"Контактри" сӑн

Сарӑту хулинче 150 метр тӑршшӗ граффити стена пуласси пирки пӗлтернӗччӗ. Халӗ унта Шупашкарти ӗлӗкхи храмсен, Анне палӑкӗн тата ытти паллӑ вырӑнӑн мӗлкисене курма пулать.

Аса илтерер: граффити стена ҫине Атӑлҫи тӑрӑхӗнчи 14 регионти тата Китайри ултӑ провинцири паллӑ вырӑнсене сӑнланӑ. Ку ӗҫе пирӗн ентеш те Лилия Яковлева хутшӑннӑ.

Автор сӑнӳкерчӗкӗ

Хальхи вӑхӑтра пур ҫӗрте те вырӑс чӗлхи анлӑн янӑрать те, ялсенче те ача-пӑча вырӑсла калаҫнинчен тӗлӗнме те пӑрахрӑмӑр пулӗ.

Паян Муркаш районӗнчи (халӗ муниципаллӑ округ теме юратаҫҫӗ-ха) Кӳстерекре пулма тӳр килчӗ. Унти лавккана кӗнӗ ҫӗрте чӑвашла пӗлтерӳ ҫакӑнса тӑнине курсан чун савӑнчӗ.

Пӗлтерӳ авторӗ — Шурчари ветеринари пункчӗ. Хыпарта ялти ҫынсен ӗнисемпе виҫӗ уйӑхран иртнӗ пӑрӑвӗсене туберкулез чирӗнчен укол тума килессине пӗлтернӗ.

"Контактри" сӑн

Чӑваш Енре скандинавсен мелӗпе утас енӗпе Раҫҫей чемпионачӗ иртӗ. Тренировка авӑн уйӑхӗн 6-мӗшӗнче Шупашкарти Театр ҫыран хӗрринче пулӗ.

Унта ӑсталӑх класӗсем, массӑллӑ стартсем тата эстафетӑсем пулӗҫ, унта тӗрлӗ регионти командӑсем хутшӑнӗҫ. Вӗсем скандинав уттин вӑрттӑнлӑхӗсемпе паллашӗҫ, опытлӑ инструкторсем сӗнӳсем парӗҫ.

Ӑмӑрту авӑнӑн 7-8-мӗшӗсенче пулӗ, спортпа туслисем 10 тата 12 ҫухрӑмлӑ дистанцисене парӑнтарӗҫ.

Инкеклӗ лару-тӑру министерстви тунӑ сӑн

Ӗнер, ҫурла уйӑхӗн 29-мӗшӗнче, Элӗкре арҫын ача чутах кил-ҫуртне ҫунтарса яман. Йӑлтах – пӗр кӗленче бензиншӑн.

Ача килте пӗччен юлсан кӗленчери бензина мунча умне тӑкнӑ та шӑрпӑк чӗртнӗ. Вӑл ҫийӗнчех хыпса илнӗ, ача аллине те пӗҫертсе янӑ. Вӑл ҫулӑма хӑй тӗллӗн сӳнтереймен.

Ҫӑлавҫӑсем пушара пӗр сехетрен сӳнтернӗ. Ҫулӑм хуралтӑ таврашне, пӳрт тӑррине сиенлетнӗ. Ачана вара пульницӑна илсе кайнӑ.

cheb-centr.soc.cap.ru сайтран илнӗ сӑнӳкерчӗк

Шупашкар округӗнчи Аркасси ялӗнче ҫуралса ӳснӗ Серафима Филипповна Алексеева 100 ҫул тултарнӑ. Ӑна саламлама вырӑнти тӳре-шара та ҫитнӗ. Вӗсем юбиляра парнесем, РФ Президенчӗн Владимир Путинӑн саламлӑ открыткине панӑ.

Серафима Филипповна мӗн ачаран тухтӑр пулма ӗмӗтленнӗ. Амӑшӗ чирлени, вӑрҫӑ вӑхӑтӗнче аманнӑ салтаксене пулӑшас килни ҫак туртӑма тата вӑйлатнӑ. Шупашкарта медсестрасен курсне уҫсан вӑл тӳрех унта ҫырӑннӑ.

Вӑрҫӑ хыҫҫӑн ҫамрӑк медсестра стоматологи пӳлӗмӗнче ӗҫленӗ, унтан эндокринологи диспансерне куҫнӑ. Унта аслӑ медсестра пулнӑ.

