Чӑваш Енри спортсменка Елена Герасимова юниорсен хушшинче иртнӗ тӗнче ӑмӑртӑвне хутшӑннӑ. Вӑл тӑван тӑрӑхне ылтӑн медальпе таврӑнӗ. Кун пирки ЧР Спорт министерстви пӗлтерет.

Пирӗн ентеш командӑпа нумай енлӗ кӗрешӳре вӑй виҫнӗ. Команда йышӗнче Елена Герасимова, Вика Листунова, Влада Уразова пулнӑ. Вӗсем тӗнче первенствин пӗрремӗш чемпионкисем пулса тӑнӑ.

Палӑртмалла: юниорсен хушшинчи тӗнче ӑмӑртӑвӗ ҫак кунсенче Венгрире иртет.

«Русада» допинга хирӗҫ агентство Чӑваш Енре допинг правилисене пӑснӑ фактсене тупса палӑртнине эпир пӗлтернӗччӗ. Усал хыпар утпа ҫӳрет теҫҫӗ те, ку сӑмах Раҫҫейри информаци агентствисемпе электрон кӑларӑмсем тӑрӑх самантрах сарӑлчӗ.

Чӑваш Ен Элтеперӗ Михаил Игнатьев РБК информаци агентствипе калаҫнӑ чух «Русада» тӗпчевне ӗненмесӗртерех калаҫнӑ. Ҫакна вӑл хӑй нимӗнле тӗпчев материалне те курманнипе сӑлтавланӑ.

Чӑваш Енӗн Спорт министерствинче ӗнер брифинг ирттернӗ. Михаил Богаратов министр «Русада» агенствӑна тӗпчев ирттерме пулӑшассине ӗнентернӗ.

Ӗнер каҫхине Чӑваш Енӗн Сывлӑх сыхлав министертствин сайтӗнче асӑннӑ ведомствӑн спорт медицини енӗпе ӗҫлекен штатра тӑман специалисчӗн Арнольд Карзаковӑн комментарине вырнаҫтарнӑ. Допинг правилисене ҫул ҫитмен ачасем те пӑснӑ тесе РБК ҫырнине вӑл кӑмӑлсӑрланса вуланӑ-мӗн. Вӑл ӗнентернӗ тӑрӑх, Чӑваш Енӗн спорт медицинин врачӗсем ҫамрӑк «олимпиецсен» сывлӑхӗшӗн пӑшӑрханаҫҫӗ, вӗҫӗмех медицина тӗрӗслевӗ ирттереҫҫӗ. Спорт тухтӑрӗсем хӑйсен квалификацине ӳстерсех тӑнине те палӑртнӑ.

Ҫав вӑхӑтрах «Русада» агентствӑн пуҫлӑхӗн ҫумӗ Маргарита Пахноцкая ТАСС информагентствӑна каланӑ тӑрӑх, Чӑваш Енри спорт отраслӗн ертӳҫисемпе тӳре-шари валли планпа пӑхман семинар ирттерсех допинг пирки ӑнлантарса парасшӑн.

Малалла...

«Русада» допинга хирӗҫ агентство Чӑваш Енре допинг правилисене пӑснӑ фактсене тупса палӑртнӑ.

Агентствӑн тӗпчев пайӗ пирӗн республикӑри спорт училищисенчен пӗринче кӑлтӑк пуррине асӑрханӑ. 140 ытла ҫынран ыйтса пӗлнӗ иккен, допинга хирӗҫ правилӑсене пӑханманнине 60 тӗслӗх шута илнӗ.

Допинг йӗркине пӑхӑнманшӑн 33 спортсмен тӗлӗшпе ӗҫ пуҫарма пултараҫҫӗ. Ҫавсен шутӗнче самбистсем виҫҫӗн, велоспорт ӑстисем пиллӗккӗн, биатлонистсем икккӗн, ҫӑмӑл атлетсем вун ҫиччӗн, йӗлтӗрпе чупакансем иккӗн. Кунсӑр пуҫне ҫак йышра спорт гимнасчӗ, боксер, ирӗклӗ майпа кӗрешекен, йӗлтӗрҫӗ пур, ҫӑмӑл атлетика енӗпе тупӑшакан хӑлха илтмен пӗр ҫамрӑк, хускану органне амантнӑ пӗр ҫӑмӑл атлет.

