Виталий Михайлов страницинчен илнӗ сӑнӳкерчӗк

Нестер Янкас ячӗллӗ пӗрлӗх 2025 ҫулшӑн литературӑпа искусство тата культура аталанӑвӗнче палӑрнисене Красноармейски муниципалитет округӗн Нестер Янкас ячӗллӗ преми лауреачӗн ятне парассипе ҫыхӑннӑ сӗнӳсене йышӑнма тытӑнать. ҫакӑн пек пӗлтернӗ пӗрлӗх ертӳҫин ҫумӗ Виталий Михайлов халӑх тетелӗнчи хӑйӗн страницинче.

Ӗҫсене 2026 ҫулхи нарӑс уйӑхӗн 20-мӗшӗччен йышӑнӗҫ. Сӑмах май каласан, Нестер Янкас поэт ҫуралнӑранпа 117 ҫул ҫитет. Уяв ячӗпе Красноармейски Культура ҫуртӗнче лауреатсен пысӑк концерчӗ пулӗ тата ҫӗнӗ лауреатсене чыслӗҫ.

«Кашни ырӑ япала, пултарулӑх хӑйӗн хакне тивӗҫлех. Конкурса иртсе каякан ҫулта литературӑпа искусство тата культура шайӗнче Трак тӑрӑхӗшӗн ырми-канми ӗҫленӗ, вулакансемшӗн, куракансемшӗн уҫӑмлӑ, чун-чӗрене ҫывӑх та пысӑк пӗлтерӗшлӗ сцена ӗҫӗсемпе, юрӑ-кӗвӗсемпе, куравсемпе, кӗнекесемпе, ытти пултарулӑх ӗҫӗсемпе савӑнтарнӑ ентешӗмӗрсем хутшӑнасса шанатпӑр эпир», — тесе хыпарланӑ эпир маларах Виталий Михайлов.

culture.cap.ru сӑнӳкерчӗкӗ

Раштав уйӑхӗн 16-мӗшӗнче Чӑваш академи драма театрӗнче чӑваш театрӗн 6 ӑстин юбилейӗ ячӗпе пуҫтарӑннӑ.

Унта пуҫтарӑннисем Николай Айзман драматурга, куҫаруҫӑна, артиста; Чӑваш Енре театр ӗҫне йӗркеленӗ, театрта 1920-1935-мӗш тата 1937-1940-меш ҫулсенче ӗҫленӗ Кирилл Егорова; Михаил Акимов-Аруй писателе; Иван Илларионов (Иван Мучи) писатель-сатирика, актера; Георгий Зайцев (Тал-Мӑрса) поэт-тӑлмача тата Чӑваш Республикин тава тивӗҫлӗ артистне Игнатий Молодова аса илнӗ.

Чӑваш патшалах гуманитари ӑслӑлӑхӗсен халӑх тетелӗнчи пабликӗнчен илнӗ сӑнӳкерчӗк

Раштав уйӑхӗн 16-мӗшӗнче чӑваш сӑвӑҫи, прозаикӗ, журналисчӗ Любовь Мартьянова ҫуралнӑранпа 75 ҫул ҫитнӗ май Чӑваш Енен Наци вулавӑшӗнче асӑну каҫӗ иртессине эпир унччен пӗлтернӗччӗ-ха.

«Эп чӗртнӗ вучах» асӑну каҫне Сергей Павлов, Арсений Тарасов, Марина Карягина, Светлана Асамат, Улькка Эльмен, Василий Кервен, Ольга Австрийская-Иванова, Александр Ильин тата ытти ҫыравҫа, культурӑпа вӗренӳре ӗҫлекен Надежда Кириллова, Николай Осипов, Леонид Петров, Чӑваш патшалӑх гуманитари институчӗн ӑсчахӗсем Виталий Родионов, Альбина Мышкина, Вера Никифорова, Чӑваш патшалӑх педагогика университечӗн студенчӗсем тата Любовь Васильевнӑн ҫывӑх ҫыннисемпе Галина хӗрӗ хутшӑннӑ.

Асӑну каҫне пухӑннисем Любовь Мартьянова пирки ӑшшӑн аса илсе калаҫнӑ.

«Контактри» сӑн

Шупашкарти кинолог лавккана кайнӑ та ӑнсӑртран вӑрра тытса чарнӑ. Ку полици прапорщикӗпе, ШӖМӗн Кинологи службин инспектор-кинологӗпе Алексей Пятаковпа пулса иртнӗ.

Раштавӑн 15-мӗшӗнче каҫхине вӑл Эгер бульварӗнчи супермаркета кайнӑ. Ӑнсӑртран вӑл хӑйне темлерех тытакан арҫынна асӑрханӑ. Хайхискер ҫӳлӗксем ҫинчи тавара илнӗ те кӗсьене чикнӗ. Кассӑна пырсан вара пӗр ҫӑкӑршӑн кӑна тӳленӗ.

Алексей Пятаков кун пирки лавкка хуралҫине пӗлтернӗ. Вӑл патрульпе пост службин нарячӗ киличчен ҫав арҫынна ниҫта та яман, тытса тӑнӑ.

«Контактри» сӑн

Вӑрнар округӗнчи Уравӑшра пурӑнакан Варвара Гаврилова 104-мӗш ҫуралнӑ кунне паллӑ тунӑ.

