Иртнӗ шӑматкун, ҫӗртмен 4-мӗшӗнче Шупашкар районӗнче ҫуллахи ялти спорт вӑййисен XVIII-мӗш ӑмӑртӑвӗ иртнӗ. Унта республикӑри районсемпе хуласенчен 800 спортсмен пырса ҫитнӗ. Уяв ял хуҫалӑхӗнче тӑрӑшакансене кӑна мар, спортпа туслӑ пур ҫынна та пӗрлештернӗ.

Ӑмӑртусем ир ирех пуҫланнӑ. Чи малтан старта утӑ ҫулакансем, механизаторсем, ӗне сӑвакансем тухнӑ.

Ҫуллахи спорт ӑмӑртӑвӗсенче спортсменсем спортӑн 16 енӗпе вӑй виҫнӗ. Утӑ ҫулассипе Вӑрнар районне ҫитекенни пулман: муниципалитет чысне Галина Павловӑпа Александр Политов ӑнӑҫлӑ хӳтӗленӗ.

Чӑваш Ен Элтеперӗ Михаил Игнатьев ҫак ҫуллахи спорт ӑмӑртӑвӗ кашни ҫул тӗрлӗ районпа хулара иртнине пӗлтернӗ. Ҫӗнтерӳҫӗсенчен йӗркеленӗ Чӑваш Енӗн пӗрлештернӗ ушкӑнӗ утӑ уйӑхӗнче Сарӑту облаҫне кайӗҫ.

Хӑш команда кампа выляссине татса параҫҫӗ

Коррупципе кӗрешекен «Сӗтев» хаҫат кӑҫал футбол турнирне 3-мӗш сезон ирттерет. Ҫулран ҫул унӑн парнисен хакӗ ӳссе пырать. Кӑҫал хаҫат никӗслевҫи тата тӗп редакторӗ Э.В. Мочалов турнир хакне 300 пин тенке ҫитернӗ.

Футбол турнирӗнче ҫӗнтерекен ушкӑн 150 пин тенкӗ алла илӗ тата куҫакан кубока тивӗҫӗ. 2-мӗш вырӑна тухакансем 100 пин тенкӗ илӗҫ, 3-мӗш вырӑна тивӗҫекенсем — 50 пин тенкӗ. Унсӑр пуҫне турнирта хутшӑнакансем валли хаклӑ парнесем, медальсем пулӗҫ.

Турнир ҫӗртме уйӑхӗн 25-мӗшӗнче пуҫланать. Кӑҫал турнирта 8 футбол ушкӑнӗ хутшӑнӗ. Турнир мӗнле иртсе пынине хаҫатӑн блогӗнче пӗлсе тӑма пулать.

Шупашкарта куҫ курманнисен хушшинче ҫӑмӑл атлетика дисциплинисен енӗпе Раҫҫей чемпионачӗ иртнӗ. Ӑмӑртӑва хутшӑнакансен самаях тар тӑкма тивнӗ. Ара, ун пӗтӗмлетӗвӗпе килӗшӳллӗн, чи маттуррисене кӑҫал иртекен Паралимп вӑййисене хутшӑнмашкӑн суйланӑ-ҫке-ха.

Шупашкарта пурӑнакан Александр Сорокин пурнӑҫӗнчи чи пысӑк ҫитӗнӳ тунӑ. Вӑл 6 метр та 36 сантиметр тӑршшӗне сикнӗ. Хӑй тата вӑйлӑрах сикме палӑртнӑ вӑл. Тренировкӑсенче Александр 6 метр та 60 сантиметра парӑнтарнӑ. Ахӑртнех, спортсмен кӑштах пӑлханнӑ.

Александр Сорокин ӑмӑртӑвӗн пӗрремӗш кунхине ҫӳллӗшне сиксе иккӗмӗш вырӑн йышӑннӑ. Ҫапла пирӗн ентеш Италире ҫӗртме уйӑхӗн 6-17-мӗшӗсенче иртекен Европа чемпионатне хутшӑнӗ.

Утӑ уйӑхӗн 9-мӗшӗнче Тӑвай ялӗнче мини футбол енӗпе республикӑри II уҫӑ турнир иртӗ. Ӑна Андрей Албутова асӑнса ирттереҫҫӗ.

