Пӗтӗм Раҫҫейри тухтӑрсен конкурсне пӗтӗмлетнӗ. «Чи лайӑх анестезиолог-реаниматолог» номинацире Президент пепкелӗх центрӗнче ӗҫлекен Екатерина Степанова виҫҫӗмӗш вырӑн йышӑннӑ.

Вӑл тин ҫуралнӑ ачасен интенсивлӑ терапи уйрӑмӗнче ӗҫлет. Екатерина Степанова 16 ҫул ӗнтӗ пепкесен пурнӑҫне ҫӑлать.

Вӑл ача чухнех тухтӑр пулма ӗмӗтленнӗ. И.Н.Ульянов ячӗллӗ ЧПУн медицина факультетӗнче педиатри уйрӑмӗнчен вӗренсе тухсан Президент пепкелӗх центрне ӗҫе вырнаҫнӑ.

Чӑваш чӗлхи лабораторийӗ хатӗрлекен «Атӑл.Тӑлмач» онлайн-куҫаруҫӑри модель ҫӗнелнӗ. Енчен те малтанхине 673 пин мӑшӑрпа вӗрентнӗ пулсан, хальхине вӗрентме 1 127 пин мӑшӑрпа усӑ курнӑ. Ҫапла май куҫару пахалӑхӗ ӳснӗ.

Хальхи вӑхӑтра вӑл «Яндекс.Тӑлмачран» пӗрре те кая мар куҫарать, хӑш чухне ирттерет те. Ку ӗнтӗ моделе вӗрентнӗ чухне ытларах мӑшӑрсемпе усӑ курнипе ҫыхӑннӑ. Аса илтерер, ҫулталӑкӑн пӗрремӗш чӗрӗкӗнче Яндекс.Тӑлмач чӑваш чӗлхин модельне 1 миллион мӑшӑрпа вӗрентсе ҫӗнетнӗччӗ. «Атӑл.Тӑлмача» вӗрентнӗ чухне вара Чӑваш чӗлхин икчӗлхеллӗ ҫӳпҫинчи мӑшӑрсен йышӗ тата та ӳсрӗ — 1 миллион та ҫӗр пинрен иртрӗ. Чӑваш чӗлхи лабораторийӗ пухӑннӑ мӑшӑрсемпе ҫеҫ мар, унсӑр пуҫне ытти ҫӑлкуҫсенчен пуҫтарнисемпе те туллин усӑ курнӑ. Ҫав шутра — моно корпуссемпе те (калӑпӑр, Википедин чӑваш уйрӑмӗнчи текстсемпе, Чӑваш халӑх сайчӗн Литература кӗтесне вырнаҫтарнӑ текстсемпе тата ыттипе те). Ку та пахалӑха ӳстерме май пачӗ.

Ҫак вӑхӑт хушшинче «Атӑл.Тӑлмачра» ҫавӑн пекех тепӗр ҫӗнӗлӗх те хушӑнчӗ — сайтра вӑйӗ мелӗпе усӑ курса халь кашни хутшӑнаканӑн тӳпине палӑртма май пур.

Малалла...

forum.na-svyazi.ru сӑнӳкерчӗкӗ

Кашни ҫулах республикӑра ятарлӑ ҫулталӑк палӑртаҫҫӗ. Килес ҫулхи мӗн ятлӑ пулсан аванраххине палӑртма «Грани» хаҫатпа «Чӑваш Ен» патшалӑх телерадиокомпанийӗ ыйтӑм ирттерет.

Списокра ҫаксем: Ял (ял территорийӗсен аталанӑвӗн) ҫулталӑкӗ, Телейлӗ ачалӑх ҫулталӑкӗ, Инноваци (технологи) аталанӑвӗн ҫулталӑкӗ, Тарават Чӑваш Ен (туризма аталантарас) ҫулталӑкӗ, Культура тата ӑс-хакӑл эткерлӗхӗн ҫулталӑкӗ, Сывлӑх ҫулталӑкӗ, Хӑрушсӑрлӑх ҫулталӑкӗ, Наукӑпа технологи ҫулталӑкӗ, Халӑхсен туслӑхӗн ҫулталӑкӗ, Тӑван ҫӗршыва хӳтӗлекенсен (патриотизм) ҫулталӑкӗ, Медицина ӗҫченӗсен паттӑрлӑхӗн ҫулталӑкӗ, Космос ҫитӗнӗвӗсен ҫулталӑкӗ.