Владимир облаҫӗнчи ҫӑлавҫӑсен служби тунӑ сӑн

Паян ҫӗрле 2 сехет те 35 минутра Шупашкартан Мускава кайма тухнӑ автобус аварие лекнӗ. Вӑл Владимир облаҫӗнчи Ҫӗнӗ Быковка ялӗ патӗнче «Газельпе» ҫапӑннӑ. Ку – Владимир хулинчен 10 ҫухрӑм аяккарах кӑна.

Автобусра 47 ҫын пулнӑ. Юрать-ха, никам та суранланман, водителе кӑна медпулӑшу кирлӗ пулнӑ. Вырӑна тепӗр автобус ҫитсе пассажирсене илсе кайнӑ.

Палӑртмалла: автобус «ТрансТур» компанин пулнӑ.

cheb-centr.soc.cap.ru сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр 87 ҫулти хӗрарӑма ҫуралнӑ кунпа саламланӑ.

Зинаида Кудряшовӑна асӑннӑ учрежденин социаллӑ ӗҫченӗ пӑхса тӑрать.

Хӗрарӑм ӗҫ ветеранӗ шутланать. Вӑл 40 ҫул ытла хулари «АККОНД» фабрикӑа ӗҫленӗ. Упӑшкипе Владимир Сергеевичпа икӗ ача ҫуратса ӳстернӗ, паян мӑнукӗсемпе савӑнса пурӑнаҫҫӗ.

Кинемее комплекслӑ центрӑн специалисчӗ Татьяна Васильева саламланӑ.

Виталий Станьял страницинчен илнӗ сӑнӳкерчӗк

Чӑваш Енри таврапӗлӳҫӗсенчен пӗри, журналист, кинематографист, мультипликатор, Чӑваш художникӗсен союзӗн пайташӗ Владимир Галошев краеведени енӗпе паллӑ утӑм тунӑ. Кун пирки Виталий Станьял ӑсчах халӑх тетелӗнчи хӑйӗн страницинче пӗлтернӗ.

Владимир Галошев «Россия – это мы» (чӑв. Раҫҫей — вӑл эпир) ярӑмпа тӑван ял тӑрӑхенчи ялсем ҫинчен кӗнке кӑларнӑ.

Елчӗкпке Тӑвай Пӑли тӑрӑхӗнчи ялсене Владимир Петровичӑн тӑван ялӗ Кушкӑ, юнашарти Аслӑ Пӑла Тимеш, ҫурҫӗр енчи Питтӗпел, Кивӗ Эйпеҫ, Кавал, Исемпел, кӑнтӑр енчи Энтепе, Ҫӗнӗ Арланкасси, Арланкасси, Сӑръель ялӗсем кӗреҫҫӗ иккен.

spb.pulscen.ru сайтри сӑн

Виҫӗ арҫын Ҫӗмӗрле округӗнче хӑйӑр кӑларнӑшӑн ява тытӗ. Йӗрке хуралҫисем палӑртнӑ тӑрӑх, пӗлтӗр ҫуркунне вӗсем котлован чавма, пӗвене хӑтлӑлатма тесе кӑларнӑ ӑна. Арҫынсем хӑйӑр кӑларма ирӗк пур организацирен суя документсем те илнӗ.

Ҫапла вӗсем 77 кубла метр ытла хӑйӑр кӑларнӑ. Ку 25 миллион тенкӗлӗх тӑкакпа танлашать.

"Контактри" сӑн

Тӑвайра пурӑнакан Евгений Витальевич тата Зинаида Николаевна пӗрлешнӗренпе 50 ҫул ҫитнине паллӑ тунӑ. Вӗсем икӗ ывӑлпа пӗр хӗр ҫуратса ӳстернӗ. Халӗ тӑватӑ мӑнукпа савӑнаҫҫӗ.

Евгений Витальевич - таврапӗлӳҫӗ, тӑван ен историйӗпе 7 кӗнеке кӑларнӑ. Вӑл ЧР этнокультурин тава тивӗҫлӗ ӗҫченӗн ятне тивӗҫнӗ. Ӑна «Пушар хуралӗн отличникӗ» паллӑпа чысланӑ.

Зинаида Николаевна пурнӑҫ тӑршшӗпе экономистра ӗҫленӗ. Ӗҫ стажӗ - 37 ҫул. Вӗсем иккӗшӗ ӗҫ ветеранӗн ятне илнӗ.