(с) Мускав хулин ҫутҫанталӑкпа усӑ курассин тата тавралӑха сыхлассин департаменчӗ

Тӗп хулан ҫутҫанталӑкпа усӑ курассин тата тавралӑха сыхлассин департаменчӗ Мускавра ҫӗпӗр урагусне, е вӑрӑм хӳреллӗ уйӑпа — ку тӑрӑхра сайра тӗл пулакан вӗҫен кайӑка асӑрхани ҫинчен пӗлтерет.

Мускавҫутҫанталӑк специалисчӗсем ӑна «Москворецки» ҫутҫанталӑкпа истори паркӗнче курнӑ.

Раҫҫейре ҫак вӗҫен кайӑксен тӗсӗ ытларах Ҫӗпӗрӗн кӑнтӑр тӑрӑхӗнчен пуҫласа Кӑнтӑр-Тухӑҫ Ази таран пурӑнать, тӗп хулана вӑл мӗнле лекнине специалистсем пӗлмеҫҫӗ.

Ведомствӑра палӑртнӑ тӑрӑх, тӗп хулара ҫак кайӑк тӗсне юлашки хут 18 ҫул каялла, 2005 ҫулта, асӑрханӑ пулнӑ.

"Чеб.ру" сайтри сӑн

Паян Правительство ҫуртӗнче иртнӗ канашлура Шупашкарти «Садовый» микрорайонти шкул хӑҫан уҫӑласси пирки пӗлтернӗ. Подрядчикӑн, Чӑваш Республикинчи ипотека корпорацийӗн, шкула кӑҫалхи раштавӑн 5-мӗшӗччен туса пӗтермелле.

Аса илтерер: объекта 2020 ҫулта «Союзстройинвест» тума пуҫланӑ. 2021 ҫулхи ҫуркунне унпа килӗшӗве пӑрахӑҫласа «Медведевский ПМК» подрядчикпе килӗшӳ алӑ пуснӑ. Унпа та кӑҫал килӗшӗве пӑрахӑҫланӑ, тивӗҫе Чӑваш Енри ипотека корпорацине панӑ.

Палӑртмалла: вӑл республикӑра чи пысӑк шкул пулӗ. Унта 1650 ача вӗренӗ.

Шупашкар хулинче авӑн уйӑхӗн 2-мӗшӗнче пуҫтах пӗр водитель тепринпе ҫапӑҫма пуҫланӑ.

Никольский проспектӗнчен Энтузиастсен урамне пӑрӑннӑ чухне Т567ТТ 21 номерлӗ «Ауди» автомобиль сулахай енне ҫул-йӗр правилине пӑсса пӑрӑнма тӑнӑ. «Киа-Рио» водителӗ ӑна ҫул паман.

Ҫавӑн хыҫҫӑн «Ауди» ҫамӑл машина хӑйне «кӳрентернӗ» машина умне сиксе тухнӑ, унтан водитель патне пырса темиҫе хутчен ҫапнӑ. Пӑтӑрмах вырӑнне йӗрке хуралҫисене чӗнме тивнӗ. Усал водитель вӗсемпе те пуҫтахла тытнӑ.

t.me/chuv_prok сӑнӳкерчӗкӗ

Шупашкар районӗнчи Кӳкеҫри шкула прокуратура эрнесерен тӗрӗслесе тӑма шантарнӑ. Кунта сӑмах район центрӗнче ҫӗкленекен ҫӗнӗ вӗренӳ учрежденийӗ пирки пырать.

Генподрядчикӗ — Чӑваш Республикин ипотека корпорацийӗ. Контракт хакӗ 1,12 миллиард тенкӗпе танлашать.

Кӑҫалхи ҫулла пуҫламӑшӗнче шкулта строительство ӗҫӗсене палӑртнинчен 3 процентне ҫеҫ пурнӑҫланине палӑртнӑ.

825 вырӑнлӑх учреждение 2024 ҫулхи раштав уйӑхӗнче туса пӗтермелле. Шкул естествӑллӑ наука (медицина) тата социаллӑ экономика енӗпе тӗплӗн вӗрентӗ.

cap.ru порталтан илнӗ cӑнӳкерчӗк

Шупашкарти олимп резервӗн 6-мӗш спорт шкулӗн воспитанникӗсем Раҫҫейӗн уҫӑ кубокӗнчен медальсемпе таврӑннӑ.

Сочи хулинче ҫурла уйӑхӗн 30-мӗшӗнчен тытӑнса авӑн уйӑхн 3-мӗшӗччен иртнӗ ӑмӑртура чӑваш гимнасчӗсем: Раҫҫейӗн тӗнче класлӑ спорт мастерӗ Владислав Поляшов тата Раҫейӗн спорт мастерӗ Екатерина Андреева — палӑрнӑ. Владислав ылтӑн медале ҫӗнче илнӗ, Екатерина — бронзӑна.

dgl.ru сӑнӳкерчӗкӗ

Чӑваш Енре преступниксен пӗр ушкӑнӗ ҫынсен ячӗпе кредит карттисем илсе тултарнӑ. 91 карта ҫинчен вӗсем 8,7 миллион тенкӗлӗх кивҫен укҫа илнӗ.

