cheb-live.ru сайтри сӑн

Республикӑра ейӳне хатӗрленеҫҫӗ. Лару-тӑру йывӑрлансан 17 муниципплитетра ейӳ сарӑлма пултарать. Вӗсенче 1,5 пин ҫуртра 3,5 пин ытла ҫын пурӑнать.

Хӑрушлӑх кӑларса тӑратма пултаракан вырӑнсенчен чи пӗлтерӗшли - Улатӑр.

Ҫуркуннене кӗтсе илнӗ май ҫак 17 районта ейӳпе кӗрешмелли комисси йӗркеленӗ, мероприятисен планне хатӗрленӗ. Юханшывсенчи шыв шайне оперативлӑ майпа тӗрӗслесе тӑракан 5 стационарлӑ гидропост пулӗ.

cap.ru сӑнӳкерчӗкӗ

Паян Шупашкарта "Ҫӗрулми" курав ӗҫлеме пуҫланӑ. Вӑл "Каскад" суту-илӳ центрӗнче вырнаҫнӑ.

Унтах ӑслӑлӑхпа практика конференцине ирттерме, тӗрлӗ сорт ҫӗрулмин дегустацине тума, вӑрлӑх сутма палӑртнӑ.

Куравра ҫӗрулмисӗр пуҫне пыл, чей, хунав тата ыттине туянма пулать. Ҫӗрулмин ҫак сорчӗсене сутаҫҫӗ: "Аван", "Вымпел", "Бельмонда", "Бернина", "Бонус", "Верди", "Винета", "Гала", "Гулливер", "Жуковский ранний", "Ирбитский", "Королева Анна", "Коломба", "Колетте", "Прайм", "Ред Скарлетт", "Ред Леди Ривьера", "Родрига", "Розара", "Удача" тата ыттисем.

Пӗлтӗр раштав уйӑхӗнче республикӑра вӑтам ӗҫ укҫи 56 пин тенкӗпе танлашнӑ. Кун пирки Чӑвашстат пӗлтерет.

Ку, пӗлтӗрхи чӳк уйӑхӗнчи шалупа танлаштарсан, 32,1 процент пысӑкрах. 2021 ҫулхи раштав уйӑхӗпе танлаштарсан вара, 15,5 процент ытларах ку. Ун чухне республикӑри вӑтам шалу 35798,6 тенкӗпе танлашнӑ.

"Про Город" сайтри сӑн

Кӳкеҫре йывӑр тиевлӗ машина аварие лекнӗ. Вӑл хӑвӑрт хыпса илекен шӗвек илсе пынӑ.

Ку паян 11 сехет те 50 минутра пулнӑ. «Про Город» хаҫата халӑх корреспонденчӗ пӗлтернӗ тӑрӑх, йывӑр тиевлӗ машина тепӗр транспортпа ҫапӑнас мар тесе кювета тухса кайнӑ.

Машинӑн пички кювета чӑмса картана лапчӑтнӑ. Юрать, техногенлӑ инкек пулман.

"Про Город" сайтӗнчи сӑн

Общество транспортӗнче билет хакӗ ӳсесси пирки унта та кунта калаҫни илтӗнкелет. Ӗнер Шупашкартан Ҫӗнӗ Шупашкара ҫӳрекен маршрутсем ҫинче пушӑн 10-мӗшӗнчен хаксем ӳсесси пирки пӗлтерӳсем курӑнма пуҫланӑ.

Унта ҫырнӑ тӑрӑх, карттӑпа тӳлесен билет 37 тенкӗ пулӗ, карттӑсӑр - 40 тенкӗ. Хальхи хаксем вара ҫапларах: карттӑпа тӳлесен билет 34 тенке кайса ларать, унсӑр - 37 тенке.

pravdapfo.ru сӑнӳкерчӗкӗ

Етӗрнери темиҫе предприятие ҫывӑх вӑхӑтра юсаса ҫӗнетме палӑртнӑ.

«Ядринмолоко» предприятире кӑҫал тӑпӑрчӑ хутаҫа тултармалли оборудовани туянма палӑртнӑ. Проект хакӗ — 27 миллион тенкӗ. 2023-2024 ҫулсенче сӗт тата сӗтрен тунӑ продукцие ПЭТ-кӗленчене тултармалли лини вырнаҫтарасшӑн. Ҫав ӗҫ хакӗ 450 миллион тенке кайса ларӗ.

Спирт заводӗнче ҫӗнӗ цех тата лини хута ярасшӑн. Ӗҫе 2023-2024 ҫулсенче пурнӑҫласшӑн.

Ҫӑкӑр тата кирпӗч завочӗсенче, аш-какай комбиначӗсенче ӗҫе юсаса ҫӗнетме палӑртнӑ.

