. Ҫитес эрнере вӑл ҫак утӑма тума шутланӑ: чӳк уйӑхӗн 17-мӗшӗнче тӳрӗ лини ирттерӗ.

Вӑл 10 сехет ҫурӑра пуҫланса 13 сехетре вӗҫленӗ. Унта 23-50-06 номерпе шӑнкӑравласа ҫитме пулать. Е сити-менеджерӑн халӑх тетелӗсенчи посчӗсен айне комментари хӑварма юрать.

Тӳрӗ линие «Контактра» халӑх тетелӗнче «Уҫӑ хула» («Открытый город») ушкӑнра курма пулать.

Мила Данилова тӗнче тетелӗнче вырнаҫтарнӑ видеоран илнӗ сӑнӳкерчӗк

Чӳк уйӑхӗн 26-мӗшӗнче Стерлитамак хулинче Чӑваш тӗррин уявне пуҫласа пухӑнӗҫ.

Пушкӑртстанри ҫав хулара йӗркелекен уявра чӑваш тӗррин пуянлӑхӗпе паллашма май килӗ. Ҫав тӗллевпе курав йӗркелӗҫ. Чӑваш Енри ремесленниксен гильдийӗн пайташӗ Любовь Вазюкова чӑваш тӗррин вӑрттӑнлӑхӗпе ҫыхӑннӑ ӑсталӑх сехечӗ ирттерӗ.

Мила Данилова «Контактра» тӗнче тетелӗнче пӗлтернӗ тӑрӑх, Чӑваш тӗррин уявне йӗркелекенни — Пушкӑртстанри чӑвашсен «Канаш» общество организацийӗ. Мероприяти хулари Культура керменӗнче 14 сехетре пуҫланӗ.

cap.ru сӑнӳкерчӗкӗ

Шупашкарпа Ҫӗнӗ Шупашкара ҫыхӑнтаракан 101С-мӗш маршрут ҫине тата тепӗр виҫӗ автобус кӑларнӑ.

Асӑннӑ маршрут Шупашкарти «Университет» чарӑнуран Ҫӗнӗ Шупашкарти «Сокол» чарӑнӑва ҫити ҫӳрет.

Халӑх йышлӑ ҫӳренӗрен Чӑваш Енӗн Транспорт тата ҫул-йӗр хуҫалӑхӗн министерстви маршрутра автобуссен шутне ӳстерме йышӑннӑ — хушма 3 автобус ҫӳретме тытӑннӑ. Ӳлӗмрен вӑл маршрутпа 18 единица автобус ҫӳрӗ.

Маршрутпа «Iveco» маркӑллӑ автобуссем хутлаҫҫӗ. Вӗсене 45 ҫын вырнаҫать, вӗсенчен 20-шӗ валли ларса пымалли вырӑн пур, 25 пассажир тӑрса пырать.

Халӑх ӗҫе кайнӑ тата ӗҫрен таврӑннӑ чухне автобуссем 10 минутра пӗрре хутлаҫҫӗ, ытти чухне — 20 минутра пӗрре.

РФ Шалти ӗҫсен министерствин Шупашкар хулинчи управленийӗн видеовӗнчен илнӗ скриншот

Чӳк уйӑхӗн 8-мӗшӗнче 16 сехетре Шупашкарти финанс организацийӗсенчен пӗрин ӗҫченӗсем йӗрке хуралҫисене пӑтӑрмах пирки систернӗ. Вӗсем пакунлисене каланӑ тӑрӑх, пӗр хӗрарӑм кредит илнӗ те ҫав укҫана тӗрлӗ счет ҫине куҫарса пама тытӑннӑ. Хӑй вара ҫав вӑхӑтра телефонпа пӗрмай такамсемпе калаҫнӑ.

Хӗрарӑмпа тӗл пулма патурльпе пост службин ӗҫченӗсем тухса кайнӑ. Ултавҫӑсен капкӑнне ҫакланни Сӗнтӗрвӑрри районӗнчи 51 ҫулти хӗрарӑм пулнӑ. Йӗрке хуралҫисем хӗрарӑма тимлӗ пулма ӳкӗте кӗртес тесе пӗр сехет ытла калаҫнӑ. Хӗрарӑм 150 пин тенке куҫарса ӗлкӗрнӗ. Пӗтӗмпе хӗрарӑм аллинче тата тепӗр 600 пин тенкӗ тӑрса юлнӑ. Ҫав укҫана такамсене куҫарса парасран сыхласа хӑварнӑ та йӗрке хуралҫисем.

culture.cap.ru сӑнӳкерчӗкӗ

Чӑваш наци музейне йӗркеленӗренпе пӗлтӗр 100 ҫул ҫитнӗ. Ҫавна май культура учрежденийӗн ӗҫченӗсем пысӑк тӗпчев ӗҫӗ туса ирттернӗ, архиври документсене тишкернӗ, тӗрлӗ пулӑма хутшӑннисен аса илӗвӗсене пухса пынӑ, хӑйсен фончӗсене шӗкӗлченӗ. Нумай тӑрӑшнине пӗр кӗнекене пухса кӑларнӑ.