Ӑмӑрту Тӑвай районӗнчи Тӑвайра вӑй-хал культурипе сывлӑха ҫирӗплетмелли спорт комплексӗнче иртӗ. Вӑл 10 сехетре пуҫланӗ.

Турнира кӑмӑл пуррисем хутшӑнма пултараҫҫӗ. Ҫӗнтерӳҫӗсемпе призерсене укҫан хавхалантарӗҫ, парнесем, медаль, хисеп грамоти парӗҫ.

Кунашкал ӑмӑрту пӗлтӗр те иртнӗ. Ун чухне 17 команда хутшӑннӑ. 1-мӗш вырӑна Канаш районӗ йышӑннӑ. 2-мӗш вырӑна Тӑвай районӗ тухнӑ, 3-мӗшне — Шупашкар хули.

Турнира хутшӑнас текенсен утӑ уйӑхӗн 8-мӗшӗччен заявка памалла. Ӑна ҫак адреспа йышӑнаҫҫӗ: vladislav.pavlov7891@yandex.ru.

Владикавказра йывӑр атлетика енӗпе Раҫҫей чемпионачӗ вӗҫленнӗ. Пӗтӗмлетӳпе килӗшӳллӗн, Чӑваш Ен спортсменки Наталья Хлесткина Олимп вӑййисене хутшӑнакан Раҫҫейӗн пӗрлештернӗ командине кӗнӗ. Ҫапла вӑл ҫулла Рио-де-Жанейрӑра иртекен Олимп вӑййисенче ҫӗршыв чысне хӳтӗлӗ.

Раҫҫейӗн йывӑр атлетика енӗпе пӗрлештернӗ командин тренерӗ Александр Видов каланӑ тӑрӑх, Натальйӑсӑр пуҫне командӑра тӗнчен тӑватӑ хут чемпионки Татьяна Каширина, тӗнче чемпионки Тима Туриева, тӗнче чемпионачӗн призерӗ Анастасия Романова пулӗҫ.

Владикавказра иртнӗ Раҫҫей чемпионатӗнче Наталья Хлесткина икӗ енлӗ кӗрешӳре пӑхӑр медаль ҫӗнсе илнӗ. Ака уйӑхӗн варринче вара пирӗн ентеш Европа чемпионкин ятне тивӗҫнӗ.

Владикавказра арҫынсемпе хӗрарӑмсен хушшинче йывӑр атлетика енӗпе Раҫҫей чемпионачӗ иртет. Ку – Рио-де-Жанейрӑра иртекен Олимп вӑййисене хутшӑнма тивӗҫлӗ кандидатсен суйлавӗ.

Етӗрне районӗнче ҫуралса ӳснӗ Ирина Баймулкина 58 килограмм тайман виҫе категорийӗнче чемпион титулне ҫӗнсе илнӗ. Вӑйлӑ конкурентсемпе вӑй виҫсе вӑл икӗ кӗмӗл, пӗр пӑхӑр медальсене тата Раҫҫей вице-чемпионкин ятне тивӗҫнӗ.

Геннадий Иванов патӗнче ӑсталӑхне туптаканскер 87 килограмм таякан штангӑна йӑтнӑ. Ӑна тӗртсе 107 килограмм ҫӗклеме пултарнӑ. Икӗ енлӗ кӗрешӳре ку 194 килогрампа танлашнӑ. Ҫапла Ирина кӗмел медаль ҫӗнсе илнӗ.

Пӗтӗмӗшле зачетра пирӗн ентеш ҫӗнтерӳҫе, Мӑкшӑ Республикинчи Наталья Гришинӑна, виҫӗ килограмм ҫеҫ выляса янӑ.

Ҫу уйӑхӗн 20-мӗшӗнче И.Я.Яковлев ячӗллӗ ЧППУра «Хальхи кире пуканӗн спорчӗн теорийӗнчи тата методикинчи ҫивӗч ыйтусем» темӑпа Пӗтӗм Раҫҫейри ӑслӑлӑхпа практика конференцийӗ иртнӗ. Ӑна РФ Спорт министерстви, ЧР Вӗренӳ министерстви, Кире пуканӗн спорчӗн Пӗтӗм Раҫҫейри федерацийӗ тата ЧППУ йӗркеленӗ.