"Контактри" сӑнӳкерчӗк

Ҫӗрпӳ районӗнчи 50 ҫулти арҫын йӗлтӗр ҫине тӑнӑ та вӑрмана хӑйӗн утарне кайнӑ. Ҫул ҫинче вӑл хӑйне япӑх туйма пуҫланӑ: вӑйӗ пӗтнӗ, тӑнне ҫухатма пуҫланӑ. Юрать-ха, вӑл тӑванӗн ачи патне шӑнкӑравласа ӗлкӗрнӗ. Лешӗ вара васкавлӑ медпулӑшу чӗннӗ.

Медиксен бригади, Ирина Морозова тата Леонид Петров, водительпе Николай Ивановпа вырӑна тухнӑ. Вӗсен машини, паллах, вӑрмана кӗреймен. Тухтӑрсем йӗлтӗр йӗрӗпе ҫуран утнӑ. Кӗҫех вӗсем патне трактор ҫитнӗ. Ӑна вырӑнти администраци пуҫлӑхӗ диспетчер ыйтнипе янӑ.

Тракторист тухтӑрсене пациентпа пӗрле васкавлӑ медпулӑшу машини патне илсе ҫитернӗ. Унта ӑна медпулӑшу панӑ. Сывлӑхӗ кӑшт йӗркеленсен пациента Шупашкарти кардиодиспансера илсе ҫитернӗ.

cap.ru сайтри сӑн

Чӑваш Енре «Халӑх учителӗ» ята ҫирӗплетесшӗн. Хушу проектне Элтепер администрацийӗ хатӗрленӗ.

Проектра палӑртнӑ тӑрӑх, «Халӑх учителӗ» ята ҫулталӑкра пӗрре, Вӗрентекен кунӗнче, парасшӑн. Ҫак ята вӗренӳ тата педагогика ӗҫӗн пӗлтерӗшне, вӗрентекенсен ҫитӗнӗвӗсене палӑртас тӗллевпе пама пуҫласшӑн.

Пуш уйӑхӗ пире ӑшӑ ҫанталӑкпа савӑнтарӗ-и? Синоптиксем пӗлтернӗ тӑрӑх, чылай чухне атмосфера пусӑмӗ пӗчӗк пулӗ, ҫил ҫурҫӗртен вӗрӗ.

Ҫак кунсенче каҫхине сывлӑш температури 15-17 градусчен сивӗнӗ. Уйӑхӑн пӗрремӗш ҫурринче сивӗ ҫанталӑк тӑрӗ. Иккӗмӗш ҫурри нормӑпа килӗшӳллӗн пулӗ. Ҫапах юр та, ҫумӑр та ҫукалӗ. Иккӗмӗш ҫурринче юр е ҫумӑр нумай ҫавӗ. Кӑнтӑрла терометр 5-10 градус ӑшӑ кӑтартӗ.

Синоптиксем палӑртнӑ тӑрӑх, ҫуркунне ир килмӗ. Пуш уйӑхӗн вӗҫӗнче е ака пуҫламӑшӗнче тин ҫуркунне хуҫаланма пуҫлӗ.

Дискриминаципе кӗрешмелли кунӑн логотипӗ. Ҫӑлкуҫ: Википеди

Паян Пӗрлешӳллӗ нацисен организацийӗ йӗркеленӗ «Дискриминаципе кӗрешмелли куна» палӑртаҫҫӗ. Ӑна кашни ҫул пуш уйӑхӗн 1-мӗшӗнче ирттерме 2014 ҫулта йышӑннӑ.

«Дискриминаци вӑл — ҫын прависене пӑсни, ун пирки илтмӗш пулмалла мар. Пурин те хисеплӗ, пурнӑҫа тивӗҫлӗ шайра ирттерме май пулмалла», — тенӗ хӑй вӑхӑтӗнче ПНО-н 8-мӗш тӗп секретарӗ Пан Ги Мун.

ПНО-ра палӑртнӑ тӑрӑх тӗнчери халӑхӑн 70% вӑл е ку енчен хӑйсен правине пӑснипе тӗл пулать. Пурнӑҫра тӗн тӗлӗшӗпе ирӗклӗхе пӑсни, вӑл е ку наци тӗлӗшӗпе, арлӑх енӗпе, тата ытти тӗлӗшпе ҫын правине пӑсни час-часах тӗл пулать. Паянхи кун Раҫҫей Федерацийӗнче те ятарлӑ ҫар операцине ирттернӗ май ҫынсен правине ытларах та ытларах пӑсма пуҫларӗҫ. Чӑваш чӗлхипе усӑ курассине те ҫултан ҫул вӑйлӑрах та вӑйлӑрах хӗсеҫҫӗ — Чӑваш Республикинче патшалӑх чӗлхи шайӗнчи чӗлхипе усӑ курманни вӑл Раҫҫей Федерацийӗнче патшалӑх чӗлхи шайӗнче пулманнипе сахал мар сӑлтавласа тӳрре тухаҫҫӗ. «Пурне те ӑнланмалла» пултӑр тесе те чӗлхене сахал мар хӗсеҫҫӗ.