Яндекс.дзен сайтри сӑн

Чӑваш Енре ачасем ҫӳллӗшӗнчен ӳкнӗ тӗслӗхсем нумайланнӑ. Юлашки кунсенче Республикӑри ача-пӑча клиника пульницин реанимаци уйрӑмне 8-ти тата 10 ҫулти ачасем лекнӗ.

Пӗри 5-мӗш хутран ӳкнӗ. Ача пуҫне, ҫурӑм шӑммине амантнӑ. Вӑл килте аппӑшӗпе ҫеҫ пулни паллӑ.

Тепри 2-мӗш хутран персе аннӑ. Вӑл та вӑйлах аманнӑ. Тухтӑрсем унӑн пурнӑҫӗшӗн 3 сехет ҫурӑ кӗрешнӗ.

Тухтӑрсем каланӑ тӑрӑх, ҫӳллӗшӗнчен ӳкнӗ ачасен 90-95 проценчӗ реанимацие лекет. Кӑҫал 14 шӑпӑрлан ҫӳллӗшӗнчен ӳкнӗ. Телее, пурте чӗрех.

Следстви комитечӗ тунӑ сӑн

Патӑрьел районӗнчи Нӑрваш Шӑхаль ялӗнче пурӑнакан 55 ҫулти арҫынна тытса чарнӑ. Вӑл ҫынна вӗлернӗ тесе шутлаҫҫӗ.

Следстви версийӗ тӑрӑх, утӑ уйӑхӗн 3-мӗшӗнче вӑл ялти икӗ ҫынпа вӑрҫӑнса кайнӑ. Хайхискер вӗсене вӗлерме шутланӑ. Каҫхине ҫӗҫӗ ярса тытнӑ та вӗсем патне кайма тухнӑ. Лешсем ҫав вӑхӑтра чарӑнуран инҫех мар ларнӑ.

Арҫын вӗсем патне пырса иккӗшне те мӑйӗнчен ҫӗҫӗпе чикнӗ. Арҫын чӗрех юлнӑ, вӑл тарма пултарнӑ, кӳршисенчен пулӑшу ыйтнӑ. Лешсем вара часрах медпулӑшу чӗннӗ. Хӗрарӑм вара вилмеллех аманнӑ. Вӑл ҫавӑнтах сывлама пӑрахнӑ.

21.мвд.рф сайтран илнӗ сӑнӳкерчӗк

Елчӗк районӗнчи пӗр ялта пурӑнакан 35 ҫулти пӗр арҫын ҫын укҫипе ӗҫсе-ҫисе савӑннӑ. Вӑрланӑ 60 пин тенке вӑл ҫапла майпа хӑвӑрт пӗтернӗ.

Хваттерте пулнӑ 60 пин тенкӗ укҫа ҫухални ҫинчен йӗрке хуралҫисене Шупашкарти Эгер бульварӗнче пурӑнакан пӗр мӑшӑр пӗлтернӗ. Утӑ уйӑхӗн 2-6-мӗшӗсенче арӑмӗпе упӑшки килте пулман. Киле таврӑнсан вӗсем укҫа ҫухалнине асӑрханӑ.

Ҫын укҫине тытаканни кӳршӗ хӗрарӑмӗн экс-упӑшки пулнине йӗрке хуралҫисем палӑртнӑ. Вӑрӑ малтан арӑмӗ пулнӑ хӗрарӑм хваттер алӑкне ватса кӗнӗ, унтан балкон витӗр кӳршӗсем патне каҫнӑ. Унтан 60 пин тенкӗ укҫа вӑрласа тухнӑ. Укҫапа вӑл хулари хавасланса-савӑнмалли заведенисем тӑрӑх ҫӳренӗ, укҫана тӑкакласа пӗтернӗ.

pravdapfo.ru сӑнӳкерчӗкӗ

«Пӗрлӗхлӗ Раҫҫей» партин регионти уйрӑмне ҫӗнӗ ҫын ертсе пыма тытӑнӗ. Кадр ыйтӑвне ҫитес кунсенче татса памалла.

