Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

Юман улăпланса тăма

çемçе çĕре ярать тымар.

Юпа пулать те – ак ăна –

тĕрекĕ ун – хыт çĕр кăна!

* * *

Мĕн-ма хирте ӳсмест юман?

Тен, çын касса-хăртса тăрать?

Тен, хăй сив çилсенчен хăрать?

Мĕн-ма хирте ӳсмест юман,

мĕнрен-ши хаклă çав вăрман?

* * *

Юман çĕн пуртăран çăлма ыйтмарĕ.

Леш катăлать, кун вăйĕ – хунавра.

Пĕриншĕн çеç хăйне вăл каçармарĕ:

аври çеç пурттăн пулнă… юманран.

Шăна кăмпи çине пăхса

утатăн –

кĕтсех тăр, ырă кăмпанах

таптатăн.

* * *

– Чылай пухайрăн-и кăмпа, –

тесе çынна чăрмав ан ту.

– Татма тӳр килчĕ сан кампа, –

çак пулĕ тĕрĕсрех ыйту.

* * *

Наркăмăшли

хăех кĕрет алла.

Ыр кăмпине вара

шырамалла.

Кĕçех уйăрăлса каятăп,

Ик халăха пуçа таятăп.

Ӳссе вĕсен арки çинче

Эп куртăм ытарми тĕнче.

Тавах, тавах, тавах!

Чăвашăн арĕ, вырăс хĕрĕ

Мана махтавлă çул пиллерĕ:

Каймарĕ пурнăçăм сая —

Уçма тӳр килчĕ Китая.

Тавах, тавах, тавах!

Чăвашăн, вырăсăн хăвачĕ

Китай ăсне пĕлме май пачĕ.

Вăй пачĕ вăл Раççейĕме

Пуçа мăнаçлăн çĕклеме.

Тавах, тавах, тавах!

Эп Тухăçа мала хуратăп,

Чун илемне унта куратăп.

Кирек хăçан, кирек ăçта

Калас килет ман, тупата:

Мухтав, мухтав, мухтав!

Чăвашăн авалхи тымарĕ

Хунсенченех хускалнă мар-и?

Сăнатап та вĕсен чунне —

Туятăп пĕртăваннине.

Мухтав, мухтав, мухтав!

Эп чăвашран юта тухмарăм,

Ыттисенчен кая хумарăм.

Вăл акă çĕкленет каллех,

Чыс курĕ-ха тĕнчипелех.

Мухтав, мухтав, мухтав!

Малалла

Йăвари пек пурнăçа ирттерчĕ,

кĕчĕ ĕнерхи студент класа.

Ун çине шăп утмăл куç тинкерчĕ,

вăтăр чĕп шимплетрĕ пуçласа.

Çĕр евĕр ӳстеретĕп те илетĕп,

телейĕме пучахăн эп пухам.

Тахçан, чăнах-ши, эпĕ те вилетĕп?

Кăшт шутласа пуç тавралла пăхам.

Хуратăн вăй, çĕннишĕн кĕрешетĕн,

тепри юри такăнтарать сана,

тепри илесшĕн канăçсăр чуна.

Вилме тăшман та, эсĕ те вилетĕн.

Ялан пĕр вĕç.

Анчах та, мур илесшĕ,

этем пулать çĕр пек, пулать тусан.

Пĕри çĕн çăкăр çитерет пулсан,

тепри, чыхăнтарса, чунна илесшĕн.

Пуç тавралла шутларăм, халь пĕлетĕп,

телейĕме

пучахăн эп пухам.

Вилсен

калча пулса тусан пӳлетĕп,

кайран, çĕн çăкăрăн,

пиçсе тухам.

Юратма вĕрентĕм

курайманлăхран,

çын айне пулсан

çĕнтерме вĕрентĕм.

Йывăр чух вĕрентĕм

савăнса кулма,

курайми пулма

тăшманран вĕрентĕм.

Çĕнтерсе çеç мар,

тепĕр чух хăрасчĕ.

Юратса çеç мар,

тарăхса курасчĕ.

Инкекне курасчĕ

кулнине пула,

хам тăшманпала

туса уйăрасчĕ.

Тепри пулсассăн ют çĕре кайсассăн

Пытарĕччĕ йăх-несĕл таврашне.

Чапа тухсассăн, аллăран каçсассăн

Каларăн уççăн ху чăн чăвашне.

