Раштав уйӑхӗн пуҫланнӑранпа Чӑваш Енре 408 ҫын кӑшӑлвируса пула вилнӗ. Вӗсенчен 17-шӗ – юлашки талӑкра.
Паянхи кун тӗлне республикӑра 45834 ҫын инфекциленнӗ. Вӗсенчен 40026-шӗ сывалнӑ. 3714 ҫын кӑшӑлвируса парӑнтараймасӑр пурнӑҫран уйрӑлнӑ.
Юлашки талӑкра 96 ҫын чирленине палӑртнӑ. 77 ҫын сывалнӑ. Хальхи вӑхӑтра стационарсенче тата килте амбулатори мелӗпе 2094 ҫын кӑшӑлвирусран сипленет
Ҫӗнӗ Шупашкарти хула пульници 60 ҫултан аслӑрах пациентсен хушшинче конкурс ирттерт. Анчах унта кӑшӑлвирусран вакцинациленнисем ҫеҫ хутшӑнаяҫҫӗ.
Конкурса хутшӑнас тесен пульницӑн кирек хӑш прививка тумалли пунктӗнче пӗрремӗш компонентпа вакцинациленмелле. Кайран вӗсене код ҫырнӑ флаер параҫҫӗ.
Конкурса кашни тунтикун пулӗ, ӑна пульницӑн Инстаграмри страницинче тӳрӗ эфирта ирттерӗҫ. Ҫынсен тонометр, дезинфекци тумалли хатӗр, ытти япала выляса илме шанчӑк пур. Конкурс кӑрлач уйӑхӗн 23-мӗшӗччен пырӗ.
Республикӑра иккӗмӗш кун ӗнтӗ 20 ҫын кӑшӑлвируса пула вилет. Кун пирки федераци информаци центрӗ пӗлтерет.
Юлашки вӑхӑтра чирлекенсем майӗпен чакса пыраҫҫӗ. Анчах вилекенсем ҫаплипех нумай. Раштав уйӑхӗ пуҫланнӑранпа республикӑра 373 ҫын кӑшӑлвируса пула вилнӗ. Пандеми пуҫланнӑранпа 3679 ҫын пурнӑҫран уйрӑлнӑ.
Юлашки талӑкра 84 ҫын чирленӗ. Ку таранччен кӑшӑлвирус ҫаклатнӑ 45647 ҫынран 39872-шӗ сывалнӑ. Хальхи вӑхӑтра стационарсенче тата килте амбулатори мелӗпе 2096 ҫын кӑшӑлвирусран сипленет.
Паян Правительство ҫуртӗнче иртнӗ планеркӑра ЧР вӗренӳ министрӗ Дмитрий Захаров шкул ачисем хӗллехи каникула маларах каяссине пӗлтернӗ. Каникул раштав уйӑхӗн 28-мӗшӗнче пуҫланӗ те кӑрлачӑн 19-мӗшӗнче вӗҫленӗ.
Министр пӗлтернӗ тӑрӑх, хальхи вӑхӑтра республикӑра 88 вӗрентекен тата шкул ачи кӑшӑлвируспа чирлет. Елчӗк районӗнчи пӗр шкул тата 51 класс карантинра.
ОРВИпе тата ОРЗпа чирлекенсен йышӗ нумай: 10,5 пин шкул ачине ҫапла диагноз лартнӑ. 90 класс карантинра.
Чӑваш Енре Ҫӗнӗ ҫулхи каникул валли 50 пин экспресс-тест илсе хурӗҫ. Вӗсемпе массӑллӑ мероприятисене хутшӑнакансене кӑшӑлвируспа чирленипе чирлеменнине тӗрӗслӗҫ.
Хальхи вӑхӑтра республикӑра 100 пин ҫынран 321,3 ҫынна тест тӑваҫҫӗ. Раштав уйӑхӗччен ковидпа чирлӗ ҫынпа хутшӑннисене ПЦР-тест тунӑ. Халӗ вара ОРВИ симптомӗсем пулсан ҫеҫ тест тӑваҫҫӗ. Ку йӗрке Раҫҫей тӗп санитари тухтӑрӗн йышӑнӑвӗпе килӗшӳллӗн улшӑннӑ.
ЧР Элтеперӗ Олег Николаев массӑллӑ мероприятисене хутшӑнакансене пурне те тест тумалли пирки каланӑ. Ҫав шутра экспресс-тестсем те пулӗҫ. Чӑваш Ен валли уйӑрнӑ 50 пин тест-экспресс 10 миллион та 750 пин тенке кайса ларӗ.
Республикӑри шкулсенче Ҫӗнӗ ҫулхи каникула тӑсасшӑн. Паян кун пирки оперативлӑ штаб ларӑвӗнче пӗлтернӗ.
