ЧР патшалӑх ветеринари службин ертӳҫи Константин Викторов ӗҫрен хӑйӗн ирӗкӗпе кайнӑ. Ку должноҫре вӑл шӑп та лӑп 3 ҫул ӗҫленӗ.

Константин Викторов ку пукана 2020 ҫулхи нарӑс уй ӑхӗнче йышӑннӑ. Унччен вӑл Шупашкарти кайӑк-кӗшӗк хапрӑкӗнче, ветеринари тата фитосанитари тӗрӗслевӗн федераци службин управленийӗнче ӗҫленӗ.

Константин Викторов ӗҫрен каясси пирки паян влаҫ органӗсен порталӗнче хушу тухнӑ.

cap.ru сӑнӳкерчӗкӗ. Михаил Наташкин мӑшӑрӗпе.

Патӑрьел районӗнчи Куславкка ялӗнче пурӑнакан ветеран Михаил Наташкин ҫак кунсенче 102-мӗш ҫуралнӑ кунне паллӑ тунӑ.

Михаил Тимофеевич ҫак районтах, Ҫӗнӗ Ахпӳрт ялӗнче, 1921 ҫулхи нарӑсӑн 25-мӗшӗнче ҫуралнӑ. 1942 ҫулхи ака уйӑхӗн 17-мӗшӗнче ун патне вӑрҫа кайма повестка килнӗ. Ленинград ҫывӑхӗнчи ҫапӑҫура вӑл аманнӑ. Госпитальте сипленсен каллех фронта таврӑннӑ.

Михаил Наташкин Украина тата Хӗвеланӑҫ фрончӗсенче ҫапӑҫнӑ, икӗ хутчен аманнӑ, пӗр хутчен контузи пулнӑ. Вӑрҫӑ пӗтсен тӑван ялне таврӑннӑ, колхозра ӗҫлеме пуҫланӑ, депутат та пулнӑ. Михаил Тимофеевич кун кӗнекине ҫырса пынӑ. Унта хӑйӗн кӑна мар, фронтри тусӗсен историйӗсем те вырӑн тупнӑ. Ветеран сӑвӑсем те ҫырнӑ.

Нарӑсӑн 25-мӗшӗнче ветеран мӑшӑрӗпе Зинаида Петровнӑпа пӗрлешнине те паллӑ тунӑ. Вӗсен кевер туй пулнӑ.

Францин ӑслӑлӑх тӗпчевӗсен наци центрӗ Вӑтаҫӗр тинӗсӗн тӗпӗнче Laboratoire Sous-marin Provence Méditerranée (LSPM) шывай лабораторине уҫнӑ. Вӑл 2450 метр тарӑнӑшӗнче вырнаҫнӑ, океана тӗпчеме пулӑшӗ.

Унти хатӗр-хӗтӗрсем нейтрино шырама, климат улшӑнӑвӗсене асӑрхаса тӑма, тинӗсӗн физикине, химине тата биологине тӗпчеме, ҫавӑн пекех ытти тӗллевсене пурнӑҫлама пултарӗҫ.

LSPM тӗп хатӗрӗ — KM3NeT детектор. Вӑл тавралӑхӗн пӗр кубла километрне ярса илет. Мӗнпур хатӗр-хӗтӗрсем тупнӑ даннӑйсене лаборатори ҫӗр ҫине ярать, ҫакӑн валли вӑл 42 километр тӑршшӗ электрооптикӑллӑ кабельпе усӑ курать.

Инкелӗ лару-тӑру министерстви тунӑ сӑн

Мари Элте виҫӗ пулӑҫ пӑр айне анса кайнӑ. Вӗсем - Чӑваш Енрен.

Ку пӑтӑрмах нарӑс уйӑхӗн 17-мӗшӗнче пулнӑ. Телее, пулӑҫсем чӗрӗ юлнӑ. Вӗсем шывран хӑйсемех тухнӑ. Ҫапах ҫӑлавҫӑсем пулӑҫсене ҫыран хӗррине тухма пулӑшнӑ. Сӑмах май, Мари Элте кӑҫал ҫынсем пӑр айне анса кайнӑ пӗрремӗш тӗслӗх пулнӑ.

Аса илтерер: кӑҫал кӑрлач пуҫламӑшӗнче Ҫӗнӗ Шупашкарти пулӑҫ пулла кайсан ҫухалнӑ. Кайран унӑн виллине тупнӑ.

"Про Город" сайтӗнчи сӑн

Паян Шупашкарта "Университет" микрорайонта ҫурт тӑрринчен пӑр катӑкӗ йӑтӑнса аннӑ. Ҫав вӑхӑра хӗрарӑм юр хырнӑ.

Телее, пӑр катӑкӗ унран кӑшт аяккарах ӳкнӗ. Пӑр ҫавӑнтах ларакан машина ҫине персе аннӑ. Юрать-ха, юр хыракан хӗрарӑм хӑранӑ кӑна, аманман.

Вырӑна полици ӗҫченӗсем ҫитнӗ.

Ӗнер Ҫӗнӗ Шупашкарта ҪҪХПИ инспекторӗсем "вунтӑваттӑмӗш" машинӑпа пынӑ водителе чарӑнма ыйтнӑ. Анчах руль умӗнчи хӗр чарӑнман, тарма пуҫланӑ.

Анчах тарнӑ чухне хӗр аварие лекнӗ. Унӑн права та ҫук иккен. Вӑл - автошкул курсанчӗ.

