Шупашкарти халӑх хастарӗ Юрий Шакеев ӗнер пикета тухнӑ. Вӑл Шупашкар хула администрацийӗ умне плакатпа пырса тӑнӑ. Унта ӗнер Шупашкра хулин иртнӗ сӳлхи ӗҫ-хӗлне пӗтӗмлетмелли пуху иртнӗ. Плакат ҫине хула администрацийӗн пуҫлӑхне Алексей Ладыкова тата Чӑваш Ен Элтеперне Михаил Игнатьева отставкӑна кайма ыйтса ҫырнӑ. «Достал! Устали! Тепре куриччен! Отдыхай! Прощай!» — тесе шӑрҫаланӑ.

Александр Белов журналист ҫырнӑ тӑрӑх, хула мэрийӗ умӗнче пакунлисем йышлӑ пулнӑ.

Ҫак йӗркесен авторӗ сӑнанӑ тӑрӑх, Юрий Шакеев Фейсбукра Алексей Ладыкова хирӗҫле постсем час-часах лартать.

Юрий Шакеев ятлӑ ҫын камне пӗлес тесе тӗнче тетелӗнчи уҫӑ ҫӑлкуҫсене тишкерсен rusprofile.ru сайтра Юрий Алексеевич Шакеев ятлӑ усламҫӑ ячӗ тухать. Вӑл — 4 компани учредителӗ, 5 компанин тӗп директорӗ-мӗн.

Йӗпреҫ районӗнчи Пучинке ял тӑрӑхӗн экс-пуҫлӑхӗ ӗҫ вырӑнӗпе ытлашши усӑ курнӑ тесе шутлаҫҫӗ. Ун тӗлӗшпе пуҫиле ӗҫ пуҫарнӑ.

Следовательсем тӗпчесе пӗлнӗ тӑрӑх, 2009 ҫулхи ҫурла уйӑхӗнче ҫак пуҫлӑх ывӑлӗн 1,5 тӑваткал метрлӑ ҫӗр лаптӑкӗ тӗлӗшпе харпӑрлӑх прави пур тесе суя документ хатӗрленӗ. Каярахпа ывӑлӗ регслужба урлӑ ҫак участокӑн харпӑрҫи пулса тӑнӑ. Чӑннипе вара ҫӗр район администрацийӗн пулнӑ.

РФ Следстви комитечӗн Чӑваш Енри управленийӗн следователӗсем пуҫиле ӗҫе малалла тӗпчеҫҫӗ.

Унччен маларах сайтра Федерацин хӑрушсӑрлӑх службин ӗҫченӗсем Патӑрьел ял тӑрӑхӗн экс-пуҫлӑхне тытса чарни пирки пӗлтернӗччӗ.

«Контактра» халӑх тетелӗнчи «Патӑрьел» пабликири сӑн

Федерацин хӑрушсӑрлӑх службин (ФХС) Чӑваш Енри управленийӗн ӗҫченӗсем тепӗр тӳре-шарана тытса чарнӑ. Тӗрӗсрех каласан, ҫак арҫын унччен влаҫ тытӑмӗнче вӑй хунӑ.

Сӑмах – Патӑрьел ял тӑрӑхӗн администрацийӗн экс-пуҫлӑхӗ Анатолий Моисеев пирки. Ӑна РФ УКн 286-мӗш статйин 3-мӗш пайӗпе килӗшӳллӗн (должноҫӗпе ытлашши усӑ курнӑшӑн) айӑпласшӑн. Арҫынна следстви изоляторне илсе кайнӑ.

Ку хыпара «Правда ПФО» тӗнче тетелӗнчи хаҫат пӗлтернӗ. «Ку статьяпа ӑна 10 ҫул таран ирӗксӗр хӑварма пултараҫҫӗ. ФХС ӗҫченӗсем ухтару ирттернӗ, документсене илнӗ. Ӑна следстви изоляторне лартнӑ», - ҫапла ҫырнӑ сайтра.

Нумаях пулмасть ФХС ӗҫченӗсем ЧР финанс министрӗн Светлана Енилинӑн аппӑшне Маргарита Замчинскаяна тытса чарни пирки хыпарланӑччӗ.

Федерацин хӑрушлӑх службин республикӑри управленийӗн ӗҫченӗсем «Аудит-Консалтинг» акционерсен хупӑ обществин генеральнӑй директорне Маргарита Замчинскаяна тытса чарнӑ. Вӑл – ЧР финанс министрӗн Светлана Енилинӑн пӗртӑванӗ.