Ку шухӑша ЧР Элтеперӗ Олег Николаев пӗлтернӗ. Хальлӗхе палӑртнӑ тӑрӑх, каникула раштавӑн 31-мӗшӗччен маларах пуҫламалла, каярах вӗҫлемелле.
Каникул пирки ҫитес эрнере татӑклӑ йышӑну тӑвӗҫ. Кун пирки Правительство ҫуртӗнче иртекен планеркӑра вӗренӳ министрӗ пӗлтернӗ.
Шупашкарти Туберкулезпа кӗрешекен диспансер ковид-госпиталь режимӗнчен тухать. Кун пирки паян оперативлӑ штаб ларӑвӗнче сывлӑх сыхлавӗн министрӗн пӗрремӗш ҫумӗн тивӗҫӗсене пурнӑҫлакан Алексей Кизилов пӗлтернӗ.
Паянтан пуҫласа диспансера кӑшӑлвируспа чирлекенсене йышӑнмаҫҫӗ. Икӗ эрне хушшинче пульницӑна ахаль чухнехи режима куҫарӗҫ. Сӑмах май, кунта 95 ковид-койка пулнӑ.
Хулан 2-мӗш пульницинче, Хӗрлӗ Чутай, Улатӑр, Канаш районӗсен пульницисенче те кӑшӑлвирусран сипленекенсен йышӗ чакса пырать.
Хальхи вӑхӑтра республикӑра 1286 ковид-койка пур, вӗсенчен 293-шӗ пушӑ.
Сӗнтӗрвӑрри районӗнчи тӗп больницӑн тӗп тухтӑрӗн тивӗҫӗсене пурнӑҫланӑ Анастасия Белова ҫынсене суя сертификатсемпе тивӗҫтернӗ тесе шухӑшлаҫҫӗ. Ҫамрӑк хӗрарӑма Шупашкарти Ленин районӗн сучӗ 2 уйӑхлӑха СИЗОна ӑсатнӑ.
Шур халатлӑскер кӑшӑлвирусран вакцинаци тунӑ пек сертификат илме 10 пациента пулӑшнӑ теҫҫӗ. Тӗпчевҫӗсем палӑртнӑ тӑрӑх, ахальтен «ырӑ туман» вӑл. Укҫалла. Суя сертификат хакӗ 5 пин тенкӗ тӑнӑ тесе тӗшмӗртеҫҫӗ.
Асӑннӑ тухтӑр Сӗнтӗрвӑррине «Земство тухтӑрӗ» программӑпа лекнӗ. Вӑл Чӑваш патшалӑх университетӗнчен 2007 ҫулта вӗренсе тухнӑ, Пирогов ячӗллӗ медицина университетӗнче квалификацие ӳстернӗ. Анастасия Белова — анестезиолог-реаниматолог, невролог. Шупашкарта Пепкелӗх центрӗнче, Хулари иккӗмӗш больницӑра, 7-мӗш больницӑра ӗҫленӗ.
Кӑшӑлвируспа официаллӑ майпа чирленӗ ҫынсене те QR-код пама пуҫлӗҫ. Кун пирки Раҫҫей Правительствин вице-премьерӗ Татьяна Голикова пӗлтернӗ.
Чирлесен пульницӑна кайман, анчах ПЦР-тест кӑшӑлвирус пуррине ҫирӗплетет тӗк пациента антителӑсем пуррипе ҫуккине тӗрӗслеме сӗнӗҫ. Вӗсем пур тӑк ҫынна QR-код парӗҫ. Ку кӑҫалхи кӑрлач уйӑхӗн 1-мӗшӗ хыҫҫӑн ПЦР-тест тунӑ ҫынсене пырса тивет.
ПЦР-тест туман, анчах антителӑсем пур пулсан та код парӗҫ. Вӑл ҫур ҫул вӑйра пулӗ.
Паянхи статистика та лӑплантармасть: кӑшӑлвирусран вилекенсен йышӗ ҫаплах чакмасть. Раштав уйӑхӗн пуҫланнӑранпа Чӑваш Енре 244 пациент ҫак амака парӑнтарайман. Юлашки талӑкра 20 ҫын вилнӗ. Ку таранччен кӑшӑлвирус 3550 пациентӑн пурнӑҫне татнӑ
Ҫав вӑхӑтрах чирлекенсен йышӗ майӗпен чакса пырать. Паянхи кун тӗлне 44813 ҫын кӑшӑлвируспа чирлнӗ. Вӗсенчен 135-шӗ – юлашки талӑкра. 39155 ҫын сывалнӑ. Юлашки талӑкра 113 ҫын чире парӑнтарнӑ. Хальхи вӑхӑтра ку амакран 2108 ҫын сипленет.
+8.3 °C