Мари Элте "Звениговский" сысна ферминче сыснасем вилнӗ. Ҫакна ӳкернӗ видео паян тӗнче тетелӗнче сарӑлнӑ.

Роспотребнадзорӑн Чулхула облаҫӗнчи тата Мари Элти управленийӗ пӗлтернӗ тӑрӑх, нарӑс уйӑхӗн 2-мӗшӗнче ҫӗрле сысна ферминче ангарсен вентиляци тытӑмӗн ӗҫӗ йӗркерен тухнӑ. Ҫавна май 1600 ытла сысна вилнӗ.

Вилнӗ выльӑха ҫунтарса ярӗҫ.

Синоптиксем пӗлтернӗ тӑрӑх, республикӑра ҫанталӑк сивӗтсе пырать. Ҫитес 4 кунра юр ҫумӗ, ҫил вӑйлӑ вӗрмӗ.

Пирӗн еннелле сивӗ сывлӑш килнӗрен сывлӑш температури те пӗчӗкленсе пырӗ. Кӑнтӑрласерен 5-10 градус, ҫӗрлесерен 15 градус пулӗ. Тунтикун каҫхине 20 градус е тата сивӗрех пулӗ.

Сивӗ нумая тӑсӑлмӗ. Эрнен иккӗмӗш ҫурринче циклон килӗ. Ун чухне юр ҫӑвӗ, ҫил вӑйланнӑран ҫил-тӑман вӗҫтерӗ. Термометр ӑшӑрах кӑтартсан та сивӗрех пек туйӑнӗ.

culture.cap.ru сӑнӳкерчӗкӗ

Чӑваш Енре ҫак уйӑхра иртекен Чӑваш музыкин фестиваль нарӑс уйӑхӗн 9-мӗшӗнче «Тӑван халӑх сасси» концертпа уҫӑлӗ.

Программӑра композиторсен юрри-кӗввипе (сӑмахран, «Тем пулсан та пурнӑҫра», «Ҫӗнӗ ҫул», «Ахаль мар», «Утӑм ҫеҫ») хайлавӗсемпе пӗрлех фольклор пуянлӑхӗпе те паллашма май килӗ.

Акӑ, «Сӗм вӑрман», «Вӗҫсе пырать кӑвакарчӑн», «Чӗн йӗвен», «Вӗҫ, вӗҫ, куккук» юрӑсене хальхи куракана ҫывӑх тума тӑрӑшнӑ. Тепӗр юрӑ (калӑпӑр, «Атьӑр, хӗрсем, выляма») сӑмахӗ халӑхӑн, кӗвви — композиторӑн.

Кашни юрра концерта пынисем хӑйсем итлесе хӑйсем хак парайӗҫ.

t.me/minobr21 сӑнӳкерчӗкӗ

Шупашкарти Кадет корпусне ҫӗнӗ ҫын ертсе пыма тытӑннӑ. Вӑл — Николай Жуков.

Асӑннӑ ҫын унччен республикӑн Вӗренӳ тата ҫамрӑксен политикин министерствинче, Шупашкарти 56-мӗш вӑтам шкулта ӗҫленӗ.

Николай Жукова кадет корпусне ертсе пыма паян, нарӑс уйӑхӗн 3-мӗшӗнче, шаннӑ.

Аса илтерер: вӗренӳ учрежденийӗнчи ҫемҫе пукан Наталья Тимофеева должноҫрен кайнӑ хыҫҫӑн пушаннӑччӗ. Тимофеева директор пулса 2021 ҫулхи авӑн уйӑхӗнченпе тӑрӑшнӑ. Республикӑн Вӗренӳ министерствинче ӗнентернӗ тӑрӑх, Тимофеева ӗҫрен кайма иртнӗ ҫулхи октябрь уйӑхӗнчех шухӑшланӑ, анчах ҫӳлтисем ыйтнипе финанс ҫулӗ вӗҫлениччен тӑхтама килӗшнӗ.

Шупашкарта Элли Юрьев ячӗллӗ парнене ҫӗнсе илессишӗн ача-пӑча ӳкерчӗкӗсен конкурсӗ иртет. Пултарулӑх ӑмӑртӑвне Чӑваш Енӗн Культурӑпа ӳнер институчӗ, Чӑваш патшалӑх ӳнер музейӗ тата Шупашкарти Э. Юрьев ячӗллӗ 4-мӗш ача-пӑча ӳнер шкулӗ пуҫарнӑ.

Конкурса хутшӑнас кӑмӑллисем кая юлман-ха. Ӗҫсене пуш уйӑхӗн 4-мӗшӗчченех йышӑнӗҫ. Ытти ҫул унта 1000 ытла ача хутшӑннӑ. Хамӑр тӑрӑхрисем ҫеҫ, ют регионсемпе ют ҫӗршывсенчисем таранах.