Асӑннӑ спортсменсемпе ӗҫлекен врач тӗлӗшпе вӑхӑтӗнче пуҫиле ӗҫ пуҫарнӑ-мӗн. Тухтӑр преступлени туман тесе пуҫиле ӗҫе каярах чарса лартнӑ.

Чӑваш ҫӗрӗн маттур хӗрӗ, Европа чемпионки Анжелика Сидорова Африкӑра иртнӗ ӑмӑртура палӑрнӑ.

Чӑваш Енӗн Спорт министерствинче пӗлтернӗ тӑрӑх, ҫӗртме уйӑхӗн 16-мӗшӗнче Мароккӑн тӗп хулинче «Бриллиантовая лига» (чӑв. Бриллиант лиги) ҫӑмӑл атлетсен пӗтӗм тӗнчери турнирӗн 6-мӗш тапхӑрӗ иртнӗ. Унта пирӗн республикӑпа Мускав чысне хӳтӗлекен Анжелика Сидорова та хутшӑннӑ.

Шӑчӑпа сикекен хӗр 4 метр та 77 сантиметра ҫӗннӗ. Ҫапла майпа пике 2020 ҫулхи Олимп вӑййине нормативне тултарнӑ. Сӑмах май каласан, ку вӑл — Анжеликӑн ҫак сезонти чи лайӑх кӑтартӑвӗ. Мароккӑн тӗп хулинче, Рабатра, иртнӗ ҫӑмӑл атлетсен пӗтӗм тӗнчери турнирӗн 6-мӗш тапхӑрӗнче Анжелика Сидорова кӗмӗл медале ҫӗнсе илнӗ.

Чӑваш Ен спортсменки ҫӗршывра чи маттурри пулнӑ. Клавдия Афанасьева Раҫҫей чемпионатӗнче 50 ҫухрӑма ытти спортсменран чи малтан парӑнтарнӑ. Вӑл ҫак вӑрӑм дистанцие 3 сехет те 57 минут та 7 ҫеккунтра утса тухнӑ. Унччен, пуш уйӑхӗн 9-мӗшӗнче, кун вӑрӑмӑш дистанцие Китай спортсменки Лю Хун 3 сехет те 59 минут та 15 ҫеккунтра парӑнтарса тӗнче рекордне ҫӗнетнӗ.

Пирӗн ентеш вара хальхине ку рекорда ҫӗнетнӗ. Анчах Пӗтӗм Раҫҫейри ҫӑмӑл атлетика федерацийӗ дисквалификациленӗ май ку рекорда пӑрахӑҫланӑ. Шупашкарти садион тӗнче шайӗнчи сертификаци витӗр тухман-мӗн. Ют ҫӗршыври тӗнче шайлӑ судьясене вара халӗ Раҫҫей турнирӗнче ӗҫлеме чарнӑ.

Чӑваш Енри спортсменсем наци пӗрлештернӗ командине кӗмелли кандидатсен списокне лекнӗ. ЧР Спорт министерстви пӗлтернӗ тӑрӑх, Раҫҫейӗн пӗрлештернӗ командин йышӗнче фристайл енӗпе Лана Прусакова тата Дмитрий Мулендеев хатӗрленме пултарӗҫ. Иккӗшӗн те фристайлӑн икӗ тӗсӗпе – слуп-стайл тата биг-эйре – иртекен ӑмӑртусене хутшӑнас шанчӑк пур.

Ски-кросра вара Полина Сабурова вӑй виҫӗ. Конькипе чупмалли спортпа спорт мастерӗ Тимур Карамов ӑмӑртӑва хутшӑнӗ. Биатлон енӗпе командӑна Иван Степанов лекнӗ.

Палӑртмалла: вӗсем пурте Олимп резервӗсен 2-мӗш спорт шкулӗнче ӑсталӑхне туптаҫҫӗ.

Шупашкарти «Спартак» вӑй-хал культурипе сывлӑха ҫирӗплетмелли комплекс хупӑнать. Тӳрех хӑраса ан ӳкӗр: нумайлӑха мар, икӗ эрнелӗхе ҫеҫ.