Ыйтӑма хальлӗхе хутшӑннисенчен 20 проценчӗ «Телейлӗ ачалӑх ҫулталӑкӗ» ятшӑн сасӑланӑ.

cap.ru сайтри сӑн

Ыран Шупашкарти депутатсен хула пухӑвӗ пулӗ. Унта «халӑх тарҫисем» хулан ҫӗнӗ мэрне суйлӗҫ.

Лару хула администрацийӗн пысӑк залӗнче 14 сехетре пуҫланӗ. Депутатсем пӗр ыйтӑва кӑна пӑхса тухӗҫ: Шупашкар пуҫлӑхӗн тата Шупашкарти депутатсен хула пухӑвӗн председателӗн тивӗҫӗсене вӑхӑтлӑха кама памалла?

Аса илтерер: хула мэрӗ пулнӑ Олег Кортунов ҫурла уйӑхӗн 22-мӗшӗнче вилнӗ. Вӑл 38 ҫулта пулнӑ.

Борис Чачев. culture.cap.ru сӑнӳкерчӗкӗ

Шупашкарти Наци вулавӑшӗнче паян Чӑваш Республикин культурӑн тава тивӗҫлӗ ӗҫченӗн Борис Чачевӑн куравӗ уҫӑлӗ.

Экспозицие ювелир ӳнерӗн, театрпа ҫыхӑннӑ ӗҫсенчен тата скульптурӑран йӗркелӗҫ.

Борис Чачев 1943 ҫулхи утӑ уйӑхӗн 9-мӗшӗнче Куйбышев (халӗ — Самар) облаҫӗнчи Сызрань хулинче ҫуралнӑ. Хусанти театр училищинчен художник-бутафор пулма вӗренсе тухнӑ, каярах И.Я. Яковлев ячӗллӗ Чӑваш патшалӑх педагогика институтӗнче художествӑпа графика факультетӗнче ӑс пухнӑ.

Художник Чӑваш Енри тата республика тулашӗнчи театрсенче ӗҫленӗ. Хамӑр тӑрӑхрисене илсен, Чӑваш музыка театрӗнче, К.В. Иванов ячӗллӗ Чӑваш патшалӑх академи драма театрӗнче, Чӑваш патшалӑх пукане театрӗнче тӑрӑшнӑ.

Следстви комитечӗ тунӑ сӑн

Ҫӗрпӳ районӗнчи Метикасси ялӗнче хӗрарӑм ӗҫҫи вӑхӑтӗнче сарӑмсӑр вилнӗ. Следстви комитечӗн Чӑваш Енри следстви органӗсем пӗлтернӗ тӑрӑх, вӑл тимӗр алӑк айне пулнӑ.

Ҫурла уйӑхӗн 19-мӗшӗнче кӑнтӑрла тырӑ упрамалли вырӑнта трактор ӗҫленӗ. Руль умӗнче 39 ҫулти арҫын ларнӑ. Вӑл ӑнсӑртран склад алӑкне лектернӗ. Тимӗр алӑк йӑтӑнса аннӑ. Шӑп ҫавӑнта хӗрарӑм тӑнӑ. Вӑл алӑк айне пулсан вилмеллех аманнӑ.

Следовательсем пуҫиле ӗҫе малалла тӗпчеҫҫӗ.

Хӗрлӗ Чутай районӗнчи Пантьӑк ялӗнче фельдшерпа акушер пункчӗ уҫӑлнӑ. Тӗрӗссипе, ӑна ҫулталӑк каяллах уҫмалла пулнӑ.

Объекта пӗлтӗр авӑн уйӑхӗн 1-мӗшӗнче вӗҫлеме палӑртнӑ. Анчах подрядчик ӗлкӗреймен. Вӑл каркасне хӑпартнӑ хыҫҫӑн унпа килӗшӗве пӑрахӑҫланӑ.

Прокуратура тӗрӗслев ирттернӗ хыҫҫӑн подрядчике 4,5 миллион тенкӗлӗх штрафланӑ. Ертӳҫине те 226 пин тенкӗ штраф тӳлеме тивнӗ.