Хӗр каланӑ тӑрӑх, вӑл руль умне лариччен пӗр кӗленче сӑра ӗҫнӗ. Анчах медосвидетельсвовани вӑл урӑ пулнине кӑтартнӑ.

Аварире "Хендай" пассажирӗ аманнӑ.

https://vk.com/wall-54381767_227707 страницӑран илнӗ сӑнӳкерчӗк

Шупашкарта ҫывӑх вӑхӑтра чӑваш мультфильмӗсен фестивалӗ иртӗ. Кунта сӑмах ача-пӑчапа валли ӳкернӗ ӗҫсем пирки пырать.

Чӑваш мультфильмӗсен фестивалӗ Республикӑн ача-пӑча вулавӑшӗнче пуш уйӑхӗн 3-мӗшӗнче иртӗ. Вӑл 11 сехетре пуҫланӗ.

Унта ҫитсе курас тесен Шупашкарти Иван Яковлев проспектӗнчи 8-мӗш «а» ҫурта ҫитмелле.

ТНТ видеовӗнчен илнӗ скриншот

Чӑваш Енри юрӑҫа федераци каналӗпе кӑтартнӑ. «ТНТ» телеканал эфирӗнче кӑтартакан «Конфетка» шоура асӑннӑ ушкӑн юрӑҫи Денис Иванов пулнӑ.

«Конфетка» шоура комеди-клаб продюсерӗсемпе тӑван ҫӗршывӑн шоу-бизнесӗнче ҫӑлтӑрӗсем хутшӑнаҫҫӗ. Вӗсем питех паллӑ мар юрӑсене хита ҫавӑраҫҫӗ.

Шоуна «Апельсин каччисем» ушкӑн солисчӗ Денис Иванов хутшӑннӑ. Ертӳҫӗсемпе экспертсем ушкӑнӑн 2000-мӗш ҫулӗсенче паллӑ пулнӑ юррине ҫӗнетнӗ. Дениса ҫавӑ килӗшнӗ.

Куракансен сасӑлавӗ тӑрӑх ҫав юрӑ финала лекнӗ, анчах тӗп парнене – 300 пин тенке – ҫӗнсе илеймен.

Муркаш муниципаллӑ округӗ тунӑ сӑн

Кирилл Данилов «Муркаш Улӑпӗ–2023» номинацие тивӗҫнӗ. Кун пирки Муркаш муниципаллӑ округӗ официаллӑ сайчӗ пӗлтерет.

«Муркаш Улӑпӗ–2023» конкурс канмалли кунсем умӗн, нарӑсӑн 21-мӗшӗнче Муркашри культура ҫуртӗнче иртнӗ. «Чӑваш пики» конкурсра хӗрсем ӑмӑртаҫҫӗ пулсан, ку конкурса вара каччӑсемшӗн йӗркеленӗ. Хӑйсен маттурлӑхне тӑватӑ конкурсра ҫирӗплетмелле пулнӑ. Чи малтанах вӗсен хӑйсем пирки каласа пама тивнӗ, кайран — Раҫҫей армийӗпе ҫыхӑннӑ ыйтусем ҫине хуравлама. Унтах хӑйсен ҫаврӑнаҫулӑхӗпе тӗл пеме пултарассине дартс вӑййинче кӑтартма тивнӗ. Ҫаван пекех пултаруллӑ пулнине те ҫирӗплетсе памалла пулнӑ.

Ҫапла май вара «Муркаш Улӑпӗ–2023» ята Муркаш территори пайӗнчи Кирилл Данилов ҫӗнсе илнӗ. Турай территори пайӗнчи Ростислав Семенов «Тавҫӑруллӑ Улӑп» ята тивӗҫнӗ; Йӳҫкасси территори пайӗнчи Данил Барминов — «Пултаруллӑ Улӑп» ята; Хорнуй территори пайӗнчи Сергей Павлов — «Патвар Улӑп» ята; Оринин территори пайӗнчи Никита Павлов — «Спортпа туслӑ Улӑп» ята.

Уява ача-пӑчасен «Фантази» хореографи ансамблӗн номерӗсем илемлетнӗ. Ҫавӑн пекех Муркаш тӑрӑхӗнчи ытти пултарулӑх ушкӑнӗсем те юрӑ-ташӑпа савӑнтарнӑ.

Малалла...

Елчӗк районӗнчи Аслӑ Пӑла Тимеш ялӗнче тахҫан участок пульници пулнӑ. Унта поликлиника та, стационар уйрӑмӗсем те пулнӑ. Ҫав ҫурт кивелнӗ, ӑна юрӑхсӑр тесе йышӑннӑ.

Кивӗ ҫуртра сивӗ, хӑтлӑ мар пулнӑ. Пациентсенчен те ҫӑхавсем тӑтӑшах килнӗ. Экспертсем ҫурта юсанин усси ҫук тесе пӗтӗмлетнӗ. Ҫитменнине, ялта ҫыннисем те сахалланса юлнӑ.

Ҫавна май ялта тухтӑр амбулаторийӗ, хӑйне евӗр микрополиклиника, тума йышӑннӑ. Ун валли 35 ытла миллион тенкӗ кирлӗ. Аукциона выляса илнӗ подрядчик никӗсне яма тытӑннӑ. Ҫӗнӗ амбулаторие ҫитес хӗл валли туса пӗтерме палӑртнӑ. Унта 1,5 пин ытла ҫын ҫӳрӗ.