Шупашкарти аэропортра ӗнер пӗр пӑтӑрмах пулса иртнӗ.
Пассажирсенчен пӗри пирус туртнӑран пушар сигнализацийӗ ӗҫлесе кайнӑ. Ҫавна пула пассажирсене урама кӑларса тӑратма тивнӗ, самолётпа вӗҫсе килнисен унтах ларма тивнӗ.
Пӑтӑрмаха пула самолёт каялла та вӑхӑтра вӗҫсе каяйман.
Шупашкарти аэропортра туалетра та пирус туртма юраманни пирки аса илтереҫҫӗ.
Шупашкарта Мускав проспектӗнче вырнаҫнӑ пульницӑра пӗр хӗрарӑмӑн укҫине вӑрланӑ. Кун пек хӑтланнӑ тесе пӗр арҫынна шанмаҫҫӗ, ӑна палласа илекенсене йӗрке хуралҫисене пелтерме ыйтаҫҫӗ. Арҫын видеокамера ҫине лекнӗ.
Пӑтӑрмах пӗлтӗрхи раштав уйӑхӗн 19-мӗшӗнче 12 сехет тӗлӗнче пулса иртнӗ. Хӗрарӑмӑн енчӗкӗ куртка кӗсйинче пулнӑ. Унта документсем тата 40 пин тенкӗ ытларах укҫа пулнӑ.
Шупашкарта кӑҫал та Чӑваш музыкин фестивалӗ иртессине эпир унччен пӗлтернӗччӗ-ха. Аса илтерер: ӑна кӑҫал 15-мӗш хутчен йӗркелеҫҫӗ.
Фестиваль нарӑс уйӑхӗн 1-мӗшӗнче уҫӑлӗ. Чӑваш патшалӑх оперӑпа балет театрӗ пӗлтернӗ тӑрӑх, репертуарта — чӑваш музыкин ылтӑн фондӗнчи ахах-мерчен: Федоров Павловӑн «Шывармань» тата Георгий Хирпюн «Нарспи» опери таранах. Хальтерехрисенчен Андрей Галкинӑн «Аттила. Рождение легенды» балетне палӑртмалла.
Фестиваль Тутарстанри паллӑ баянист Айдар Гайнуллин хутшӑнакан гала-концертпа вӗҫленӗ.
Шупашкарта пурӑнакан фронтовик Иван Григорьев ҫак кунсенче 102 ҫул тултарнӑ.
Иван Григорьевич – Тӑван ҫӗршывӑн Аслӑ вӑрҫин сусӑрӗ. Вӑл Тӑвай районӗнче ҫуралнӑ. 1941 ҫулхи ҫурла уйӑхӗнче хӑйӗн ирӗкӗпе фронта кайнӑ, III Украина тата II Беларуҫ фрончӗсенче фашистпа ҫапӑҫнӑ, «Катюша» операторӗ пулнӑ. Киле вӑл 1946 ҫулта кӑна таврӑннӑ. Кун хыҫҫӑн Чӑваш обком партийӗнче 57 ҫул ытла ӗҫленӗ.
Иван Григорьевич мӑшӑрӗпе икӗ хӗр ҫуратса ӳстернӗ.
Шупашкарта пурӑнакан 72 ҫулти арҫын 4 хутчен ултавҫӑсен аллине лекнӗ. Вӑл инвестицисемпе ӗҫлесе илме ӗмӗтленнӗ.
Ҫак арҫын ултавҫӑсен аллине 4 хутчен ҫакланса пӗтӗмпе 900 пин ытла тенкӗ куҫарса панӑ. Хальхинче вӑл 60 пин тенкӗ ҫухатнӑ. Тӗнче тетелӗнче укҫа ӗҫлесе илмелли пирки реклама курсан вӑл каҫӑ ҫине пуснӑ та хӑйӗн телефон номерне хӑварнӑ. Унпа кайран «аналитиксем» ҫыхӑннӑ. Вӗсем хушнипе арҫын телефона сарӑм вырнаҫтарнӑ, микрозайм илнӗ те укҫана тӗрлӗ счет ҫине куҫарнӑ.
