cap.ru сӑнӳкерчӗкӗ

Шупашкар районӗн тӗп пульницин поликлиники ҫӗнелнӗ хыҫҫӑн уҫӑлнӑ. Ку ӗҫе пӗлтӗр раштав уйӑхӗнчех вӗҫлемелле пулнӑ-ха, анчах УФАСа ҫӑхав ҫитнипе срока каярах куҫарма тивнӗ.

Поликлиника тӑррине, фасадне улӑштарнӑ, электросете, вентиляци тытӑмне ҫӗнетнӗ. Шалта та улшӑнусем пулнӑ: кашни уйрӑма урӑхла тӗспе илемлетнӗ. Сӗтел-пукана та йӑлтах улӑштарнӑ. Поликлиникӑна хӑтлӑх кӗртес тесе ытти ӗҫе те пурнӑҫланӑ.

Ку ӗҫсене «Стройремсервис» тулли мар яваплӑ общество 98 миллион тенкӗпе тунӑ.

Йӗпреҫ районӗнче шар курнӑ ҫуртсем

Республикӑн кӑнтӑр районӗсенче паян вӑйлӑ ҫил алхаснӑ. Ҫил-тӑвӑла пула ҫуртсем тӑррисӗр юлнӑ, хӑш-пӗр ялта ҫутӑ пӗтнӗ.

Уйрӑмах пысӑк сӑтӑр ҫил Йӗпреҫ районӗнчи Хумри Ишекре тунӑ — кунта темиҫе ҫурт тӑррисене тӗппипех вӗҫтерсе кайнӑ, хуралтӑ ҫиттийӗсене сӳсе антарнӑ. Яла кӗнӗ вырӑнта вырнаҫтарнӑ паллӑ та вӑйлӑ ҫиле чӑтайман — тӳнсе кайнӑ.

Комсомольски районӗнчи Урмаелте те вӑйлӑ ҫил сӑтӑр тунӑ — кунта, сӑмахран, шкул тӑррин пӗр пайӗ хӑйпӑннӑ. Ҫавӑн пекех вӑйлӑ ҫиле пула ялта пушар та тухнӑ.

Ҫурҫӗрти районсенче те ҫанталӑк хуҫа кам иккенне кӑтартнӑ. Муркаш районӗнчи Сорӑм Панклинче пысӑк пӑр ҫунӑ. Шупашкар районӗнчи Атайкассинче те 2-3 см пысӑкӑш пӑр ҫуса кайнӑ.

reporter-crimea.ru сайтри сӑн

Ҫулталӑк пуҫланнӑранпа Чӑваш Енре 257 ҫын ятне улӑштарнӑ. Кун пирки Юстици ӗҫӗсен патшалӑх служби пӗлтерет.

Чылай чухне ҫынсем ятне тӗпрен мар, кӑштах улӑштарма килеҫҫӗ. Тӗслӗхрен, Артем – Артём, Ирина – Ира, Дмитрий – Димитрий.

Хӑшӗ-пӗри ячӗпе хушамачӗ янӑраманнипе ЗАГСа пырса ӑна урӑхла ҫыртарать. Кӑҫал ят улӑштарнисен йышӗнче Алюна, Доминика, Арослан, Ирен, Мирра пур.

kuzbass-today.ru сӑнӳкерчӗкӗ

Муркаш районӗнчи пӗр ялта пурӑнакан 58 ҫулти арҫын пӗр кунхине 70 пин тенкӗ укҫа ҫухалнине асӑрханӑ. Сывлӑхӗ енчен хавшак тӑванӗпе пурӑнаканскер хӑйсем патне килсе ҫӳрекен кӳршине шанман, анчах лешӗ укҫа тытнине туннӑ.

Полицейскисем лавккасенчи сутуҫӑсемпе калаҫнӑ. Вӗсем хӑйсен ял ҫынни унччен укҫа ҫуккипе нушаланнине, юлашки вӑхӑтра вӑл пысӑк купюрӑпа апат-ҫимӗҫ туянма пуҫланине пӗлтернӗ. Ҫав этем кӳршӗллӗ районсене юлашки уйӑхра таксипе темиҫе хутчен кайса килнӗ иккен.

Унччен судпа айӑпланнӑ 50 ҫулти арҫын кил хуҫисем ҫук чухне чӳречерен кӗрсе укҫа вӑрланӑ иккен.

mk103.med.cap.ru сӑнӳкерчӗкӗ

Шупашкар хулинче пурӑнакан 71 ҫулти ватта сӑвӑс сӑхнӑ. Васкавлӑ пулӑшу тухтӑрӗсем ҫитнӗ ҫӗре арҫын аптӑраса ӳкнӗ.

Хайхи мӑн сӑпса ватӑ ҫынна уҫӑлма тухсан, ҫӗртме уйӑхӗн 23-мӗшӗнче, пуҫӗнчен сӑхнӑ. Сӑвӑс сӑхни сывлӑха сиен кӳме пултарнине пӗлнӗрен арҫыннӑн арӑмӗ васкавлӑ пулӑшу тухтӑрӗсене чӗнсе илнӗ.

Вырӑна фельдшерсем ҫитнӗ ҫӗре пациент хӑйне япӑх туйнӑ. Сывлӑш ҫулӗсем шыҫса ларнӑран вӑл сывлӑш ҫитменнипе, пуҫ ҫаврӑннипе, ӑш пӑтраннипе, вӑй ҫуккипе нушаланнӑ. Арҫыннӑн анафилактика шокӗ пуҫланнӑ.

Фельдшерсем вырӑна реанимаци бригадине васкавлӑн чӗнсе илнӗ, хӑйсем вара пирвайхи пулӑшу кӳнӗ.

