Александр Кузнецов страницинчи сӑнӳкерчӗксем

Чӑваш Енри районсенче ӗҫре юрӑ уявӗсем иртеҫҫӗ. Ҫак йӗркесен авторӗ пӗлнӗ тӑрӑх, паян Акатуя Шупашкар районӗнче пуҫтарӑннӑ. Асӑннӑ тӑрӑхра ҫак уява ҫулсерен тӗрлӗ Ялта ирттереҫҫӗ. Кӑҫал Ҫӗньял тӑрӑхӗнче пуҫтарӑннӑ.

Етӗрне районӗнче те Акатуй кӗрлет. Кун пирки Чӑваш Енри муниципалитет пӗрлешӗвӗсен Канашӗн ертӳҫи Александр Кузнецов халӑх тетелӗнчи хӑйӗн страницинче пӗлтернӗ. Акатуйра ҫӗр ӗҫченӗсене савӑнтарма юрӑ-ташӑ ӑстисем пуҫтарӑннӑ.

Аса илтерер: ҫӗршывӑн тӗп хулинче те Акатуй ирттерӗҫ. Унта ӑна утӑ уйӑхӗн 1-мӗшӗнче уявлама палӑртса хунӑ.

Яндекс сӑнӳкерчӗкӗ

Республикӑри социаллӑ учрежденисене те реорганизацилеҫҫӗ текен сӑмах унччен тухнӑччӗ-ха. Чӑваш Енӗн Ӗҫ тата социаллӑ хӳтлӗх министерствине пӑхӑнакан ҫав учрежденисене пӗрлештерме тытӑннӑ.

Республикӑн влаҫ органӗсен официаллӑ порталӗнче вырнаҫтарнӑ йышӑнура палӑртса хӑварнӑ тӑрӑх, Улатӑрти халӑхӑн социаллӑ Ыйтӑвӗсене тивӗҫтерекен комплекслӑ центра тата унти Ҫул ҫитменнисен реабилитаци центрне пӗр ҫӗре пӗрлештерме йышӑннӑ. Асӑннӑ хысна учрежденийӗсем малашне пӗр организаци пулса тӑрӗҫ.

cap.ru порталтан илнӗ скриншот

Шупашкарти больницӑсене пӗрлештересшӗнни пирки эпир унччен пӗлтернӗччӗ-ха. Аса илтерер: Хулари 1-мӗш клиника больниципе Иккӗмӗш хула больницине тата П.Н. Осипов ячӗллӗ пӗрремӗш хула больницине пӗрлештерес ыйтӑва Шупашкарта халӑхра пухӑнса сӳтсе явнӑччӗ.

Халӗ республика Правительствин пуҫлӑхӗн тивӗҫӗсене пурнӑҫлакан Михаил Ноздряков ятарлӑ йышӑнӑва ҫӗртме уйӑхӗн 14-мӗшӗнче алӑ пуснӑ.

Реорганизациленӗ организацин учредителӗ пулма Хулари 1-мӗш клиника больницине шаннӑ.

cap.ru сайтри сӑн

Ӗнер Красноармейски районӗнчи Яманак ялӗнче доярсен республика конкурсӗ иртнӗ. Унта хутшӑнакансем теори пӗлӗвне тӗрӗсленӗ, ӗне сумалли аппарата сӳтсе пуҫтарнӑ.

Чемпион ятне Комсомольски районӗнчи «Рассвет» ЯХПКри Петр Зверев ҫӗнсе илнӗ. Вӑл 96,31 балл пухнӑ. Вӑл Чулхулара ҫурла уйӑхӗн 16-19-мӗшӗсенче иртекен Пӗтӗм Раҫҫейри тупӑшура республика чысне хӳтӗлӗ. Петр кӗпе-йӗм ҫумалли машинӑна тивӗҫнӗ. Иккӗмӗш вырӑншӑн телевизор панӑ, виҫҫӗмӗшӗшӗн – микрохумлӑ кӑмака.

Хула администрацийен пуҫлӑхӗн телеграм-каналӗнчи сӑн

Ӗнер Шупашкарти тӗп пляжра ӗҫлекен ҫӑлавҫӑсем 20 сехет те 10 минутра сменӑна вӗҫленӗ. Кун хыҫҫӑн хуралҫӑ кӑна юлнӑ.

20 сехет те 20 минутра вара пляжра хӗр путса вилнӗ. Вӑл Узбекистанран Шупашкара медицина факультетне вӗренме килнӗскер пулнӑ.

Ҫав вӑхӑтра 3 хӗр шыва кӗнӗ. Путса вилнин тусӗсем каланӑ тӑрӑх, вӑл ишме пӗлмен. Студенткӑн виллине шывран паян ирхи 6 сехетре ҫыран хӗррине илсе тухнӑ.

