2018.miasskiy.ru сайтри сӑн

Шупашкарти «Каскад» суту-илӳ центрӗнче вакцинаци пункчӗ ӗҫлени пирки эпир хыпарланӑччӗ. Ун чухне пӗр кунра 100 ҫын ытла кӑшӑлвирусран прививка тунӑччӗ.

Вакцинаци пункчӗ тепӗр хутчен уҫӑлӗ. Халӗ унта иккӗмӗш хут та прививка тӑвӗҫ. Пункт пуш уйӑхӗн 4-6-мӗшӗсенче ӗҫлӗ. ЧР Сывлӑх сыхлавӗн министерстви пӗлтернӗ тӑрӑх, пункт 14-19 сехетсенче уҫӑ пулӗ.

Прививка тума килекенсен ҫумра паспорт, СНИЛС, страхлав полисӗ пулмалла. 21 кунран, пушӑн 25-мӗшӗнче, пункт каллех уҫӑлӗ, унта иккӗмӗш прививкӑна тума май пулӗ.

dobvesti.ru сайтри сӑн

90 ҫулти кинемейӗн юбилейне япӑх пулӑм тӗксӗмлетнӗ. Вӑл укҫасӑр тӑрса юлнӑ.

Нумаях пулмасть пӗр халӑх тетелӗнче ӑна социаллӑ тӳлев пама тивӗҫ тесе хыпарланӑ. Ку 2700 тенкӗпе танлашать-мӗн.

Анчах тӳлеве илес тесен банк карттин номерне, хыҫалти кодне, усӑ курмалли срокне калама ыйтнӑ. Кинемей япӑххи пирки шухӑшламан – йӑлтах пӗлтернӗ.

Ватӑскер тепӗр кунхине 90 ҫулхи юбилейне паллӑ тума хатӗрленнӗ. «Кӗтмен парне» уява тӗксӗмлетнӗ. Ултавҫӑсем унӑн картти ҫинчен 9 пин тенкӗ куҫарнӑ.

Чӑваш Енӗн Общество палатин членӗсем республика Элтеперӗпе Олег Николаевпа тӗл пулсан Ҫамрӑксен ӗҫӗсен комитетне йӗркелес ыйтӑва хускатнӑ.

Олег Николаев шухӑшланӑ тӑрӑх, ҫамрӑксен ыйтӑвӗпе пӗрмаях тӗллевлӗн ӗҫлемелле. Ун валли уйрӑм ведомство йӗркелемесен те.

Республика ертӗӳҫи пирӗн регионта хӑй вӑхӑтӗнче ун пек комитет пулнине аса илтернӗ. Хальхи вӑхӑтра ҫамрӑксен ыйтӑвӗсемпе республикӑн Вӗренӳ тата ҫамӑксен политикин министерстви ӗҫлет. Ҫавна май йӗркене кӗрсе кайнӑ ӗҫе ылмаштармасан та. Ведомство ку енӗпе тимлесе ҫитереймесен е ӗҫе урӑхла йӗркелемелли сисӗнсен шухӑшласа пӑхма пулать.

forum.na-svyazi.ru сайтри сӑн

Хальхи вӑхӑтра республикӑри культура аталанӑвне пысӑк тӳпе хывнӑшӑн 20 ҫын пурнӑҫ тӑршшӗпе 3 пин тенкӗ пособи илсе тӑрать. Анчах ку виҫе 1994 ҫултанпа ӳсмен.

Чӑвашинформ пӗлтернӗ тӑрӑх, ЧР Культура министерствин Общество канашӑн председателӗ Виктор Бондарев ЧР Элтеперӗ Олег Николаев патне пособие ӳстерес ыйтупа тухнӑ. Олег Алексеевич ку шухӑша ырланӑ.

«Эсир сӑмах хускатнӑ ҫынсем Чӑваш Ен культурине пысӑк тӳпе хывнӑ. Ку пособи виҫине пирӗн ЧР Культура министерствипе пӗрле пӑхса тухмалла», - тенӗ Элтепер.