Сана ĕçченлăх, çивĕч ăс пилленĕ,

Вĕсем упранă тăлăх ачана.

Эс вĕсене пулах çӳле çĕкленнĕ,

Хăвпа пĕрле çĕклерĕн халăхна.

Асамлăха ăçтан ăнкарнă эсĕ?

Ырлать, мухтать ăсталăхна тĕнче.

Виçелĕх, шайлашу, ачашлăх тĕсĕ

Пĕр тикĕс курăнать çуртусенче.

Çуллахи Сад картипеле эрешĕ —

Çак тĕнчери кĕтретсенчен пĕри.

Карта илемĕн тупсăмĕ мĕнре-ши'

Ăсна килмен-ши чăвашсен тĕрри?

Санра сăн илнĕ Смольнăй мăнастирĕ,

Эсех çĕнетнĕ Петергоф сăнне.

Миçе хутчен-ши Питĕрпурăн ирĕ

Сăнанă эсĕ ыйхă татнине?

Ытти çĕрте те эсĕ йĕр хăварнă:

Ăна пĕлтерĕ Хĕллехи Кермен,

Ĕлккен чиркĕвӳпе мухтанĕ Пярну...

Мĕн чухлĕ çурт сăнне-ши ӳкермен?..

Санра грузин янралĕ чĕрлĕх чĕртнĕ,

Ĕçе вĕрентнĕ Питĕрпур çынни.

Чун-чĕрӳне, тен, лăпланмасăр хĕртнĕ

Малалла

Тĕнчипе пĕр тытăçу пырать.

Вилĕм – чĕрĕлĕх.

Çĕнтерĕ хăшĕ?

Йывăртан шатăртатать Çĕр кăшăль,

кĕрешӳ йӳçет, хаярланать.

Пурнăçра мĕн çĕрнĕ – вилĕм ĕçĕ,

вăй илет вăл ирсĕр чунсенчен.

Эй, çĕнел, йӳçсе çĕнел, тĕнче!

Лапчăт киввине, ун çитнĕ вĕçĕ!

Чĕрĕлĕх – çунса тăран чĕре,

пурнăçпа сывлан пур йывăç-курăк.

Мĕн кивелнĕ –

кирлĕ мар пире,

çĕр çинче йĕрке тăватпăр урăх.

Тытăçу.

Галактика чĕтрет.

Вилĕм – чĕрĕлĕх.

Çĕнтерĕ хăшĕ?

Кĕрешӳ çĕнелчĕ çĕн çĕпрен,

йывăртан шатăртатать Çĕр кăшăль.

Эп вилсен пуçна усса ан ут.

Тупăкрах-ши çĕрĕп? Çук, ку мăшкăл!

Йывăç та пулса тĕнче курмашкăн

вирхĕнсе тухатăп тепĕр хут.

Тус, тăшман та килĕç чыс тумашкăн,

ĕçсе çийĕç, таптĕç йывăçа.

Çакăн хыççăн шăпланса тăмашкăн

йывăр пулĕ сассăр сăвăçа.

Йывăçсем çил майăн вăшăл-вăшăл.

Вилнисем каласшăн пулĕ тем?

Пĕр хĕстерчĕ лартрĕ тупăк-кăшăл –

пĕлтереймĕ шухăшне этем.

Чĕрере вĕрет калас сăмахăм,

пĕлес туртăм та пĕтмен пулас.

Йывăç пек лармашкăн эп ухмах-им,

мĕн шутлатăп – каласа юлас!

Эп вилсен пуçна усса ан ут.

Тупăкрах-ши çĕрĕп? Çук, ку мăшкăл!

Вилнĕ хыççăн çут тĕнче курмашкăн

сăвăпа тухатăп тепĕр хут.

7.08.1971

Пурнăç хумĕ хаяр,

хĕрхенмест никама та.

Пĕр çĕклет вăл çӳле,

шыв айне пĕр перет.

Турпасланĕ карап,

эсĕ çеç пурпĕрех

парăнмасăр ăна

кунĕн-çĕрĕн куматăн.

Йăлма пек путнине

калас çук нимĕнле те.

Кĕрешме пӳрнисем!

Пурăнар урăхла:

тек ан пултăр этем

хум çинчи турпасла,

пурнăç хумĕсене

вăл хăй йĕвенлетĕр!