Варвара Порфирьевна пурнӑҫ тӑршшӗпе чунне парса ӗҫленӗ, 30 ҫул ытла акушеркӑра вӑй хунӑ, ачасене кун ҫути курма пулӑшнӑ. Халӗ кинемейӗн хӑйӗн ҫемйи пысӑк: ачисем, мӑнукӗсем, кӗҫӗн мӑнукӗсем тата вӗсен ачисем пур. Хальхи вӑхӑтра Варвара Порфирьевнӑна мӑнукӗ Вероника пӑхса пурӑнать.

vk.com/gov_cap_ru сӑнӳкерчӗкӗ

Иван Ермолаев выльӑх тухтӑрӗ «Раҫҫей Федерацийӗн тава тивӗҫлӗ ветеринари врачӗ» хисеплӗ ята тивӗҫнӗ. Хушӑва Раҫҫей Президенчӗ раштав уйӑхӗн 10-мӗшӗнче алӑ пуснӑ.

Иван Егорович Хусанти Н.Э. Бауман ячӗлле ветеринари медицинин институтӗнчен вӗренсе тухнӑ. Выльӑх тухтӑрӗнче 34 ҫул ытла тӑрӑшать, ҫав шутран 20 ҫулне — Вӑрнарти аш-какай комбинатӗнче. Вӑл сысна ҫурисем таса сыва ӳсчӗр тесе тӑрӑшать.

cap.ru сайтри сӑн

Канаш округӗнче пурӑнакан Зоя Малышева 100 ҫулхи юбилейне паллӑ тунӑ. Вӑл – Тӑван ҫӗршывӑн Аслӑ вӑрҫин ветеранӗн тӑлӑх арӑмӗ.

Зоя Васильевна Тутарстанра ҫуралса ӳснӗ. Канаш типографийӗнче 40 ҫул ытла наборщицӑра ӗҫленӗ, «Ӗҫ ветеранӗ» ята тивӗҫнӗ. Халӗ вӑл пӗртӑванӗсен ачисен хӳттинче пурӑнать.

Юбиляра Канаш округӗн пуҫлӑхӗ Валерий Чернов саламланӑ, РФ, Президенчӗн Владимир Путинӑн открыткине парнеленӗ.

cap.ru сайтри сӑн

Ӗнер ЧР Элтеперӗ промышленноҫ тата энергетика министрне палӑртнӑ. Ку тивӗҫе Марат Якушева шанса панӑ.

Вӑл министр тивӗҫӗсене аванӑн 15-мӗшӗнченпе пурнӑҫласа пынӑ. Унччен вӑл, 2009 ҫултанпа, ертӳҫӗ должноҫӗсенче ӗҫленӗ, ҫав шутра Шупашкарти аш-какай комбиначӗн пуҫлӑхӗ те пулнӑ.

Палӑртмалла: ку ведомствӑна 2020 ҫулхи нарӑсра йӗркеленӗ. Хальччен министр нумай пулнӑ, нихӑшӗ те чылай тытӑнса тӑман: Игорь Воропаев (нарӑс, 2020), Александр Доманин (нарӑс-ака, 2020), Сергей Лекарев (ака-авӑн 2020), Евгений Герасимов (авӑн, 2020 – ҫурла 2021), Александр Кондратьев (юпа, 2021 – утӑ, 2023), Борис Марковцов (утӑ, 2023 – ҫу, 2024), Сергей Лекарев (ҫӗртме, 2024 – авӑн, 2025).

Чӑваш наци вулавӑшӗн сӑнӳкерчӗкӗ

Чӑваш Енӗн Наци вулавӑшӗнче раштав уйӑхӗн 16-мӗшӗнче «Эп чӗртнӗ вучах» портрет-каҫ иртӗ. Ӑна Любовь Мартьянова поэт, писатель, журналист ҫуралнӑранпа 75 ҫул ҫитнине халаллӗҫ.

Мероприятие чӑваш писателӗсем, журналистсем, поэтӑн пултарулӑхне хаклакансем пуҫтарӑнӗҫ. Вӗсем поэтӑн пултарулӑхне, хӑйне евӗр чӗлхине сӳтсе явӗҫ.

Сӑмах май каласан, композиторсем Любовь Мартьянова сӑввисемпе юрӑсем кӗвӗленӗ: «Ан ятла», «Аса ил», «Хура тутӑр хурлӑн ӳкрӗ урайне» (композиторӗ — В. Романов); «Кӗрхи юрӑ» (композиторӗ — Ю. Шепилова) тата ыттисене.

Владимир Тяптушкин архивӗнчи сӑн

Чӑваш Енре ҫуралса ӳснӗ, халӗ паллӑ актер пулса тӑнӑ Владимир Тяптушкин «Кто хочет стать миллионером?» кӑларӑма хутшӑннӑ. Кӗҫех чӑваш актерне телевизорпа ҫак кӑларӑмра кӑтартӗҫ.

Палӑртар: Владимир Тяптушкин Елчӗк районӗнчи Аслӑ Таяпа ялӗнче ҫуралнӑ, «Ландыши» сериалта тата ытти кинопроектра ӳкерӗннӗ.

«Вӑйӑ кӑсӑклӑ пулчӗ. Чылай калаҫрӑмӑр, тӑраниччен култӑмӑр. Кӑларӑма часах эфирта кӑтартӗҫ»,— тесе ҫырнӑ артист хӑйӗн телеграм-каналӗнче.