«Спартакпа» пӗрлех «Ҫӗнӗ ӑру» тӑрӑллӑ каток та хупӑнӗ. Ку юсав ӗҫӗсем ирттернипе ҫыхӑннӑ: учрежденире хутса ӑшӑтмалли тытӑма опрессовка тӑвӗҫ. Ҫавна май «Спартак» вӑй-хал культурипе сывлӑха ҫирӗплетмелли комплекс ҫӗртме уйӑхӗн 15-мӗшӗнчен пуҫласа 30-мӗшӗччен ӗҫлемӗ.

«Спартак» администрацийӗ ҫынсене ҫапла майпа чӑрмантару тунӑшӑн каҫару ыйтать.

Ҫитес канмалли кунсенче, ҫӗртме уйӑхӗн 15-16-мӗшӗсенче, Шупашкара Раҫҫейри ҫӑмӑл атлетсем пухӑнӗҫ. Ҫав кун пирӗн республикӑра ҫӗршыв шайӗнчи чемпионат тата ӑмӑрту иртӗ.

Хӑвӑрт утакансен тупӑшӑвне Раҫҫейӗн 20 регионӗнчи 150-а яхӑн спортсмен килме кӑмӑл тунӑ. Ӑмӑрту Шупашкарти кӳлмек хӗрринче иртмелле. Хӗрарӑмсен 20 километра ҫӗнмелле, арҫынсен — 50 километра.

Юниор тата ҫамрӑксен ҫулӗсенчи спорстменсем Шупашкарти Олимп стадионӗнче тупӑшӗҫ. Вӗсен 5 тата 10 пин метра утмалла.

Хӑвӑрт утакансен тупӑшӑвӗ иртнӗ май ҫамрӑкраххисем те хӑйсене тӗрӗслеме пултарӗҫ. Вӗсем валли «Юный скороход» (чӑв. Ҫамрӑк хӑвӑрт утакан) ӑмӑрту йӗркелӗҫ. 14-15 ҫулсенчи яшсен 5 пин метра утма тивӗ, хӗрсен — 3 пин метра.

Ҫӗртме уйӑхӗн 15-16-мӗшӗсенче Шупашкарта хӑвӑрт утас енӗпе Раҫҫей чемпионачӗ тата первенстви иртӗ. Чӑваш Ене ҫӗршыври 20 регионти 150 ҫӑмӑл атлет килме палӑртнӑ.

Ӑмӑрту Шупашкарти кӳлмекре иртӗ. Арҫынсем – 50 ҫухрӑм, хӗрарӑмсем 20 ҫухрӑм утӗҫ. Юниорсен тупӑшӑвӗ вара «Олимпийский» стадионта иртӗ. Спортсменсем 5 тата 10 ҫухрӑм утса тухӗҫ.

ЧР Спорт министерстви пӗлтернӗ тӑрӑх, кӑҫал наци первенствипе килӗшӳллӗн регионсен хушшинче «Ҫамрӑк скороход» тупӑшу ирттерме палӑртнӑ. Унта 14-15 ҫулсенчи хӗрсемпе каччӑсем хутшӑнӗҫ, пӗрремӗшӗсем – 3 ҫухрӑм, иккӗмӗшӗсем 5 ҫухрӑм парӑнтарӗҫ.

И.Н.Ульянов ячӗллӗ ЧПУра вӗренекен Лана Прусакова тата Дмитрий Мулендеев Раҫҫейӗн пӗрлештернӗ команди йышӗнче Пӗтӗм тӗнчери Универсиадӑна хутшӑннӑ. Ӑмӑрту Красноярскра иртнӗ. Ун чухне, пушӑн 6-мӗшӗнче, Лана Прусакова слоупстайл дисциплинӑра ылтӑн медаль ҫӗнсе илнӗ.

Маттур спортсменкӑна укҫан хавхалантарма йышӑннӑ. Чӑваш Ен премьер-министрӗ Иван Моторин Лана Прусаковӑна 75 пин тенкӗ преми парасси пирки распоряжени алӑ пуснӑ. Унта палӑртнӑ тӑрӑх, унӑн тренерӗ Никита Васильев та хавхалантарӑва тивӗҫнӗ: 37500 тенкӗ.

Кунсӑр пуҫне ҫу уйӑхӗн 1-мӗшӗнчен пуҫласа 2020 ҫулхи акан 30-мӗшӗччен Лана Прусакова уйӑхсерен 7500 тенкӗ илсе тӑрӗ.