Партин регионти уйрӑмне Чӑваш Енӗн Патшалӑх Канашӗн председателӗ Леонид Черкесов ертсе пыма тытӑнас сӑмах тухнӑ.

Партин регионти уйрӑмӗн секретарӗ пулнӑ Вячеслав Тимченко сенатор хӑйне ҫав ӗҫрен кӑларма ыйтнӑ. Вӑл ку должноҫре 5 уйӑха яхӑн ҫеҫ тимленӗ.

Сӑмах май каласан, кӗркунне муниципалитетсенче депутатсене палӑртмалли суйлав иртӗ. «Пӗрлӗхлӗ Раҫҫей» партин регионти уйрӑмӗшӗн те ҫав сасӑлав пӗлтерӗшлӗ.

pravdapfo.ru сӑнӳкерчӗкӗ

Шупашкар хулин Кӑнтӑр-хӗвеланӑҫ районӗнче пурӑнакансем хӑйсен тӑрӑхӗнче вӑрман вырӑнӗнче ҫурт-йӗр комплексӗ хӑпартса лартассине хирӗҫ иккен. Ҫав вӑхӑтрах республика Элтеперӗ Олег Николаев асӑннӑ комплекс валли 1 миллиарда яхӑн тенкӗ инфраструктура кредичӗ пама йышӑну кӑларнӑ.

«Дубрава-парк» ҫурт-йӗр комплексне вӑрман вырӑнӗнче хӑпартмалла-мӗн. Унта нумай хваттерлӗ 19 ҫурт пулмалла-мӗн. Вӗсенчен 15-шне 10 хутран пуҫласа 21 хутлӑ тӑвасшӑн иккен.

10 миллион ытла тенкӗ тӑракан проект хальлӗхе хатӗр мар-мӗн-ха. Эскиз вара пур. Унта палӑртнӑ тӑрӑх, ҫурт-йӗр комплексӗ Миттов бульварӗ, Фруктовӑй, Тополинӑй урамсем тата Сугутка юханшывӗ хушшинче пулӗ.

forum.na-svyazi.ru сӑнӳкерчӗкӗ

Шупашкарта электросамокатлӑ ҫынсем инкеке лекеҫҫӗ. Электросамокатлӑ ҫынсемпе ҫу тата ҫӗртме уйӑхӗсенче 34 инкек пулнӑ.

Асӑннӑ 34 тӗслӗхрен саккӑрӑшӗнче электросамокатпа пассажирсем ҫине пырса кӗнӗ. Шар курнисене тухтӑрсен пулӑшӑвӗ кирлӗ пулса тухнӑ.

Инкексенче ҫынсем электросамокатсем ҫинчен ӳксе аманаҫҫӗ: кӑкӑр шӑммине, пуҫне ыраттараҫҫӗ, аллисене тата янах шӑммине хуҫаҫҫӗ.

Ҫул-йӗр хӑрушсӑрлӑхӗн инспекторӗсем пӗлтернӗ тӑрӑх, 250 ватран пӗчӗкрех хӑватлӑ самокатсемпе ҫӳреме права кирлӗ мар. Вӗсемпе тротуар тӑрӑх ҫӳремелле, светофорӑн симӗс ҫутипе каҫнӑ чухне утмалла. Хӑватлӑраххисене мопедпа танлаштарнӑ.

Cap.ru сӑнӳкерчӗкӗ

14-мӗш номерлӗ троллейбус ҫулталӑк каялла Шупашкарти «Хӗвеллӗ» микрорайона ҫӳреме тытӑннӑ. Халӗ унӑн маршрутӗнче черетлӗ улшӑну пулса иртӗ – транспорт «Университет» микрорайона ҫитме пуҫлӗ. Асӑннӑ маршрутпа ҫӳрекен троллейбус «Университет» микрорайон тӑрӑх автономи мелӗпе утӑ уйӑхӗн 9-мӗшӗнчен тытӑнса ҫӳрӗ. Вӑл сехет йӗппи ҫаврӑннӑ евӗр ҫаврӑнӗ. Троллейбус «Миначев академик урамӗ», «Вӑрманлӑ», «Университет-2» общество транспорчӗн чарӑнӑвӗсенче чарӑнӗ.