Усал ӗҫпе ҫав ҫынсем 2021 ҫулхи раштав уйӑхӗнчен тытӑнса 2022 ҫулхи нарӑс уйӑхӗччен аппаланнӑ. Укҫана Шупашкарти тата Челябинскри кредит организацийӗсенчен илнӗ.

Преступниксен ушкӑнне карас ҫыхӑнӑвӗн компанийӗсенчен пӗрин офисӗнче ӗҫлекенсем те кӗнӗ. Вӗсем паспортӑн суя копийӗсемпе усӑ курса банк тата микрофинанс учрежденийӗсенче кредит карттисем илнӗ. Кредит лимичӗпе пӑхса хӑварнӑ укҫана кайран хӑйсен кӗсйине пӗтӗрсе чикнӗ. 91 кредит картти ҫинчен 8,7 миллион тенкӗ тыла илнӗ. Тепӗр 6 тӗслӗхре банксем карттӑсем ҫинчен илме чарса лартнӑ.

Паян ҫуллахи пекех ӑшӑ. Ытларикунпа юнкун вара кӑшт сивӗтӗ. Юнкун каҫхине ҫумӑр ҫӑвӗ те сивӗтӗ. Кӗҫнерникунпа эрнекун кӑнтӑрла 11-13 градус кӑна ӑшӑ пулӗ. Ҫӗрле вара – 7-9 градус. Ҫил ҫурҫӗр-хӗвеланӑҫ енчен кастарса вӗрнипе тата сивӗрех пек туйӑнӗ.

Икӗ кунра ҫумӑр самай ҫӑвӗ. Апла, кӑмпа сезонӗ пуҫланӗ. Канмалли кунсенче ҫумӑр ҫумӗ, сывлӑш температури 18-20 градус таран ӑшӑнӗ.

Синоптиксем малтанлӑха пӗлтернӗ тӑрӑх, ҫитес эрнере ҫуллахи ӑшӑ таврӑнӗ, 22-27 градус ӑшӑ пулӗ.

ingalator.com.ua сӑнӳкерчӗкӗ

Муркаш районӗнчи икӗ шкулти медицина пӳлӗмӗнче тонометр та пулман.

Вӗренӳ учрежденийӗсенче ҫул ҫитменнисен сывлӑхне сыхлас енӗпе епле ӗҫленине прокуратура тӗрӗсленӗ. Нискассинчи тата Ильинкӑри вӑтам шкулсенчи тухтӑр пӳлӗмӗсенче кирлӗ приборсемпе оборудовани пулман. Вӗсенче, сӑмахран, тонометр, динамометр, холодильник, юн кайма пуҫласан ҫыхса лартмалли жгут, наҫилкка тата ытти пулман.

Кӑлтӑка тупса палӑртнӑ хыҫҫӑн надзор органӗ суда тавӑҫпа тухнӑ, унта вӑл вӗренӳ учрежденийӗсене медицина пӳлӗмӗсене туллин тивӗҫтерме хистеме ыйтнӑ.

21.mchs.gov.ru сӑнӳкерчӗкӗ

Авӑн уйӑхӗн 2-мӗшӗнче Шупашкар районӗнче хӑна ҫурчӗ ҫунса кайнӑ. Ҫӗнӗ Шупашкартан инҫех мар вырнаҫнӑ Чӑрӑшкасси ялӗнчи «Заимка» кану базинчи икӗ хутлӑ пура ҫурт вут-ҫулӑмра тӗпрен кӗлленнӗ. Инкек авӑн уйӑхӗн 2-мӗшӗнчи каҫхи сакӑр сехет тӗлӗнче пулнӑ. Пушара сӳнтерме вырӑна пырса ҫитнӗ ҫӑлавҫӑсем вут-ҫулӑм юнашарти ытти ҫурт ҫине куҫасран сыхласа хӑварма пултарнӑ.Пушар пӗр сехетрен сӳнтернӗ. Ҫынсем шар курман.

Специалистсем малтанласа шухӑшланӑ тӑрӑх, кӑмакан мӑрйине тӗрӗс мар тунипе пушар тухма пултарнӑ.

cap.ru сайтри сӑн

Авӑн уйӑхӗн 1-мӗшӗнче ЧР Пуҫлӑхӗ Олег Николаев И.Я.Яковлев ячӗллӗ ЧППУн ҫӗнӗ ректорӗпе Игорь Кожановпа тӗл пулнӑ. Вӗсем шкулсенче кадрсем ҫитменни пирки калаҫнӑ.

Палӑртмалла: 2020 ҫулта 3-мӗш курс студенчӗсене ӗҫлеме ирӗк панӑ. Игорь Кожанов каланӑ тӑрӑх, студентсем шкулсенче ӗҫлеме пуҫланӑ. Анчах вӗсен, ытти специалистпа танлаштарсан, ӗҫ укҫине ӳстерекен коэффициент ҫук.

Хальхи вӑхӑтра 85 яхӑн студент шкулта ӗҫлет. Олег Николаев ӗҫ укҫине ӳстерекен коэффициента тусан тата нумайрах студента шкула илӗртме май пуррине палӑртнӑ. Ҫавӑн пекех Элтепер тӗллевлӗ вӗренекен студентсем сахаллине каланӑ. 138 абитуриент валли квота пур, анчах вӗсенчен 20-шӗ кӑна вӗренет.