Чӑваш Ен Патшалӑх Канашӗнчи «Пӗрлӗхлӗ Раҫҫей» партин депутачӗсен хӑйне евӗр рейтингне йӗркеленӗ. «Халӑх тарҫисен» уссине РФ Патшалӑх Думин тӗслӗхне шута илсе палӑртнӑ.

Танлаштарӑмра ҫӳлти йӗркене Федерацин травматологи, ортопеди тата эндопротезировани центрӗн тӗп врачӗ Николай Николаев, И.Н. Ульянов ячӗллӗ Чӑваш патшалӑх университечӗн ректорӗ Андрей Александров, «Дент-а-мед» стоматологи клиникин тӗп врачӗ Юрий Зорин лекнӗ.

Аутсайдерсен йышӗнче – «Акконд» хапрӑк директорӗ Валерий Иванов, «Реал-Б» обществӑн гендиректорӗн ҫумӗ Елена Васильева, Улатӑрти профсоюз ӗҫченӗ Николай Ефремов, Роман Каляев тата Леонид Лукин усламҫӑсем, газ компанийӗсен ертӳҫи Кияметдин Мифтахутдинов, «Элара» гендиректорӗ Андрей Углов, «Чӑвашхлебопродукт» пуҫлӑхӗ пулнӑ Владимир Яковлев.

Вӑтаммисен йышӗнче – Елена Николаева олимп чемпионки, «Авангард» ООО гендиректорӗ Николай Курчаткин, ЧР Патшалӑх Канашӗн соцполитика комитечӗн ертӳҫи Вячеслав Рафинов, Альбина Егорова спикер.

Игорь Моляковӑн сайт та пур

Раҫҫей Патшалӑх Думин депутачӗ Игорь Моляков чирлесен те ӗҫлет. Кун пирки пурне те пӗлсе-курса тӑракан «Правда ПФО» тӗнче тетелӗнчи хаҫат ӗнер пӗлтернӗ.

Кӑҫалхи ҫул парламентаришӗн ӑнӑҫлах килсе тухман. Ӑна чир хыҫҫӑн чир ҫакланнӑ. Халӗ вӑл Республикӑн клиника пульницинчи неврологи уйрӑмӗнче сипленет, депутат микроинсульт тӳссе ирттернӗ.

Пульницӑра пулин те «халӑх тарҫи» федерацин ведомствисене суйлавҫӑсене пӑшӑрхантаракан тӗрлӗ ыйтупа ҫырусем ӑсатать.

Игорь Моляковӑн сайт та пур. Унта вӑл хӑйӗн сӑввисен «Книга расставания» пуххине вырнаҫтарнӑ. Кӗнекепе www.игорьмоляков.рф каҫӑпа паллашма пулать.

poisknews.ru сӑнӳкерчӗкӗ

Кӑҫалхи ҫула Раҫҫейре Ӑслӑлӑхпа технологисен ҫулталӑкӗ тесе йышӑннӑ. Ун пек йышӑнӑва РФ Президенчӗ пӗлтӗрхи раштав уйӑхӗн 25-мӗшӗнче алӑ пуснӑ.

Ӑслӑлӑхпа технологисен ҫулталӑкӗ пулнӑ май пирӗн республикӑра та тӗрлӗ мероприяти ирттерӗҫ. Ӑна йӗркелессипе ятарлӑ ӗҫ ушкӑнӗ тӑрӑшӗ. Кун пек йышӑнӑва республика Элтеперӗ Олег Николаев алӑ пуснӑ.

Ӗҫлӗ ушкӑна республикӑн вице-премьерӗ – вӗренӳ тата ҫамрӑксен политикин министрӗ Алла Салаева ертсе пырӗ. Унӑн ҫумӗ пулма Денис Спирина, экономика аталанӑвӗн тата пурлӑх хутшӑнӑвӗсен минситрӗн ҫумне, ҫирӗплетнӗ.

