mintrud.cap.ru сӑнӳкерчӗкӗ

Улатӑрта пурӑнакан ватӑ ҫынсем колледжра вӗренеҫҫӗ. Тивӗҫлӗ канури пилӗк кинемей кӑҫал вырӑнти технологи колледжне вӗренме кӗнӗ.

«Пирӗн хамӑра аталантарса пыма яланах май тупмалла. Пенсире те малашлӑха талпӑнмалла, ӑнтӑлмалла. Ҫав шутра ҫӗнӗ профессие те алла илмелле», − теҫҫӗ парта хушшине ларнӑ ватӑсем.

«Пире Зоя Бусоргина опычӗ хавхалантарчӗ. Иртнӗ ҫул вӑл колледжа пиллӗк паллӑсемпе вӗренсе пӗтерчӗ. Вӑл вӗренме пултарнине эпӗ те пултаратӑп тесе хавхалантӑм», — каласа кӑтартнӑ Марина Борискина. Хӗрарӑмӑн амӑшӗ ӗмӗрӗпех ҫӗленӗ. Марина пенсие тухсан ҫав ӑсталӑха алла илес тенӗ.

culture.cap.ru сӑнӳкерчӗкӗ

Авӑн уйӑхӗн 18-мӗшӗнче Шупашкарта «Dream Voice» вокал проекчӗн пултарулӑхӗпе паллашма май килӗ.

Вокал проекчӗн ятне акӑлчан чӗлхинчен чӑвашла куҫарсан «Ӗмӗтри сасӑ» тенине пӗлтерет.

Ҫӗршыври чи лайӑх вокалистсен ушкӑнӗ Чӑваш патшалӑх оперӑпа балет театрӗн сцени ҫине тухӗҫ.

Коллектив тӗнчери фестивальсен лауреачӗсенчен, Мускаври ертсе пыракан театрсенчи солистсенчен тӑрать.

Артистсем кроссовер стилӗпе ӗҫлеҫҫӗ, ку вӑл классикӑна тата поп-музыкӑна хутӑштарнине пӗлтерет.

culture.cap.ru сӑнӳкерчӗкӗ

Шупашкарти Вырӑс драма театрӗн актёрӗ Станислав Мишин Раҫҫейӗн общество телевиденийӗ (ОТР) «Страна поэтов» (чӑв. Поэтсен ҫӗршывӗ) проекта хутшӑннӑ.

Проекта ҫӗршывӑн тӗрлӗ кӗтесӗнче пурӑнакансем хутшӑннӑ. Тӗрлӗ ӗҫре тӑрӑшакансем вырӑс поэчӗсен сӑввисене вуланӑ. Уйрӑмах илемлӗ вуланисене телекуравра кӑтартнӑ. Станислав Мишин Владимир Высоцкин «У неё всё своё» сӑввине вуланӑ. Программа эфира авӑн уйӑхӗн 2-мӗшӗнче тухнӑ.

culture.cap.ru сӑнӳкерчӗкӗ

Авӑн уйӑхӗн 4-мӗшӗнче Чӑваш патшалӑх филармонийӗнче ӗҫ коллективӗн пухӑвӗ иртнӗ. Унта хутшӑннӑ республикӑн культура, национальноҫсен ӗҫӗсен тата архив ӗҫӗн министрӗн ҫумӗ Георгий Богуславский ҫӗнӗ сезон пуҫланнӑ ятпа саламланӑ.

Чӑваш Енӗ Элтеперӗн Тав ҫырӑвӗпе Анна Голицынӑна, Анастасия Степановӑна, Чӑваш Республикин тава тивӗҫлӗ артисткине Ольга Прокопьевӑна, Ирина Гавриловӑна тата Лилия Прокопьевӑна чысланӑ, республикӑн Культура министерствин Хисеп грамотипе — Динара Юнисовӑна; ведомствӑн Тав хучӗпе – Анастасия Пирожковӑна, Татьяна Васильевӑна, Хакас Республикӑн тава тивӗҫлӗ артистне Сергей Кузнецова, Владимир Ашмарина тата Андрей Именнова. Чӑваш Республикин тава тивӗҫлӗ артистне Юрий Каткова республикӑн Шалти ӗҫсен министерствин Тав хучӗпе хавхалантарнӑ.

"Чеб.ру" сайтри сӑн

2017 ҫултанпа Шупашкарти Мускав ҫыран хӗррине илемлетме, хӑтлӑлатма тытӑннӑ. Кӑҫал вара ӗҫсене вӗҫленӗ. Ҫак илемлӗ вырӑна Пӗрремӗш каналпа пыракан «Ырӑ ир!» кӑларӑмра кӑтартнӑ.

Мускав ҫыран хӗррине хӑтлӑлатнӑ кӑна мар, вӑл халӗ пӗчӗк тата вӑтам усламсене илӗртекен вырӑн та пулса тӑнӑ. Унта уҫӑлса ҫӳреме, велосипедпа тата самокатпа ярӑнма, шашлӑк ӑшалама, кафере ларма та пулать. Пӗтӗмпе 6 ҫухрӑм тӑршшӗ территорие хӑтлӑх кӗртнӗ.

Ҫӑлкуҫ: 1MI

16-ри ҫамрӑк ача Лысково округӗнче шурлӑхра лакса ларнӑ. Раҫҫей ШӖМӗн регионти тӗн управленийӗн пресс-службинче каласа кӑтартнӑ тӑрӑх ӑна ҫӑлма май килнӗ.