Живопись тата графика композицийӗсене «Сӑнарлӑ ӳнер» тата «Диплом ӗҫӗ» номинацисенче хаклӗҫ. Номинацисен теми — «Пӗтӗм професси кирлӗ!».

culture.cap.ru сӑнӳкерчӗкӗ

Тӑван чӗлхесен пӗтӗм тӗнчери кунӗ умӗн Чӑваш Енри халӑхсен туслӑхӗн ҫурчӗ «Мой язык — мой народ» (чӑв. Ман чӗлхе — ман халӑх) ача-пӑчан республикӑри конкурсне ирттерессине эпир унччен пӗлтернӗччӗ-ха.

Аса илтерер: Унта 8-14 ҫулсенчи ачасем хутшӑнма пултараҫҫӗ. Вӗсен тӑван чӗлхепе ҫырнӑ сӑвва илемлӗ вуламалла, ҫав видеоролика (унӑн тӑршшӗ 1-2 минут пулмалла) Чӑваш Енри халӑхсен туслӑхӗн ҫуртне ярса памалла. Сӑвва вуланӑ чух наци тумне тӑхӑнма сӗнеҫҫӗ. Ҫук пулсан та тем мар.

Конкурса, паянхи куна илсен, эрменсем, тутарсем, ҫармӑссем, мордвасем, узбексем хастар хутшӑнма кӑмӑл туни сисӗнет.

"Про Город" сайтри сӑн

Шупашкарта пурӑнакан Виктор Аввакумов кашни ҫул нарӑс уйӑхӗн 2-мӗшӗнче тӑван тӑрӑхне, Канаш районӗнчи Шӑхасана, утать. Ҫул ҫинче 13-15 сехет иртет. Ҫапла вӑл 80 ҫухрӑма парӑнтарать.

Виктор 80 ҫухрӑм ахальтен утмасть. Вӑл ҫакна Тӑван ҫӗршывӑн Аслӑ вӑрҫи вӑхӑтӗнче Сталинграда ирӗке кӑларнине халалласа тӑвать. Унта унӑн аслашшӗ /е кукашшӗ/ вилнӗ.

Виктор Аввакумов ирхи 4-ра тухать те пӗчченех утать. Ҫӗрпӳре апат ҫиме чарӑнать. Ялта кӳршисем, тӑванӗсем патне каять.

Ӗнер Муркашра пушар пулнӑ. Унта 7 ҫулти ача шар курнӑ. Ӑна Шупашкара пульницӑна илсе ҫитернӗ.

Амӑшӗ аслине шкула илме кайнӑ вӑхӑтра хваттерте пушар тухнӑ. Ун чухне 7 ҫулти ача килте пӗччен юлнӑ. Вӑл килнӗ ҫӗре пушарнӑйсем ҫитнӗ, хваттере чӳрече урлӑ кӗме пусма хатӗрленӗ. Юрать-ха, амӑшӗ ҫитсен пушарнӑйсем алӑкранах кӗме пултарнӑ.

Пушарнӑйсем 2 минутран ҫитнӗ. Ҫулӑм тухнине асӑрхасан кӳршисем часрах шӑнкӑравланӑ. Вӗсемех иккӗмӗш хутри хваттерте ача пулма пултарни пирки каланӑ.

Шупашкарти Хӗрлӗ лапамра Хула музейне уҫма палӑртни пирки унччен тӳре-шара пӗлтернӗччӗ. Ҫав вырӑнта халӗ урӑх музей уҫасшӑн. Вӑл Раҫҫейӗн тӗрленӗ карттин музейӗ пулӗ. Кун пирки ЧР Элтеперӗ Олег Николаев ТАССа пӗлтернӗ.

Олег Алексеевич палӑртнӑ тӑрӑх, ку музей регионпа паллаштарӗ кӑна мар, туристсем килекен вырӑн та пулӗ.

www.chgign.ru сӑнӳкерчӗкӗ

Чӑваш Енре маттур ҫамрӑк учёнӑйсене палӑртнӑ. Республика шайӗнчи конкурса 11-мӗш хутчен ирттернӗ.

«Чӑваш Республикинчи естествӑлла наукӑсем енӗпе чи лайӑх ҫамрӑк ӑсчах» ята И.Н. Ульянов ячӗллӗ Чӑваш патшалӑх университечӗн органика тата фармаци химийӗн кафедрин доценчӗ Михаил Иевлев тивӗҫнӗ, техника наукисен енӗпе — Чӑваш патшалӑх аграри университечӗн транспортпа технологи машинисен тата комплексӗсен кафедрин доценчӗ Алексей Алатырев, социогуманитари енӗпе — Чӑваш патшалӑх гуманитари ӑслӑлӑхӗсен институчӗн археологи енӗпе ӗҫлекен аслӑ ӑслӑлӑх ӗҫченӗ Николай Мясников, истори наукисен енӗпе — И.Н. Ульянов ячӗллӗ Чӑваш патшалӑх университечӗн факультетсем хушшинчи 1С никӗс лабораторийӗн заведующийӗ — Алексей Минеев. Чи лайӑх тӗпчевҫӗ-учёнӑй ята Шупашкарти коопераци институчӗн экономика тата информаци технологийӗсен кафедрин доцентне Андрей Никитина панӑ.