ФАПа тепӗр подрядчик туса пӗтернӗ. Ҫапла вӑл нумаях пулмасть, ҫурла уйӑхӗн 23-мӗшӗнче, кӑна алӑкне уҫнӑ.

Шупашкар районӗн администрацийӗн пуҫлӑхӗн ҫумӗ Алексей Иванов шкулти спорт оборудованине юсама тухнӑ. Анчах вӑл ҫав ӗҫе пӗр 10 минутран ытла хутшӑнман имӗш. Аллӑ киҫтӗк тытнӑскер кӑштах сӑрланӑ та пӑрахса кайнӑ. Ку хыпара тӗнче тетелӗнчи халӑх ушкӑнӗсенчен пӗринче пӗлтернӗ. Видео ӳкерсе илсех паблика вырнаҫтарнӑ. «Сӑн ӳкерӗнме кӑна тухнӑ», — пӗтӗмлетнӗ пост авторӗсем.

32 ҫулти Алексей Иванов асӑннӑ мероприяти пирки хӑйӗн страницинче, чӑн та, пӗлтернӗ. Унта Ҫатра Лапсар шкулӗнчи спорт лапамӗ пирки сӑмах пырать иккен.

«Шупашкар районӗн хыпарӗсем» пабликри видеоран илнӗ скриншот

«Хуҫа хӑйӗн халӑхӗпе тӗл пулма хӑрать». Ҫакӑн пек чӑвашла ят панӑ видеона «Контактра» халӑх ушкӑнӗнчи «Вести Чебоксарского района» (чӑв. Шупашкар районӗн хыпарӗсем) пабликра ӗнер, ҫурла уйӑхӗн 23-мӗшӗнче, вырнаҫтарнӑ.

Видеона кӗскен ӑнлантарса панинчен ҫакна ӑнланма пулать. Шупашкар районӗн администрацийӗн пуҫлӑхӗ Николай Хорасев Ҫӗньял ял тӑрӑхӗнчи пуҫару ушкӑнӗн хастарӗсемпе тӗл пулма калаҫса татӑлнӑ. Палӑртнӑ кун ҫитсен пуҫлӑх тӗлпулӑва пыман. Мӗншӗн пыманнине район администрацийӗнче ӗҫлекен пӗр хӗрарӑм (сӑнӳкерчӗкре) ӑнлантарса пама хӑтланнӑ.

Пуҫлӑхпа тӗл пулма пырса ҫитнисем ҫапах та аптӑрамаллипех аптӑранӑ. Ну, калӑпӑр, темле лару-тӑру сиксе тухнӑ тейӗпӗр. Тӗлпулӑва пыраймассине пӗлсен Николай Евгеньевич халӑха мӗншӗн ҫавӑн пирки маларах асӑрхаттарман? «Ку вӑл ҫынсене хисеплеменни пӗлтермест-и?» — пуҫ ватнӑ Ҫӗньял тӑрӑхӗнчи хастарсем.

Александр Степанов страницинчи сӑнӳкерчӗк

Республика тулашӗнче пурӑнакан йӑхташӑмӑрсен ачисем «Эткер» уйлӑха ҫулсеренех пухӑнаҫҫӗ. Кӑҫал та ҫаплах пулнӑ.

Раҫҫейӗн тӗрлӗ регионӗнчен 20 ытла ача килсе ҫитнӗ. Вӗсемпе пӗр кунхине Шупашкар хулинчи пӗтӗмӗшле вӑтам пӗлӳ тата уйрӑм предметсемпе тарӑн пӗлӳ паракан 40-мӗш шкулти чӑваш чӗлхи учителӗ Александр Степанов тӗл пулнӑ, Чӑваш Енӗн тӗп хулипе паллаштаракан экскурси ирттернӗ.

Александр Марсович «Контактра» халӑх ушкӑнӗнчи хӑйӗн страницнче пӗлтернӗ тӑрӑх, «20 ытла ачаран 2-3 ача кӑна чӑвашла калаҫмасть, анчах та вӗсем те аванах ӑнланаҫҫӗ». «Эппин, пирӗн шанӑҫ пур!!!» — хавхаланнӑ пултаруллӑ педагог.