Ҫанталӑк ҫуллахи пек шӑрӑх тӑмасть. Синоптиксем пӗлтернӗ тӑрах, хальлӗхе шӑрӑх пуласса кӗтмелле мар.

Паян самай ӑшӑ-ха. Ыран 25 градус пулӗ, вырсарникун – 20 градус. Ҫумӑр ҫумӗ. Кӗҫӗр 11-16 градус ӑшӑ тӑрӗ. Кайран вара палӑрмаллах сивӗтӗ: ҫӗрлесерен 5-10 градус кӑна пулӗ. Ҫил ҫурҫӗр енчен вӗрӗ.

Ҫитес эрнере те уҫӑ ҫанталӑк пулӗ. Хӗвел ытлах пӑхмӗ, сывлӑш 18-20 градус таран кӑна ӑшӑнӗ. Юнкунпа кӗҫнерникун 24 градус таран ӑшӑтӗ. Малтанлӑха пӗлтернӗ тӑрӑх, ҫитес эрнере канмалли кунсем тӗлне каллех сивӗтӗ. Ҫумӑр та ҫукалӗ. Республика кунӗнче ӑшӑрах ҫанталӑк тӑрӗ.

t.me/oanikolaev канала вырнаҫтарнӑ сӑнӳкерчӗк

Мускавра та Акатуя пуҫтарӑнӗҫ. Ӑна унта утӑ уйӑхӗн 1-мӗшӗнче ирттерӗҫ.

Наци сӑн-сӑпатне тӑван культурӑн йӑли-йӗркине тӗпе хурса, ӳнерпе спорт мероприятийӗсемпе пуянлатса та илемлетсе кӑтартма палӑртаҫҫӗ. Ҫӗршывӑмӑрӑн тӗп хулинчи уява республикӑн ял хуҫалӑх отраслӗнче ӗҫлекенсем те хутшӑнӗҫ.

Мускаври уяв пирки Телеграмри хӑйӗн страницинче хыпарланӑ май республика Элтеперӗ Олег Николаев чӑваш Акатуйне ытти халӑх ҫыннисем те ҫитсе курасса шаннине палӑртса хӑварнӑ. Республика ертӳҫи хӑй те Акатуя хутшӑнма ӗмӗтленет.

cap.ru сӑнӳкерчӗкӗ

Муркаш районӗнче Емельян Арчиков ячӗпе асӑну хӑми вырнаҫтарнӑ.

Емельян Арчиков асӑннӑ районти Нискасси ялӗнче ҫуралнӑ, Тӑван ҫӗршывӑн аслӑ вӑрҫин ветеранӗ, педагог, Чӑваш Енре ӑслӑ географи шкулне йӗркелесе яраканӗ пулнӑ.

Емельян Иванович — географи наукисен докторӗ, профессор. Асӑну хӑмине Нискассинчи шкул ҫурчӗ ҫине вырнаҫтарнӑ. Ҫав ятпа шкула республикӑн ҫутҫанталӑк ресурсӗсен тата экологи министрӗ Эмир

Бедертдинов тата ытти сумлӑ хӑна пырса ҫитнӗ, хисеплӗ ҫын ҫинчен нумай ӑшӑ сӑмах каланӑ.

t.me/Chuv_today канала вырнаҫтарнӑ сӑнӳкерчӗк

Чӑваш чиперкки Александра Козлова — Йывӑр атлетика енӗпе Раҫҫей чемпионачӗн виҫӗ хут бронза призерӗ.

В.С. Соколов ячӗллӗ спорт шкулӗн воспитанници Александра Козлова Ҫӗнӗ Уренгой хулинче иртекен ҫӗршыври ӑмӑртӑва хутшӑннӑ. Хӗрӗн пулӑшса тата вӗренсе пыраканӗ — Раҫҫейӗн тава тивӗҫлӗ тренерӗ Геннадий Иванов.

Йывӑр спорт инвентарьне йӑтса илессипе ӑмӑртнӑ чухне хӗр икӗ тӗрлӗ ӑмӑртура 195 килограма парӑнтарнӑ. Ку вӑл ӑна бронза медале ҫӗнсе илме май панӑ.

Республика кунӗнче Ҫӗнӗ Шупашкарта Раҫҫейри паллӑ юрӑҫсем сцена ҫине тухассине пӗлтернӗччӗ. Ун чухне камсем килессине каламанччӗ.

Вӑрттӑнлӑха уҫнӑ. Спутник хула ҫыннисене "Краски" ушкӑн савӑнтарӗ. Вӑл каҫхине Атӑл хӗрринчи лапамра юрлӗ.

Палӑртмалла: 2000 ҫулсен пуҫламӑшӗнче анлӑ сарӑлнӑ ушкӑнра ун чухнехи юрӑҫсенчен нихӑшӗ те юлман. Пурте - ҫӗнӗ ҫынсем.