МЧСӑн Чӑваш Енри управленийӗн сӑнӳкерчӗкӗ

Шупашкарти нумай хваттерлӗ ҫуртсенчен пӗринче пушар тухнӑ. Унта икӗ ачана ҫӑлма тивнӗ.

Инкек Афанасьев хулинчи 9-мӗш ҫуртӑн 3-мӗш корпусӗнчи хваттерте пулнӑ. Улттӑмӗш хутри хваттерти 12 ҫулти арҫын ача пиҫсе кайнӑ, ӑна халӗ тухтӑрсем пулӑшаҫҫӗ.

Кӳршӗсен хваттерне вара тӗтӗм-сӗрӗм тухса тулнӑ. Унта 8 ҫулти хӗрача пулнӑ, ӑна та ҫӑлавҫӑсем урама илсе тухнӑ. Ача шар курман.

Пушара сӳнтерме 8 машина пырса ҫитнӗ. Вут-ҫулӑма ҫур сехетре сӳнтернӗ.

Пушар карса тунӑ маччари светильникран тухма пултарнӑ тесе шухӑшлаҫҫӗ.

Кандинский нейросеть сӑнӳкерчӗкӗ

Мускавран Балине самолётсем вӗҫме пуҫлӗҫ. Асӑннӑ ҫӗршыва хальхи вӑхӑтра тӳрӗ рейс ҫук. Самолётсене «Аэрофлот» авиакомпани ҫӳретме тытӑнӗ.

Мускавпа Балине тӳрӗ рейспа ҫыхӑнтаракан рейса авӑн уйӑхӗн 17-мӗшӗнче уҫӗҫ.

SU296 рейс пассажирсене Шереметьево аэропортран Денпасара ытларикунпа шӑматкунсерен турттарӗ. Самолёт 14 сехет те 40 минутра ҫула тухӗ. Балинчен каялла юнкунпа вырсарникунсерен 10 сехет те 5 минутра хускалӗ.

Унсӑр пуҫне юпа уйӑхӗн 3-мӗшӗнчен таиа тепӗр рейс хушӑнӗ: Мускавран самолёт кӗҫнерникунсерен вӗҫме пуҫлӗ, Балирен – эрнекунсерен.

Инкеклӗ лару-тӑру министерстви тунӑ сӑн

Ҫурла уйӑхӗн 19-мӗшӗнче Чӑваш Енре 43 ҫулти икӗ арҫын пушарта ҫунса вилнӗ. Пӗрремӗш инкек Вӑрнар округӗнчи Ершепуҫ ялӗнче пулнӑ. Ҫӑлавҫӑсем йывӑҫ ҫуртри пушара сӳнтернӗ хыҫҫӑн арҫын виллине тупнӑ. Халӗ ҫулӑм мӗнрен тухнине тӗпчеҫҫӗ.

Ҫав кунах 23 сехетре Шупашкарта Ленин проспектӗнчи 56-мӗш ҫуртра хваттер ҫуннӑ. Унта та 43-ри арҫын вилнӗ. Малтанлӑха пӗлтернӗ тӑрӑх, ҫулӑм пирус асӑрханмасӑр туртнӑран тухнӑ.

t.me/gibdd121 сӑнӳкерчӗкӗ

Етӗрне муниципаллӑ округӗнче ҫамрӑксем мопедпа мотоблокпа пырса ҫапӑннӑ.

Етӗрне тӑрӑхӗнчи Лапракассинче пурӑнакан яшсем

мопедпа пынӑ чухне мотоблок ҫине пырса кӗнӗ.

Инкекре мопед пассажирӗ аманнӑ.

Пӑтӑрмах ҫурла уйӑхӗн 16-мӗшӗнчи ҫӗрле пулнӑ. Мопеда тытса пынӑ 17 ҫулти ҫамрӑк хирӗҫ килекен мотоблокпа пырса ҫапӑннӑ. Инкекре мопед ҫинче ларса пынӑ 14 ҫулти яш пуҫне амантнӑ. Вӑл халӗ пульницӑра сипленет.

Мопед ҫинчисем те, мотоблок хуҫи те урӑ пулнӑ.

ШӖМ видеовӗнчен илнӗ сӑнӳкерчӗк

Чӑваш Енре наркотиклӑ арҫынна тытса чарнӑ.

Питӗрте пурӑнакан 46 ҫулти арҫынна «Хӗвелтухӑҫ» М-12 ҫул ҫинче чарнӑ. Вӑл хӑйӗн «Хендай-Солярис» машинипе Питӗртен Челепире кайма тухнӑ.

Машинӑна Каҫал тӑрӑхӗнчи ҫул-йӗр хӑрушсӑрлӑхӗн инспекторӗсемпе йӗрке хуралҫисем чарнӑ. Машинӑра 5 килограмм героинпа пулнӑ.

Арҫын хӑйӗн айӑпне тунсан та ӑна вӑхӑтлӑха хупса хунӑ. Ун тӗлӗшпе пуҫиле ӗҫ пуҫарнӑ.

https://chuvashia.sledcom.ru сӑнӳкерчӗкӗ

Красноармейски районӗнче ашшӗпе ывӑлӗ ватӑ ҫынна ҫаратма шут тытнӑ.

Ҫӗньял Шетмӗ ялӗнче пурӑнакан 41 ҫулти арҫын усал ӗҫе хӑйӗн 15-ри ывӑлне явӑҫтарнӑ.

Ырӑ мар шухӑш тытнӑ ҫак ҫемье ялта пӗччен пурӑнакан 88 ҫулти кинемейӗн укҫа пурах тесе шухӑшланӑ. Ҫавна май вӗсем ватӑ патне кӑҫалхи ака уйӑхӗн 14-мӗшӗнче каҫхи тӑхӑр сехет иртсен кайнӑ. Алӑка ватса кӗрсе кинемее тапӑннӑ, унӑн 200 пин тенкине илсе тухса кайнӑ.

