Ака уйӑхӗн 23-25-мӗшӗсенче Чӑваш Енре «Абилимпикс» професси ӑсталӑхӗн чемпионачӗ пулӗ. Унта сывлӑх енчен хавшак ҫынсем хутшӑнӗҫ.
180 ҫын хӑйсен ӑсталӑхне 33 компетенцире тӗрӗслӗ. Кӑҫал ҫӗнӗ профессисем те пулӗҫ, флористика, адаптаци физкультури, психологи, массаж, горничнӑй, вокал, библиотека ӗҫӗ. Чемпионата хутшӑнакансен ӑсталӑхне 171 эксперт хаклӗ. Ӑмӑрту республикӑри 11 техникумра иртӗ.
Аса илтерер: пӗлтӗр чемпионатра Шупашкарти экономикӑпа технологипе колледжӗн студентки «Портной» компетенцире ылтӑн медаль ҫӗнсе илнӗ.
Шупашкарти 40-мӗш вӑтам шкулта ачасене чӑваш чӗлхи вӗрентекен Александр Степанов иртнӗ эрнере Хусанта форума хутшӑннӑ. Унта «Нумай чӗлхеллӗ Раҫҫей: культурӑсен хутшӑнӑвӗнчен пуҫласа паха вӗренӳ таран», пӗтӗм тӗнче шайӗнчи форум иртнӗ.
Александр Морисович форум хыҫҫӑн килнӗ шухӑшсемпе халӑх тетелӗнчи хӑйӗн страницинче пӗлтернӗ. Ӑна вӑл икӗ пунктпа палӑртаса хӑварнӑ.
«1. Нумай ҫул каялла Шупашкар хулин 10-мӗш шкулӗнче пуҫламӑш класра ачасене темиҫе чӗлхе вӗрентнин моделӗ хӑйӗн кирлӗлӗхне ҫирӗплетет.
2. Республикӑра нумай чӗлхеллӗ вӗренӗве аталантармалла!» — кӗскен пӗтӗмлетнӗ вӑл.
Шупашкар хулинче Тӑван ҫӗршывӑн аслӑ вӑрҫине хутшӑннӑ ветерансем ҫинчен фильм ӳкереҫҫӗ. Ку ӗҫе ачасене те явӑҫтарнӑ.
Хулари шкулсенче вӗренекен, асӑннӑ социаллӑ центрпа туслӑ ҫыхӑну тытакан хастар ачасем вӑрҫа хутшӑннӑ ветерансемпе тӗл пулаҫҫӗ, вӗсенчен интервью илеҫҫӗ, хӑйсен аллипе ӑсталанӑ открыткӑсемпе савӑнтараҫҫӗ, сӑвӑ вуласа параҫҫӗ. Вӗсемпе пӗрле центрӑн пресс-секретарӗ ҫӳрет.
Кайран ҫав кӗске видеосенчен та видео хатӗрлеме палӑртаҫҫӗ. «Ку ӗҫ питех те калӑпӑшлӑ та яваплӑ. Хамӑр та пӑлханатпӑр», — теҫҫӗ центрта.
Шупашкарта пурӑнакан 29 ҫулти хӗрарӑм ултавҫӑсене 3 миллион ытла тенкӗ куҫарса панӑ. Ҫав шутра килти укҫа та пулнӑ, кредит та илнӗ. Ҫавӑн чухлӗ суммӑна хӗрарӑм пӗр эрне хушшинче куҫарса панӑ.
Пӑтӑрмах почта уйрӑмне килмелли документсене йӑнӑша пула урӑх адреспа ярса панине ӗнентернинчен, урӑх ҫӗре ярса пама смспа килнӗ пароле ыйтнинчен пуҫланнӑ. Код мессенджерсенчен пӗринче бот урлӑ килнӗ. Хӗрарӑм ҫав кода ют ҫынсене пӗлтернӗ. Унтан ҫавсем патшалӑх пулӑшӑвӗсен порталӗнчи уйрӑм кабинета кӗме пултарнӑ.
Кайран хӗрарӑма укҫана хӑрушсӑр счет ҫине куҫарса пама ыйтнӑ. Ҫамрӑк хӗрарӑм ют ҫынсем каланине йӑлт пурнӑҫланӑ.
Нумаях пулмасть республикӑна «Ҫӗнтерӳ пуйӑсӗ» килсе кайнӑччӗ. Ҫӗнтерӳ пулнӑранпа 80 ҫул ҫитнине халалланӑ акципе килӗшӳллӗн, вӑл каллех пирӗн пата ҫитӗ. Пуйӑс Чулхула чукун ҫулӗн 45 станцийӗнче чарӑнӗ. Ҫав шутра — пирӗн республикӑра вырнаҫнисенче те.
Пирӗн республикӑна пуйӑс ака уйӑхӗн 26-мӗшӗнче ҫитӗ. Вӑл «Ҫӗмӗрле», «Вӑрнар», «Канаш1» станцисенче чарӑнӗ. Ака уйӑхӗн 27-мӗшӗнче Улатӑр тата Шупашкар урлӑ иртӗ. Чарӑнура 20 минутран пуҫласа 1 сехет таран пулӗ.