Вӗсем аппӑшӗпе йӑмӑкӗ пулнине «Правда ПФО» интернет-хаҫат «Хыпар» хаҫатра тухнӑ статьяна тӗпе хурса пӗлтӗрех пӗлтернӗ. Кун хыҫҫӑн халӑх фрончӗн хастарӗсем прокуратурӑна тата монополипе кӗрешекен службӑна Финанс министерствипе «Аудит-Консалтинг» фирма хутшӑнӑвӗсене тӗрӗслеме ыйтнӑ. Республикӑри хӑш-пӗр ведомство тата вӗсене пӑхӑнса тӑракан организацисем Маргарита Замчинская ертсе пыракан компанире экспертизӑсемпе аудит саккас панӑ.

Палӑртмалла: Маргарита Замчинская 1957 ҫулта Патӑрьел районӗнчи Тӗреньел ялӗнче ҫуралнӑ. Вӑл ҫӳлерех асӑннӑ компание 1995 ҫултанпа ертсе пырать.

Паян Чӑваш Енӗн Цифра аталанӑвӗн, информаци политикин тата массӑллӑ коммуникацисен мнистрӗн ҫумне Светлана Каликовӑна ӗҫрен кӑларнӑ. Тӳрех палӑртар: Светлана Анатольевна куншӑн пӑшӑрханмӗ.

Республикӑн Министрсен Кабинечӗн Ертӳҫин Иван Моторинӑн хушӑвӗнче те, сӑмах май, Светлана Анатольевна урӑх ӗҫе куҫассине палӑртнӑ.

Светлана Каликова, аса илтерер, Чӑваш Ен Элтеперӗн Михаил Игнатьев хӑйӗн пресс-ҫыруҫинче тӑрӑшнӑччӗ. Пӗлтӗрхи юпа уйӑхӗнче вӑл ЧР Цифра аталанӑвӗн, информаци политикин тата массӑллӑ коммуникацисен министр ҫумӗн пуканне йышӑннӑччӗ. Иртнӗ уйӑх вӗҫӗнче Чӑваш кӗнеке издательствин тӗп директорӗн должноҫне палӑртмашкӑн ӗҫлӗ ушкӑн ларӑвӗ иртнӗччӗ. Ҫав тилхепене Светлана Кадиковӑна тыттарас тенӗ.

Чӑваш Енӗн Тӗрӗслевпе шутлав палатин ертӳҫи Светлана Аристова

Ҫук-ҫук. Пур ҫӗре те мар. Элтеперпе ытти пысӑк пуҫлӑхӑн тӑванӗсене Чӑваш Енӗн Тӗрӗслевпе шутлав палатинчи хӑш-пӗр ӗҫе илмӗҫ.

Паян, нарӑсӑн 18-мӗшӗнче, Чӑваш Енре Тӗрӗслевпе шутлав палатипе ҫыхӑннӑ саккуна улшӑнусем кӗртнӗ. Ҫав утӑма федераци саккунӗнче улшӑну пулса иртнӗ хыҫҫӑн тунӑ.

Республикӑн Тӗрӗслевпе шутлав палатин ертӳҫи, унӑн ҫумӗ тата аудиторсем пулмалли должноҫсене Чӑваш Ен Элтеперӗпе, республикӑн Патшалӑх Канашӗн Ертӳҫипе, республикӑн Министрсен Кабинечӗн Ертӳҫипе, суд тата право органӗсен ертӳҫисен ҫывӑх тӑвансене е хурӑнташсене (ашшӗ-амӑшне, мӑшӑрсене, ачасене, пиччӗшӗ-шӑллӗсене, аппӑшӗ-йӑмӑкӗсене, мӑшӑрӗн ҫывӑх тӑванӗсене) ӗҫе илме юрамасть. Маларах капла чару Тӗрӗслевпе шутлав палатин ертӳҫине ҫеҫ пырса тивнӗ.

А. Беловпа Ю. Васильев (сулахайран сылтӑмалла)

Чӑваш Енри паллӑ журналиста республика Элтеперӗн пресс-ҫыруҫи пулма йыхравланӑ-мӗн. Кун пирки Александр Белов Фейсбукра нарӑс уйӑхӗн 16-мӗшӗнче пӗлтернӗ.

Александр Белов кӑҫалхи кӑрлачӑн 20-мӗшӗнче 65 ҫул тултарнине эпир хыпарланӑччӗ.

Вӑл Ҫӗнӗ Шупашкарти «Путь к коммунизму» (хальхи «Грани»), «Советская Чувашия» хаҫатсенче тӑрӑшнӑ. Чӑваш Енӗн Патшалӑх Канашӗн «Республика» хаҫачӗн пӗрремӗш редакторӗ пулнӑ. «АиФ-Чувашия» редакторӗн должноҫӗнче тимленӗ. Паян вӑл тӗнче тетелӗнчи «Правда ПФо» хаҫатра тӑрӑшать.