ЧР Спорт министерствин советникӗ Ольга Букина кире пуканӗн спорчӗ Чӑваш Енре анлӑ сарӑлнине палӑртнӑ. Педагогика ӑслӑлӑхӗсен докторӗ Герольд Драндров профессор конференцие кире пуканӗн спорчӗ мӗнле лару-тӑрура пулнине тишкермешкӗн йӗркеленине каланӑ.

Конференцие вӑй-хал культурин тытӑмӗнче ӗҫлекен 115 специалист хутшӑннӑ. Вӗсем тӗрлӗ темӑпа тухса калаҫнӑ.

Ҫу уйӑхӗн 19-мӗшӗнче «Туриада – 2016» Атӑлҫи федераци округӗн спортпа туризм уйлӑхӗнче пӗрремӗш тупӑшу кунӗ иртнӗ. Ачасем спорт туризмӗнче тата тавракурӑма анлӑлатмалли конкурссенче ӑмӑртнӑ.

Ку мероприятие 2013 ҫултанпа РФ Президенчӗн Атӑлҫи федераци округӗнчи тулли праваллӑ элчи Михаил Бабич пуҫарнипе йӗркелеҫҫӗ. Катамарансемпе Балаково хулинче ишнӗ. Ӑна ту хушшинчи юханшыв евӗр тунӑ. Ку тупӑшура Пермь крайӗ, Удмурт тата Мари республикисем малти вырӑнсене йышӑннӑ. Арҫын ачасен йышӗнче вара Пушкӑрт, Тутар республикисем мала тухнӑ.

Ҫав кунах Атӑлҫи федераци округӗнчи туризм маршручӗсен хӑтласси енӗпе конкурс иртнӗ. Кунта вара Чӑваш Ен маттурӗсем 3-мӗш вырӑн йышӑннӑ. 1-мӗшпе 2-мӗш вырӑнсене Удмурт тата Мӑкшӑ республикисем тивӗҫнӗ.

Елена Исинбаева

Ҫӗртме уйӑхӗн 20–23-мӗшӗсенче Чӑваш Енӗн тӗп хулинче ҫӑмӑл атлетика енӗпе Раҫҫей чемпионачӗ иртет. Унта паллӑ спортсменка хутшӑнать.

Чемпионата Раҫҫейри паллӑ спортсменка, Олимп вӑййисен икӗ хут чемпионки Елена Исинбаева килӗ. Вӑл шӑчӑпа сикессипе тӗрлӗ ӑмӑртура мала тухнӑ. Анчах ҫулталӑк каялла Елена суранланнӑ.

Сиплев хыҫҫӑн Шупашкарта иртекен чемпионат Елена Исинбаевӑшӑн пӗрремӗш пулӗ. Вӑл унччен Волгоград кӗпӗрнаттӑрӗн парнисене ҫӗнсе илессишӗн ирттернӗ ӑмӑртура суранланнӑ.

Ҫур ҫул каялла Елена Исинбаева спорта таврӑнасси пирки каланӑ. Вӑл Рио-де-Жанейрӑра иртекен Олимп вӑййисене хутшӑнма тӗллев лартнӑ. Кун хыҫҫӑн вӑл карьерӑна вӗҫлесшӗн.

Чӑваш Ен спортсменки Полина Федорова ӑмӑртура маттурлӑхӗпе палӑрнӑ. Пирӗн ентеш унта тӳрех пилӗк медаль ҫӗнсе илнӗ.

Полина ЧР тава тивӗҫлӗ тренерӗ Ирина Николаева патӗнче ӑсталӑхне туптать. Полина Федорова Пензӑра студентсен хушшинче спорт гимнастики енӗпе иртнӗ ӑмӑртӑва хутшӑннӑ.

Пӗтӗм тӗнчери Универсиада чемпионки ирӗклӗ хӑнӑхтарусенче ҫӗнтернӗ, нумай енлӗ кӗрешӳре, сикнинче тата пӗрене ҫинче хӑнӑхтарусем тӑвассинче иккӗмӗш вырӑн йышӑннӑ.

Сӑмах май, Полина Федорова Олимп резервсен ачасемпе ҫамрӑксен 6-мӗш спорт шкулӗнче ӑсталӑхне туптать, И.Н.Ульянов ячӗллӗ ЧПУн экономика факультетӗнче вӗренет.