Шупашкарти Ф.П. Павлов ячӗллӗ музыка училищинче вӗренекенсем Ҫӗнтерӳ кунне халалласа «Ҫӗнтерӳ юррисем» концерт хатӗрленӗ. Ӑна вӗсем ҫу уйӑхӗн 5-мӗшӗнче, 18 сехет те 30 минутра, кӑтартӗҫ.
Программӑна пирӗн халӑхӑмӑрӑн мухтавлӑхне палӑртса ҫырнӑ хайлавсене кӗртнӗ. Концерта вӗрсе тата ҫапса каламалли инструментсем илем кӳрӗҫ.
Концерта музыка училищин солисчӗсем, ансмблӗсем, оркестрӗ хутшӑнӗ.
Дирижёрӗ — Чӑваш Республикин культурӑн тава тивӗҫлӗ артисчӗ Николай Смирнов. Концерта Чӑваш Республикин культурӑн тава тивӗҫлӗ ӗҫченӗ Элла Леонтьева ертсе пырӗ. Концертмейстерсем: Наталья Тихонова, Ирина Сысоева, Елена Ананьева, Татьяна Асламас, Нина Кульпина.
Ӗнер, ака уйӑхӗн 14-мӗшӗнче, каҫхи вунӑ сехетре, Шупашкарти Мускав проспектӗнче 17 ҫулти хӗр 53 ҫулти хӗрарӑм ҫине самокатпа пырса кӗнӗ.
Инкек тротуар ҫинче пулса иртнӗ. Хӗрарӑм ҫулпа утса пынӑ, ҫав вӑхӑтра ун ҫине электричество самокачӗпе ярӑнса пыракан студент пырса кӗнӗ. Суранланнӑ хӗрарӑма пульницӑна ӑсатнӑ. Унта ӑна тухтӑрсем пулӑшнӑ хыҫҫӑн килӗнче сипленме янӑ.
Колледжра иккӗмӗш курсра вӗренекен хӗр ӗнентернӗ тӑрӑх, руле вӑл астумасӑр пӑрса янӑ. Пике тӗлӗшпе халӗ административлӑ ӗҫ пуҫарнӑ.
Кӑҫалхи пӗрремӗш кварталта пирӗн республикӑра 958 мӑшӑр ҫемье ҫавӑрнӑ. Ку цифра пӗлтӗрхи ҫав тапхӑртинчен 12,7 процент нумайрах. Ун чухнехи виҫӗ уйӑхра 850 мӑшӑр пӗрлешнӗ.
Кӑҫалхи пӗрремӗш кварталта Шупашкарти загсра 264 мӑшӑр ҫырӑннӑ, Ҫӗнӗ Шупашкарта — 118, хулари Калинин тата Ленин районӗсенче — 95 тата 92. Шупашкар тӑрӑхӗнче 46 мӑшӑр ҫемьеленнӗ, Ҫӗрпӳ районӗнче — 26, Патӑрьел районӗнче — 21, Муркаш районӗнче — 20.
Мӑшӑрсенчен ытларахӑшӗ ҫемье ҫавӑрма заявленине патшалӑх пулӑшӑвӗсен порталӗ урлӑ панӑ.
Ҫамрӑк чухне эпир пӗчченлӗхе туймастпӑр: ялан ҫын ҫинче, ӗҫӗ те нумай, унта-кунта тухса ҫӳретпӗр, ӑна-кӑна вулатпӑр. Ватӑлсан ҫын пӗчченлӗхпе аптӑрать. Телевизор пӑхса йӑлӑхать вӑл, кӗнеке-хаҫат вулама куҫ начар курни кансӗрлет.
Шупашкар хулинчи халӑхӑн социаллӑ ыйтӑвӗсене тивӗҫтеркен комплекслӑ центр психологӗ Лира Саминова каланӑ тӑрӑх, ватӑ ҫынна пурнӑҫ условийӗнчен ытла ҫумра ӑнланакан ҫын пулни паха. Ҫавӑнпа та вӑл асӑннӑ учрежденире пурӑнакан ватӑсемпе тӗлпулусем-калаҫусем ирттерет.
Ватта чунтан хисеплесе калаҫни, ӑна ӑнланнине палӑртни аслӑ ҫулхисене хавхалантарать, пӑлханнине ирттерет, вӗсене хаваслантарать.
Республикӑра Чӑваш автономи облаҫӗ йӗркеленнӗренпе 105 ҫул ҫитнине паллӑ тума хатӗрленеҫҫӗ. Ҫавна май тӗрлӗ мероприяти ирттерме палӑртнӑ.
Кӑҫал «Земля вкуса» гастрономи фестивалӗ пӗрремӗш хут иртӗ. Малтанлӑха палӑртнӑ тӑрӑх, унта 40 регионти производительсем хутшӑнӗҫ. Ҫавӑн пекех «Руҫ ӑстисем», «Раҫҫейӗн симӗс ылтӑнӗ», «Раҫҫей ҫӑлкуҫӗсем», «Раҫҫей чунӗ. Атӑлҫи» фестивальсем иртӗҫ. Ҫырла фестивалӗ те пулӗ.
Аса илтерер: кӑҫал Республика кунӗ Шупашкарта тата Етӗрне округӗнче иртӗ. Етӗрнере уявра хӑмла музейӗ уҫӑлӗ.
+9.3 °C