Улатӑрти ачасем Кубань тӑрӑхне канма тухса кайӗҫ. Унти «Термы» сиплев ҫурчӗ Чӑваш Енри ачасене ыркӑмӑллӑх шучӗпе сиплет. Кубань тӑрӑхӗ 25 ҫемьене йышӑнӗ. Унта сусӑр ачасене илсе кайӗҫ. Организаци ыр кӑмӑллӑхҫӑсем пулӑшнипе ӗҫлет. Вӗсенчен пӗри – Александр Удодов усламҫӑ.

Проекта Мускаври «Ҫветтуй Лука» фонд, Вырӑс православи чиркӗвӗн Улатӑрти епархийӗ йӗркеленӗ.

Улатӑрта сусӑр 200-е яхӑн ача пурӑнать. Вӗсемпе тӗллевлӗӗҫлекен чи ҫывӑх учреждени те 200 километрта, Шупашкарта, вырнаҫнӑ. Улатӑрти епархи ҫумӗнче йӗркеленӗ центр 25 сусӑр ачашӑн тӑван кил евӗр пулса тӑнӑ. Унта ачасемпе логопед, психолог, дефектолог, массажист, физкультура инструкторӗ ӗҫлеҫҫӗ. Арт-терапи тата хореографи енӗпе занятисем иртеҫҫӗ, театр тата хор кружокӗсем пур. Улатӑрти виҫӗ ҫемье Краснодар тӑрӑхӗнчен канса килнӗ те ӗнтӗ.

ru.wikipedia.org сӑнӳкерчӗкӗ

Темиҫе минут каялла Чехире биатлон енӗпе Тӗнче кубокӗн черетлӗ тӑххӑрмӗш тапхӑрӗ вӗҫленчӗ. Хӗрарӑм-спортсменкӑсем спринтра 7,5 километра чупрӗҫ. Вӗсен пӗрре выртса, пӗрре тӑрса пеме тиврӗ.

Пирӗн ҫӗршыв командинче 6 спортсменка пулчӗ, ҫав шутра – Чӑваш Ен хӗрӗ, Тӗменшӗн ӑмӑртакан Татьяна Акимова та.

Тӳрех палӑртар: Раҫҫей командин членӗсем япӑх печӗҫ, начар чупрӗҫ. Ҫав вӑхӑтрах эпир ентешӗмӗрпе мӑнаҫланма пултаратпӑр. Вӑл 100 ытла спортсмен хушшинче 25-мӗш вырӑн йышӑнчӗ. Татьяна Акимова выртса пенӗ чух ҫеҫ пӗрре лектереймерӗ. Пирӗн ҫӗршыври ытти спортсменкӑн кӑтартӑвӗ ҫапларах:

Лариса Куклина — 42-мӗш, Светлана Миронова — 52-мӗш, Ульяна Кайшева — 58-мӗш, Евгения Павлова — 65-мӗш, Ирина Казакевич — 81-мӗш.

Кӑшӑлвируспа хӑш районта ытларах чирлеҫҫӗ? Пуш уйӑхӗн 10-мӗшӗ тӗлне хатӗрленӗ «вирус карттине» тишкерер.

Хӗрлӗ Чутай тата Шӑмӑршӑ районӗсем, Ҫӗмӗрле хули – ҫак муниципалитетсенче чирлес хӑрушлӑх пысӑк. Шӑмӑршӑ тӑрӑхӗнче – 287, Хӗрлӗ Чутай районӗнче – 345, Ҫӗмӗрлере 681 ҫын каварлӑ вируса ҫаклатнӑ.

Паллах, ытларах ку енӗпе Шупашкар «палӑрнӑ». Унта 10904 ҫын чирленӗ. Иккӗмӗш вырӑнта – Ҫӗнӗ Шупашкар (1632 ҫын). Ун хыҫҫӑн Шупашкар районӗ (1100), Ҫӗмӗрле (681), Улатӑр (672) пыраҫҫӗ.

Чи сахал ҫын чирленисен йышне ҫаксем кӗнӗ: Йӗпреҫ районӗ (185), Красноармейски районӗ (178), Сӗнтӗрвӑрри районӗ (173), Ҫӗмӗрле районӗ (137).

Хӑҫан ӑшӑтӗ? Паллах, часрах ҫурхи илемлӗ ҫанталӑкпа килес килет. Синоптиксем мӗн калаҫҫӗ-ха?