Пособи виҫи мӗн чухлӗ пулассине хальлӗхе пӗлтермеҫҫӗ.

Ыран, пуш уйӑхӗн 3-мӗшӗнче, халӑха асӑрхаттармалли тытӑм епле ӗҫленине черетлӗ хутчен тӗрӗслӗҫ. Яваплӑ службӑсем ун пеккине тӑтӑшах ирттеренине хӑнӑхӑмӑр ӗнтӗ.

Урамсенче вырнаҫтарнӑ сиренсемпе громкоговорительсем граждан хӳтӗлевӗн тренировки пуҫланни ҫинчен систерӗҫ. «Внимание всем!» (чӑв. Пурин те тимлӗ пулмалла) асӑрхаттару икӗ хутчен: 10 сехет те 40 минутра тата 11 сехетре янӑрӗ.

Чӑваш Енӗн Граждан хӳтӗлевӗпе чрезвычайлӑ лару-тӑру комитечӗ пӗлтернӗ тӑрӑх, сасса илтсен пӑлханма кирлӗ мар. Вӑл —тӗрӗслев кӑна.

Нарӑс уйӑхӗн 26-28-мӗшӗсенче Мускавра тӑван чӗлхе учителӗсен педагогика ӑсталӑхӗн форумӗ иртнӗ. Унта 18 регионти 36 учитель хутшӑннӑ, ҫав шутра – Чӑваш Енри шкулсенче чӑваш чӗлхипе литературине вӗрентекенсем те.

Виҫӗ кунлӑх мероприятие педагогика ӑсталӑхӗн конкурсӗнче ҫӗнтернисем кайма тивӗҫнӗ. Пирӗн тӑрӑхрисенчен йышра ҫаксем пулнӑ: Элӗк районӗнчи Чӑваш Сурӑмри вӑтам шкулти чӑваш чӗлхипе литературине вӗрентекен Алина Петрова, Ҫӗнӗ Шупашкарти 6-мӗш гимназири Елена Николаева, Шупашкарти сывлӑх енчен хавшакрах ачасен 2-мӗш шкулӗнчи Ираида Матьянова, Шупашкар районӗнчи Тренккассинчи Ираида Фомина, ЧР Вӗренӳпе ҫамрӑксен политикин министерствин «Вӗрентӳ тата ачасене комплекслӑ пулӑшакан центрӗ» учрежденири Любовь Кудрявцева, Шупашкар районӗнчи Атайкассинчи шкулти Светлана Ефимова, Патӑрьел районӗнчи Патӑрьелти 2-мӗш вӑтам шкулти Галина Хлебникова.

Паян, пуш уйӑхӗн 2-мӗшӗнче, Чӑваш Ен Наци вулавӑшӗнче Владимир Галошев режиссерӑн мультфильмӗсене хӑтлӗҫ. Мероприяти 10 сехетре пуҫланӗ. Унта «Радуга», «Аслати», «Пихампар», «Огонь и вода» мультипликациллӗ фильмсене кӑтартӗҫ. Вӗсене «Чӑваш халапӗсем, юмахӗсем тата легендисем» ярӑмпа хатӗрленӗ.

Автор каланӑ тӑрӑх, юмахсемпе вӑл И.Н. Ульянов ячӗллӗ Чӑваш патшалӑх университечӗн студенчӗ чухне, иртнӗ ӗмӗрӗн 90-мӗш ҫулӗсенче, кӑсӑкланма пуҫланӑ. Килӗшнӗ текстсем валли малтан ӳкернӗ, кайран комиксем хатӗрлеме тытӑннӑ. Ҫапла майпа «Вутӑш», «Кукша», «Ҫӗлен», «Иван паттӑр» тата ыттисем ҫуралнӑ. Компьютер технологийӗпе усӑ курса мультфильм хатӗрлеме май килнине ӑнлансан Владимир Петрович анимаципе ӗҫлеме тытӑннӑ.

