cap.ru сӑнӳкерчӗкӗ

Муркаш муниципаллӑ округӗнчи Чуракасси ялӗнчи Совет урамӗнче чӳкӗн 11-мӗшӗнче кирпӗч ҫурт ҫунса кайнӑ.

Инкеклӗ лару-тӑру министерстви пӗлтернӗ тӑрӑх, хальлӗхе ҫулӑм мӗнрен тухнине палӑртман. Инкек вӑхатӗнче пӳртре икӗ ҫын пулнӑ: 1953 ҫулта ҫуралнӑ кил хуҫи тата 1956 ҫулхи хӑна. Пушара сӳнтерсен вӗсен виллине тупнӑ.

21.мвд.рф сӑнӳкерчӗкӗ

Лавккасенче ӗҫлекенсене пӗри улталаса ҫӳренӗ. Вӑл Канаш тата Ҫӗрпӳ муниципаллӑ округӗсенче улталама ӗлкӗрнӗ.

Ҫамрӑк мар арҫын суту-илӳ точкисене кӗрсе хаклӑ мар япала туяннӑ. Уншӑн вӑл 5 пин тенкӗлӗх укҫапа татӑлнӑ. Кайран тавара тӗрлӗ сӑлтав тупса каялла пырса панӑ, ҫав вӑхӑтра банкнотӑсенчен пӗр пайне вӑрласа юлнӑ. Суту-илӳ точкисене вӑл 8 пин тенкӗлӗх шар кӑтартнӑ.

Сӑнпа пӑхсан арҫын 50-55 ҫулсенче, 175-180 сантиметр ҫӳллӗш.

Арҫынна паллакансене йӗрке хуралҫисене 8 937 959 79 99 е 102 телефонпа шӑнкӑравласа пӗтерме ыйтаҫҫӗ.

carsweek.ru сӑнӳкерчӗкӗ

Ҫул-йӗр ҫинче пулса иртекен инкексемпе ҫыхӑннӑ лару-тӑрӑва кӑҫалхи 10 уйӑхпа тишкернӗ те, вӑл кӑткӑссине палӑртнӑ. Паян ҫак ыйтӑва Правительство ларӑвӗнче сӳтсе явнӑ.

Инкексен шучӗ пӗлтӗрхи танлаштаруллӑ тапхӑртинчен 12,1 процент, аманнисен шучӗ 11,1 процент чакнӑ пулин те вилекенсен йышӗ нумайланнӑ.

Чӑваш Енӗн Патшалӑх автоинспекцийӗн пуҫлӑхӗ Владмир Романов палӑртнӑ тӑрӑх, ҫул ҫинчи инкексен тӗп сӑлтавӗсен шутӗнче машинӑсем хӑвӑртлӑха ӳстернипе, хирӗҫ килекен ҫул ҫине тухса кайнипе, пӗр машинӑран тепри иртсе кайнӑ чух йӗркене пӑхӑнманнипе, ҫул хӗресленнӗ тата ҫуран каҫмалли вырӑнсенче асӑрханманнипе ҫыхӑннӑ.

cap.ru сайтри сӑн

ЧР Ял хуҫалӑх министерстви пӗлтернӗ тӑрӑх, халӑхран пухакан сӗтӗн вӑтам хакӗ 20 тенке ҫитнӗ. Нумаях пулмасть ведомство ялсенчи хаксене тишкернӗ.

Чӳк уйӑхӗн 10-мӗшӗ тӗлне 1 литр сӗте вӑтамран 20 тенкӗ те 30 пуспа пухнӑ. Кунашкал хак юлашкинчен кӑҫал пуш уйӑхӗнче пулнӑ. Кайран хак самаях чакса ларнӑ. Утӑ уйӑхӗнче чи пӗчӗк хак пулнине палӑртнӑ: 14 тенкӗ те 60 пус.

Сӗте халӑхран чи пысӑк хакпа пухакан округ – Элӗк. Унта 1 литрне 24 тенкӗпе туянаҫҫӗ. Пӑрачкав, Шупашкар, Ҫӗмӗрле районӗсенче 1 литрӗ 22 тенкӗ.

Вера Иванова сӑнӳкерчӗкӗ

Паян Шупашкара «Старость в радость» (чӑв. Ватлӑх савӑнмалӑх) ыркӑмӑллӑх фончӗн ертӳҫисем килсе ҫитнӗ. Вӗсем пирӗн республикӑра икӗ кун пулӗҫ. Паян хӑнасем Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта канашлу ирттернӗ, унтан Правительство ҫуртӗнче канашланӑ.

Асӑннӑ фонд тата республикӑн Ӗҫ тата социаллӑ хӳтлӗх министерстви пӗрле пулса ваттисене вӑрах вӑхӑт пӑхмалли йӗркене пурнӑҫа кӗртеҫҫӗ. Пирӗн республикӑшӑн вӑл ҫӗнӗлӗх. Ӑна сӑнамалла мелпе авӑн уйӑхӗн 1-мӗшӗнчен Шупашкарпа Ҫӗнӗ Шупашкар хулисенче, Ҫӗмӗрлепе Канаш муниципаллӑ округӗсенче ӗҫлеттерсе янӑ.

Ҫӗнӗлӗх ватисене пӑхса тӑракан тӑванӗсене те укҫа тӳлесе тӑма май парать. Вӗсем мӗнле ӗҫленине фонд тата халӑхӑн социаллӑ ыйтӑвӗсене тивӗҫтерекен центрсем тӗрӗслесе тӑрӗҫ.

cap.ru сайтри сӑн

Раҫҫейре экодиктант ҫыраҫҫӗ. Акцие Чӑваш Енре пурӑнакансем те хутшӑнаҫҫӗ. Ӑна ирттермелли лапамсенчен пӗри ЧР Наци вулавӑшӗ пулнӑ. Унта иртнӗ акцие 35 ҫын хутшӑннӑ. Вӗсем 25 ыйтӑва хуравланӑ.