Кун тӗлӗшпе пуҫиле ӗҫ пуҫарнӑ.
Паян Шупашкарти 50-мӗш шкулта ача нумай вӗренме килмен. ЧР вӗренӳ министрӗ ку чир-чӗрпе ҫыхӑннине пӗлтернӗ. Анчах мӗнле чир пулни пирки пӗлтермен.
Прокуратура хыпарланӑ тӑрӑх, шкулти вӗренӗве вӑхӑтлӑха чарнӑ. Роспотребнадзор специалисчӗсем шкулта, ҫав шутра апатлану блокӗнче те, анализсем тата пробӑсем илнӗ.
ЧР Сывлӑх сыхлавӗн министерстви паян 17 сехет тӗлне пӗлтернӗ тӑрӑх, 2 ача инфекци уйрӑмӗнче сипленет, пӗри – амбулатори мелӗпе.
Шупашкарта суши хатӗрлесе сутакан пӗр предприяти организаци ятне «Ёбидоёби» тесе ҫырса хунӑ. Компани ӗнентернӗ тӑрӑх, ку ят япони чӗлхинчен куҫарсан «Эрнери кун – шӑматкун» тенине пӗлтерет.
Вырӑс чӗлхинче килӗшуллӗ илтӗнмен сӑмах пирки ҫӑхавлакансем реклама ҫинчен калакан саккуна пӑсакан организацие явап тыттарма ыйтнӑ.
Халӗ Федерацин монополипе кӗрешекен службин Чӑваш Енри управленийӗ ӗҫ пуҫарнӑ.
Шупашкарти Ленин комсомолӗн урамӗнче вырнаҫнӑ гараж кооперативӗнче газ сирпӗннӗ.
Ку паян кӑнтӑрла пулнӑ. Ҫав вӑхӑтра гаражра ҫынсем пулнӑ. Малтанлӑха палӑртнӑ тӑрӑх, автомобиль ҫине газ оборудованийӗ лартнӑ чухне газ-сывлӑш хутӑшӗ сирпӗннӗ. Пушар гараж боксне тата машинӑна тӗп тунӑ.
Ҫынсемпе мӗн пулнине пӗлтермен. Халӗ тӗрӗслев пырать.
Раштав уйӑхӗнче Шупашкарти 36 ҫулти сварщик Европӑран машина туянма шутланӑ. Анчах машинӑсӑр та, укҫасӑр та тӑрса юлнӑ.
Вӑл тӗнче тетелӗнче реклама тупнӑ та каҫӑ ҫине пуснӑ. Ҫапла «менеджерпа» ҫырӑнма пуҫланӑ – хайхискер машина тупма тата документсене хатӗрлеме пулӑшать-мӗн.
«Менеджер» 1,5 млн тенкӗ куҫарма ыйтнӑ. Арҫын куҫарма тӑрсан банк операцие тӑватӑ хутран кая мар пӑрахӑҫланӑ. Анчах арҫын банк ӗҫченӗсене ҫав палламан ҫын ӑна улталаманнине ӗнентерме пултарнӑ. Ҫапла вӑл 1,5 млн тенкӗсӗр юлнӑ. Ку укҫаран пӗр пайӗ – кредит илнӗскер.
Кун тӗлӗшпе пуҫиле ӗҫ пуҫарнӑ.
«Газпром газораспределение Шупашкар» акционерсен обществин Шупашкарти филиалӗн тӗп инженерне Сергей Леонтьева «Чӑваш Республикин тава тивӗҫлӗ строителӗ» ята панӑ. Хушӑва республика Элтеперӗ алӑ пуснӑ.
Сергей Николаевич газ отраслӗнче 20 ытла ҫул ӗҫлет. 2019 ҫултанпа вара вӑл тӗп инженер пулса тӑрӑшать. Чӑваш Ен Элтеперӗн халӑх тетелӗнчи пабликӗнче пӗлтернӗ тӑрӑх, Сергей Леонтьев хутшӑннипе Шупашкарта тата Шупашкар районӗнче газ объекчӗсем тӑваҫҫӗ тата пуррисене юсаса ҫӗнетеҫҫӗ.
-11.7 °C