Чӑваш Ен Наци музейӗнче ӗнентернӗ тӑрӑх, «Чувашский национальный музей. 1921-2021» ятлӑ кӗнеке музей историйӗпе туллин паллаштарать. Тӑван тӑрӑхӑмӑрпа халӑхӑмӑрӑн кун-ҫулӗ ҫеҫ мар, музей шӑпи те кӑсӑклӑ пулнӑ.

Ӗнер Хӗрлӗ Чутай районӗнчи «Коминтерн» хуҫалӑхра 500 пуҫ вырнаҫмалли пӑру вити уҫӑлнӑ. Тӗрӗссипе, унта строительство ӗҫӗсем тахҫантанпах пыраҫҫӗ. 5 ҫул каялла 600 ӗне валли вите хута янӑ, 2 ҫул каялла ӗне сумалли блока хута янӑ.

Хуҫалӑх ертӳҫи Альбина Новикова палӑртнӑ тӑрӑх, инвестицие 310 миллион тенкӗ хывнӑ. Патшалӑх енчен те пулӑшу пулнӑ: федераци хыснинчен - 8 млн, республика хыснинчен 30 млн тенкӗ уйӑрнӑ.

Халӗ фермӑра 1 ӗнерен ҫулталӑкне вӑтамран 7 пин килограмм сӗт суса илеҫҫӗ. Кӑҫал 6 пин ытла тонна сӗт суса илме палӑртнӑ.

daytimenews.ru сайтри сӑн

Раҫҫейре кӑшӑлвирусран хӳтелӗнмелли вакцинӑна сӑмсаран яма пуҫланӑ. Кун пирки сайтра пӗлтернӗччӗ. Унпа Чӑваш Енре те усӑ курма тытӑннӑ.

Укол туса янӑ вакцина хыҫҫӑн организмра пӗтӗмӗшле иммунитет пулать, сӑмсаран ярсан вара – клетка иммунитечӗ. Тухтӑрсем иккӗмӗш мелпе ревакцинаци тума сӗнеҫҫӗ.

Ҫак мелпе вакцинациленсен икӗ сехет ҫиме, ӗҫме юрамасть. Кунсӑр пуҫне йывӑр ӗҫлеме сӗнмеҫҫӗ. Кӑштах сӑмса питӗрӗнме пултарать, вӑй чакать. Ку иммунитет йӗркеленнине систерет.

cap.ru сӑнӳкерчӗкӗ

Гидрометеологипе тӑван тавралӑха сӑнакан Чӑваш Енри центрта пӗлтернӗ тӑрӑх, паян тата ыран пирӗн тӑрӑха тӗтре карса илӗ.

Ҫанталӑк кӗҫӗр, чӳк уйӑхӗн 9-мӗшӗнче, тата ыран, чӳк уйӑхӗн 10-мӗшӗнче, талӑкӗпех тӗтреллӗ тӑрӗ. Тӗтре Шупашкара тата республикӑн хӑш-пӗр вырӑнне карса илӗ. Ҫавна май ҫынсене, уйрӑмах водительсемпе пассажирсене, ҫулта-йӗрте асӑрхануллӑ пулма ыйтаҫҫӗ.

9111.ru сайтри сӑн

Ҫитес ҫултан Раҫҫейре ачаллӑ пур ҫемье валли те пӗр пособи пулӗ. Ку 17 ҫул тултарман ачасене пырса тивет.

Хальхи вӑхӑтра 0-3 ҫулти, 3-7 ҫулсенчи тата 7-17 ҫулсенчи шӑпӑрлансемшӗн, ача кӗтекен хӗрарӑмсене расна пособи шутласа параҫҫӗ. РФ Президенчӗ Владимир Путин 2023 ҫултан вӗсене пӗрлештерме хушнӑ.

Владимир Владимирович унччен йӗркелӳ ыйтӑвӗсене, пособие мӗнле шутламалли тата тӳлемелли йӗркене татса пама хушнӑ.

Сӑмах май, ҫӗршывра Амӑшӗн капиталне тӑснӑ. Вӑл 2026 ҫулччен вӑйра пулӗ.