Чӑнах та, ҫитес вӑхӑтра ӑшӑтса пырӗ. Анчах ҫил самай вӑйлӑ пулӗ, уйрӑмах пушӑн 13-16-мӗшӗсенче – ҫеккунтра 15 метр хӑвӑртлӑхпа вӗрӗ. Ҫавна май сивӗрех пек туйӑнӗ.

Вырсарникун ҫил-тӑман тухӗ. Тунтикун юр ҫумӗ, термометр «плюс» кӑтартӗ. Ҫитес эрне варринче ҫил лӑпланӗ.

Пушӑн 18-21-мӗшӗсенче каллех юр ҫӑвӗ. Гидрометцентр хыпарланӑ тӑрӑх, ҫитес 10 кунра Чӑваш Енре ҫанталӑк нормӑран 1 градус сивӗрех пулӗ. Вӑтам температура 5 градус сивӗпе танлашать.

Чӑваш Ен премьер-министрӗ тата Коми Республикин Пуҫлӑхӗ пулнӑ 50 ҫулти Сергей Гапликов ҫӗнӗрен йӗркеленӗ Мускаври пӗр предприятие ертсе пырӗ. Асӑннӑ компани «Техсити Девелопмент» ятлӑ. ӑна «Ростех» патшалӑх корпорацийӗпе «Crocus Group» компанин уҫнӑ.

«Техсити Девелопмент» тулли мар яваплӑ мар обществӑна кӑҫалхи пуш уйӑхӗн 9-мӗшӗнче Мускавра регистрациленӗ. Предприятин пурлӑхӗн 51 процентне «Crocus Group» 51 процент хывнӑ, «Ростех» – 49 процент.

Хальтерех йӗркеленӗ предприятин тӗп тивӗҫӗ – инженери ӗҫӗсем, инженерипе техника проекчӗсем хатӗрлесси, ҫак енӗпе сӗнӳ-канашпа пулӑшасси, проектсене епле хатӗрленине тӗрӗслесси.

Чӑваш Енри аграрисем хӑйсем туса илекен продукцие ют ҫӗршыва хастар ӑсатаҫҫӗ. Асӑннӑ ӗҫ «Халӑхсем хушшинчи коопераци тата экспорт» наци проекчӗпе килӗшӳллӗн пурнӑҫланса пырать.

«Агроаналитика центрӗ» федерацин патшалӑх хысна учрежденийӗ пӗлтернине тӗпе хурса республикӑн Ял хуҫалӑх министерстви хыпарланӑ тӑрӑх, кӑрлач-нарӑс уйӑхӗсенче кушӑм сутассипе пирӗн регион Раҫҫейре малтисен ретӗнче пулнӑ. Асӑннӑ продукцие пирӗн регион 118,7 пин америка долларӗлӗх сутнӑ.

Кушӑм Польшӑна, Германие тата Беларуҫе ӑсанать.

Чӑваш Енри пульницӑсем валли машинӑсем туянасшӑн. Пӗтӗмпе – 24 автомобиль. Ҫавна май аукцион ирттереҫҫӗ. Килӗшӗвӗн малтанхи хакӗ – 16 миллион тенкӗ те 248 пин тенкӗ.

Машинӑра хыҫалта виҫӗ ҫын вырнаҫмалӑх, механика курупкаллӑ пулмалла. Условисенчен пӗри ҫакӑ.

Виҫӗ машинӑна Шупашкар районӗн пульницине парӗҫ. Патӑрьел тата Муркаш районӗсен пульницине икшер машина тивӗҫӗ. Улатӑр, Элӗк, Вӑрнар, Йӗпреҫ, Канаш, Куславкка, Комсомольски, Хӗрлӗ Чутай, Сӗнтӗрвӑрри, Вӑрмар, Ҫӗрпӳ, Шӑмӑршӑ, Етӗрне, Тӑвай тата Елчӗк районӗсен пульницисене, Шупашкарти васкавлӑ медпулӑшу пульницине, Ҫӗмӗрлери территорисен хушшинчи медицина центрне пӗрер машина лекӗ.