Маршрут ҫинче 13 троллейбус пулӗ. Вӗсем халӑх йышлӑ ҫӳрекен вӑхӑтра кашни 11-12 минутра пӗрре хутлӗҫ.

Пани тата ачасем. «Ҫӗнтерӳ ҫулӗ» тунӑ сӑн

Вӑрнарти 2-мӗш вӑтам шкул ҫумӗнчи ҫуллахи сывлӑха ҫирӗплетмелли лагерьте Виталий Яковлев кинологпа паян тӗлпулу иртнӗ. Вӑл хӑй пӗччен ҫитмен, пӗрле Пани ятлӑ йытта илсе пынӑ.

Кинолог ачасемпе тӗл пулнӑ май вӗсене йытӑсем пирки кӑсӑклӑ япаласем каласа панӑ. Ачасем ҫак чӗрчунсем Тӑван Ҫӗршывӑн аслӑ вӑрҫинче мӗнпе пулӑшни пирки, паянхи кулленхи пурнӑҫра мӗнле вырӑн йышӑнни ҫинчен пӗлнӗ. Шкул ҫумӗнчи лагере ҫӳрекенсене уйрӑммӑн Пани пирки каласа пани кӑсӑклӑ пулнӑ.

Виталий Иванович акӑ мӗн каласа панӑ: Пани сисӗмлӗ те чӑтӑмлӑ, вӑр-вар пулнипе полицейскисем преступленисене уҫса параҫҫӗ, вӗсене тӑвасран вӑхӑтра чараҫҫӗ, усал ӗҫ тӑвакансене тытаҫҫӗ. Йытӑ ачасене хӑйӗн хӑш-пӗр ӑсталӑхне те кӑтартса панӑ.

Лагере ҫӳрекенсене паянхи тӗлпулу кӑмӑл кайнӑ. «Ҫӗнтерӳ хаҫачӗ» вӑл нумайлӑха асра юлӗ тесе шантарса калать.

Ҫемье, юратупа шанчӑклӑх кунӗ умӗн Шупашкарта пурӑнакан Кокуринсем ҫӗнӗ хваттер уҫҫине илнӗ. Ҫак ятпа вӗсене тӳре-шара саламланӑ.

Кокуринсем 6 ачана воспитани параҫҫӗ. Иринӑпа Александр кӑҫал шӑпах ҫемье юбилейне паллӑ тунӑ тата. Вӗсем пӗрлешнӗренпе 25 ҫул ҫитнӗ.

Кокуринсене ҫӗнӗ хваттере "Ҫӗнӗ хула" микрорайонти Ҫӗнӗ хула урамӗнче уйӑрса панӑ.

Сӑмах май, саккунпа килӗшӳллӗн 5 е ытларах ачана ӳстерекен ҫемьесене социаллӑ найм мелӗпе хваттер параҫҫӗ.

Шупашкарта ҫӗнӗ фермер пасарӗ ӗҫлеме пуҫланӑ. Вӑл ҫак адреспа вырнаҫнӑ: Элкер урамӗ, 11-мӗш ҫурт.

Ун вырӑнӗнче малтан кивӗ пасар пулнӑ. Пӗлтӗр ӑна пӑсса ҫӗннине тума йышӑннӑ. Ку тӗллевпе 6 миллион тенкӗ уйӑрнӑ.

Кӑҫал ака уйӑхӗнче кивӗ тимӗр лавккасене пӑснӑ. Вӗсен вырӑнне 10 ҫӗннине туса лартнӑ. Варринче — суту-илӳ павильонӗ. Пасара икӗ ҫӗртен кӗме пулать, унти асфальта та ҫӗнетнӗ. Ҫавӑн пекех арман евӗр арт-обьект туса лартнӑ.

Ҫӗнӗ фермер пасарне ыран савӑнӑҫлӑ лару-тӑрура уҫӗҫ.