«Юрий Егорович (кунта сӑмах ЧР Министрсен Кабинечӗн Ертӳҫин ҫумӗ — Элтепер Администрацийӗн Ертӳҫи Юрий Васильев пирки пырать. — Т.Т.) Игнатьевӑн пресс-ҫыруҫи пулма каллех чӗнет, эпӗ хака ӳстеретӗп», — ҫырнӑ Белов Фейсбукра. Хӑйӗн кӗске посчӗ ҫумне Белов Юрий Васильевпа ӳкерӗннӗ сӑн ӳкерчӗке лартса хунӑ.

Нумах пулмасть Ладыковӑн ывӑлне Олег Ладыкова тытса чарни пирки хыпарланӑччӗ. Аса илтерер: хирӗҫсе кайнӑ ҫамрӑксен ушкӑнӗ патне полицейскисем ҫитнӗ, Ладыков-кӗҫӗннине тытса чарнӑ чухне вӑл йӗрке хуралҫине тапӑннӑ, пӗрне полици уйрӑмӗнче питрен ҫапнӑ.

Паян Шупашкар хулин сити-менеджерӗ Инстаграмри страницинче кун пирки комментари ҫырнӑ. «Ман ывӑлпа пулса иртнӗ пӑтӑрмах пирки, мӗн калаятӑп. Ман ывӑл – 18 ҫул тултарнӑ ҫын, хӑй тӗллӗнлӗхе хӑнӑхнӑ. Эпӗ пӗлнӗ тӑрӑх, вӑл айӑпне йышӑннӑ, саккунпа килӗшӳллӗн явап тытма хатӗр. Манӑн тивӗҫ ҫакӑ тесе шутлатӑп: тепӗр хутчен шар курнӑ ҫынсенчен каҫару ыйтатӑп», - ҫапла ҫырнӑ сити-менеджер.

Паян, нарӑс уйӑхӗн 12-мӗшӗнче, Шупашкарта Чӑваш Енӗн Патшалӑх Канашӗн черетлӗ сессийӗ иртнӗ, тӗп ыйтӑвӗ Патшалӑх Канашне ертсе пыракана суйласси пулнӑ. Ҫапла майпа Альбина Егорова председатель должноҫне йышӑннӑ. Кун пирки «Правда ПФО» интернет-кӑларӑм хыпарлать.

Хайхи ҫӑлкуҫ пӗлтернӗ тӑрӑх, Патшалӑх Канашӗн ҫак ларӑвӗнче председателе ҫирӗплетмешкӗн «Пӗрлӗхлӗ Раҫҫей» партин Чӑваш Енри уйрӑмӗн депутачӗсем иртнӗ ларура вӑрттӑн сасӑлав ирттерсе Альбина Егоровӑн кандидатурине сӗннӗ.

Аса илтерер, Альбина Егорова 1958 ҫулхи юпа уйӑхӗн 29-мӗшӗнче Шупашкар районӗнчи Апашра ҫуралнӑ. Питӗрти патшалӑх техника университетӗнче экономиста вӗреннӗ. Ултӑ ҫул хушши Чӑваш Енӗн конкурентлӑ политикӑпа тариф службине ертсе пынӑ, 2016 ҫултанпа Патшалӑх Канашӗн предселателӗн ҫумӗнче — хысна, финанс тата налуксем енӗпе ӗҫлекен комитет пуҫлӑхӗнче тӑрӑшнӑ. Валерий Филимонова председательтен кӑларсан ун тивӗҫӗсене пурнӑҫласа пынӑ.

«Ҫыхӑнура» форум пӗлтернӗ тӑрӑх, Ладыковӑн ывӑлне Олег Ладыкова тытса чарнӑ. Кун пирки Cheb.media портала пӗр-пӗрне пӑхӑнман виҫӗ ҫӑлкуҫ хыпарланӑ.

Нарӑс уйӑхӗн 9-мӗшӗнче ҫӗрле Шупашкарти Атӑл (выр. «Волжский» урамӗнче ҫынна хӗнени пирки полицие шӑнкӑравласа пӗлтернӗ. Йӗрке хуралҫисем вырӑна ҫитнӗ. Ҫӑлкуҫсем хыпарланӑ тӑрӑх, Ладыков-кӗҫӗнни йӗрке хуралҫисене пӑхӑнман, вӗсенчен пӗрне тапӑннӑ. Кун хыҫҫӑн ӑна полицин 2-мӗш уйрӑмне илсе ҫитернӗ.

Официаллӑ мар даннӑйсене ӗненес тӗк, 19 ҫулти Олег Ладыков халӗ вӑхӑтлӑх тытмалли изоляторта.

Каярахпа «Ҫыхӑнура» формура хыпара ҫӗнетнӗ: полицейскисем Росгварди пулӑшнипе лимузина тытса чарнӑ (салонри ҫынсем ҫапӑҫу вырӑнӗнчен тарнӑ). Ҫӑлкуҫсем пӗлтернӗ тӑрӑх, полици уйрӑмӗнче Олег Ладыков полицин патруль службин пӗр ӗҫченне питрен ҫапнӑ.