Шкул ачи ҫурлан 13-мӗшӗнче ҫухалнӑ, ӑна шыраса амӑшӗ полицие ҫитнӗ. Тӗпчесе палӑртнӑ тӑрӑх, унччен икӗ кун маларах арҫын ача юлташӗсемпе пӗрле юханшыв ҫывӑхӗнче каннӑ. Ҫакӑн хыҫҫӑн унӑн тусӗсем пурте киле таврӑннӑ, вӑл вара — ҫук, вӗсенчен уйрӑлас умӗн «пӗччен пулас килет» тесе каланӑ пулать.

Шырав мероприятийӗсем йӗркеленӗ. Ҫак ӗҫе кинологсене те явӑҫтарнӑ. Пӗр Урма ятлӑ йытӑ йӗрлесе кайса йӗрке хуралҫисене шурлӑх патне илсе ҫитернӗ — ҫул ҫитмен ача унта тупӑннӑ та. Вӑл пӗр талӑк ытла лачакара пӗр хускалмасӑр тӑнӑ.

Шкул ачине шурлӑхран туртса кӑларнӑ, малтанхи медицина пулӑшӑвне панӑ хыҫҫӑн пульницӑна ӑсатнӑ.

Ҫӑлкуҫ: SCMP composite/Douyin

Китайри Фуцзянь провинцинче пурӑнакан хӗрарӑм, iPhone 14 Plus вӑрлама шут тытса, смартфона вӑрласа каясран лавккари сӗтелпе кӑкарнӑ троса кӑшласа татнӑ.

Ҫакӑн пек хӑйне евӗрлӗ вӑрламалли меслет видеосӑнав камерине лекрӗ: видео ҫинче вӑрӑ малтан трос ҫирӗплӗхне тӗрӗслесе пӗр-икӗ хутчен ҫыртса пӑхнӑ, унтан, никам та сӑнаманнине курсан, ӑна кӗппипех кӑшласа татнӑ. Ҫакӑн хыҫҫӑн, South China Morning Post ҫырнӑ тӑрӑх, китаянка смартфона сумкӑна пуҫтарса чикнӗ те лавккаран тухса кайнӑ.

Ҫапах та вӑрӑна лавккаран тухса кайсан ҫур сехетрен ярса тытнӑ. Йӗрке хуралҫисем ӑна 7 пин юаньлӗх сиен кӳнӗшӗн айӑплама йышӑннӑ, ку вӑл пирӗннипе шутласа 95 пин тенке яхӑн.

Усал шухӑшлӑ хӗрарӑм хӑй каласа панӑ тӑрӑх, йӗркене ҫакӑн пек пӑсма ӑна ҫӗнӗ iPhone туянас ӗмӗт хӗтӗртнӗ, анчах та ҫак хаклӑ япалана туянма унӑн укҫи пулман имӗш.

"Про Город" сайтӗнчи сӑн

Паян Андриян Григорьевич Николаев ҫуралнӑранпа 94 ҫул ҫитнӗ. Ҫавна май велосипедпа ярӑнма кӑмӑллакансем йӑлана кӗнӗ старта тухнӑ: Ҫӗнӗ Шупашкартан Шуршӑла ҫитнӗ.

Ку старт - юбилейлӑ. Акцие кӑҫалхипе 20-мӗш хут ирттернӗ. Палӑртмалла: велосипедҫӑсен старчӗ 2004 ҫулта йӑлана кӗнӗ.

Паян акцие 25 спортменран кая мар хутшӑннӑ. Вӗсен йышӗнче 70 ҫулти Любовь Федотова та пулнӑ. Вӑл велосипедпа ярӑнассипе - республика чемпионки. Спортменка ҫак акцие вуннӑмӗш ҫул хутшӑннине пӗлтернӗ.

pskov.ru сӑнӳккерчӗкӗ

Чӑваш Енре шкул автобусӗсене тӗрӗслӗҫ.

Республикӑн прокуратуринче пӗлтернӗ тӑрӑх, ҫӗнӗ вӗренӳ ҫулӗ умӗн вӗсене патшалӑхӑн ҫул-йӗр инспекцийӗпе пӗрле тӗрӗслеме тытӑннӑ-ха. Ҫав вӑхӑтра кӑлтӑксем тупӑнкаланӑ.

Сӑмахран, Куславкка районӗнче шкул автобусӗсем вӑхӑтра техосмотр тухман иккен. Ҫӗрпӳ районӗнчи темиҫе автобусӑн «ГЛОНАСС» навигаципе информаци тытӑмӗ ӗҫлемен. Йӗпреҫ, Пӑрачкав тата Комсомольски районӗсенче автоубссенче огнетушительсем тата аптечкӑсем пулман.

"Про Город" архивӗнчи сӑн

Паян Вӑрнар районӗнче пӑр ҫунӑ. Кун пирки "Про Город" хаҫата халӑх корреспонденчӗ пӗлтернӗ.

Хаҫата хыпарланӑ тарӑх, пӑр 14 сехет те 40 минутра ҫунӑ. Ҫакна Кӳтӳмер ялӗнче пурӑнакансем видео тата сӑн ӳкернӗ. Ҫынсем пӑр пӑрҫа пысӑкӑш ҫуни пирки хыпарланӑ.

Аса илтерер: синоптиксем ҫак кунсенче ҫумӑр ҫавасси пирки пӗлтернӗччӗ. Паян вара аслатиллӗ ҫумӑр ҫума пултарасси ҫинчен асӑрхаттарнӑ.