Шупашкарта пӗр арҫын 9 ҫулти хӗрача ҫумне ҫулӑхнине Чӑваш халӑх сайчӗ пӗлтернӗччӗ. Аса илтерер: пӑтӑрмах пӗлтӗрхи юпа уйӑхӗн 2-мӗшӗнче пулса иртнӗ. Палламан этем 9-мӗш пилӗк ҫуллӑх урамӗнчи ҫуртри лифтра хӗрача ҫумне ҫулӑхнӑ.

Пӑтӑрмах хыҫҫӑн 12 сехетрен арҫынна хӑйӗн килӗ умӗнче тытса чарнӑ. Вӑл 46 ҫулта. Судпа унччен темиҫе хут та айӑпланнӑ. Юлашки хутчен ирӗке вӑл 2019 ҫулхи юпа уйӑхӗнче тухнӑ.

Халӗ ун тӗлӗшпе черетлӗ хутчен суд пулнӑ. Арҫынна ҫирӗп режимлӑ колоние 13 ҫуллӑха ӑсатма йышӑннӑ, ун хыҫҫӑн та вӑл тепӗр ҫулталӑк хушши ирӗклӗн унта-кунта ҫӳреймӗ, мӗншӗн тесен суд ун ирӗкне чакарма йышӑннӑ.

Чӑваш Ен Арбитраж сучӗ республикӑн Спорт министерствин тавӑҫне тишкерме килӗшмен.

Тавӑҫа ведомство «Алза» тулли мар яваплӑ общество тӗлӗшпе хатӗрленӗ. 2019 ҫулта панкрута тухнӑ строительство организацийӗнчен ведомство 124,6 миллион тенкӗ шыраса илме хӑтланнӑ. «Алза» биатлон комплексне тума пуҫланӑ, анчах ӗҫе вӗҫлемен. Асӑннӑ 124,6 миллион тенкӗрен 46,3 миллионне сӑлтавсӑр пуйнӑшӑн шыраса илес тенӗ, 76,5 миллионне – ӗҫе вӑхӑтра пурнӑҫламаншӑн, 1,9 миллионне – оборудование вӑхӑтра туянманшӑн.

Суд ларӑвӗнче стройорганизаци парӑмне кредитор требованийӗсен реестне кӗртни палӑрнӑ. Раҫҫейӗн Тӗп банкӗ рефинансировани ставкине пӗчӗклетнине кура пени виҫине 76,5 миллион тенкӗрен 58 миллиона ҫити чакарнӑ.

Шупашкарти биатлон комплексне тӑвас пирки килӗшӗве 2013 ҫулта алӑ пуснӑ. Объекта 2016 ҫулта хута ямалла пулнӑ. Ӗҫ хакӗ 371 миллион тенкӗпе танлашнӑ. 2019 ҫулта контракта пӑрахӑҫланӑ, «Алзаран» парӑма шыраса илессине уйрӑм производствӑна уйӑрнӑ.

kakprosto.ru сайтри сӑн

Шупашкарти Калинин районӗн администрацийӗн ЗАГС пайӗ нарӑс уйӑхне пӗтӗмлетнӗ. Ашшӗ-амӑшӗ ачисене ытларах мӗнле ят панӑ-ха?

Ку районта нарӑс уйӑхӗнче 188 ача ҫуралнӑ. Вӗсенчен тӑваттӑшӗ – йӗкӗреш /икӗ мӑшӑр йӗкӗреш ҫуралнӑ/. Икӗ ача килте кун ҫути курнӑ.

Нарӑс уйӑхӗнче Калинин районӗнче Султан ятлӑ арҫын ача кун ҫути курнӑ. Сайра тӗл пулакан ятсем татах пур: Серафим, Стефан, Юрий, Азалия, Виталина, Марьяна, Снежана, Лиана. Кирилл, Александр, Марк, Роман, Андрей, Даниил, Виктория, Александра, Валерия, Анна, Екатерина, Ева – тӑтӑшах тӗл пулакан ятсем.