21.mchs.gov.ru сӑнӳкерчӗкӗ

Шупашкарти Совхоз урамӗнче (вӑл Ҫӗнӗ Лапсар посёлокӗнче) пушар тухнӑ. Инкекре 62 ҫулти арҫыннӑн тата унӑн 37 ҫулти хӗрӗн пурнӑҫӗ татӑлнӑ.

Совхоз урамӗнчи 25-мӗш ҫуртри виҫҫӗмӗш хутри икӗ пӳлӗмлӗ хваттер ҫуннӑ. Кил хуҫисемсӗр пуҫне тата виҫӗ ҫын шар курнӑ. Вӗсем — асӑннӑ хваттертен ҫӳллӗрех хутсенче пурӑнакансем. Пиллӗк хутлӑ ҫуртри тата 3 ҫынна ҫӑлавҫӑсем хулари Васкавлӑ медицина пулӑшӑвӗн больницин токсикологи уйрӑмне ӑсатнӑ.

Пушара сӳнтерме 3 машина пырса ҫитнӗ. «Хӗрлӗ автана» вӗсем ҫур сехетре лӑплантарнӑ.

Инкек сӑлтавне сӑнавлӑ пушар лабораторийӗн эксперчӗсем палӑртӗҫ.

Канаш хулинчи Разин урамӗнчи лавккана пӗр ҫамрӑк ӗнер, ҫӗртме уйӑхӗн 26-мӗшӗнче, тӑр кӑнтӑрла ҫаратма тӑнӑ. Вӑл лавккара ӗҫлекен 23 ҫулти хӗре тапӑннӑ, магазинти укҫана ҫаратма ӗмӗтленнӗ. Хӗр хытӑ кӑшкӑрма тытӑннӑ. Хӗр шӑв-шав ҫӗклесен каччӑ 188 тенкӗ тӑракан сигарет ярса илнӗ те лавккаран тухса тарнӑ. Хӑй вӑл медицина маскипе пулнӑ.

Пӑтӑрмах пирки йӗрке хуралҫисене пӗлтерсен каччӑна часах тытса чарнӑ.

Каччӑ лавккана ҫаратма ятарласа хатӗрленнӗ иккен: сухалне хырнӑ; тум туяннӑ, ӑна лавккаран тухсан тӗмсем хушшине персе хӑварнӑ.

Ҫамрӑкскер унччен те судпа айӑпланнӑскер иккен. Хай вӑл Тӗмен облаҫӗнчен.

www.chuvbook.ru сӑнӳкерчӗкӗ

Чӑваш кӗнеке издательствинче «Чуваши и булгары по данным Ахмеда ибн Фадлана» ятлӑ кӗнеке пичетленсе тухнӑ. Унта А.П. Ковалевский тӗпчевҫӗн «Чуваши и булгары по данным Ахмеда ибн Фадлана», «О степени достоверности Ибн Фадлана» ӗҫӗсем тата «Формы конечного «н» «з(р)» в арабской графике VII–XIII вв.», «Путешествие Ибн Фадлана на Волгу» материалсем кӗнӗ.

«IX ӗмӗр пуҫламӑшӗнче Хӗвелтухӑҫ Европӑра ҫӗнӗ патшалӑх — Атӑлҫи Пӑлхар — йӗркеленме пуҫланӑ. 895 ҫулта Алмуш пӑлхарсен уйрӑмах вӑйлӑ ӑрӑвне ертсе пыма тытӑннӑ», — историе аса илтерет наука кӑларӑмӗн редакторӗ Владимир Степанов.

Кӗнеке тиражӗ – 1000 экземпляр.

cap.ru сӑнӳкерчӗкӗ

Чӑваш Енре тепӗр ҫамрӑк Патшалӑхӑн пӗрлехи экзаменӗсенче 2 предметпа 200 балл пухнӑ. Кун пирки ЧР Вӗренӳ министерстви пӗлтерет.

Вӑл Ҫӗнӗ Шупашкарти 18-мӗш лицейра ӑс пухакан Мария Пульхеровская. Мария биологипе тата химипе экзамен тытса иккӗшӗнпе те 100-шер балл пухнӑ.

Аса илтерер: ун пек тепӗр маттур хӗр – Екатерина Ейкова. Шупашкарти 2-мӗш лицейра ӑс пухнӑскер вырӑс чӗлхипе тата химипе 100-шер балл пухнӑ.

auto.rambler.ru сайтри сӑн

Шупашкарта 42 ҫулти хӗрарӑм ирхи 5 сехетре 6 ҫулти хӗрӗ ҫухални пирки полицие пӗлтернӗ. Ача ҫӗрле ҫухалнӑ. Амӑшӗ ӑна ирччен хӑй шыранине ӗнентернӗ.

Йӗрке хуралҫисем пӗтӗм службӑна ура ҫине тӑратнӑ. Малтан вӗсем киле кайса тӗрӗслеме шутланӑ. Чӑнах та, унта ача ҫывӑрнине чӳречерен курнӑ. Мӗн пулса иртнӗ-ха ку ҫемьере?

Каҫхине хӗрарӑм тусӗсемпе каннӑ иккен. Хӗрне те пӗрле илнӗ. Пӗчӗкскер ывӑнса ҫитнӗ те хӑйех киле кайма шутланӑ. Тӗлӗнмелле те, каҫхине ҫулпа утакан ача никама та тӗлӗнтермен, никам та чарӑнса унран ӑҫта кайни пирки ыйтман.

Палӑртмалла: ҫак хӗрарӑм унччен те профучетра тӑнӑ.