gov.cap.ru сӑнӳкерчӗкӗ

К.В. Иванов ячӗллӗ Чӑваш патшалӑх академи драма театрӗн артистки, режиссёрӗ Наталья Сергеева «Чӑваш Республикин халӑх артисчӗ» ята тивӗҫнӗ. Хушӑва республика Элтеперӗ Олег Николаев ӗнер, утӑ уйӑхӗн 28-мӗшӗнче, алӑ пуснӑ.

Наталья Сергеева Шупашкар районӗнчи Шинер Тӑрӑн ялӗнче 1971 ҫулхи юпа уйӑхӗн 4-мӗшӗнче ҫуралнӑ. Ашшӗ — инженер-механик, амӑшӗ — медсестра. Вӑл вара, Наталья, пачах урӑх ҫулпа каяс тенӗ. Мускаври Щепикин ячӗллӗ театр училищине вӗренме кӗнӗ.

Темиҫе ҫул каяллахи интервьюра Наталья Алексеевна пӗлтернӗ тӑрӑх, вӑл — ҫемьеллӗ, икӗ ывӑл амӑшӗ. Шупашкар урамӗсенче хӑйне ҫынсем палласа илнине те пытарман.

Яндекс.дзен сайтри сӑн

Шупашарта пурӑнакан 59 ҫулти хӗрарӑм такамсем ун ячӗпе кредит илеҫҫӗ тесе хӑранӑ та ултавҫӑсене 2 миллион та 130 пин тенкӗ куҫарса панӑ. Кун хыҫҫӑн вӑл полицие кайса пулӑшу ыйтнӑ.

Ӗҫ-пуҫ акӑ мӗнле пулса иртнӗ. Ун патне палламан ҫын шӑнкӑравланӑ, вӑл банк ӗҫченӗ имӗш. Хайхискер такам ун ячӗпе кредит илме хӑтланнине пӗлтернӗ. Ҫак ҫын ӑна укҫана хӑрушсӑр счет ҫине куҫарма сӗннӗ. Ҫапла Шупашкар хӗрарӑмӗ тӗрлӗ телефон номерӗсемпе 2 миллион ытла тенкӗ куҫарса панӑ.

Халӗ полици ултавҫӑсене шырать.

Чӑваш Енӗн Наци музейӗ республикӑри тата чӑваш диаспорисенчи ал ӑстисен «Живи, узор чувашский» (чӑв. Пурӑн, чӑваш тӗрри) конкурсне ирттерессине пӗлтернӗ. Кӑҫалхи пултарулӑх ӑмӑртӑвӗн теми – «Салтак тутри».

Конкурс утӑ уйӑхӗн 25-мӗшӗнче пуҫланнӑ, вӑл юпа уйӑхӗн 20-мӗшӗнче вӗҫленӗ. Унта хутшӑнакансем салтак тутрине тӗрлӗҫ.

Хатӗр ӗҫсене авӑн уйӑхӗн 15-мӗшӗнчен пуҫласа юпа уйӑхӗн 15-мӗшӗччен Шупашкарти чӑваш тӗррин музейӗнче йышӑнӗҫ. Ҫӗнтерӳҫӗсене Чӑваш тӗррин кунӗнче чыслӗҫ.

Инкелӗ лару-тӑру министерстви тунӑ сӑн

Ӗнер каҫхине, 21 сехетсенче, Шупашкарта Трактор тӑвакансен проспектӗнчи 73-мӗш ҫуртри 5 пӳлӗмлӗ хваттерӗн балконӗ ҫунма тытӑннӑ. Ҫакна иртен-ҫӳрен видео ӳкернӗ.

Инкеклӗ лару-тӑру министерстви пӗлтернӗ тӑрӑх, 3 тӑваткал метр ҫинче алхасакан ҫулӑма кил хуҫи хӑйех сӳнтерме пултарнӑ. Анчах хӑй пиҫсе кайнӑ: кӗлетки, ури, алли сиенленнӗ. Ӑна пульницӑна илсе ҫитернӗ.

Ӗнер Патӑрьел районӗнчи Ыхраҫырми ялӗнче те пушар пулнӑ. Унта ҫулӑм пӗр ҫурта сиенлетнӗ.

cap.ru сӑнӳкерчӗкӗ

99 ҫулти кинемей килте ӑнсӑртран майсӑр ӳкнӗ. Унӑн пӗҫӗ шӑмми, аяк пӗрчисем хуҫӑлнӑ, суранланнӑ вырӑнсем пулнӑ.

Чӗрепе юн тымарӗсен тытӑмӗнче кӑлтӑксем сиксе тухма пултарнӑран тухтӑрсем операцие пӗр тӑхтамасӑр тумаллине палӑртнӑ. Хулан 1-мӗш клиника пульницин 2-мӗш травматологи уйрӑмӗн заведующийӗ Алексей Панасенко тата Никита Максимов травматолог-ортопед кинемее тӗплӗн тӗрӗсленӗ. Операци ӑнӑҫлӑ иртнӗ.

Халӗ 99 ҫулти кинемей вырӑн ҫинчен тӑрать, ятарлӑ хатӗрпе утаять. Анчах хальлӗхе аяк пӗрчи хуҫӑлнӑран утнӑ чухне вӑл кукӑрӑлать.

Парк, сквер е урам ятне Варнава митрополит ятне парасшӑн. Хальлӗхе хӑшне парассине палӑртман. Ҫавна май «Уҫӑ хула» порталта сасӑлав иртет.