Пӑтӑрмах пирки кинемей кӑштах пурӑнсан ҫеҫ кӳршисене каласа панӑ, леш йӗрке хуралҫисене пӗлтернӗ. Хайхи пуҫтахсем ватта тавӑрассипе хӑратнӑ иккен, вӑл ҫавӑнпа каласа кӑтартма шикленнӗ.

Ӗҫ министерствин сайтӗнчен илнӗ сӑнӳкерчӗк

Етӗрнери тӳрӗ-шара Валентина Максимова ӗҫ ветеранне юбилейпа саламланӑ.

Валентина Васильевна 1934 ҫулхи ҫурла уйӑхӗн 19-мӗшӗнче нумай ачаллӑ ҫемьере ҫуралнӑ. Кил-йышра 6 ача пулнӑ. Вӑрҫӑ ҫулӗсем Валентинӑшӑн йывӑр килнӗ. Ашшӗ, пиччӗшӗпе аппӑшӗ фронта тухса кайнӑ, кӗҫӗннисен нумай ӗҫлеме тивнӗ. Вӑрҫӑран ашшӗпе аппӑшӗ ҫеҫ таврӑннӑ.

Валентина Васильевна Етӗрнери вӑтам шкултан вӗренсе тухсан Шупашкарти планпа экономика техникумне вӗренме кӗнӗ. Етӗрнери АТПра бухгалтерта тӑрӑшнӑ, пенсие тухас умӗн склад заведующийӗ пулнӑ.

"На связи" форумри сӑн. Халӗ ку ӳкерчӗк ҫук

«Чӑваш Ен» Издательствӑпа полиграфи комплексӗ валли директор шыраҫҫӗ. ЧР Экономика министерстви кандидатсенчен заявленисем ыран йышӑнма пуҫлать. Авӑн уйӑхӗн 5-мӗшӗччен ӗлкӗрмелле. Ӑна аслӑ пӗлӳ илнӗ, ертӳҫӗ должноҫӗнче ӗҫленӗ ҫынсенчен кӑна йышӑнаҫҫӗ. Кунсӑр пуҫне обществӑн аталану программине тӑратмалла.

Палӑртмалла: Издательствӑпа полиграфи комплексне 2021 ҫулхи утӑ уйӑхӗнчен Алексей Ключников ертсе пырать. Ҫурлан 5-мӗшӗнченпе вӑл тӗп директор тивӗҫне вӑхӑтлӑх пурнӑҫлать тесе палӑртнӑ.

Ҫамрӑк ӳнерҫӗ Ксения Кокель Шупашкарти Хевеш урамӗнчи 30-мӗш ҫурт ҫине ӳкернӗ муралпа Атӑлҫи федераци округӗнче иртекен стрит-арт конкурсне хутшӑннӑ. Унтан лайӑх хыпар ҫитнӗ: вӑл 2-мӗш вырӑн йышӑннӑ.

Аса илтерер: Ксения ҫурт стени ҫине «Манӑн кил – манӑн крепоҫ» ӗҫе пурнӑҫланӑ. Унта чӑваш хӗрарӑмне сӑнланӑ. Унпа вӑл «ФормART» конкурса хутшӑннӑ.

Пӗрремӗш вырӑна Чӗмпӗр облаҫӗнчи Марат Петров тивӗҫнӗ. Виҫҫӗмӗш вырӑна Саратов облаҫӗнчи Юлия Чиженькова йышӑннӑ. Ҫӗнтерӳҫӗсене хӑйсен пултарулӑхне аталантарма грант параҫҫӗ. Ксения Кокель 150 пин тенке тивӗҫнӗ.

Дмитрий Моисеев архивӗнчи сӑнӳкерчӗк

Чӑваш Енре Медиацентр туса хурасси пирки пӗлтернӗччӗ. Ӑна кам ертсе пырассине те хыпарланӑччӗ: «Хыпар» Издательство ҫурчӗн директорӗн-тӗп редакторӗн ҫумӗ Дмитрий Моисеев. Аса илтерер: Дмитрий Андреевич 2023 ҫулхи юпа уйӑхӗнчен пуҫласа кӑҫалхи ҫӗртме уйӑхӗччен Издательство ҫуртне вӑхӑтлӑх ертсе пынӑ.

Медиацентра ҫурла уйӑхӗн 16-мӗшӗнче регистрациленӗ. Унӑн учредителӗ – ЧР Цифра министерстви. Мънле ӗҫсем пурнӑҫлӗ-ха Медиацентр? МИХсене кӑларса тӑрӗ, республикӑри интернет-ресурссене аталантарӗ, контент тӑвӗ, медиасферӑна тишкерӗ. Ҫавӑн пекех вӑл хаҫатсен дизайнӗпе, версткипе, рекламипе те ӗҫлӗ.

Палӑртса хӑварар: Дмитрий Моисеев И.Н.Ульянов ячӗллӗ ЧПУн журналистика факультетӗнче вӗреннӗ, 2006 ҫулта «Ҫамрӑксен хаҫатӗнче» корреспондентра ӗҫленӗ, 2009-2015 ҫулсенче унӑн редакторӗ пулнӑ. 2016 ҫултанпа – «Хыпар» Издательство ҫурчӗн директорӗн-тӗп редакторӗн ҫумӗ. Вӑл – ЧР Ҫамрӑксен патшалӑх премийӗн лауреачӗ, кӗнекесен авторӗ. Унӑн пьесисем тӑрӑх халӑх театрӗсем спектакльсем лартаҫҫӗ.