Акци вӗҫленмен-ха. Чӳк уйӑхӗн 13-17-мӗшӗсенче тата чӳкӗн 20-24-мӗшӗсенче Ҫӗрпӳри 2-мӗш шкулта экодиктант ҫырӗҫ. Чӳкӗн 16-мӗшӗнче Красноармейски муниципаллӑ округӗнчи культура тата вулавӑш ӗҫӗн аталанӑвӗн центрӗнче диктант ҫырма пухӑнӗҫ. Ҫаван пекех акци Шупашкарти «Эткер» центрта, И.Я.Яковлев ячӗллӗ ЧППУра, Чӑваш патшалӑх аграри университетӗнче, Республикӑри ачасемпе ҫамрӑксен вулавӑшӗнче иртӗ.

digitalocean.ru сайтри сӑн

Шупашкарта пурӑнакан 52 ҫулти хӗрарӑм чӳк уйӑхӗн 11-мӗшӗнче ирхине банк карточки ҫинчи 50 пин ытла тенки ҫухалнине асӑрханӑ та тӳрех полицие кайнӑ. Кӑштахран йӑлтах уҫӑмланнӑ: 9 ҫулти мӑнукӗ телефонра вӑйӑ вылянӑ иккен.

Ача вӑйӑ валютине тата суперпӑшал илес тесе палламан ҫын мӗн ҫырнине йӑлтах пурнӑҫланӑ. Ҫапла вӑл 52-ри хӗрарӑмӑн банк карттин реквизичӗсене пӗлтернӗ. Счет ҫинчи укҫа ҫийӗнчех ҫухалнӑ.

Ачан амӑшӗ кун пирки пӗлсен телефонри вӑййа тасатнӑ.

Чӳк уйӑхӗн пуҫламӑшӗнче ӑшӑ ҫанталӑк тӑни 10 ҫул пулман. Анчах, синоптиксем пӗлтернӗ тӑрӑх, кӗр вӗҫленсе пырать, хӗл ҫывхарать.

Ыран ҫумӑр хушӑран кӑна ҫӑвӗ, хӗвел пӑхкалӗ. Сывлӑш температури 3-8 градус ӑшӑ пулӗ.

Юнкун тӗтре карса илӗ, ҫумӑрпа пӗрле йӗпе юр ҫӑвӗ. Кӗҫнерникун ҫил ҫурҫӗр еннелле куҫӗ, кӑнтӑрла та сивӗ пулӗ. Ҫак кунран метеорологи хӗлӗ пуҫланать.

Ҫитес канмалли кунсенче юр 20 сантиметр хулӑнӑш ҫуса лартма пултарать. Анчах хальлӗхе ҫакна ҫирӗплетсе калама ҫук. Ахӑртнех, чӳкӗн 17-мӗшӗнче кӑштах юр ҫӑвӗ, хура ҫӗр шуралӗ. Ҫапла сивӗ те типӗ ҫанталӑк тӑрӗ.

Малтанлӑха пӗлтернӗ тӑрӑх, канмалли кунсенче уяр ҫанталӑк тӑрӗ те ҫитес эренере циклон килӗ. Хальхинче - юрпа. Эппин, хӗл хӑйӗн вырӑнне йышӑнасшӑн.

cap.ru сӑнӳкерчӗкӗ

Чӑваш Енре пурӑнакан нумай ачаллӑ ҫемьесем патшалӑх шучӗпе хваттерлӗ пулса тӑраҫҫӗ.

Республика Элтеперӗ Олег Николаев каланӑ тӑрӑх, Чӑваш Енри ултӑ е унран та ытларах ачаллӑ кашни ҫемьенех юлашки виҫӗ ҫулта ҫурт-йӗрпе тивӗҫтернӗ. Кун пирки вӑл Шупашкарти Башмачников урамӗнчи ҫӗнӗ ҫуртра хваттерлӗ пулнисене ҫӑра уҫҫи тыттарнӑ чух палӑртса хӑварнӑ.

Асӑннӑ ҫуртри 91 хваттере кивӗ ҫуртра пӳрӑнакансене панӑ, 16-шне — нумай ачаллӑ тата сахал тупӑшлӑ ҫемьесене, 9-шне — тӑлӑх ачасене.

Халӑхпа ҫыхӑну тытакан специалистсен «Коммуникаци ӑсти» уҫӑ конкурсне Раҫҫейӗн 75 регионӗнчи 655 специалист хушӑнать. Вӗсен йышӗнче пирӗн ҫӗршывӑмӑрӑн ҫӗнӗ регионӗсенчи — Донецк тата Луганск халӑх республикисенчен, Запорожье тата Херон облаҫӗсенчен, ҫавӑн пекех Кӑркӑстанри Бишкек хулинчен 11 ҫын хутшӑнать.

Конкусра заявка тӑратман 14 регион шутӗнче Ингушети, Калмӑк Республики, Саха (Якути), Тыва, Кабардин-Балкар тата Карачай-Черкесск республикисем, Амур, Кострома, Курск, Магадан, Смоленск облаҫӗсем, Ненецк тата Чукотка автономи округӗсем, Еврей автономи облаҫӗ. Сӑмах май каласан, 20 специалист хӑсйем хӑш регионтан пунине кӑтартман иккен.

392 ҫын конкурса «Предприяти, организаци» категорире хушӑнать, 165-ӗн — «Патшалӑх управленийӗ» енӗпе, 98-ӑн — «Вырӑнти хӑйтытӑмлӑх» енӗпе.