Шупашкар хула администрацийӗ пӗлтернӗ тӑрӑх, вӗсем патне пӗр ҫӗнӗ урама, парка е сквера Варнава митрополит ятне парасси пирки сӗнӳ килнӗ. Варнава Владыка /Кедров Владимир Викторович/ - Шупашкарӑн хисеплӗ ҫынни, Шупашкар тата Чӑваш Ен митрополичӗ. Митрополие вӑл 1976 ҫултан пуҫласа хӑй виличчен, 2020 ҫулхи ҫӗртмен 1-мӗшӗччен, ертсе пынӑ. Ҫав тапхӑрта 7 мӑнастире ҫӗнетнӗ, 210 прихут уҫӑлнӑ, Шупашкарти тӗн училищи ӗҫлеме пуҫланӑ.

Ӗҫлев тата социаллӑ хӳтлӗх министрӗ Алена Елизарова хӑйӗн ӗмӗтне пурнӑҫланӑ. Вӑл Парашютистсен кунӗ умӗн /утӑ уйӑхӗн 26-мӗшӗнче паллӑ тӑваҫҫӗ/ Шупашкарти аэропортра парашютпа сикнӗ.

Министр папашютпа сикнӗ чухне хӑранине, анчах ҫав вӑхӑтрах ӑна савӑнӑҫ, хӗпӗртӳ туйӑмӗ ярса илнине палӑртнӑ.

Сӑмах май, Алена Елизарова министр тивӗҫӗсене 2020 ҫулхи нарӑс уйӑхӗнченпе пурнӑҫлать.

https://culture.cap.ru сӑнӳкерчӗкӗ

Чӑваш патшалӑх культурӑпа ӳнер институчӗ Ача-пӑчан ӳнер шкулне уҫать. Унта шӑпӑрлансем 4 ҫултанах хореографие, вокала, актер ӑсталӑхне, прикладной ӳнерне вӗренме тытӑнӗҫ. Вӗсемпе аслӑ шкулӑн чи лайӑх преподавателӗсем ӗҫлӗҫ.

Институт ҫумӗнче халӗ те пултарулӑх студийӗсем ӗҫлеҫҫӗ. Ҫӗнӗ вӗренӳ ҫулӗнчен вӗсене Ача-пӑчан ӳнер шкулӗ тавра пӗрлештерӗҫ.

Унта вӗренме кӗрес текенсем ҫак енсенчен пӗрне суйлама пултарӗҫ: «Attitude» классика балечӗн шкул-студийӗ, Театр ӳнерӗн студийӗ, «Виктория» вокал ӳнерӗн студийӗ, «Эткер — наследие» декораципе прикладной ӳнер студийӗ, «Сингл» хальхи вӑхӑтри юрӑпа музыка аталанӑвӗн студийӗ. Вӗреннӗшӗн укҫа тӳлемелле.

chuvashia.sledcom.ru сӑнӳкерчӗкӗ

2020 ҫулхи авӑн уйӑхӗн 4-мӗшӗнче Канашри 48 ҫулти арҫын икӗ ҫамрӑка хӑйӗн хваттерне тара панӑ. Тепӗр кунхине ирхи 1 сехет тӗлӗнче ун патне кӳршисем шӑнкӑравланӑ, хваттерте питӗ шавлаҫҫӗ тесе евитленӗ. Хваттер хуҫи ҫамрӑксем патне шӑнкӑравланӑ, анчах лешсем телефона тытман. Ҫавӑн хыҫҫӑн арҫын хӑйӗн арӑмӗпе ҫав хваттере ҫул тытнӑ. Каччӑсемпе хваттер хуҫи хирӗҫсе кайнӑ. Ӳсӗр ҫамрӑк 48 ҫулти арҫынпа ҫапӑҫма пуҫланӑ. Ӑна вӑл 4 хутран кая мар чышкӑпа ҫапнӑ, 1 хутчен кӗленчепе пуҫӗнчен кӗрӗслетнӗ.

Кил хуҫи пуҫтахран тарса балкон ҫине тухнӑ. Унта каччӑ арҫынна уҫӑ чӳречерен тӗксе янӑ. Лешӗ ӳкес мар тесе балкон чӳречин раминчен ярса илнӗ. Анчах каччӑ ӑна аллинчен кӗленчепе ҫапма тытӑннӑ.

Арҫын виҫҫӗмӗш хутран персе аннӑ, анчах ӑна вӑхӑтра пулӑшнине кура вӑл чӗрӗ юлнӑ.

Йӗпреҫ районӗнчи 19 ҫулти каччӑ тӗлӗшпе ҫынна вӗлерме тӑнӑ тесе пуҫарнӑ пуҫиле ӗҫе халӗ суда ярса панӑ.

traveltimes.ru сӑнӳкерчӗкӗ

Шупашкарти ҫамрӑк лавккари телефона укҫа тӳлемесӗр йӑтса тухса кайнӑ. Халӗ каччӑ тӗлӗшпе пуҫиле ӗҫ пуҫарнӑ.

Каччӑ 90 пине яхӑн тенкӗ тӑракан телефона интернет урлӑ саккас парса туянма шухӑш тытнӑ. Хаклӑ гаджет интернет-лавккан тавар паракан пунктне ҫитнӗ. Йӗрке тӑрӑх, ҫын малтан тавар илет, унтан уншӑн укҫа тӳлет. Каччӑ суту-илӳ йӗркин пӗр пайне пӑхӑннӑ, анчах иккӗмӗшне — ҫук. Вӑл телефоншӑн укҫа тӳлемен — тавара илсе тухса кайнӑ.

Телефон ҫухалнӑ тесе йӗрке хуралҫисене пӗлтернӗ хыҫҫӑн пакунлисем каччӑна шырама тытӑннӑ, ӑна тупса палӑртнӑ хыҫҫӑн ун тӗлӗшпе пуҫиле ӗҫ пуҫарнӑ.